世界柔軟ê台灣影像創作

主講/張辰漁   

記錄/吳宛霖


本文是2020/11/4 ê講座摘要記錄,主講者張辰漁是「世界柔軟數位影像文化」ê負責人。



「世界柔軟」,tse kám是leh賣衛生紙ê廣告詞?細漢ê時tiānn-tiānn聽序大人leh講:「Tse mi̍h件世界bái;tse mi̍h件世界俗……。世界柔軟可能是一種上柔軟,徛遠遠kuân-kuân客觀看代誌ê方式,所以阮kā公司號名叫做「世界柔軟數位影像文化」。三冬前公司開始運作,目前有leh做電視劇、網路劇、『動畫』、特效……,今年開始uân-ná有leh做bàng-gà。我並無kā家己定位做一个拍片、做節目iah是做bàng-gà ê人,對我來講,影像只是一種工具,利用影像來推展家己做社會溝通ê價值,用商業ê包裝方式做創作。比如講公視4K電視奇幻劇集《妖怪人間》,是因為看《妖怪台灣》tsit本冊了後koh有看韓國片《與神同行》,想beh結合lán台灣本土ê故事kap社會、環境、族群等等議題,tsiah來製作--ê。


另外,公視台語台《光榮島轉來》節目,原本ê構想是想beh用「鋼管車」做舞台來縮短逐家ê距離,lán台灣人lóng mā歹勢講我愛對方,m̄-koh tsiok愛分享家己kah意ê mi̍h件。尾仔因為節目製作設定ê關係,suah來變做選秀節目。可能是政策kap時代leh演變,逐家開始重視母語,tsit-má囡仔ê台語lóng講了比我khah好。《光榮島轉來》節目是台灣頭一个台語囡仔選秀節目,uì南到北邀請全台各地ê小學生組隊參賽,結合台語展現家己ê才藝kap創意,表演內容豐富多元,有傳統ê喙念、戲曲、布袋戲,mā有活潑ê跳唱、合唱,tse就是lán台灣本土正港ê人文特色。 


明年4月份beh出社會寫實ê網路劇《水下事務所》,主角是一个真gâu tshiâu代誌ê土地代書,kā伊交關ê客戶是財團,用kōo地方ê觀點來看台灣,看地方頭人按怎來交結。我sì-kè做田野調查來到台南,看著pha荒ê游泳池,he是地方選舉ê時支票sa leh烏白開所起造--ê,因為無去想著後壁ê管理費用,所以選舉煞就pha荒--去。尾仔游泳池suah變做籃球場,beh sńg球tio̍h行落去無水ê水池內,看球ê人徛tī頂面看,hōo人想著布袋戲tiānn-tiānn leh講ê一句話「徛kuân山,看馬sio踢」。Tsit个情境mā是現此時lán台灣錯亂ê土地使用ê縮影,所以戲劇號名做《水下事務所》,主角tī《水下事務所》逐工tshiâu代誌。Tsit齣戲m̄-nā是網路劇niā-niā,另外有bàng-gà kap桌遊做伙推出。Bàng-gà是網路劇ê前傳,有交代主角哪ē tsiah gâu tshiâu代誌;桌遊算是暗烏版ê大富翁,sńg ê人thìng好選任何一个家己kah意ê行業,來比siáng khah有錢、khah好額。歡迎各位siàu想beh發財ê人,做伙來體驗水下事務所系列全方位包山包海ê款式。


無論是戲劇、節目iah是bàng-gà,阮公司tsit-má beh做ê mi̍h件,m̄是因為輕可好做,是因為心內想beh做tsiah去做。為著beh有效tshui-sak,今年公司有leh籌備《社會事IP》社群,包括網路文章kap Podcast,內容有三个部分。頭一个是用柔軟、趣味ê bàng-gà模式來講台灣歷史故事;koh來就是beh籌備一个講俗民文化、講食si̍t文化ê新節目。節目無beh講台灣mi̍h件偌好食拄偌好食,想beh講--ê是按怎tsit項mi̍h件,台灣人ài án-ne食?是按怎樣ê食材?是按怎來透lām鹹hiam、處理khuì口味數?是啥mih人來影響lán ê食si̍t?Tsit个概念ē-sái講是飯桌頂ê台灣史,透過食si̍t文化來了解台灣;上尾就是因為我對台灣史有趣味,koh有leh sak台灣史系列ê bàng-gà,想beh kā社會犯罪史拍做影集,hōo人ē-tàng了解烏暗ê社會變遷,國民政府威權時期因為清鄉政策所致,來爆發「四六事件」、「獨台會案」、「中壢事件」等,用kōo bàng-gà tshuā領讀者行入一件一件ê歷史事件現場,hōo in理解台灣社會ê大變遷,仝時mā ē-tàng思考人kap社會、人kap國家之間ê關係,重新整理家己ê性命經驗。








線頂看影片
台語sa攏有 - YouTube 頻道





#台語sa攏有 專欄,本文使用教育部推薦漢字kap臺灣閩南語羅馬字拼音方案。
台文通訊BONG報321期,2020年12月出刊。


歡迎捐款贊助 #李江却台語文教基金會 (捐款thang抵稅,匯款了後請通知02-23112199)
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox


郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會

李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。