作者：林榮淑
2022年5月初1到15，巴西Caxias do Sul舉行第24屆、2022夏季Deaflympics（聽障奧林匹克運動會，簡稱「聽奧」）。
台中市19歲田徑女將許樂代表台灣參加比賽，ài面對疫情ê考驗kap適應無仝場地、環境、時差，koh有濟濟國際ê菁英選手（走標是西洋人gâu ê項目）。頭擺參加聽奧，tī女子100公尺拍破U20世界記錄，得著銅牌，koh tī女子100公尺跨欄，以13秒91成績拍破大會記錄，是台灣隊tī本屆得--著ê頭一塊也是唯一ê金牌。自2001年羅馬聽奧男子十項選手安慶隆了後，台灣koh再一擺tī聽奧田徑有金牌入lak袋仔。
進前，伊參加全國身心障礙運動會，100公尺走出12秒46，拍破大會kap全國記錄，100公尺跨欄、800公尺等項目，koh分別以14秒08、2分42秒08 ê成績，得著三項大會記錄、一項全國記錄，個人tio̍h八塊金牌，打造大會新路程。
2020年12月初5，《自由時報》頭版正中ng，圖文呵咾一个台灣查某囡仔，紅色標題『全國田徑賽百米跨欄奪金』，khah大ê白色字體『聽障女許樂寫驚奇』。
一歲外，醫生診斷出伊耳空重tsiok嚴重，ài倚靠助聽器tsiah ē-tàng正常生活。落塗身軀有缺點，心內自卑感厚，無法度行入去仝輩箍仔內。頭殼頂hit蕊烏雲，kánn-ná suh血ê蜈蜞，暝日tuè-tiâu-tiâu pué bē開。心悶ê烏空，鬱卒ê日子親像永遠看bē著盡磅。
頭起先，爸母hōo查某囝參加道埕鬥賽隊（tàu-suè-tuī），kan-na想beh用運動kap團體生活來增加伊ê自信心。想bē到，意外發現伊有運動ê本等。
拄開始，許樂想beh做一个短距離ê走標選手。尾手，發現掛助聽器，等聽著起走銃聲ê時，lóng比其他選手khah慢。一般來講，選手起走反應時間大約是0.13、0.14秒；m̄-koh，許樂平均落tī 0.2秒。Tī競爭夭壽厲害ê走標大比賽，輸贏精差lóng ài用機密儀器協助，測量tsiah bē有tîng-tânn。就án-ne，改換做跨欄運動，透過每一个欄架縮少kap對手ê精差。
生成聽力有欠點，成長過程khám-khám-khia̍t-khia̍t，hōo伊鍛鍊出堅強ê心肝。比別人lim khah濟苦湯，需要用比別人khah濟ê時間練習跨欄技術，kā食苦當做leh食補，沓沓仔交出醒目ê成績單。2018年，台中市中學運動會提著金牌。2019年全中運，m̄-nā得著金牌，koh拍破國女組100公尺跨欄家己上好ê 13秒成績。2019年春季盃、港都盃mā lóng提冠軍，得著總統教育獎肯定。
2020年ê全國田徑錦標賽100公尺跨欄決賽，hit-tsūn 17歲ê許樂tsìnn風走出人生上好ê 13秒19成績，拍倒濟濟名名將，得著人生第一塊田徑比賽金牌，而且跳入去國內前三名，kan-na輸紀政保持ê全國記錄12秒93 kap林詩亭ê 13秒04。粒積到tsit-má，lóng總七擺超越聽障世界記錄，tsiânn做受期待ê一粒新星。
許樂看著發明大王Thomas Edison（『愛迪生』）八歲hōo學校退學，起走點輸--去ê人，煞尾發明電火為全人類帶來光明。伊曉悟天才是一分ê天份，加上九十九分ê拍拚。無放棄家己有缺陷ê肉體，比別人koh-khah認真骨力。
運動hōo伊自信、樂暢。個性勻勻仔轉變，身軀邊ê朋友愈來愈濟，對伊愈來愈友善，逐家鬥陣愈來愈自在。任何成功絕對m̄是凊凊彩彩就ē-tàng得--著，接受家己ê無完全，願意長時間骨力做功課，學業仝款tsiânn好。親tsiânn朋友歡喜伊揣著人生ê方向。
Lám-lám馬mā有一步踢。輸tī起走點，拍拚贏tī終點，許樂是上好ê見本。
台灣人寫真 專欄，本文使用教育部推薦漢字kap台羅。
#台文通訊BONG報 344期，2022年11月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
