向逆境乾杯
/ 蔡秀英
中晝過ê天色畫滿烏áu，雨激到黃昏tsiah甘願沓沓仔飛--落-來。檳榔擔外口汽車lá-pah聲雄雄pa bē停，我hōo he一聲急過一聲ê lá-pah聲催一下suah bē記得攑雨傘，就兇兇狂狂走到車邊，ànn腰輕聲仔問：「請問beh愛啥？」
司機：「Tsiūnn高速公路按怎行？」
我：「順頭前tsit條去。」
司機：「Koh有偌遠？」
我：「大約10公里。」
問煞，車窗仔隨關--leh，我根本bē赴反應，ia̋n-jín huah一聲隨無khuàinn車影。徛tī車邊ê我，一下閃bē離，hōo輪仔kauh過水窟仔tsuānn--起-來ê烏塗lah-sap水，噴kah規身軀lóng漉糊糜仔。
我氣phut-phut tiô跤大聲lé。
天公伯--à kánn-ná有看著我ê委屈，生狂雨隨phiann--落-來，親像刁工beh洗清我bē爽ê情緒。
我提面巾iân-á拭tshiâng洗--過ê身軀，喙--裡iân-á se̍h-se̍h唸：「天公伯--à！你是目睭去hōo lâ仔肉糊--著？A̍h是耳空包皮？按怎lóng無看顧一下仔我tsit个hông問路ê衰尾道人。」
人leh衰，種pû仔生菜瓜，正港是無米koh兼閏月。
幾若工後。
外口一tsūn lá-pah聲，有人leh huah：「檳榔50！」
我uì冰箱提一包檳榔，三步拚兩步來到車邊，坐tī副駕駛座ê人，手真緊就掠著我ê手tsat，車mā khuann-khuann仔駛進前，我只ē-tàng tuè車向前走。
Hōo拖差不多30米，車內兩个人笑kah kā-kā叫，手雄雄放--開，我ê身軀隨tshū--倒，面tshè破幾若空。
面ê tshè傷真緊就堅phí，兩三工就liù-phí仔，只是tsit款疼suah埋tī我ê心肝窟仔，對tsit件代誌mā一直真掛意。
有一日，雄雄一陣穿警察制服kap穿便服ê官員，來檳榔擔檢查我kám有做非法ê營業。
其中一个官員kā我tshiàng白：「阮是縣政府派--來ê稽查員。」
In除了例行抄一寡我個人ê資料，koh一直kā我講ài列管ê mi̍h件，suà--落koh叫我薰提出來hōo in檢查，講是beh檢查我ê薰kám有lām水貨。
官員問：「你kám有賣私薰？」
我講：「無。」
官員問：「你賣--出-去ê薰，kám有開發票？」
我講：「大人--啊，借問--一-下，台灣ê檳榔擔佗一間有leh開發票？」
官員講：「既然你無開發票，án-ne我beh kā薰紮tńg去檢驗，檢查看māi，你kám是有leh賣水貨。」
我講：「好--ah！M̄-koh大人，請你ài開一張紮走ê數量證明hōo--我。」
官員講：「阮紮--tńg-去了後，ē kā全部ê薰lóng拆開，一枝一枝檢驗。」
我講：「無要緊，大人你beh按怎拆、按怎驗，我lóng無意見，只是薰還--我ê時tsūn，請你復原包裝。」
官員講：「我a̍h無封口機，按怎復原？」
我講：「大人，he m̄是我ê問題，bē-tàng因為大人ê質疑，就hōo我了一條bē少ê損失！一--來，我無食薰，koh再講我mā無賣散薰，你beh一包一包拆開一枝一枝檢驗，當然ài負責封hōo好勢還--我。話koh講倒tńg--來，一包薰趁lín兩三箍，你當做我tsiok愛賣--ooh？He是服務買檳榔ê人客，我姑不將兼賣薰，天氣若好，khah無要緊，若拄著落雨天，koh ài攑雨傘，有時仔koh ē hōo雨水thái-ko塗tsuānn kah規身軀，koh tâm koh lah-sap……」
官員講：「Ueh，你tsit箍刁民，mā khah差不多--leh，我tsiah講幾句仔話，哪ē hiah-nī厚話屎。」
我講：「大人--啊，我哪ē是刁民，我koh佗位像刁民？你講beh紮走我金siak-siak ê銀票買--tńg-來ê薰去查驗，我無講過反對ê話--őo，我只是提出合理ê要求，請你開字據hōo--我，kám講án-ne m̄-tio̍h？你講你beh kā薰拆開來驗，我mā講無意見，只是要求復原，án-ne kám有m̄-tio̍h？」
官員講：「好，mài講薰，我beh吊走kha̋ng-páng，kap拆掉lín兜ê nî-tsînn。」
我講：「Ē用--得，橫直檳榔擔mā無啥生理，我年歲koh有，揣頭路，工廠ê人講40歲以上--ê m̄ tshiànn。Án-ne好--lah，我規氣紮hip相機tuè lín ê後壁，沿路hip相存證，看lín kám有一家一戶吊kha̋ng-páng、拆nî-tsînn。」
官員講：「Iáu leh辯，像你án-ne應喙應舌，m̄是刁民是啥mi̍h？」
伊寫一堆單據，講：「刁民來簽名。」
我講：「M̄簽，我a̍h m̄知你寫啥mi̍h，萬不二我亂簽，你kā薰紮走，一枝一枝拆開，m̄復原，講是我同意--ê，a̍h是寫我同意薰m̄免還，án-ne我m̄就tsiok衰。」
官員講：「Kám有án-ne寫，你家己bē-hiáu看？」
我講：「大人，tsiânn歹勢，我m̄ bat字，看無。」
官員講：「你到底想beh按怎？」
我講：「雖然我m̄ bat字，但是阮查某囝bat，你kā資料留--落-來，等阮查某囝下班tńg--來了後，我叫伊唸hōo我聽，我感覺ē用--得，我tsiah簽字。」
官員講：「叫你簽名就簽名，哪ē hiah-nī濟話屎，你過來看--一-下，趕緊簽名。」
我講：「我無讀啥mih冊，看無--lah！M̄簽。」
官員講：「你免tī hia假仙，m̄ bat字，koh ē-hiáu sńg tsiah-nī濟台電腦，tsit幾台是lóng sa̋m-phú-luh--ooh！」
我講：「人若有頭毛，siáng甘願做禿頭--ê，就是m̄ bat字，m̄-tsiah來賣檳榔。」
後--來，另外一位官員行倚--來，提tú-tsiah官員寫好ê紙，一字一字唸hōo我聽，koh頓胸坎掛保證，伊絕對無亂唸，我tsiah同意頓手印。
Hia-ê警察、官員走了後，我ê kha̋ng-páng iáu tī--leh，無hông吊走，nî-tsînn mā無拆，連薰mā無代誌。
Tsit幾冬我tshiâng-tsāi想起tsit件代誌，hit當時我哪ē hiah好大膽，敢kap警察at手pà？
答案kài清楚。假使當初我無行入公民大學，絕對bē有hiah大ê膽敢kap警察理論，mā bē知影，要求警察開收據hōo--我，是我ê權力，koh-khah免講敢kā in tshiàng聲，講beh紮hip相機tuè in hip相，看in kám是有取締違法ê代誌。
橫直hit年我入去海線公民大學，除了學ē-hiáu kā空喙放hōo bē記--得，tann頭跤步大大步向前行，mā學著面對代誌ê是非，ài爭到底，m̄是警察講--ê就lóng總是tio̍h--ê。
Ànn頭硬拚、認真學習ê hit段日子，除了無時間去為退色ê夢悲傷，kā全部時間lóng用tī ke讀、ke看、ke聽，看代誌ê角度mā有淡薄仔無仝款。
但是真正ē-hiáu徛tī對方ê立場去看代誌，是有一擺我leh教查某囝：「代誌lóng有兩面，看家己用啥款ê心境、角度去面對。Koh有ài時時刻刻提醒家己，m̄-thang bē記得徛tī對方ê立場去看代誌。Tng你面ǹg日頭光ê時tsūn，烏影就tī你ê後壁；你後壁ǹg日頭光ê時tsūn，án-ne烏影就tī你ê面頭前，lóng在你家己用啥款心境去解sueh。你是beh後壁ǹg日頭光a̍h是後壁ǹg烏影，lóng在你一念之間。看代誌真正需要培養，按怎tī一體兩面學ē-hiáu選擇，知影趁時機轉念，bē-tàng改日頭光ê方向，tio̍h-ài學ē-hiáu tńg身，án-ne tsiah看ē著真濟家己疏忽--去a̍h是làu-kau--去ê mi̍h件。」
查某囝頭歪歪，激siáu丑仔面kā我tiang：「媽媽lóng kan-ta用喙講，kám bat真正做到tńg身、轉念？」
Hōo查某囝tng頭án-ne問，suah真正hōo我喙that舌，應無路來。
查某囝koh kā我講：「媽媽對代誌ê看法，kám真正ē選擇面對日頭光a̍h是面對烏影？你若有時間就家己想看māi--leh。」
Hit工查某囝tńg--去了後，我家己留tī檳榔攤，想一寡過去發生ê tsiânn濟代誌。
想--leh想--leh，我家己伸手摸心肝：「假使我是一个tsiú寡tsiânn濟年ê查某人，tī歷盡辛酸、食盡萬苦了後，tsiah kā後生tshiânn養大漢，栽培伊受真好ê教育，伊suah beh娶一个年歲ke伊七歲，m̄-nā無學歷、離婚--過，koh kah一个tuè轎後--ê，竟然koh bē生，無法度傳宗接代，甚至tiānn-tiānn leh破病ê查某人做某，我kám ē答應？Kám ē願意？Kám ē甘願？」
想到tsia，我ê kha-tsiah就拚凊汗，khah早我kan-ta看著家己ê委屈，是按怎就lóng無想過別人mā ē怨、mā ē恨？
雄雄我ê委屈kap怨恨，suah lóng總飛了了、散了了。
真正ē-tàng理解，是按怎過去我無論做kah偌好，lóng無法度得著ta-ke ê疼惜，原來我一直lóng是伊tsit世人ê見笑代，是伊áu鬱ê源頭。
我想起伊tsit世人上得意、mā是伊上驕傲ê代誌，就是少年就tsiú寡，靠家己克服萬難，孤人tshiânn養栽培三个囡仔長大成人。
後生suah娶一个tī伊目睭內是hiah-nī仔bē看口ê查某人，伊kám bē鬱卒？Tsia-ê打擊對伊來講，應該bē khah輸我離婚ê打擊！
畢竟tī伊ê心肝內，操心peh腹栽培--出-來ê優秀後生，竟然去kah意著世俗ê目睭內上無值得注目ê查某人，tse對伊mā是一款tsiok深沉ê傷害。
翻頭想過去婚姻內所發生--過ê點點滴滴，我喙內雖然講無怨恨，ē用愛去化解，但是我ê心肝窟仔，絕對無kā tsia-ê代誌放bē記--得，傷痕原在、怨恨原在，只是化做無形，tī我ê kha-tshng後tuè-tiâu-tiâu。
一直到現此時，我tsiah真正leh反思，看清過去ê種種，受傷--ê mā m̄-nā我一个人，總算ē-tàng理解，總算ē-tàng放下，總算真正bē koh再怨恨。
我bē koh再怨天tsheh命，因為我想起頂站仔朋友bat寄E-mail傳hōo我一个故事，大概意思是講「人生不如意，十有八九，哪ē無beh ke想he一二？」做人應該ke想寡歡喜ê代誌。
我用Word畫一張表格，開始一筆一筆，寫離婚了後ê好kap bái。Tsiah發現離婚了後，我ê幸運m̄-nā「一二」！雖然我失去婚姻，suah因為án-ne tsiah thang拄著tsiok濟tsiok濟好機緣。
我leh想，假使我無離婚，按怎有機會去讀冊，mā無機會去拄著hiah-nī好ê老師，tsiok有耐心指導我寫作，in bē因為我tsiah國校仔畢業程度低，寫bē出好作品就放棄--我，in猶原鼓勵--我，hōo我bē因為能力不足來放棄文學。
假使我無離婚，án-ne到tsit-má，我大概iáu規工ku tī灶跤，洗菜、切肉、包便當leh過鬱卒ê日子，koh ē kap膏膏纏ê怨恨做伴，過áu鬱ê生活！
假使我無離婚，án-ne就一定無機會坐tī靜宜大學ê教室旁聽，koh-khah無機會sì-kè去聽演講、聽音樂演奏會、參加文學營，甚至koh ē-tàng peh-tsiūnn台灣厝尾頂——玉山去看日出。Tsia--ê是tī離婚進前，連做夢to m̄敢有ê siàu想。
假使我無離婚，我哪ē有機會行入海線社區公民大學，熟sāi文學。假使我無離婚，哪ē有機會熟sāi hiah-nī濟義工朋友、學員，koh得著in無嫌我hân-bān、一擺閣一擺ê教導，kā我ê電腦基礎拍底？
假使我無離婚，按怎ē重建人生？按怎有今仔日ê成長--leh？
算bē清ê「假使我無離婚」，因為離婚大大開闊我ê生活箍仔，mā因為離婚，我tsiah有才調徛tī人生koh-khah kuân ê所在，hùn開生命ê視野。
Án-ne詳細tia̍k算--一-下，tsiah發現原來我竟然是一个tsiah-nī幸運ê人，初初學電腦無法度克服ê問題，一幕一幕tī腦海內飛--過——查某囝自頭到尾lóng一直陪伴--我，伊koh激頭殼想盡各種辦法，就是beh hōo我tī學習中減少挫折，koh親手畫圖說明加註解，做一本koh一本hōo我學習電腦ê『葵花寶典』，hōo我學--起-來ē-tàng ha̍h跤ha̍h手。
照án-ne算--來，我m̄-nā有「一
二」thang想，應該koh ē-tàng想kah「六七八九十」！所致，我無應該怨恨離婚，應該感謝離婚hōo我成長tsiah tio̍h！
Tsit个時tsūn總算知影天公伯--à是tsiok公平--ê，伊用一張離婚協議書，化解真濟命中注定無解ê宿題。
我hit張離婚協議書，hōo ta-ke bē koh有「不孝有三，無後為大」ê遺憾。Tī伊ê思想國度--裡，m̄免koh再鬱卒有我tsit个看bē tsiūnn目ê新婦。伊又koh ē-sái tī親tsiânn朋友ê面頭前，大聲講「烈女不侍二夫」ê話--ah。
感情無siáng tio̍h siáng m̄-tio̍h，也無siáng反背siáng，只有緣份行到盡尾，自然就ē分開。
一張離婚協議書，hōo前翁揣著伊另外ê愛情，hōo伊完成傳宗接代ê心願，hōo伊ē-tàng對老母盡孝，m̄-nā對ē起老母真心ê寄望，對伊ê列祖列宗mā有交代。
一張離婚協議書，切斷我tsit段驚驚勼勼ê悲苦婚姻。
天公伯--à另外安排我蓮花化身，m̄-nā有機會熟sāi tsiok濟良師益友，進一步學著in ê工夫。除了看愈遠、bat愈濟，koh學著tsiok濟以早m̄ bat接觸--過ê世界，一步一步向我ê夢田出發。
其實自從做路寒袖老師ê學生了後，我就偷偷仔hē一个願，ǹg望家己有一日ē-tàng tsiânn做一个作家，所以tsit幾年lóng真拚勢leh學習文學創作，學習向逆境乾杯！
司機：「Tsiūnn高速公路按怎行？」
我：「順頭前tsit條去。」
司機：「Koh有偌遠？」
我：「大約10公里。」
問煞，車窗仔隨關--leh，我根本bē赴反應，ia̋n-jín huah一聲隨無khuàinn車影。徛tī車邊ê我，一下閃bē離，hōo輪仔kauh過水窟仔tsuānn--起-來ê烏塗lah-sap水，噴kah規身軀lóng漉糊糜仔。
我氣phut-phut tiô跤大聲lé。
天公伯--à kánn-ná有看著我ê委屈，生狂雨隨phiann--落-來，親像刁工beh洗清我bē爽ê情緒。
我提面巾iân-á拭tshiâng洗--過ê身軀，喙--裡iân-á se̍h-se̍h唸：「天公伯--à！你是目睭去hōo lâ仔肉糊--著？A̍h是耳空包皮？按怎lóng無看顧一下仔我tsit个hông問路ê衰尾道人。」
人leh衰，種pû仔生菜瓜，正港是無米koh兼閏月。
幾若工後。
外口一tsūn lá-pah聲，有人leh huah：「檳榔50！」
我uì冰箱提一包檳榔，三步拚兩步來到車邊，坐tī副駕駛座ê人，手真緊就掠著我ê手tsat，車mā khuann-khuann仔駛進前，我只ē-tàng tuè車向前走。
Hōo拖差不多30米，車內兩个人笑kah kā-kā叫，手雄雄放--開，我ê身軀隨tshū--倒，面tshè破幾若空。
面ê tshè傷真緊就堅phí，兩三工就liù-phí仔，只是tsit款疼suah埋tī我ê心肝窟仔，對tsit件代誌mā一直真掛意。
有一日，雄雄一陣穿警察制服kap穿便服ê官員，來檳榔擔檢查我kám有做非法ê營業。
其中一个官員kā我tshiàng白：「阮是縣政府派--來ê稽查員。」
In除了例行抄一寡我個人ê資料，koh一直kā我講ài列管ê mi̍h件，suà--落koh叫我薰提出來hōo in檢查，講是beh檢查我ê薰kám有lām水貨。
官員問：「你kám有賣私薰？」
我講：「無。」
官員問：「你賣--出-去ê薰，kám有開發票？」
我講：「大人--啊，借問--一-下，台灣ê檳榔擔佗一間有leh開發票？」
官員講：「既然你無開發票，án-ne我beh kā薰紮tńg去檢驗，檢查看māi，你kám是有leh賣水貨。」
我講：「好--ah！M̄-koh大人，請你ài開一張紮走ê數量證明hōo--我。」
官員講：「阮紮--tńg-去了後，ē kā全部ê薰lóng拆開，一枝一枝檢驗。」
我講：「無要緊，大人你beh按怎拆、按怎驗，我lóng無意見，只是薰還--我ê時tsūn，請你復原包裝。」
官員講：「我a̍h無封口機，按怎復原？」
我講：「大人，he m̄是我ê問題，bē-tàng因為大人ê質疑，就hōo我了一條bē少ê損失！一--來，我無食薰，koh再講我mā無賣散薰，你beh一包一包拆開一枝一枝檢驗，當然ài負責封hōo好勢還--我。話koh講倒tńg--來，一包薰趁lín兩三箍，你當做我tsiok愛賣--ooh？He是服務買檳榔ê人客，我姑不將兼賣薰，天氣若好，khah無要緊，若拄著落雨天，koh ài攑雨傘，有時仔koh ē hōo雨水thái-ko塗tsuānn kah規身軀，koh tâm koh lah-sap……」
官員講：「Ueh，你tsit箍刁民，mā khah差不多--leh，我tsiah講幾句仔話，哪ē hiah-nī厚話屎。」
我講：「大人--啊，我哪ē是刁民，我koh佗位像刁民？你講beh紮走我金siak-siak ê銀票買--tńg-來ê薰去查驗，我無講過反對ê話--őo，我只是提出合理ê要求，請你開字據hōo--我，kám講án-ne m̄-tio̍h？你講你beh kā薰拆開來驗，我mā講無意見，只是要求復原，án-ne kám有m̄-tio̍h？」
官員講：「好，mài講薰，我beh吊走kha̋ng-páng，kap拆掉lín兜ê nî-tsînn。」
我講：「Ē用--得，橫直檳榔擔mā無啥生理，我年歲koh有，揣頭路，工廠ê人講40歲以上--ê m̄ tshiànn。Án-ne好--lah，我規氣紮hip相機tuè lín ê後壁，沿路hip相存證，看lín kám有一家一戶吊kha̋ng-páng、拆nî-tsînn。」
官員講：「Iáu leh辯，像你án-ne應喙應舌，m̄是刁民是啥mi̍h？」
伊寫一堆單據，講：「刁民來簽名。」
我講：「M̄簽，我a̍h m̄知你寫啥mi̍h，萬不二我亂簽，你kā薰紮走，一枝一枝拆開，m̄復原，講是我同意--ê，a̍h是寫我同意薰m̄免還，án-ne我m̄就tsiok衰。」
官員講：「Kám有án-ne寫，你家己bē-hiáu看？」
我講：「大人，tsiânn歹勢，我m̄ bat字，看無。」
官員講：「你到底想beh按怎？」
我講：「雖然我m̄ bat字，但是阮查某囝bat，你kā資料留--落-來，等阮查某囝下班tńg--來了後，我叫伊唸hōo我聽，我感覺ē用--得，我tsiah簽字。」
官員講：「叫你簽名就簽名，哪ē hiah-nī濟話屎，你過來看--一-下，趕緊簽名。」
我講：「我無讀啥mih冊，看無--lah！M̄簽。」
官員講：「你免tī hia假仙，m̄ bat字，koh ē-hiáu sńg tsiah-nī濟台電腦，tsit幾台是lóng sa̋m-phú-luh--ooh！」
我講：「人若有頭毛，siáng甘願做禿頭--ê，就是m̄ bat字，m̄-tsiah來賣檳榔。」
後--來，另外一位官員行倚--來，提tú-tsiah官員寫好ê紙，一字一字唸hōo我聽，koh頓胸坎掛保證，伊絕對無亂唸，我tsiah同意頓手印。
Hia-ê警察、官員走了後，我ê kha̋ng-páng iáu tī--leh，無hông吊走，nî-tsînn mā無拆，連薰mā無代誌。
Tsit幾冬我tshiâng-tsāi想起tsit件代誌，hit當時我哪ē hiah好大膽，敢kap警察at手pà？
答案kài清楚。假使當初我無行入公民大學，絕對bē有hiah大ê膽敢kap警察理論，mā bē知影，要求警察開收據hōo--我，是我ê權力，koh-khah免講敢kā in tshiàng聲，講beh紮hip相機tuè in hip相，看in kám是有取締違法ê代誌。
橫直hit年我入去海線公民大學，除了學ē-hiáu kā空喙放hōo bē記--得，tann頭跤步大大步向前行，mā學著面對代誌ê是非，ài爭到底，m̄是警察講--ê就lóng總是tio̍h--ê。
Ànn頭硬拚、認真學習ê hit段日子，除了無時間去為退色ê夢悲傷，kā全部時間lóng用tī ke讀、ke看、ke聽，看代誌ê角度mā有淡薄仔無仝款。
但是真正ē-hiáu徛tī對方ê立場去看代誌，是有一擺我leh教查某囝：「代誌lóng有兩面，看家己用啥款ê心境、角度去面對。Koh有ài時時刻刻提醒家己，m̄-thang bē記得徛tī對方ê立場去看代誌。Tng你面ǹg日頭光ê時tsūn，烏影就tī你ê後壁；你後壁ǹg日頭光ê時tsūn，án-ne烏影就tī你ê面頭前，lóng在你家己用啥款心境去解sueh。你是beh後壁ǹg日頭光a̍h是後壁ǹg烏影，lóng在你一念之間。看代誌真正需要培養，按怎tī一體兩面學ē-hiáu選擇，知影趁時機轉念，bē-tàng改日頭光ê方向，tio̍h-ài學ē-hiáu tńg身，án-ne tsiah看ē著真濟家己疏忽--去a̍h是làu-kau--去ê mi̍h件。」
查某囝頭歪歪，激siáu丑仔面kā我tiang：「媽媽lóng kan-ta用喙講，kám bat真正做到tńg身、轉念？」
Hōo查某囝tng頭án-ne問，suah真正hōo我喙that舌，應無路來。
查某囝koh kā我講：「媽媽對代誌ê看法，kám真正ē選擇面對日頭光a̍h是面對烏影？你若有時間就家己想看māi--leh。」
Hit工查某囝tńg--去了後，我家己留tī檳榔攤，想一寡過去發生ê tsiânn濟代誌。
想--leh想--leh，我家己伸手摸心肝：「假使我是一个tsiú寡tsiânn濟年ê查某人，tī歷盡辛酸、食盡萬苦了後，tsiah kā後生tshiânn養大漢，栽培伊受真好ê教育，伊suah beh娶一个年歲ke伊七歲，m̄-nā無學歷、離婚--過，koh kah一个tuè轎後--ê，竟然koh bē生，無法度傳宗接代，甚至tiānn-tiānn leh破病ê查某人做某，我kám ē答應？Kám ē願意？Kám ē甘願？」
想到tsia，我ê kha-tsiah就拚凊汗，khah早我kan-ta看著家己ê委屈，是按怎就lóng無想過別人mā ē怨、mā ē恨？
雄雄我ê委屈kap怨恨，suah lóng總飛了了、散了了。
真正ē-tàng理解，是按怎過去我無論做kah偌好，lóng無法度得著ta-ke ê疼惜，原來我一直lóng是伊tsit世人ê見笑代，是伊áu鬱ê源頭。
我想起伊tsit世人上得意、mā是伊上驕傲ê代誌，就是少年就tsiú寡，靠家己克服萬難，孤人tshiânn養栽培三个囡仔長大成人。
後生suah娶一个tī伊目睭內是hiah-nī仔bē看口ê查某人，伊kám bē鬱卒？Tsia-ê打擊對伊來講，應該bē khah輸我離婚ê打擊！
畢竟tī伊ê心肝內，操心peh腹栽培--出-來ê優秀後生，竟然去kah意著世俗ê目睭內上無值得注目ê查某人，tse對伊mā是一款tsiok深沉ê傷害。
翻頭想過去婚姻內所發生--過ê點點滴滴，我喙內雖然講無怨恨，ē用愛去化解，但是我ê心肝窟仔，絕對無kā tsia-ê代誌放bē記--得，傷痕原在、怨恨原在，只是化做無形，tī我ê kha-tshng後tuè-tiâu-tiâu。
一直到現此時，我tsiah真正leh反思，看清過去ê種種，受傷--ê mā m̄-nā我一个人，總算ē-tàng理解，總算ē-tàng放下，總算真正bē koh再怨恨。
我bē koh再怨天tsheh命，因為我想起頂站仔朋友bat寄E-mail傳hōo我一个故事，大概意思是講「人生不如意，十有八九，哪ē無beh ke想he一二？」做人應該ke想寡歡喜ê代誌。
我用Word畫一張表格，開始一筆一筆，寫離婚了後ê好kap bái。Tsiah發現離婚了後，我ê幸運m̄-nā「一二」！雖然我失去婚姻，suah因為án-ne tsiah thang拄著tsiok濟tsiok濟好機緣。
我leh想，假使我無離婚，按怎有機會去讀冊，mā無機會去拄著hiah-nī好ê老師，tsiok有耐心指導我寫作，in bē因為我tsiah國校仔畢業程度低，寫bē出好作品就放棄--我，in猶原鼓勵--我，hōo我bē因為能力不足來放棄文學。
假使我無離婚，án-ne到tsit-má，我大概iáu規工ku tī灶跤，洗菜、切肉、包便當leh過鬱卒ê日子，koh ē kap膏膏纏ê怨恨做伴，過áu鬱ê生活！
假使我無離婚，án-ne就一定無機會坐tī靜宜大學ê教室旁聽，koh-khah無機會sì-kè去聽演講、聽音樂演奏會、參加文學營，甚至koh ē-tàng peh-tsiūnn台灣厝尾頂——玉山去看日出。Tsia--ê是tī離婚進前，連做夢to m̄敢有ê siàu想。
假使我無離婚，我哪ē有機會行入海線社區公民大學，熟sāi文學。假使我無離婚，哪ē有機會熟sāi hiah-nī濟義工朋友、學員，koh得著in無嫌我hân-bān、一擺閣一擺ê教導，kā我ê電腦基礎拍底？
假使我無離婚，按怎ē重建人生？按怎有今仔日ê成長--leh？
算bē清ê「假使我無離婚」，因為離婚大大開闊我ê生活箍仔，mā因為離婚，我tsiah有才調徛tī人生koh-khah kuân ê所在，hùn開生命ê視野。
Án-ne詳細tia̍k算--一-下，tsiah發現原來我竟然是一个tsiah-nī幸運ê人，初初學電腦無法度克服ê問題，一幕一幕tī腦海內飛--過——查某囝自頭到尾lóng一直陪伴--我，伊koh激頭殼想盡各種辦法，就是beh hōo我tī學習中減少挫折，koh親手畫圖說明加註解，做一本koh一本hōo我學習電腦ê『葵花寶典』，hōo我學--起-來ē-tàng ha̍h跤ha̍h手。
照án-ne算--來，我m̄-nā有「一
二」thang想，應該koh ē-tàng想kah「六七八九十」！所致，我無應該怨恨離婚，應該感謝離婚hōo我成長tsiah tio̍h！
Tsit个時tsūn總算知影天公伯--à是tsiok公平--ê，伊用一張離婚協議書，化解真濟命中注定無解ê宿題。
我hit張離婚協議書，hōo ta-ke bē koh有「不孝有三，無後為大」ê遺憾。Tī伊ê思想國度--裡，m̄免koh再鬱卒有我tsit个看bē tsiūnn目ê新婦。伊又koh ē-sái tī親tsiânn朋友ê面頭前，大聲講「烈女不侍二夫」ê話--ah。
感情無siáng tio̍h siáng m̄-tio̍h，也無siáng反背siáng，只有緣份行到盡尾，自然就ē分開。
一張離婚協議書，hōo前翁揣著伊另外ê愛情，hōo伊完成傳宗接代ê心願，hōo伊ē-tàng對老母盡孝，m̄-nā對ē起老母真心ê寄望，對伊ê列祖列宗mā有交代。
一張離婚協議書，切斷我tsit段驚驚勼勼ê悲苦婚姻。
天公伯--à另外安排我蓮花化身，m̄-nā有機會熟sāi tsiok濟良師益友，進一步學著in ê工夫。除了看愈遠、bat愈濟，koh學著tsiok濟以早m̄ bat接觸--過ê世界，一步一步向我ê夢田出發。
其實自從做路寒袖老師ê學生了後，我就偷偷仔hē一个願，ǹg望家己有一日ē-tàng tsiânn做一个作家，所以tsit幾年lóng真拚勢leh學習文學創作，學習向逆境乾杯！
