Tuì台灣白色恐怖小說選ê〈賴索〉講起
/ Tīnn Bûn-kî
1.
自開始學台語文以來，我就想講ke減讀一寡過去khah無熟sāi ê歷史，像「白色恐怖」hit-tang-tsūn ê政治受難者ê故事。
我進前tsiah tuì線頂圖書館借著國家人權博物館出版ê《讓過去成為此刻：台灣白色恐怖小說選》，lóng總有四本冊，主編是兩位作家，胡淑雯kap童偉格。講實在--ê，in收tī tsia-ê冊內底ê小說，注重文學ê效果khah贏歷史ê認bat。當然，我mā知影ài有好ê作品，tsiah ē-tàng吸引讀者。Iáu-m̄-koh讀者若是想beh koh-khah了解白色恐怖ê歷史，就需要家己另外做功課。親像tī第二卷《眾聲歸來》，有一篇叫做〈賴索〉ê小說1。其中，作者黃凡所描寫ê主角「韓志遠」就hōo人感覺是teh倒khau建立「台灣共和國」ê hit个廖文毅。
若是我從來m̄ bat聽過廖文毅hit群人ê故事，代先看著tsit篇小說，恐驚我mā ē感覺伊是真正hàm古。我知影作者是想beh透過「後現代」ê諷刺手路來表現，描寫「韓志遠」tuè-tiâu-tiâu ê理想是按怎來破滅，像「賴索」hit款ê普通人，又koh是按怎tī政治當中，漸漸失去自我認同，iáu-m̄-koh我tsit篇讀了，總--是感覺有淡薄仔怪怪。
2.
講著國民政府iáu未代表聯軍接收台灣ê時，廖文毅kap伊ê二兄廖文奎bat tī南京ê大學教冊，in兩人原本ê立場是khah倚中國hit爿--ê。戰後，兩人做伙來台灣，廖文毅iáu想beh代表台灣人參與新政治。無疑政府烏白來，致使二二八事件爆發，軍隊刣死無辜ê民眾。Hit時in兩兄弟仔拄好去香港、無tī台灣，閃過一劫，m̄-koh in也hōo政府抹烏是二二八ê主謀。
事實in兩人當然是冤枉--ê，因為廖文毅tī 1946年參選「國民參政員」ê主張是「聯省自治」，iáu未反對政府。後--來in tsiah tī香港組織「台灣再解放聯盟」，投書hōo聯合國主張「台灣民族自決公投」。1950年，廖文毅偷走到日本，廖文奎繼續留蹛香港。1952年，廖文奎破病過身，廖文毅ài koh幾冬後tsiah成立「台灣共和國」。
廖文毅kap廖文奎是無法度拆分開--ê，廖文奎ê死，是台獨運動ê一大損失。〈賴索〉ê作者黃凡kan-na寫「韓志遠」是六〇年代uì東京tńg來台灣、向國民黨投降ê一个「失敗者」——就親像當初kài出名ê廖文毅2，m̄-koh作者無交代伊tńg--來ê動機。作者koh寫伊tsiūnn電視懺悔ê時，講著共產黨『想利用我達到 “解放” 台灣的目的』，tse完全是國民黨抹烏台獨主張者ê借口，mā證明黃凡無beh討論歷史。
是按怎「廖文毅」無可能自己講tsit款話？因為伊tsiânn討厭共產黨，tī 1948年，伊就kap台灣共產黨tī香港有衝突，根本無可能有合作。小說哪ē寫到hōo共產黨利用？何況廖文毅beh tńg來台灣，主要是因為in阿嫂（廖蔡秀巒）kap姪仔（廖史豪）hōo政府掠去關。廖文毅若m̄ tńg--來，in兩人就beh無命--去--ah。
種種理由，我感覺黃凡無啥要意廖文毅真正ê主張，mā無了解台獨運動ê mê角。雖然伊ê小說是好看，但是伊所描寫ê hit个「韓志遠」是一个無存在tī台灣歷史ê人物。
3.
準講小說自本就是一種再創造，m̄是歷史ê事實。至少，lán ē-tàng讀白色恐怖前輩鍾謙順ê回憶錄《煉獄浮生錄》，看伊是按怎來描寫廖--家對台灣獨立ê貢獻kap犧牲。Tī hit本冊內底，作者對廖--家是大大肯定。鍾前輩mā有hōo廖文毅ê台獨運動牽連--著，伊m̄-nā hōo政府掠三擺，koh hông tī火燒島關兩擺，m̄-koh鍾前輩完全無批評過廖文毅tńg來台灣ê代誌，甚至講伊ē tńg來台灣mā是不得已，實在是一个有氣魄ê前輩。
自六〇年代到七〇年代，國際ê情勢khah穩定--ah。一方面，過去有牽連著共產黨地下組織、iah是同情左派思想ê讀冊人，已經lóng hōo政府掠去關了了--ah；另外一方面，tī聯合國ê「中國」代表權爭奪戰已經到新ê階段，美國beh承認共產黨代表「中國」，tsit件代誌hōo政府真大ê壓力。
海外台獨ê行動愈來愈濟，國內認同獨立ê聲音mā開始phū-出-來，查出台獨ê白色恐怖案件一冬濟過一冬，有ê人是有組織--ê，有ê人只是tàu宣傳，當然，koh有人是hōo別人拖累--著。到tann，「台灣共和國」已經是一場空，m̄-koh經過tsia-ê前輩sì-kè走tsông，in ê理念已經生湠、代代流傳--looh。
最後，凡勢文學有伊表現ê技術，像我tsit款讀者只是『杞人憂天』。但是像tsit種歷史基礎有問題ê描寫，kám bē誤著tng-leh進行ê轉型正義工程？Iah是講，tse是作者避免讀者對號入座ê寫法？講--起-來，小說家若是想beh khau洗廖文毅tsit个人，lán kám有需要kā〈賴索〉收tī《台灣白色恐怖小說選》第二卷內底？總講--一-句，tsit篇小說實在hōo我無講bē爽快。
自開始學台語文以來，我就想講ke減讀一寡過去khah無熟sāi ê歷史，像「白色恐怖」hit-tang-tsūn ê政治受難者ê故事。
我進前tsiah tuì線頂圖書館借著國家人權博物館出版ê《讓過去成為此刻：台灣白色恐怖小說選》，lóng總有四本冊，主編是兩位作家，胡淑雯kap童偉格。講實在--ê，in收tī tsia-ê冊內底ê小說，注重文學ê效果khah贏歷史ê認bat。當然，我mā知影ài有好ê作品，tsiah ē-tàng吸引讀者。Iáu-m̄-koh讀者若是想beh koh-khah了解白色恐怖ê歷史，就需要家己另外做功課。親像tī第二卷《眾聲歸來》，有一篇叫做〈賴索〉ê小說1。其中，作者黃凡所描寫ê主角「韓志遠」就hōo人感覺是teh倒khau建立「台灣共和國」ê hit个廖文毅。
若是我從來m̄ bat聽過廖文毅hit群人ê故事，代先看著tsit篇小說，恐驚我mā ē感覺伊是真正hàm古。我知影作者是想beh透過「後現代」ê諷刺手路來表現，描寫「韓志遠」tuè-tiâu-tiâu ê理想是按怎來破滅，像「賴索」hit款ê普通人，又koh是按怎tī政治當中，漸漸失去自我認同，iáu-m̄-koh我tsit篇讀了，總--是感覺有淡薄仔怪怪。
2.
講著國民政府iáu未代表聯軍接收台灣ê時，廖文毅kap伊ê二兄廖文奎bat tī南京ê大學教冊，in兩人原本ê立場是khah倚中國hit爿--ê。戰後，兩人做伙來台灣，廖文毅iáu想beh代表台灣人參與新政治。無疑政府烏白來，致使二二八事件爆發，軍隊刣死無辜ê民眾。Hit時in兩兄弟仔拄好去香港、無tī台灣，閃過一劫，m̄-koh in也hōo政府抹烏是二二八ê主謀。
事實in兩人當然是冤枉--ê，因為廖文毅tī 1946年參選「國民參政員」ê主張是「聯省自治」，iáu未反對政府。後--來in tsiah tī香港組織「台灣再解放聯盟」，投書hōo聯合國主張「台灣民族自決公投」。1950年，廖文毅偷走到日本，廖文奎繼續留蹛香港。1952年，廖文奎破病過身，廖文毅ài koh幾冬後tsiah成立「台灣共和國」。
廖文毅kap廖文奎是無法度拆分開--ê，廖文奎ê死，是台獨運動ê一大損失。〈賴索〉ê作者黃凡kan-na寫「韓志遠」是六〇年代uì東京tńg來台灣、向國民黨投降ê一个「失敗者」——就親像當初kài出名ê廖文毅2，m̄-koh作者無交代伊tńg--來ê動機。作者koh寫伊tsiūnn電視懺悔ê時，講著共產黨『想利用我達到 “解放” 台灣的目的』，tse完全是國民黨抹烏台獨主張者ê借口，mā證明黃凡無beh討論歷史。
是按怎「廖文毅」無可能自己講tsit款話？因為伊tsiânn討厭共產黨，tī 1948年，伊就kap台灣共產黨tī香港有衝突，根本無可能有合作。小說哪ē寫到hōo共產黨利用？何況廖文毅beh tńg來台灣，主要是因為in阿嫂（廖蔡秀巒）kap姪仔（廖史豪）hōo政府掠去關。廖文毅若m̄ tńg--來，in兩人就beh無命--去--ah。
種種理由，我感覺黃凡無啥要意廖文毅真正ê主張，mā無了解台獨運動ê mê角。雖然伊ê小說是好看，但是伊所描寫ê hit个「韓志遠」是一个無存在tī台灣歷史ê人物。
3.
準講小說自本就是一種再創造，m̄是歷史ê事實。至少，lán ē-tàng讀白色恐怖前輩鍾謙順ê回憶錄《煉獄浮生錄》，看伊是按怎來描寫廖--家對台灣獨立ê貢獻kap犧牲。Tī hit本冊內底，作者對廖--家是大大肯定。鍾前輩mā有hōo廖文毅ê台獨運動牽連--著，伊m̄-nā hōo政府掠三擺，koh hông tī火燒島關兩擺，m̄-koh鍾前輩完全無批評過廖文毅tńg來台灣ê代誌，甚至講伊ē tńg來台灣mā是不得已，實在是一个有氣魄ê前輩。
自六〇年代到七〇年代，國際ê情勢khah穩定--ah。一方面，過去有牽連著共產黨地下組織、iah是同情左派思想ê讀冊人，已經lóng hōo政府掠去關了了--ah；另外一方面，tī聯合國ê「中國」代表權爭奪戰已經到新ê階段，美國beh承認共產黨代表「中國」，tsit件代誌hōo政府真大ê壓力。
海外台獨ê行動愈來愈濟，國內認同獨立ê聲音mā開始phū-出-來，查出台獨ê白色恐怖案件一冬濟過一冬，有ê人是有組織--ê，有ê人只是tàu宣傳，當然，koh有人是hōo別人拖累--著。到tann，「台灣共和國」已經是一場空，m̄-koh經過tsia-ê前輩sì-kè走tsông，in ê理念已經生湠、代代流傳--looh。
最後，凡勢文學有伊表現ê技術，像我tsit款讀者只是『杞人憂天』。但是像tsit種歷史基礎有問題ê描寫，kám bē誤著tng-leh進行ê轉型正義工程？Iah是講，tse是作者避免讀者對號入座ê寫法？講--起-來，小說家若是想beh khau洗廖文毅tsit个人，lán kám有需要kā〈賴索〉收tī《台灣白色恐怖小說選》第二卷內底？總講--一-句，tsit篇小說實在hōo我無講bē爽快。
1 胡淑雯、童偉格主編，《讓過去成為此刻：台灣白色恐怖小說選》第二卷「眾聲歸來」，台北：春山，2020年。
2 參考傅怡禎ê講法。傅怡禎（2010）博士論文，《挑戰大敘述：1979－1987台灣政治小說研究》）。頁167-168。
2 參考傅怡禎ê講法。傅怡禎（2010）博士論文，《挑戰大敘述：1979－1987台灣政治小說研究》）。頁167-168。
