上愛食ê三項mih仔
/ 張寶明
人若tī細漢就tiâu腹ê記憶，m̄管按怎規世人to lóng ē記--得，而且隨點記持隨叫ē出--來，特別是食mi̍h kah伊ê滋味。
Beh食阿爹灌ê煙腸無tiānn有，應該講是kan-na阮兜有刣koh-iūnn豬ê時，tsiah有阿爹灌ê煙腸thang食。高粱酒酒芳、五香kah二砂ê甜摻tī bē油bē tīng ê白精肉--裡，踮喙--裡哺，tse是何等ê享受。所致，阿爹ê煙腸阮是kan-na一tsat tio̍h-ài配三碗燒飯。
Tī食si̍t欠缺到tsit款ê日子內底生活，致使ē趁錢了後，看著煙腸無買是擋bē tiâu--ê，便若買外口ê煙腸就ē kah阿爹--ê比，看啥人ê khah好食？煙腸ê滋味就án-ne tiâu tī我ê心--裡，tsiânn做我ê興。
Kah煙腸仝款，家己灌大腸來食mā是罕--得，因為tī豬砧買大腸貴som-som，灌著koh厚工，逐工無閒kah ná干樂，阿娘哪有美國時間來灌大腸，beh食ē著阿娘灌ê大腸，真正稀罕。見若食著阿娘ê大腸，he滋味to lóng ē tī頭殼--裡kā記持刻深一斗。
就án-ne，見若看著外口有人leh賣，心頭就起giàn，tsiok想beh買來食thang好過giàn。不而過，十斗無一斗買ē落手，手工正大腸灌--ê定著貴kah m̄是lán經濟thìng好tiānn買--ê，心內因為án-ne tiānn leh鬱卒--neh！
久久--à一斗殘殘豆乾切五角kā買--落-去，見買見失望，貴som-som--無-打-緊，無油蔥芳khuì、塗豆koh少，生理mih仔總--是料ài斂tsiah有利純，lán ē-tàng理解，án-ne自然食著khah無滋味，hōo人ē感覺買著無彩錢。
阿姊知影我興tsit味，拄著--à ē灌，見就灌一隻豬ê量，koh bē嫌麻煩寄來hōo我食，我是儉儉仔食，thìng好食到過季。
其實，阮兜冰箱冷凍庫比大腸koh-khah tsia̍p冰--ê是肉粽，規年thàng天to有肉粽thang食，iáu未食了阿姊就koh寄--來。
Kah大腸siāng款tsu̍t米路ê肉粽，猶原是我kài興ê食si̍t。Tī庄跤hit-tsūn，阮兜m̄-nā五日節ē縛粽，連過年to ē縛，可見阮偌愛食肉粽。阿娘、阿嫂kah阿姊縛粽各有手路，m̄-koh，南部粽ê蔥仔芳、塗豆、三層肉kah爛tsu̍t米ê特色lóng無走精--去，就是tsit種滋味kā我 siânn kah死死，m̄是tsit款滋味ê粽lóng免講。
粽若拄sa̍h熟，一睏頭無三粒起跳是bē過giàn，上kuân記錄六粒，到tann無人破--過。
阿姊知影我興，不時to leh問：「你肉粽是食了--ah--未？」
我若細膩兼歹勢kā回講：「冰箱內底iáu有。」伊定著ē講：「M̄-thang儉儉仔食，緊食食--leh，我後禮拜koh kā你寄--去。」連我beh kā推辭to bē赴講，電話就掛--ah。真正後禮拜一定收著80粒肉粽，講40粒留家己食，賰--ê指定ài提去hōo佗一个親tsiânn幾粒拄幾粒，面子lóng beh做hōo--我。莫怪，阮兜冰箱不時to有肉粽，上怪--ê是我哪ē khah食to bē siān。
Tsit三項傳統食si̍t我ē上愛食，相信m̄是kan-na in ê滋味niā-niā，hit款leh灌、leh縛、leh食ê過程，thang好感受傳統氣氛，享受疼thàng lán ê親情，是何等ê幸福、是何等ê感動，你kám知？
Beh食阿爹灌ê煙腸無tiānn有，應該講是kan-na阮兜有刣koh-iūnn豬ê時，tsiah有阿爹灌ê煙腸thang食。高粱酒酒芳、五香kah二砂ê甜摻tī bē油bē tīng ê白精肉--裡，踮喙--裡哺，tse是何等ê享受。所致，阿爹ê煙腸阮是kan-na一tsat tio̍h-ài配三碗燒飯。
Tī食si̍t欠缺到tsit款ê日子內底生活，致使ē趁錢了後，看著煙腸無買是擋bē tiâu--ê，便若買外口ê煙腸就ē kah阿爹--ê比，看啥人ê khah好食？煙腸ê滋味就án-ne tiâu tī我ê心--裡，tsiânn做我ê興。
Kah煙腸仝款，家己灌大腸來食mā是罕--得，因為tī豬砧買大腸貴som-som，灌著koh厚工，逐工無閒kah ná干樂，阿娘哪有美國時間來灌大腸，beh食ē著阿娘灌ê大腸，真正稀罕。見若食著阿娘ê大腸，he滋味to lóng ē tī頭殼--裡kā記持刻深一斗。
就án-ne，見若看著外口有人leh賣，心頭就起giàn，tsiok想beh買來食thang好過giàn。不而過，十斗無一斗買ē落手，手工正大腸灌--ê定著貴kah m̄是lán經濟thìng好tiānn買--ê，心內因為án-ne tiānn leh鬱卒--neh！
久久--à一斗殘殘豆乾切五角kā買--落-去，見買見失望，貴som-som--無-打-緊，無油蔥芳khuì、塗豆koh少，生理mih仔總--是料ài斂tsiah有利純，lán ē-tàng理解，án-ne自然食著khah無滋味，hōo人ē感覺買著無彩錢。
阿姊知影我興tsit味，拄著--à ē灌，見就灌一隻豬ê量，koh bē嫌麻煩寄來hōo我食，我是儉儉仔食，thìng好食到過季。
其實，阮兜冰箱冷凍庫比大腸koh-khah tsia̍p冰--ê是肉粽，規年thàng天to有肉粽thang食，iáu未食了阿姊就koh寄--來。
Kah大腸siāng款tsu̍t米路ê肉粽，猶原是我kài興ê食si̍t。Tī庄跤hit-tsūn，阮兜m̄-nā五日節ē縛粽，連過年to ē縛，可見阮偌愛食肉粽。阿娘、阿嫂kah阿姊縛粽各有手路，m̄-koh，南部粽ê蔥仔芳、塗豆、三層肉kah爛tsu̍t米ê特色lóng無走精--去，就是tsit種滋味kā我 siânn kah死死，m̄是tsit款滋味ê粽lóng免講。
粽若拄sa̍h熟，一睏頭無三粒起跳是bē過giàn，上kuân記錄六粒，到tann無人破--過。
阿姊知影我興，不時to leh問：「你肉粽是食了--ah--未？」
我若細膩兼歹勢kā回講：「冰箱內底iáu有。」伊定著ē講：「M̄-thang儉儉仔食，緊食食--leh，我後禮拜koh kā你寄--去。」連我beh kā推辭to bē赴講，電話就掛--ah。真正後禮拜一定收著80粒肉粽，講40粒留家己食，賰--ê指定ài提去hōo佗一个親tsiânn幾粒拄幾粒，面子lóng beh做hōo--我。莫怪，阮兜冰箱不時to有肉粽，上怪--ê是我哪ē khah食to bē siān。
Tsit三項傳統食si̍t我ē上愛食，相信m̄是kan-na in ê滋味niā-niā，hit款leh灌、leh縛、leh食ê過程，thang好感受傳統氣氛，享受疼thàng lán ê親情，是何等ê幸福、是何等ê感動，你kám知？
