路燈夢
/ 藍春瑞
Sian想to想bē-hiáu我退休ē tsông來iap-phiah ê草地所在蹛，uì舊年7月31交厝了後，tuè手kā戶口遷--入-來。無偌久，我聽hit箍來阮兜開井ê水電師傅講一tsuā巷仔若有兩戶徛家，巷仔口ê路燈ē-sái去申請叫公所來牽，koh兼出電錢，我聽一下tsiok sannh心，就tshuân beh去kā阿母ê家甲徙--來，創hōo無仝戶，看有thang請一pha仔路燈--無。
Tshuā阿母來到戶政事務所，辦手--ê講beh開新戶tio̍h-ài上近tsit期水費iah是電錢ê收據tsiah ē-sái，姑不將就tsông去自來水公司討證明，舞差不多一點鐘tsiah提到位。Suà--落-去koh beh kā我討進前允准辦門牌號碼ê證明書，tsit聲無tńg去厝--裡去揣bē煞，往回koh了30分鐘tńg厝去píng冊櫥仔內ê書類tsiah hiau--著，害阿母踮hia ke坐倚beh點外鐘久，好佳哉戶政事務所ê公務員lóng tsiânn古意，khiú椅仔hōo坐、奉茶koh陪伊開講。
隔tńg工透早5點ê時tsūn，阿母來khà房間門，hiàm我ê名。我緊mé phi一領外衫出來客廳ê膨椅坐。伊講伊規暝睏bē ka-tsuē，lóng leh想講是按怎beh kā家甲uì台北遷來庄跤--leh？家己一个一戶koh兼做戶長是啥mih意思--leh？
我kā講，一--來選舉ê時tsūn免專工盤山過嶺拚tńg去台北，kan-na為著投票niâ，遷來tsia就ē-tàng省工、省力；二--來若有兩戶，巷仔口ê路燈ē-sái去申請叫公所來牽，koh兼出電錢。Kah我jû差不多有一點鐘，有喙講kah無瀾，伊tsiah回話：「若先khah早講--leh，就bē害我規暝睏bē落眠，sian to想bē-hiáu舞tsit齣是beh創啥？」
Tann水清魚現，伊mā無koh問--落-去，tsit件代誌tsiah煞--去。M̄-koh，我去村長hia申請，伊有kah村幹事做伙來看現場，一禮拜後kah公所建設課管路燈ê辦手--ê同齊koh來勘查第二tsuā，直透問一寡tsia蹛幾戶、有幾个人？Hip幾若張相了後，規陣人講著beh裝路燈ê代誌suah thi-thi-thu̍h-thu̍h，你nauh--一-句我nauh--一-句m̄知leh講啥，聽ē出來聲嗽lóng無kài好，我家己tī心肝內暗想，大概火燒罟寮——無網（望）--ah。自án-ne無聲無sueh倚beh半冬，kan-na m̄回我啥mih因端mā lóng無來huan咐，無彩pìnn一大堆ê齣頭lóng拍損--去，真正是「雞公kah雞母」。
Tshuā阿母來到戶政事務所，辦手--ê講beh開新戶tio̍h-ài上近tsit期水費iah是電錢ê收據tsiah ē-sái，姑不將就tsông去自來水公司討證明，舞差不多一點鐘tsiah提到位。Suà--落-去koh beh kā我討進前允准辦門牌號碼ê證明書，tsit聲無tńg去厝--裡去揣bē煞，往回koh了30分鐘tńg厝去píng冊櫥仔內ê書類tsiah hiau--著，害阿母踮hia ke坐倚beh點外鐘久，好佳哉戶政事務所ê公務員lóng tsiânn古意，khiú椅仔hōo坐、奉茶koh陪伊開講。
隔tńg工透早5點ê時tsūn，阿母來khà房間門，hiàm我ê名。我緊mé phi一領外衫出來客廳ê膨椅坐。伊講伊規暝睏bē ka-tsuē，lóng leh想講是按怎beh kā家甲uì台北遷來庄跤--leh？家己一个一戶koh兼做戶長是啥mih意思--leh？
我kā講，一--來選舉ê時tsūn免專工盤山過嶺拚tńg去台北，kan-na為著投票niâ，遷來tsia就ē-tàng省工、省力；二--來若有兩戶，巷仔口ê路燈ē-sái去申請叫公所來牽，koh兼出電錢。Kah我jû差不多有一點鐘，有喙講kah無瀾，伊tsiah回話：「若先khah早講--leh，就bē害我規暝睏bē落眠，sian to想bē-hiáu舞tsit齣是beh創啥？」
Tann水清魚現，伊mā無koh問--落-去，tsit件代誌tsiah煞--去。M̄-koh，我去村長hia申請，伊有kah村幹事做伙來看現場，一禮拜後kah公所建設課管路燈ê辦手--ê同齊koh來勘查第二tsuā，直透問一寡tsia蹛幾戶、有幾个人？Hip幾若張相了後，規陣人講著beh裝路燈ê代誌suah thi-thi-thu̍h-thu̍h，你nauh--一-句我nauh--一-句m̄知leh講啥，聽ē出來聲嗽lóng無kài好，我家己tī心肝內暗想，大概火燒罟寮——無網（望）--ah。自án-ne無聲無sueh倚beh半冬，kan-na m̄回我啥mih因端mā lóng無來huan咐，無彩pìnn一大堆ê齣頭lóng拍損--去，真正是「雞公kah雞母」。
（Tsit篇文章bat刊tī教育部電子報，漢羅用字有調整，原文網址：https://reurl.cc/npoz5e）
