厝跤ê鳥仔
/ 林麗能
M̄知uì tang時開始，阮兜四箍圍仔，粉鳥愈湠愈濟，攑頭看厝邊兜ê冷氣機外機面頂、雨遮下面、牆圍仔頂、厝尾頂ê水塔，逐不時歇規大群粉鳥，鳥屎一pû koh一pû，粉鳥仔家庭sio-tshuā來做siū，生卵、pū囝，一水過一水，早時仔天iáu未光，sù常hōo in「ku ku ku」ê叫聲吵精神，實在真ak-tsak。
拄開始感覺人kah鳥仔和平鬥陣，互相尊tshûn，留hōo逐家一條生路，mā算做實行性命教育。
Tī都市大樓ê樓頂除了粉鳥，pan-kah、燕仔、石磯仔（『台灣夜鷹』）、ka-līng（『八哥』）、白頭khok仔（『白頭翁』）、厝角鳥仔mā tiānn-tiānn看ē著。
暗光鳥
辦公室對面ê花園內底有榕仔、細葉欖仁、玉蘭花、弓蕉樹kah一个細細--à ê魚池。下晡時仔，看著暗光鳥不止仔清閒，孤單一隻無意仔無意，用伊瘦抽瘦抽ê鳥仔跤，一hua̍h一hua̍h khuann-khuann仔leh散步。有tang時仔頭殼lê-lê，kánn-ná tī草埔底揣蟲食，頭殼ná戴一頂烏phú色ê帽仔，身軀身是咖啡色ê鳥仔毛。喘khuì ê時tsūn，頷頸仔thián大箍，bē輸是雞nuā仔hiah大隻。目睭大大蕊，tiānn-tiānn kah人sio對看，你khuann-khuann仔行倚伊一步，伊就tsiânn張持離你一步。Kah鳥保持幾个跤步遠，想beh kā創治，雄雄走倚--伊，伊suah tio̍h生驚，就飛起去樹尾頂，無看鳥影。
石磯仔
若講著石磯仔，伊是tsiok顧人怨，講tsiânn實--ê，m̄ bat看過伊ê廬山真面目，神祕kah kan-na有聽著聲，無看著影。
Tī維基百科揣伊ê相片，烏phú色ê毛，生做tsiânn細粒子，想bē到丹田tsiah有力，聲嗽tsiah-nī kuân。In無像粉鳥tī透早吵人ê眠，是半暝三更「tsuē tsuē tsuē」háu bē恬，歹睏癖ê我，tiānn-tiānn hōo in吵kah睏bē落眠。助眠ê音樂，聽幾若改，tsiânn無簡單睏ka-tsuē--ah！睏kah半暝仔，koh雄雄hōo in吵精神。Tī眠床頂，píng來píng去，心肝頭真giâu疑，in是按怎háu規暝，bē喙ta、bē忝頭，kám講lóng bē愛睏--hiooh？落尾仔認真揣資料，tsiah知影in是leh揣kah意ê鳥仔伴，tsiah ē叫bē煞，為愛情走天涯，祝福in khah緊揣著鳥仔伴，萬代gâu生湠。
燕仔
Koh來講燕仔，細漢bat聽爸母講，gîm-tsînn跤ê厝瓦面頂若有燕仔來做siū，siū喙ǹg厝內，就是好吉兆。
燕仔有靈性，揣著好地理tsiah ē來做siū，in ē「帶財入宅」，hōo tsit家伙仔有好運途，看in uì細細siū，khuann-khuann仔用塗肉lia̍p kah大大siū，m̄敢kā in攪吵。燕仔家庭一家伙安搭好勢，有食就有放，鳥屎tī gîm-tsînn放kah規大pû，想著in無的確phīng別款鳥仔khah有魔力，tsiah有法度為厝家紮來財富，khah艱苦mā ài歡喜做甘願受，逐工提掃梳掃、kuānn水桶tshiâng，tshiâng hōo清氣liu-liu。
Pan-kah
我tiānn-tiānn tī窗仔門外口，看著pan-kah tī我ê花khann生卵、pū囝，in kah人類仝款，實行一夫一妻制度。Pan-kah實在是值得呵咾，tsiok有家庭責任感--ê，公--ê kah母--ê輪班pū卵，一水pū兩粒卵。交班ê時間是tī早時仔，m̄-koh我看bē出siáng是輪日班、siáng是輪暗班。大約pū卵兩禮拜外，鳥仔囝就啄殼出世。飼鳥仔囝mā是輪流飼，飼囝ê時tsūn，兩爿翼股一直ia̍t bē煞，頭殼koh kuân-kuân低低，幌來幌去，kánn-ná leh跳舞。鳥仔囝ê喙long入去爸爸iah是媽媽ê喙內底，hōo爸母kā哺hōo爛爛、好消化ê食物，送去鳥仔囝ê喙內，飼囝大漢。
我ē記得阿媽講伊mā是用tsit个撇步飼孫仔大漢--lah！Tsiânn好佳哉，hit个孫仔m̄是我。
Pan-kah飼鳥仔囝飼kah大隻，mā大概兩禮拜外，in為著hōo鳥仔囝學習獨立（我家己臆--ê），就無koh飛--tńg-來，m̄知in kám有kā鳥仔囝sio辭--無？頭起先，兩隻鳥仔囝對窗仔門外口金金siòng，等爸母tńg來飼--in，等--啊等，tsîng透早等到暗暝，等--來--ê是失望。
我驚in iau--死，真好禮仔me飯粒仔tī花khann，m̄-koh，好心去hōo雷唚，in顛倒驚一tiô，掠做我beh掠--in。Koh來，我換掖白米，看in beh食--無？Mā是無彩工，無食半喙。Koh幾若工，早時仔tī窗仔門內面，偷偷仔bî，看in kám真正hiah耐iau。Ooh！Kan-na賰一隻niā-niā，隔tńg工，另外hit隻mā輸「鳥」m̄輸陣，飛走--出-去--ah！一水ê pan-kah來生湠，tsîng pū卵到鳥仔囝飛走，大概有個外月ê時間。
粉鳥
蹛tī半空中都市ê公寓，雖然無花園，iáu-koh想beh種東種西，窗仔門外口，鐵窗雨遮下面，來種寡花草，ē-tàng tsa̍h西照日，擋大路外口ê ing-ia。買花khann kah培養塗、tiām花子iah是買花栽，等伊發芽、puh-ínn，小可仔滿足種花草ê趣味。
M̄-koh，koh驚無頭神，bē記得沃水，iah是出門幾若工，花草ta死了了。我lóng盡量種m̄驚ta塗ê花草，ná像是沙漠玫瑰、瓊花、麒麟花、八卦紅等。頂年歇熱出外tshit-thô tsiânn個月，tńg來到厝，驚一tiô，花khann ê花草iáu tī--leh，suah koh看著一粒鳥仔卵，頭起先，掠做是pan-kah卵，m̄-koh，pan-kah卵無hiah大粒。
Iáu leh giâu疑tsit粒卵是啥mih鳥--ê，過無偌久，無張無持koh ke puh一粒卵，生卵ê鳥仔母mā知影是啥--looh！Kah我想--ê仝款——粉鳥。
原本掠做所有ê鳥仔kah燕仔仝款，lóng是揣著好地理tsiah來做siū，ē tshuā財koh tài富。另外一方面是仝款做人阿母ê心情，beh hōo伊穩心仔pū卵，mài kā伊拍生驚。Koh掠準粉鳥kah pan-kah仝款，個外月粉鳥囝大隻，就ē飛走，忍個外月就ē-sái。
落尾tsiah知影，粉鳥kah pan-kah自頭到尾lóng無仝款。
Khah早tshuā囡仔去溪頭tshit-thô，上ē記--得--ê是公園有tsiok濟粉鳥，逐隻lóng bē驚人，tī大樹跤真大pān。In肥肥ê身軀身，看著真清氣相，kah人行路仝款，倒跤、正跤一hua̍h一hua̍h行來行去，頭殼koh隨時sì-kè tàm頭巡視揣食，看著真古錐。
阮sa錢買飼料，hōo囡仔掖飼料tī塗跤kā in飼，做阿母ê我，囡仔做moo-lé-luh（model），徛tī邊--a提hip相機金金siòng，揣無仝款ê姿勢，掠上suí ê鏡頭，kā囡仔kah規陣iau-sâi ê粉鳥hip做伙，做囡仔細漢時成長ê記念。
30年前，iáu無網路，所有ê智識lóng tī冊本內底，學校若無教--著、阿母無講--著、報紙雜誌無讀--著，tsiok濟生活智識就m̄ bat半項。落尾有網路食kah飽，揣資料mā tsiah知影粉鳥屎、pan-kah屎lóng有tài病菌，ē敗害人類ê健康，尤其是細漢囡仔，抵抗力bái，koh-khah ài提防。
粉鳥pū卵ê時間比pan-kah ke tsiok久，粉鳥囝拄出世，bē輸是細隻鴨bî仔，毛草淺黃gâm色。看著真古錐，m̄-koh大隻了後，毛色就變做烏phú色--ê，粉鳥phīng pan-kah khah大隻，鳥仔屎ke真大pû，m̄-nā放tī花khann面頂，白鐵仔窗仔門mā uè kah滿滿是。上悽慘--ê是鳥仔囝大隻了後，伊認拄出世ê siū是in兜，鳥仔母早就無飛--tńg-來--ah，in iáu是kho̍k-kho̍k等，真mî-tsinn m̄甘願走。
花khann ê瓊花已經ta-lian--ah，沙漠玫瑰ê葉仔mā lak了了--ah！有一暝，規身軀m̄知按怎，癢kah擋bē tiâu，掠準是食著無拄好，起凊mo̍oh。越頭想想--leh，tsit站仔koh無食海產類--ê，tng-leh抹萬金油ê時tsūn，雄雄想--著，無的確是粉鳥屎ê緣故。
害了了！窗仔門關kah ba̍t-tsiuh-tsiuh，病菌ē飛天koh鑽地，攻入來我ê地盤，走入來我ê房間--ah！看著窗仔門外口，鳥屎規大phiàn，實在tsiok厭氣。心肝掠坦橫，ài出手解決--ah。
先掛喙am、手lok仔，sa一枝長棍仔，beh來趕粉鳥。Tsit間房間，拄好是三角窗，窗仔門大約有四窗闊。趕in去tsit爿，in走去hit爿，趕in去hit爿，in koh走去tsit爿，kah我bih sio揣，活beh氣--死。Koh出絕招，tī長棍仔尾包報紙，一直倚in ê身軀身吵lā，終其尾，in tio̍h生驚，姑不而將飛走--出-去。
Suà--落-來，先kā花ue鉸到底，tàn-hiat-ka̍k，khioh-khioh--leh，囥tī塑膠袋仔內底，花khann隨个仔搬走，koh來kuānn水桶，用布lù仔出大力lù黏tī窗仔門、紗窗、白鐵仔kuainn ê鳥仔屎。Koh來清房間，地板、桌面、眠床、倚窗仔門ê衫架仔，tsiâu拭hōo清氣。有網友建議tī窗仔門外口用漂白水噴噴--leh，縛光碟片、紅布條仔，in就m̄敢koh飛--tńg-來。
Ǹg望粉鳥mài koh tńg--來，mài koh透早kā我攪吵，hōo我睏眠飽足、精神好。
拄開始感覺人kah鳥仔和平鬥陣，互相尊tshûn，留hōo逐家一條生路，mā算做實行性命教育。
Tī都市大樓ê樓頂除了粉鳥，pan-kah、燕仔、石磯仔（『台灣夜鷹』）、ka-līng（『八哥』）、白頭khok仔（『白頭翁』）、厝角鳥仔mā tiānn-tiānn看ē著。
暗光鳥
辦公室對面ê花園內底有榕仔、細葉欖仁、玉蘭花、弓蕉樹kah一个細細--à ê魚池。下晡時仔，看著暗光鳥不止仔清閒，孤單一隻無意仔無意，用伊瘦抽瘦抽ê鳥仔跤，一hua̍h一hua̍h khuann-khuann仔leh散步。有tang時仔頭殼lê-lê，kánn-ná tī草埔底揣蟲食，頭殼ná戴一頂烏phú色ê帽仔，身軀身是咖啡色ê鳥仔毛。喘khuì ê時tsūn，頷頸仔thián大箍，bē輸是雞nuā仔hiah大隻。目睭大大蕊，tiānn-tiānn kah人sio對看，你khuann-khuann仔行倚伊一步，伊就tsiânn張持離你一步。Kah鳥保持幾个跤步遠，想beh kā創治，雄雄走倚--伊，伊suah tio̍h生驚，就飛起去樹尾頂，無看鳥影。
石磯仔
若講著石磯仔，伊是tsiok顧人怨，講tsiânn實--ê，m̄ bat看過伊ê廬山真面目，神祕kah kan-na有聽著聲，無看著影。
Tī維基百科揣伊ê相片，烏phú色ê毛，生做tsiânn細粒子，想bē到丹田tsiah有力，聲嗽tsiah-nī kuân。In無像粉鳥tī透早吵人ê眠，是半暝三更「tsuē tsuē tsuē」háu bē恬，歹睏癖ê我，tiānn-tiānn hōo in吵kah睏bē落眠。助眠ê音樂，聽幾若改，tsiânn無簡單睏ka-tsuē--ah！睏kah半暝仔，koh雄雄hōo in吵精神。Tī眠床頂，píng來píng去，心肝頭真giâu疑，in是按怎háu規暝，bē喙ta、bē忝頭，kám講lóng bē愛睏--hiooh？落尾仔認真揣資料，tsiah知影in是leh揣kah意ê鳥仔伴，tsiah ē叫bē煞，為愛情走天涯，祝福in khah緊揣著鳥仔伴，萬代gâu生湠。
燕仔
Koh來講燕仔，細漢bat聽爸母講，gîm-tsînn跤ê厝瓦面頂若有燕仔來做siū，siū喙ǹg厝內，就是好吉兆。
燕仔有靈性，揣著好地理tsiah ē來做siū，in ē「帶財入宅」，hōo tsit家伙仔有好運途，看in uì細細siū，khuann-khuann仔用塗肉lia̍p kah大大siū，m̄敢kā in攪吵。燕仔家庭一家伙安搭好勢，有食就有放，鳥屎tī gîm-tsînn放kah規大pû，想著in無的確phīng別款鳥仔khah有魔力，tsiah有法度為厝家紮來財富，khah艱苦mā ài歡喜做甘願受，逐工提掃梳掃、kuānn水桶tshiâng，tshiâng hōo清氣liu-liu。
Pan-kah
我tiānn-tiānn tī窗仔門外口，看著pan-kah tī我ê花khann生卵、pū囝，in kah人類仝款，實行一夫一妻制度。Pan-kah實在是值得呵咾，tsiok有家庭責任感--ê，公--ê kah母--ê輪班pū卵，一水pū兩粒卵。交班ê時間是tī早時仔，m̄-koh我看bē出siáng是輪日班、siáng是輪暗班。大約pū卵兩禮拜外，鳥仔囝就啄殼出世。飼鳥仔囝mā是輪流飼，飼囝ê時tsūn，兩爿翼股一直ia̍t bē煞，頭殼koh kuân-kuân低低，幌來幌去，kánn-ná leh跳舞。鳥仔囝ê喙long入去爸爸iah是媽媽ê喙內底，hōo爸母kā哺hōo爛爛、好消化ê食物，送去鳥仔囝ê喙內，飼囝大漢。
我ē記得阿媽講伊mā是用tsit个撇步飼孫仔大漢--lah！Tsiânn好佳哉，hit个孫仔m̄是我。
Pan-kah飼鳥仔囝飼kah大隻，mā大概兩禮拜外，in為著hōo鳥仔囝學習獨立（我家己臆--ê），就無koh飛--tńg-來，m̄知in kám有kā鳥仔囝sio辭--無？頭起先，兩隻鳥仔囝對窗仔門外口金金siòng，等爸母tńg來飼--in，等--啊等，tsîng透早等到暗暝，等--來--ê是失望。
我驚in iau--死，真好禮仔me飯粒仔tī花khann，m̄-koh，好心去hōo雷唚，in顛倒驚一tiô，掠做我beh掠--in。Koh來，我換掖白米，看in beh食--無？Mā是無彩工，無食半喙。Koh幾若工，早時仔tī窗仔門內面，偷偷仔bî，看in kám真正hiah耐iau。Ooh！Kan-na賰一隻niā-niā，隔tńg工，另外hit隻mā輸「鳥」m̄輸陣，飛走--出-去--ah！一水ê pan-kah來生湠，tsîng pū卵到鳥仔囝飛走，大概有個外月ê時間。
粉鳥
蹛tī半空中都市ê公寓，雖然無花園，iáu-koh想beh種東種西，窗仔門外口，鐵窗雨遮下面，來種寡花草，ē-tàng tsa̍h西照日，擋大路外口ê ing-ia。買花khann kah培養塗、tiām花子iah是買花栽，等伊發芽、puh-ínn，小可仔滿足種花草ê趣味。
M̄-koh，koh驚無頭神，bē記得沃水，iah是出門幾若工，花草ta死了了。我lóng盡量種m̄驚ta塗ê花草，ná像是沙漠玫瑰、瓊花、麒麟花、八卦紅等。頂年歇熱出外tshit-thô tsiânn個月，tńg來到厝，驚一tiô，花khann ê花草iáu tī--leh，suah koh看著一粒鳥仔卵，頭起先，掠做是pan-kah卵，m̄-koh，pan-kah卵無hiah大粒。
Iáu leh giâu疑tsit粒卵是啥mih鳥--ê，過無偌久，無張無持koh ke puh一粒卵，生卵ê鳥仔母mā知影是啥--looh！Kah我想--ê仝款——粉鳥。
原本掠做所有ê鳥仔kah燕仔仝款，lóng是揣著好地理tsiah來做siū，ē tshuā財koh tài富。另外一方面是仝款做人阿母ê心情，beh hōo伊穩心仔pū卵，mài kā伊拍生驚。Koh掠準粉鳥kah pan-kah仝款，個外月粉鳥囝大隻，就ē飛走，忍個外月就ē-sái。
落尾tsiah知影，粉鳥kah pan-kah自頭到尾lóng無仝款。
Khah早tshuā囡仔去溪頭tshit-thô，上ē記--得--ê是公園有tsiok濟粉鳥，逐隻lóng bē驚人，tī大樹跤真大pān。In肥肥ê身軀身，看著真清氣相，kah人行路仝款，倒跤、正跤一hua̍h一hua̍h行來行去，頭殼koh隨時sì-kè tàm頭巡視揣食，看著真古錐。
阮sa錢買飼料，hōo囡仔掖飼料tī塗跤kā in飼，做阿母ê我，囡仔做moo-lé-luh（model），徛tī邊--a提hip相機金金siòng，揣無仝款ê姿勢，掠上suí ê鏡頭，kā囡仔kah規陣iau-sâi ê粉鳥hip做伙，做囡仔細漢時成長ê記念。
30年前，iáu無網路，所有ê智識lóng tī冊本內底，學校若無教--著、阿母無講--著、報紙雜誌無讀--著，tsiok濟生活智識就m̄ bat半項。落尾有網路食kah飽，揣資料mā tsiah知影粉鳥屎、pan-kah屎lóng有tài病菌，ē敗害人類ê健康，尤其是細漢囡仔，抵抗力bái，koh-khah ài提防。
粉鳥pū卵ê時間比pan-kah ke tsiok久，粉鳥囝拄出世，bē輸是細隻鴨bî仔，毛草淺黃gâm色。看著真古錐，m̄-koh大隻了後，毛色就變做烏phú色--ê，粉鳥phīng pan-kah khah大隻，鳥仔屎ke真大pû，m̄-nā放tī花khann面頂，白鐵仔窗仔門mā uè kah滿滿是。上悽慘--ê是鳥仔囝大隻了後，伊認拄出世ê siū是in兜，鳥仔母早就無飛--tńg-來--ah，in iáu是kho̍k-kho̍k等，真mî-tsinn m̄甘願走。
花khann ê瓊花已經ta-lian--ah，沙漠玫瑰ê葉仔mā lak了了--ah！有一暝，規身軀m̄知按怎，癢kah擋bē tiâu，掠準是食著無拄好，起凊mo̍oh。越頭想想--leh，tsit站仔koh無食海產類--ê，tng-leh抹萬金油ê時tsūn，雄雄想--著，無的確是粉鳥屎ê緣故。
害了了！窗仔門關kah ba̍t-tsiuh-tsiuh，病菌ē飛天koh鑽地，攻入來我ê地盤，走入來我ê房間--ah！看著窗仔門外口，鳥屎規大phiàn，實在tsiok厭氣。心肝掠坦橫，ài出手解決--ah。
先掛喙am、手lok仔，sa一枝長棍仔，beh來趕粉鳥。Tsit間房間，拄好是三角窗，窗仔門大約有四窗闊。趕in去tsit爿，in走去hit爿，趕in去hit爿，in koh走去tsit爿，kah我bih sio揣，活beh氣--死。Koh出絕招，tī長棍仔尾包報紙，一直倚in ê身軀身吵lā，終其尾，in tio̍h生驚，姑不而將飛走--出-去。
Suà--落-來，先kā花ue鉸到底，tàn-hiat-ka̍k，khioh-khioh--leh，囥tī塑膠袋仔內底，花khann隨个仔搬走，koh來kuānn水桶，用布lù仔出大力lù黏tī窗仔門、紗窗、白鐵仔kuainn ê鳥仔屎。Koh來清房間，地板、桌面、眠床、倚窗仔門ê衫架仔，tsiâu拭hōo清氣。有網友建議tī窗仔門外口用漂白水噴噴--leh，縛光碟片、紅布條仔，in就m̄敢koh飛--tńg-來。
Ǹg望粉鳥mài koh tńg--來，mài koh透早kā我攪吵，hōo我睏眠飽足、精神好。
