出世tī台灣
作者／黃土水（N̂g Thôo-tsuí）
譯者／林東榮
作者是日本時代ê台灣雕刻家，本文原文是日文，1922年tī《東洋》雜誌刊出，表達伊創作台灣美術ê心情kah期待。Tsit篇文章已經有幾个中譯版本（全文iah部份內容），tsit擺配合黃土水經典作品〈甘露水〉記錄片tsiūnn電影院，頭一擺全文台譯。
世間ê人tsiânn愛批評講：藝術家是怪人。我mā是藝術家ê一个小份子，一直tsiânn注意mài hông講是怪人，m̄-koh，iáu是tiānn-tiānn ē hōo朋友提醒講：你有小可仔怪怪，hân-bān kah人puânn-nuá，阮lóng ē煩惱。因為tī造形藝術內底，雕刻上kài費時間（完成一个仝程度ê作品，日本畫需要一工，西洋畫ài一禮拜，雕刻tio̍h一月日，量約仔是tsit款情形）。一个雕刻品ê製作，tio̍h一兩月日甚至五六月日，小可仔khah厚工--ê就tio̍h一兩年甚至tio̍h三四年。罕罕--à mā有人用十外外年，甚至一世人就kan-na做一項作品。
自古以來就有講七十是古稀，m̄-koh kā算khah長--leh，人ê性命應該mā是七十左右。經過短短ê七十年，tsit个寶貴肉身mā tio̍h送去稀微ê墓仔埔，tī hia變做規港ê臭味kah ngia̍uh-ngia̍uh趖ê屍蟲。人ê性命實在是短短--à。M̄是，若是活kah七十算好--ê，實際上「人生五十」就是一般ê水準，親像佛教mā有講「tuì浴桶到打桶，五十年」1，人ê平均年齡是無到五十--ê。家己mā m̄知幾歲ē離開tsit个世間，若準是tī人ê平均年歲來死，表示人生已經過一半--ah。Tī賰ê tsit幾年，到底是有法度做偌濟khang-khuè--leh？
雕刻家ê使命就是創造好作品，hōo人ê生活美化。為beh完成tsit个尊貴ê使命，kan-na做一項作品就m̄是簡單ê khang-khuè。想著tsia-ê代誌，阮根本就無hit款閒工，親像別人án-ne，薰是大大喙ná suh、tī街仔路leh luā-luā趖，酒是lim kah半暝、講一寡仔五四三ê話leh討債貴重ê時間。
Beh按怎tsiah thang hōo雕像koh-khah suí-khuì？Beh按怎tsiah thang hōo石仔刻khah緊？Tuì透早到暗時，就kan-na leh想雕刻ê代誌，自然tio̍h kā kah人ê交陪來疏遠，tse mā是該當然--ê。一座只是五六尺ê石像tio̍h-ài刻一年。透早一直到暗，摃搥仔攑--leh，kho̍k kho̍k kho̍k，幾十萬擺、幾千萬擺leh摃石材，到底是摃幾擺，實在是算to算bē了。若準he內底有一擺失覺察，只是摃了差一肢tsíng頭仔大，代誌就大條--ah！到tann ê骨力拍拚，ē用得講就變做水phue̍h。Mài算家己拍拚ê工錢，石材ê費用kah運金，iáu有模仔ê費用、石膏費、器具費kah其他種種ê費用，算算--leh m̄是小可仔錢。
Tse對散赤無錢ê阮，是上kài恐怖ê代誌。當今是黃金萬能ê時代，創作好作品若是無錢，想beh創啥就lóng做bē到。只賰雙手合掌向天吐khuì以外是無半步。因為一屑屑仔ê無注意，就ē hōo貴重ê時間kah大bong ê費用lóng放水流，想著tse阮是一分一秒to bē-tàng放鬆。親像án-ne，逐工，雕刻ê代誌就kā阮ê心肝té kah tīnn-tīnn，kah人ê交陪就自然bē去關心。Tse m̄-nā是阮án-ne，一般ê藝術家大概lóng是tsit款。Tsiah ē來得著「真濟藝術家是怪人」ê歹風聲。
有一工，協會ê三井先生來到我tsit个藝術家ê小份子、也就是做一个怪人ê親tsiânn ê所在，看我ē-tàng來寫一篇關係著藝術ê感想文，來hōo為東亞文化leh盡力ê雜誌《東洋》--bē？本tsiânn，就親像頭前講--ê，我tsit个逐工lóng攑摃搥仔leh練習ê人，叫我攑筆來寫文章實在是揣m̄-tio̍h人。不而過，想著tī tsiah-nī寒ê日子，特別千里迢迢來到門口iáu是雪積規堆、tī郊外ê工作室揣--我，bē-sái得凊彩就kâng拒絕，就án-ne kā允--落-來。Iáu-m̄-koh，對東洋ê藝術iah是世界ê藝術大大發表議論，對我tsit个初入洞門ê人是做bē到--ê。我只是kā牽kha̍p著台灣--ê，tshiâng-tsāi leh想ê代誌簡單講--一-下，來回報三井先生ê期待。
我ê美麗島
出世tī hit个國家、就愛hit个國家，出世tī hit塊土地、就愛hit塊土地，tse是人ê本性。藝術無國境，去到佗位應該lóng仝款，m̄-koh，iáu是家己出世ê土地上懷念。因為阮台灣是美麗島，就特別懷念。不而過，一擺to m̄ bat蹛過台灣ê內地2人，真濟人認為台灣是親像火熱地獄hit款hip熱ê所在，是惡病流行ê所在，而且蹛真濟比猛獸khah恐怖ê生番。真濟人lóng認為ē去hit款所在--ê，m̄是tsiânn hònn奇ê人，就是有死ê覺悟ê人。我tī東京已經蹛六七年，tiānn-tiānn ē拄著tsit款hōo人憤慨ê質問，m̄是，he是ē hōo人笑kah píng--過ê奇問。
有人問講「台灣kám是kah內地仝款食飯？」iah是問講「你ê祖先kám mā bat tsuî過人頭？」Koh lóng是正經leh問--ê，講ē憤慨khah輸講對hit个無知ē tsheh。Koh有一位內地ê朋友，kā傳家ê寶刀攑來hōo我看，kā我講「有一个親tsiânn蹛tī台中，後個月中旬beh去看--伊，beh攑tsit支刀做護身用」koh激一个決心beh大冒險ê面腔。我感覺siunn hàm古，m̄-koh iáu是頂真詳細kā開破：「台灣m̄是一sì-kè lóng有生番，準講有，mā m̄是hiah-nī恐怖，並無啥mi̍h」，án-ne好好仔kā講了後，伊tsiah khah了解。
親像án-ne，內地ê人lóng是leh hàm想講：去到台灣ê田庄，規个lóng是生番，m̄-koh，台灣350萬ê人口內底、生番tsiah占七八萬niā-niā。而且大部份lóng是蹛tī人罕到ê深山林內。M̄管按怎，內地人對台灣ê認bat tsit層代誌是生疏kah ē驚死人，連有相當地位ê有識階級，想法iáu是tsiânn tîng-tânn，就mài講普通人--ah。對台灣ê無知、誤解是比lán所想--ê koh-khah嚴重。台灣絕對m̄是內地人所想ê蠻地，實在是難得ê寶島。Tse是去過台灣ê人lóng ē贊同--ê。
譬如講，比內地富士山khah kuân ê新高山（玉山）3、雪山、秀姑巒山諸峰，kah其他南北sio-thàng-sio連ê中央山脈ê高山峻嶺，lóng是leh傳達自然ê lè-táu。Tī島ê西部，流tī平洋kah山崙之間ê數十條溪流，有親像五花十色ê畫材畫--出-來ê翠青ê茶園、瓜仔園。中部是青lìng-lìng ê稻仔湧，南部是甜but-but ê甘蔗園、koh有lò-siak-siak ê檳榔樹，am-phà-phà ê榕仔樹，有林投樹林、有竹bôo、有鹽田、有飼魚池，山--裡有金仔、塗炭kah其他各種ê礦物，木材樟腦等等ê產出濟，真正是國境之南ê寶庫，常夏ê天氣是規年thàng天草木青青am-phà-phà。
春天，tsínn葉翠青ê垂柳iah是深綠ê松樹、杉仔樹下跤，桃花滿開sio爭比suí；夏天，清清清萬古ê潭水內底有一搭一搭幼秀水草ê日月潭船遊；秋天，淡水河邊看黃昏時ê五彩日頭；冬天，中央山脈彎來khiau去罩雪ê高山峻嶺，特別是tī群山中phok--出-來ê新高山雄姿，實在是美麗壯觀無tè比。莫怪西洋人ē感嘆kah，kā號做「Formosa，美麗之島」。親像án-ne，阮台灣是山容水態多變化、天賜ê產物ē用得講是ē了bē盡，kā叫做「國境之南ê寶庫」iah是「地上ê樂園」bē用得講是呵咾過頭。
幼稚ê藝術
Lán ê美麗島有tsit款豐富ê天然之美，悲哀ê代誌是蹛tī tsia ê人，有一大部份對「美是啥mi̍h」一點點仔to無了解。Tī tse天賜之美頂kuân，加添一寡仔人工之美，來美化lán ê生活、以高尚優美ê精神hōo人生過著khah有意義ê人是真少。本島人對美感、趣味ê生活完全kā放目。山腹有樹林，樹林近圍仔ê兩三間農家厝ê煙筒leh tshìng火薰，鋤頭擔肩頭ê作田人行tī田岸tng beh tńg去厝，ná攑頭看日頭落山ê美麗光景。描寫tsit款自然雅氣ê畫，iah是飼牛囡仔騎tī水牛頂、歡喜kah leh pûn phín仔tsit款健丟風趣ê雕刻作品，ē想beh欣賞ê人iáu是真少，顛倒酒lim kah酒精中毒，畫妝畫kah怪怪，iau飽吵ê人tsiânn濟——tse到底是啥mi̍h--lah！
Tse tī上流社會koh特別濟，為著lán台灣，實在hōo人煩惱擔憂。Bat聽著某一位台灣ê大好額人、社會地位mā真kuân ê查埔人，家己khai萬金娶妓女，一暗ê宴會百金千金lóng bē m̄甘，m̄-koh聽著某出名畫家ê一幅油畫賣500箍，跤就軟--去。Kan-na知影mi̍h貨ê尊貴，m̄知影精神上是koh-khah尊貴ê人，所做--ê就是tsit款代誌。而且tī台灣，tsit陣人徛tī社會ê kuân位、kā所有權勢la̍k tī手頭。島嶼ê人是tī無明ê烏暗leh揣無路，kan-na tī-leh做mi̍h貨萬能ê卑賤ê夢，現此時ê情形就是án-ne，講--起-來mā是當然ê道理。
Lán來kā看māi！台灣佗一个家庭ē發出藝術、美感ê芳味？Tī中流以下ê家庭所妝thānn ê mi̍h件千篇一律，壁龕仔lóng是掛對聯，iah是觀音、關公、土地公等等m̄值得三sián錢ê印刷tshat仔。Koh來，tī中流以上ê家庭，lóng是本tsiânn就應該kā tàn-hìnn-sak ê仿水墨畫、iah是騙囡仔ê he色彩花pa-li-niau ê花鳥畫，罕罕--à有頭kah身軀平大ê怪物雕刻品真恐怖leh笑。
若是到大大細細數十間ê神廟佛寺巡--一-遍，lóng是無味無素ê mi̍h件，門是門神、金童玉女、老宦，壁是龍虎，欄杆是太公望釣魚、文王耕作，nî-tsînn下是魚蝦，koh lóng是親像囡仔烏白tsō ê程度，只是照抄bái ê古例、傳統，無添一點仔新ê意義kah美ê趣味，án-ne顛倒是kā古早人用舊經驗做基礎所創造得--著ê藝術毀損--去。古物店是排真濟神獸石像、木雕佛身、塗做ê神像。
看著手是跤幾若倍大ê神像，我是bē忍得就隨笑--出-來。M̄是，應該講是tsiânn傷心。不而過，應該是因為宇宙萬物lóng是tuì神ê手創造--出-來--ê，beh表示神ê手是偉大--ê，tsiah ē án-ne做mā無的確？也bat拜過目睭是喙兩三倍大ê佛像。佛祖是佛法無窮，佛眼若開，人ê善惡是看kah一分一厘to bē精差，所以目睭就kā做khah大？
去到台灣第一、koh是tsiânn做信仰中心ê北港朝天宮媽祖廟，厝頂是花紅柳綠刻kah tīnn-tīnn，五花十色ê茶碗kah濟濟ê雕刻人像。Tse確實是小可仔有變化，m̄-koh，聽著有人展講tse是台灣第一ê藝術hit時，凊汗隨流--出-來。真hiau-hīng，我想beh huah：台灣ê藝術是幼稚--ê！是零分--ê！
仝鄉ê少年有志，定著來做藝術家！
親愛ê有志！一世人只是短短五十年，準講有兩倍長mā是一目nih niâ。時鐘ê聲一刻一刻leh消磨人ê命，日月ê圓kah khih kám m̄是leh tshuā lán行ǹg墓仔埔去？光陰親像風送箭，有一工，lán ê壽命盡、死期到，我ê肉爛做肥，你ê骨頭碎做hu。Tuì宇宙無限ê時間來看，人生根本就是短kah m̄值得講。真正是ná露水ná sih-nah。莫怪蘇東坡ē感嘆「寄蜉蝣於天地，渺滄海之一粟」。想著盡心盡力、惜命命寶惜到tann ê tsit个肉身，磨練koh磨練ê頭殼，鍛鍊koh鍛鍊ê雙手，有一工ē變做可憐ê幾塊死人骨頭，埋入去墓地塗底，lán人ê肉身實在是虛幻無常。
親像秦始皇kah漢武帝án-ne，一心走揣長壽ê靈藥iáu是註死走bē離。祈神信佛，對死仝款是一點仔步數to無。少年人想講奶酸是不老之藥、食--落了後suah làu屎；老大人想beh khah少年、khah快樂，注射了後顛倒早死。東西古今身份kuân低lóng無差別，人一定無法度保持萬年ê歲壽。只不過，有一个永久bē死ê方法，he就是精神上ê長生不老。親像孔子公，親像釋迦摩尼、親像耶穌基督，iah是親像Dante（『但丁』）、親像Michelangelo（『米開朗基羅』）、親像Raphael（『拉斐爾』），tsia-ê人tī肉體死了後，千百年後ê今仔日，精神上iáu是保持bē死ê性命。
親愛ê有志！Lán來停止追求物質上ê快樂，mài koh追求長生不老ê法度，kám m̄好？以科學ê發明來利益人類，koh以哲理ê發現來貢獻人生mā ē-sái--得。進一步對lán ê立場來講，創作好作品留--落-來，kā人ê生活美化mā好。至少阮藝術家流血流汗創作ê作品，是一直到完全sńg-tn̄g tsiah算死--去。
少年ê有志！藝術家ē用得講是長生不老--ê。有自信ê人就請你來！貪戀眼前ê榮華富貴，m̄ bat精神上ê尊貴，hōo人討厭ê阮故鄉ê大好額人，m̄是，只有臭銅sian，色慾橫流ê上流人士死了後，到底iáu有啥mi̍h留--落-來--leh？留--落-來--ê是kan-na大某細姨冤家sio拍，放蕩囝孫歹看面為財產吵家lā宅nā-tiānn。In ê財寶、in ê榮華富貴lóng免欣羨。Kā一時ê肉體享樂tàn-hìnn-sak，來為永久ê靈魂活--落-去！
藝術家是困苦--ê。He kan-na是肉體上、物質上ê困苦，tī心靈上、精神上是無盡磅ê快活。用大自然ê烏塗lia̍p出健丟ê囡仔，用紅木刻出元氣十足、活跳跳ê查埔人。用白石雕出比棉仔koh-khah溫柔ê美人。而且是lóng bē死、bē老ê人。一丸塗、一塊柴、一粒石頭，kā變做家己所想ê形、beh愛ê款，tsit款創作ê快樂是別人sian想to想bē出--來--ê。仝鄉ê少年有志，來藝術ê道路thián翼。Tī hia，花開kah滿滿是，鳥仔聲tsiuh-tsiuh叫無停睏。啊！Lán做伙來去hit个法喜充滿ê所在。
藝術上ê「Formosa時代」
Lán台灣是幸iah不幸？有豐富ê天然物產資源，就án-ne物質文明日日月月leh進步，m̄-koh，悲哀--ê是精神文明suah tuè無著。阮tī tsia beh來大聲呼請：無kā tsia-ê靈叫醒bē-sái--得！準講hōo人罵講是起痟--ê，hōo人叫做起酒khong--ê，阮mā是beh ǹg lán ê目標，犁頭戴鼎、勇猛向前衝。Koh來，為著lán鄉土ê面目，對hia-ê物質萬能主義ê人lán tio̍h勇敢宣戰。無了解藝術、對人生ê精神化無認bat ê人民，前途是烏暗--ê。阮是一定beh tshia拚到底。不而過，阮ê戰鬥是久長--ê，而且應該mā是拚生拚死ê惡戰。是按怎tio̍h án-ne
--leh？Tī阮ê故鄉，iáu無一个kah阮做伙拍拚ê藝術之子。Tio̍h，後過是m̄知，tsit-tsūn ê台灣是連一个日本畫家、一个西洋畫家、一个工藝美術家to無！不而過，台灣是有飽tīnn天賜資源ê地上樂園。
總有一工，故鄉ê人ē覺醒，少年人ê意志thang東西南北自由去，lán tio̍h-ài相信，偉大ê藝術家ē規陣規陣湧--出-來。Lán就好禮仔來ǹg望，骨力kā家己ê底蒂拍hōo在，為beh kā藝術釘根，mā tio̍h mî-mî-tsinn-tsinn、勇敢對故鄉大聲鼓吹。Tse m̄是我個人ê空思夢想，ǹg望藝術上ê「Formosa時代」早日來到。
世間ê人tsiânn愛批評講：藝術家是怪人。我mā是藝術家ê一个小份子，一直tsiânn注意mài hông講是怪人，m̄-koh，iáu是tiānn-tiānn ē hōo朋友提醒講：你有小可仔怪怪，hân-bān kah人puânn-nuá，阮lóng ē煩惱。因為tī造形藝術內底，雕刻上kài費時間（完成一个仝程度ê作品，日本畫需要一工，西洋畫ài一禮拜，雕刻tio̍h一月日，量約仔是tsit款情形）。一个雕刻品ê製作，tio̍h一兩月日甚至五六月日，小可仔khah厚工--ê就tio̍h一兩年甚至tio̍h三四年。罕罕--à mā有人用十外外年，甚至一世人就kan-na做一項作品。
自古以來就有講七十是古稀，m̄-koh kā算khah長--leh，人ê性命應該mā是七十左右。經過短短ê七十年，tsit个寶貴肉身mā tio̍h送去稀微ê墓仔埔，tī hia變做規港ê臭味kah ngia̍uh-ngia̍uh趖ê屍蟲。人ê性命實在是短短--à。M̄是，若是活kah七十算好--ê，實際上「人生五十」就是一般ê水準，親像佛教mā有講「tuì浴桶到打桶，五十年」1，人ê平均年齡是無到五十--ê。家己mā m̄知幾歲ē離開tsit个世間，若準是tī人ê平均年歲來死，表示人生已經過一半--ah。Tī賰ê tsit幾年，到底是有法度做偌濟khang-khuè--leh？
雕刻家ê使命就是創造好作品，hōo人ê生活美化。為beh完成tsit个尊貴ê使命，kan-na做一項作品就m̄是簡單ê khang-khuè。想著tsia-ê代誌，阮根本就無hit款閒工，親像別人án-ne，薰是大大喙ná suh、tī街仔路leh luā-luā趖，酒是lim kah半暝、講一寡仔五四三ê話leh討債貴重ê時間。
Beh按怎tsiah thang hōo雕像koh-khah suí-khuì？Beh按怎tsiah thang hōo石仔刻khah緊？Tuì透早到暗時，就kan-na leh想雕刻ê代誌，自然tio̍h kā kah人ê交陪來疏遠，tse mā是該當然--ê。一座只是五六尺ê石像tio̍h-ài刻一年。透早一直到暗，摃搥仔攑--leh，kho̍k kho̍k kho̍k，幾十萬擺、幾千萬擺leh摃石材，到底是摃幾擺，實在是算to算bē了。若準he內底有一擺失覺察，只是摃了差一肢tsíng頭仔大，代誌就大條--ah！到tann ê骨力拍拚，ē用得講就變做水phue̍h。Mài算家己拍拚ê工錢，石材ê費用kah運金，iáu有模仔ê費用、石膏費、器具費kah其他種種ê費用，算算--leh m̄是小可仔錢。
Tse對散赤無錢ê阮，是上kài恐怖ê代誌。當今是黃金萬能ê時代，創作好作品若是無錢，想beh創啥就lóng做bē到。只賰雙手合掌向天吐khuì以外是無半步。因為一屑屑仔ê無注意，就ē hōo貴重ê時間kah大bong ê費用lóng放水流，想著tse阮是一分一秒to bē-tàng放鬆。親像án-ne，逐工，雕刻ê代誌就kā阮ê心肝té kah tīnn-tīnn，kah人ê交陪就自然bē去關心。Tse m̄-nā是阮án-ne，一般ê藝術家大概lóng是tsit款。Tsiah ē來得著「真濟藝術家是怪人」ê歹風聲。
有一工，協會ê三井先生來到我tsit个藝術家ê小份子、也就是做一个怪人ê親tsiânn ê所在，看我ē-tàng來寫一篇關係著藝術ê感想文，來hōo為東亞文化leh盡力ê雜誌《東洋》--bē？本tsiânn，就親像頭前講--ê，我tsit个逐工lóng攑摃搥仔leh練習ê人，叫我攑筆來寫文章實在是揣m̄-tio̍h人。不而過，想著tī tsiah-nī寒ê日子，特別千里迢迢來到門口iáu是雪積規堆、tī郊外ê工作室揣--我，bē-sái得凊彩就kâng拒絕，就án-ne kā允--落-來。Iáu-m̄-koh，對東洋ê藝術iah是世界ê藝術大大發表議論，對我tsit个初入洞門ê人是做bē到--ê。我只是kā牽kha̍p著台灣--ê，tshiâng-tsāi leh想ê代誌簡單講--一-下，來回報三井先生ê期待。
我ê美麗島
出世tī hit个國家、就愛hit个國家，出世tī hit塊土地、就愛hit塊土地，tse是人ê本性。藝術無國境，去到佗位應該lóng仝款，m̄-koh，iáu是家己出世ê土地上懷念。因為阮台灣是美麗島，就特別懷念。不而過，一擺to m̄ bat蹛過台灣ê內地2人，真濟人認為台灣是親像火熱地獄hit款hip熱ê所在，是惡病流行ê所在，而且蹛真濟比猛獸khah恐怖ê生番。真濟人lóng認為ē去hit款所在--ê，m̄是tsiânn hònn奇ê人，就是有死ê覺悟ê人。我tī東京已經蹛六七年，tiānn-tiānn ē拄著tsit款hōo人憤慨ê質問，m̄是，he是ē hōo人笑kah píng--過ê奇問。
有人問講「台灣kám是kah內地仝款食飯？」iah是問講「你ê祖先kám mā bat tsuî過人頭？」Koh lóng是正經leh問--ê，講ē憤慨khah輸講對hit个無知ē tsheh。Koh有一位內地ê朋友，kā傳家ê寶刀攑來hōo我看，kā我講「有一个親tsiânn蹛tī台中，後個月中旬beh去看--伊，beh攑tsit支刀做護身用」koh激一个決心beh大冒險ê面腔。我感覺siunn hàm古，m̄-koh iáu是頂真詳細kā開破：「台灣m̄是一sì-kè lóng有生番，準講有，mā m̄是hiah-nī恐怖，並無啥mi̍h」，án-ne好好仔kā講了後，伊tsiah khah了解。
親像án-ne，內地ê人lóng是leh hàm想講：去到台灣ê田庄，規个lóng是生番，m̄-koh，台灣350萬ê人口內底、生番tsiah占七八萬niā-niā。而且大部份lóng是蹛tī人罕到ê深山林內。M̄管按怎，內地人對台灣ê認bat tsit層代誌是生疏kah ē驚死人，連有相當地位ê有識階級，想法iáu是tsiânn tîng-tânn，就mài講普通人--ah。對台灣ê無知、誤解是比lán所想--ê koh-khah嚴重。台灣絕對m̄是內地人所想ê蠻地，實在是難得ê寶島。Tse是去過台灣ê人lóng ē贊同--ê。
譬如講，比內地富士山khah kuân ê新高山（玉山）3、雪山、秀姑巒山諸峰，kah其他南北sio-thàng-sio連ê中央山脈ê高山峻嶺，lóng是leh傳達自然ê lè-táu。Tī島ê西部，流tī平洋kah山崙之間ê數十條溪流，有親像五花十色ê畫材畫--出-來ê翠青ê茶園、瓜仔園。中部是青lìng-lìng ê稻仔湧，南部是甜but-but ê甘蔗園、koh有lò-siak-siak ê檳榔樹，am-phà-phà ê榕仔樹，有林投樹林、有竹bôo、有鹽田、有飼魚池，山--裡有金仔、塗炭kah其他各種ê礦物，木材樟腦等等ê產出濟，真正是國境之南ê寶庫，常夏ê天氣是規年thàng天草木青青am-phà-phà。
春天，tsínn葉翠青ê垂柳iah是深綠ê松樹、杉仔樹下跤，桃花滿開sio爭比suí；夏天，清清清萬古ê潭水內底有一搭一搭幼秀水草ê日月潭船遊；秋天，淡水河邊看黃昏時ê五彩日頭；冬天，中央山脈彎來khiau去罩雪ê高山峻嶺，特別是tī群山中phok--出-來ê新高山雄姿，實在是美麗壯觀無tè比。莫怪西洋人ē感嘆kah，kā號做「Formosa，美麗之島」。親像án-ne，阮台灣是山容水態多變化、天賜ê產物ē用得講是ē了bē盡，kā叫做「國境之南ê寶庫」iah是「地上ê樂園」bē用得講是呵咾過頭。
幼稚ê藝術
Lán ê美麗島有tsit款豐富ê天然之美，悲哀ê代誌是蹛tī tsia ê人，有一大部份對「美是啥mi̍h」一點點仔to無了解。Tī tse天賜之美頂kuân，加添一寡仔人工之美，來美化lán ê生活、以高尚優美ê精神hōo人生過著khah有意義ê人是真少。本島人對美感、趣味ê生活完全kā放目。山腹有樹林，樹林近圍仔ê兩三間農家厝ê煙筒leh tshìng火薰，鋤頭擔肩頭ê作田人行tī田岸tng beh tńg去厝，ná攑頭看日頭落山ê美麗光景。描寫tsit款自然雅氣ê畫，iah是飼牛囡仔騎tī水牛頂、歡喜kah leh pûn phín仔tsit款健丟風趣ê雕刻作品，ē想beh欣賞ê人iáu是真少，顛倒酒lim kah酒精中毒，畫妝畫kah怪怪，iau飽吵ê人tsiânn濟——tse到底是啥mi̍h--lah！
Tse tī上流社會koh特別濟，為著lán台灣，實在hōo人煩惱擔憂。Bat聽著某一位台灣ê大好額人、社會地位mā真kuân ê查埔人，家己khai萬金娶妓女，一暗ê宴會百金千金lóng bē m̄甘，m̄-koh聽著某出名畫家ê一幅油畫賣500箍，跤就軟--去。Kan-na知影mi̍h貨ê尊貴，m̄知影精神上是koh-khah尊貴ê人，所做--ê就是tsit款代誌。而且tī台灣，tsit陣人徛tī社會ê kuân位、kā所有權勢la̍k tī手頭。島嶼ê人是tī無明ê烏暗leh揣無路，kan-na tī-leh做mi̍h貨萬能ê卑賤ê夢，現此時ê情形就是án-ne，講--起-來mā是當然ê道理。
Lán來kā看māi！台灣佗一个家庭ē發出藝術、美感ê芳味？Tī中流以下ê家庭所妝thānn ê mi̍h件千篇一律，壁龕仔lóng是掛對聯，iah是觀音、關公、土地公等等m̄值得三sián錢ê印刷tshat仔。Koh來，tī中流以上ê家庭，lóng是本tsiânn就應該kā tàn-hìnn-sak ê仿水墨畫、iah是騙囡仔ê he色彩花pa-li-niau ê花鳥畫，罕罕--à有頭kah身軀平大ê怪物雕刻品真恐怖leh笑。
若是到大大細細數十間ê神廟佛寺巡--一-遍，lóng是無味無素ê mi̍h件，門是門神、金童玉女、老宦，壁是龍虎，欄杆是太公望釣魚、文王耕作，nî-tsînn下是魚蝦，koh lóng是親像囡仔烏白tsō ê程度，只是照抄bái ê古例、傳統，無添一點仔新ê意義kah美ê趣味，án-ne顛倒是kā古早人用舊經驗做基礎所創造得--著ê藝術毀損--去。古物店是排真濟神獸石像、木雕佛身、塗做ê神像。
看著手是跤幾若倍大ê神像，我是bē忍得就隨笑--出-來。M̄是，應該講是tsiânn傷心。不而過，應該是因為宇宙萬物lóng是tuì神ê手創造--出-來--ê，beh表示神ê手是偉大--ê，tsiah ē án-ne做mā無的確？也bat拜過目睭是喙兩三倍大ê佛像。佛祖是佛法無窮，佛眼若開，人ê善惡是看kah一分一厘to bē精差，所以目睭就kā做khah大？
去到台灣第一、koh是tsiânn做信仰中心ê北港朝天宮媽祖廟，厝頂是花紅柳綠刻kah tīnn-tīnn，五花十色ê茶碗kah濟濟ê雕刻人像。Tse確實是小可仔有變化，m̄-koh，聽著有人展講tse是台灣第一ê藝術hit時，凊汗隨流--出-來。真hiau-hīng，我想beh huah：台灣ê藝術是幼稚--ê！是零分--ê！
仝鄉ê少年有志，定著來做藝術家！
親愛ê有志！一世人只是短短五十年，準講有兩倍長mā是一目nih niâ。時鐘ê聲一刻一刻leh消磨人ê命，日月ê圓kah khih kám m̄是leh tshuā lán行ǹg墓仔埔去？光陰親像風送箭，有一工，lán ê壽命盡、死期到，我ê肉爛做肥，你ê骨頭碎做hu。Tuì宇宙無限ê時間來看，人生根本就是短kah m̄值得講。真正是ná露水ná sih-nah。莫怪蘇東坡ē感嘆「寄蜉蝣於天地，渺滄海之一粟」。想著盡心盡力、惜命命寶惜到tann ê tsit个肉身，磨練koh磨練ê頭殼，鍛鍊koh鍛鍊ê雙手，有一工ē變做可憐ê幾塊死人骨頭，埋入去墓地塗底，lán人ê肉身實在是虛幻無常。
親像秦始皇kah漢武帝án-ne，一心走揣長壽ê靈藥iáu是註死走bē離。祈神信佛，對死仝款是一點仔步數to無。少年人想講奶酸是不老之藥、食--落了後suah làu屎；老大人想beh khah少年、khah快樂，注射了後顛倒早死。東西古今身份kuân低lóng無差別，人一定無法度保持萬年ê歲壽。只不過，有一个永久bē死ê方法，he就是精神上ê長生不老。親像孔子公，親像釋迦摩尼、親像耶穌基督，iah是親像Dante（『但丁』）、親像Michelangelo（『米開朗基羅』）、親像Raphael（『拉斐爾』），tsia-ê人tī肉體死了後，千百年後ê今仔日，精神上iáu是保持bē死ê性命。
親愛ê有志！Lán來停止追求物質上ê快樂，mài koh追求長生不老ê法度，kám m̄好？以科學ê發明來利益人類，koh以哲理ê發現來貢獻人生mā ē-sái--得。進一步對lán ê立場來講，創作好作品留--落-來，kā人ê生活美化mā好。至少阮藝術家流血流汗創作ê作品，是一直到完全sńg-tn̄g tsiah算死--去。
少年ê有志！藝術家ē用得講是長生不老--ê。有自信ê人就請你來！貪戀眼前ê榮華富貴，m̄ bat精神上ê尊貴，hōo人討厭ê阮故鄉ê大好額人，m̄是，只有臭銅sian，色慾橫流ê上流人士死了後，到底iáu有啥mi̍h留--落-來--leh？留--落-來--ê是kan-na大某細姨冤家sio拍，放蕩囝孫歹看面為財產吵家lā宅nā-tiānn。In ê財寶、in ê榮華富貴lóng免欣羨。Kā一時ê肉體享樂tàn-hìnn-sak，來為永久ê靈魂活--落-去！
藝術家是困苦--ê。He kan-na是肉體上、物質上ê困苦，tī心靈上、精神上是無盡磅ê快活。用大自然ê烏塗lia̍p出健丟ê囡仔，用紅木刻出元氣十足、活跳跳ê查埔人。用白石雕出比棉仔koh-khah溫柔ê美人。而且是lóng bē死、bē老ê人。一丸塗、一塊柴、一粒石頭，kā變做家己所想ê形、beh愛ê款，tsit款創作ê快樂是別人sian想to想bē出--來--ê。仝鄉ê少年有志，來藝術ê道路thián翼。Tī hia，花開kah滿滿是，鳥仔聲tsiuh-tsiuh叫無停睏。啊！Lán做伙來去hit个法喜充滿ê所在。
藝術上ê「Formosa時代」
Lán台灣是幸iah不幸？有豐富ê天然物產資源，就án-ne物質文明日日月月leh進步，m̄-koh，悲哀--ê是精神文明suah tuè無著。阮tī tsia beh來大聲呼請：無kā tsia-ê靈叫醒bē-sái--得！準講hōo人罵講是起痟--ê，hōo人叫做起酒khong--ê，阮mā是beh ǹg lán ê目標，犁頭戴鼎、勇猛向前衝。Koh來，為著lán鄉土ê面目，對hia-ê物質萬能主義ê人lán tio̍h勇敢宣戰。無了解藝術、對人生ê精神化無認bat ê人民，前途是烏暗--ê。阮是一定beh tshia拚到底。不而過，阮ê戰鬥是久長--ê，而且應該mā是拚生拚死ê惡戰。是按怎tio̍h án-ne
--leh？Tī阮ê故鄉，iáu無一个kah阮做伙拍拚ê藝術之子。Tio̍h，後過是m̄知，tsit-tsūn ê台灣是連一个日本畫家、一个西洋畫家、一个工藝美術家to無！不而過，台灣是有飽tīnn天賜資源ê地上樂園。
總有一工，故鄉ê人ē覺醒，少年人ê意志thang東西南北自由去，lán tio̍h-ài相信，偉大ê藝術家ē規陣規陣湧--出-來。Lán就好禮仔來ǹg望，骨力kā家己ê底蒂拍hōo在，為beh kā藝術釘根，mā tio̍h mî-mî-tsinn-tsinn、勇敢對故鄉大聲鼓吹。Tse m̄是我個人ê空思夢想，ǹg望藝術上ê「Formosa時代」早日來到。
1 Tsit句話ê原文：「盥より盥に帰る五十年」，是明治大正時代ê俳人河東碧梧桐（かわひがし へきごとう）辭世ê時做ê俳句。Tī日本，人生--出-來ê時，用浴桶（盥）kā洗身軀，死ê時，用面桶（盥）té水來拭身軀。直譯是「tuì浴桶來，到面桶tńg--去，五十年」。台語ê「打桶」是喪事ê一个儀式，tī tsia用來表達過身（tńg--去），就kā譯做「tuì浴桶到打桶，五十年」。
2編註：日本時代kā日本本土叫做「內地」，用來kah「殖民地」台灣、朝鮮做區分。
3編註：日本時代kā玉山叫做「新高山」，因為比日本本土上kuân ê富士山koh-khah kuân。
2編註：日本時代kā日本本土叫做「內地」，用來kah「殖民地」台灣、朝鮮做區分。
3編註：日本時代kā玉山叫做「新高山」，因為比日本本土上kuân ê富士山koh-khah kuân。
