變做官方語言ê族語：
Uì巴拉圭ê Guaraní 思考台語ê未來
/ 陳韻如
一、南美洲ê語言奇蹟
全世界逐個月就有一～兩个語言消失，m̄-koh iáu有真濟人拍拚beh kā家己ê語言留--落-來。Tī南美有一个原住民語言Guaraní，伊經過西班牙殖民kah國家教育ê壓制，500冬後變做巴拉圭ê官方語言。原住民ê族語ē-tàng一直湠--落-去，變做國家認同ê文化基礎，koh tsiânn做官方語言是真罕見。針對Guaraní語有bē少研究，tsit个語言按怎經過殖民，tī全球化ê時代繼續生存？對長期受著無仝殖民文化影響ê台灣來講，ē-sái提供真濟方面ê參考。
Guaraní tsit个語言tī巴拉圭ê發展是真特殊ê一个案例。Tī西班牙人去到南美進前，當地1,000種以上ê原住民語言，今仔日賰無到一半。Guaraní是一个族群ê名，in ê語言古早叫做Avañe'ẽ（意思是「lán人ê語言」），tsit-tsūn是直接kā tsit个語言叫做Guaraní。1986年ê電影《教會》（The Mission）就是leh描寫tsit陣蹛tī巴拉圭、阿根廷、巴西交界ê原住民。Tī 18世紀為著西班牙kah葡萄牙ê爭鬥，致使蹛tī殖民地ê Guaraní族真濟人死亡、受傷、搬徙去別位。
Tsit陣人少koh真溫馴ê Guaraní族，一定想bē到in ê語言tī幾若世紀以後，使用ê人口ē超過南美大部份ê族語。現此時kan-na巴拉圭就有800外萬人leh使用Guaraní。1992年巴拉圭立法kā Guaraní變做國家官方語言。後來阿根廷Corrientes省（tī 2004年）kah南美共同市場1（tī 2006年) mā lóng kā伊當做官方語言。
二、語言ê保存kah發展
Guaraní是按怎保存--落-來--ê？伊本底kan-na口語，無文字。去hia宣教ê耶穌會士Antonio Ruiz de Montoya，用文字kā tsit个語言記載--落-來。1639年出版頭一本Guaraní對照西班牙語ê語法kah詞典《Tesoro de La Lengua Guaraní》。Tse是後--來beh學習tsit个語言ê基礎，m̄-koh m̄是主要hōo語言保存--落-來ê原因。Suà--來ê幾若百冬，Guaraní ê生湠是kan-na靠口語。
Guaraní族ê聚落分佈範圍tsiânn闊。Tsit个語言tī阿根廷、巴西、Bolivia（『玻利維亞』），甚至tī烏拉圭部份所在lóng有人leh講，只不過上濟ê使用人口是tī巴拉圭。巴拉圭是內陸國家，無港口，mā m̄是資源豐富ê所在，所致來到tsia ê西班牙人少，khah無受著西班牙ê影響。19世紀脫離殖民統治ê時，巴拉圭大部份ê人是講Guaraní語。獨立了ê巴拉圭，gia̍p tī南美兩大國中ng，一爿巴西、一爿阿根廷，長期受威脅。有一段時間巴拉圭政府kā國家隔界lóng封--起-來，除了少數ê社會精英，無啥leh kah外面交流，加上教育無普遍，in原本ê語言保存了khah好。就算後--來ê移民，in為著生活，lóng ē學當地ê語言Guaraní。
Tsia-ê地理、歷史、經濟種種原因，hōo巴拉圭人，無論佗一个族群，lóng使用tsit个語言。M̄-koh tse無代表國家ê領導者就百面支持tsit个語言，顛倒是tī無仝時代lóng有出現禁止使用Guaraní ê政策。上矛盾--ê是統治巴拉圭35冬ê 獨裁總統Strossner。伊beh得著民眾ê支持，tī真濟場所ē講Guaraní，mā tī 1967年正式承認Guaraní是國家語言。M̄-koh仝hit時，學校對囡仔講西班牙語ê要求也變koh-khah嚴格。講Guaraní ê學生ē hōo人摃，hōo人罰跪番麥粒仔iah是跪粗鹽，mā有人是罰規日bē-sái lim水。教育程度khah好ê家長ē要求囡仔講西班牙語。Tsit款對母語ê壓制，對真濟台灣人來講，定著是熟sāi ê記憶。好佳哉巴拉圭去學校讀冊ê人口增加khah慢。
1990年代全世界ê獨裁政權沓沓仔結束，巴拉圭ê軍人總統Strossner mā落台。民主化了後，巴拉圭制定新ê憲法，承認家己是雙語國家，kā Guaraní變做kah西班牙語有仝款法律地位ê官方語言。上大ê改變是Guaraní正式變做教育體制內底ê課程。
三、認同增加，使用者減少
巴拉圭人無分族群kah社會階層lóng使用tsit个語言，in對語言ê認同是長期粒積ê結果，有深沉ê歷史因端。南美脫離西班牙殖民了後，國kah國ê界線按怎劃，不時引起衝突。南美歷史內上粗殘ê戰爭——三國同盟戰爭（La Guerra de Triple Alianza，1864～1870）是阿根廷、巴西、烏拉圭做伙拍巴拉圭，致使巴拉圭失去50%以上ê人口，多數是男性，koh kā大約140,000平方公里ê土地撥hōo--人。Tī六冬ê戰爭內，Guaraní變做是敵人聽無ê暗號，hit時軍隊koh出版Guaraní語雜誌《Cacique Lambaré》來安搭民心kah恥笑敵軍。戰後是留--落-來ê女性kah老人kā tsit个語言傳hōo in ê囡仔。
隔壁國家ê威脅kah sio戰ê經驗，hōo語言沓沓仔kā民眾箍做伙、建立巴拉圭認同ê基礎。1990年代初期beh成立南美共同市場ê時，巴拉圭面對講葡萄牙語ê巴西，kah講西班牙語ê阿根廷、烏拉圭，堅持家己語言ê主體性，tshui-sak Guaraní變做tsit个國際經濟組織ê官方語言。仝時tsūn國家憲法kā Guaraní訂做官方語言。後--來ê國際政治變化hōo Guaraní保存運動有koh-khah大ê運作空間。2000年左右聯合國kah國際組織開始注重多元族群kap原住民文化ê保存。阿根廷ê一个省（Corrientes），mā kā Guaraní設做in地方ê官方語言，suà--落-來南美共同市場mā是。
巴拉圭做一个上濟人講Guaraní ê國家，mā tio̍h有人力kah資源來做厝邊國家ê語言模範，國際期待kah政治壓力hōo in制定新ê語言法。Khîng實，巴拉圭自從憲法承認雙語國家、Guaraní教育起鼓了，使用人口並無增加，是leh減少。大部份公家單位mā無全面使用Guaraní。為著hōo公家單位工作上ē-sái用tsit个語言，hōo語言教育kah書寫系統koh-khah有制度，巴拉圭2010年通過語言法，成立語言政策秘書處（La Secretaría de Políticas Lingüísticas）負責語言政策ê規畫kah實施，mā成立Guaraní語學院（La Academia de la Lengua Guaraní）來研究kah審定Guaraní ê語法、寫法、新詞，處理kah語言有關ê問題。
雖bóng變做官方語言，民眾mā認同tsit个語言，m̄-koh民主化了後，教育機會增加，國外影片、節目變濟，使用Guaraní ê人數直直lak。1992年全國聽有、ē-hiáu講Guaraní ê人iáu有90%，tsit个比例到tann賰70%。兩个語言（Guaraní、西班牙語）lóng有leh講ê人口目前是39%，主要講Guaraní--ê是28%，主要使用西班牙語--ê是30%。按統計來看，西班牙語ê使用者增加tsiânn緊，kan-na ē-hiáu西班牙語、bē-hiáu Guaraní ê人也愈來愈濟。M̄-koh語言專家肯定政府ê語言政策kah民眾對Guaraní ê認同，若無，tsit个語言ê使用者減少ê速度ē koh-khah緊。
四、看Guaraní ê變化，思考台語ê未來
Guaraní uì hōo人歧視ê語言變做國家kah國際組織ê官方語言，伊ê歷史背景，傳承ê基礎條件kah台灣ê母語雖bóng無仝，m̄-koh做一个仝款hōo殖民語言壓制，koh beh保存ê弱勢語言來看，tsit个南美語言政策ê效果iáu是有thang hōo lán參考ê所在：
1.語言ê法律保障是基本，制度kám tuè有著tsiah是重點
Guaraní uì國家語言變做學校教ê官方語言、到公家機關lóng總tio̍h用雙語，是經過真久長ê爭取。Beh真正hōo社會各領域lóng講kah寫Guaraní，必需ài設立一个管理、協調各部門ê機關kah一个專門處理語言問題ê中心。Tsia-ê khang-khuè tio̍h-ài有政府ê支援kah資源，tsiah有法度進行。Tsit幾若冬來民間團體要求成立台語委員會，意思sio仝。Beh復振台語tio̍h-ài有資源、有行政權力ê公家機關來規畫、協調kah管理。
2.國家kah社會ê認同bē改變語言ê弱勢，m̄-koh ē hōo伊繼續傳承
Guaraní ê研究真tsia̍p寫著雙層語言（diglossia）ê問題。憲法規定巴拉圭是雙語國家，多數ê人兩種語言lóng ē通，m̄-koh tī正式ê場合、高等法院、學術界、大型商業活動主要講--ê是西班牙語；tī厝內、菜市仔、朋友聚會大部份講Guaraní。Tse除了kah過去 Guaraní hōo人當做是無讀冊ê人leh講ê語言有關係，koh-khah重要--ê是兩種語言背後ê經濟力量kah政治影響力差tsiânn濟。
現此時ê巴拉圭無啥人排斥Gua-raní，逐个人lóng認同tsit个語言展現國家ê主體性，m̄-koh使用西班牙語ê經濟效益khah kuân。科學性--ê、khah複雜ê內容tio̍h用西班牙語tsiah有法度接收kah表達，世界講西班牙語ê人ke tsiok濟。巴拉圭上出名ê文學家Augusto Roa Bastos bat講，Guaraní是巴拉圭人感情溝通ê時，上好ê語言。伊用西班牙語寫巴拉圭ê Guaraní文化、在地ê光景，m̄-koh伊mā表示，無一个作家ē用別國人讀無ê Guaraní來寫作。
Tī全球化ê網路時代，語言kah語言ê無仝地位，m̄-nā出現tī一个國家iah是地區內底，是kah別國語言鬥陣leh比phīng。國家政策無辦法改變tī真濟重要ê國際場合主要ê語言是英語，m̄-koh政府ê支持kah制度ê改變ē-sái hōo弱勢、khah少人講ē語言繼續湠--落-去。巴拉圭ê政策kah民眾對Guaraní ê感情ē hōo in ê語言留--落-來。台語tī現實ê條件內bē改變少人講ê弱勢處境，m̄-koh政治ê意志加上民眾ê意願ē-sái hōo tsit个語言傳承--落-來。
Uì tsia來看，kā語言講--tńg-來、保存--落-來，比改變弱勢ê處境koh-khah重要。Koh再講，無仝語言ê使用kah學習m̄是「零和競爭」，語言m̄是kan-na ē-sái揀一个講，支持一个語言ê目的m̄是beh對抗另外一个語言。重點m̄是kah別个語言競爭，是加強語言認同kah意識，hōo逐家願意使用母語。Tsit-tsūn大多數ê人是有語言意識，tsiah ē使用台語。Tsit方面一直有真濟人leh拍拚，m̄-koh iáu需要koh-khah濟、無仝套ê論述，uì無仝ê角度來說服民眾使用台語。
現此時是台灣tī國際上tshia-iānn ê時tsūn，逐个人lóng想beh熟sāi台灣。Tī台灣beh展現家己ê時，「啥mi̍h是台灣？」是上要緊ê問題。Tse mā是鼓勵逐个人使用台灣語言ê好時機。台灣意識ê建立tio̍h uì各方面來進行，講家己ê語言，hōo lán ê母語tsiânn做國家認同ê一部份真重要。M̄-koh現此時社會對「台灣語言」ê想法並無一致，有真濟版本，台語tī tse內底是啥mih角色？Tse需要繼續討論。
3.學校教ê語言kah日常leh講ê語言無仝款
Guaraní uì口語變做有標準講法kah固定ê書寫系統，是專家用心研究，老師拚命教ê成果，m̄-koh ná來ná濟人發現，學校教--ê kah平常時講--ê愈來愈無仝。Tsit个語言沓沓仔變做兩種：一種是學校leh教、專家leh講--ê，一種是平常生活leh使用--ê。特別是真早就有ê Yopará——就是Guaraní透lām西班牙語ê語法kah詞彙發展--出-來ê口語，mā有人講是第三種語言。
Yopará kā兩个完全無仝系統ê語言lām做伙講，kan-na巴拉圭人tsiah聽有。少年人特別kah意，學校老師煩惱若Yopará愈時行，未來西班牙語kah Guaraní lóng講bē「正確」。語言專家分做兩派，有人認為若繼續lām leh講，製造koh-khah濟lām用ê語詞kah文法，原本ê Guaraní語就無人ē-hiáu。Mā有人認為tse是語言ê自然演變，是tī巴拉圭本土發展--出-來ê語言，並無好bái，mā ē hōo khah濟外國人熟sāi Guaraní。Tsit兩種立場代表--ê是兩種對未來巴拉圭人ê語言無仝ê想象。無論學者按怎想，是支持iah反對，語言使用者是自由--ê，Yopará是繼續leh發展。
台語、華語lām leh講m̄是新ê現象，m̄-koh mā無可能像Yopará，變做一个新ê語言。Lām leh講、lām leh寫kám好？台灣beh按怎避免像巴拉圭ê語言教育離民眾ê生活愈來愈遠？Koh再講，語言使用者m̄（免）是語言專家，學者、專家若無共識，民眾就ē照家己ê慣勢kah立場來講、來寫，有khah濟自由發揮ê空間——tsit款語言自由對台語復振ê影響是啥？
五、語言ê價值
巴拉圭ê Guaraní hōo lán知影語言beh繼續湠--落-去，tio̍h-ài有法律保障kah設立執行ê機構。Mā hōo lán思考母語kan-na停tī私底下leh使用ê問題，語言專業kah日常使用脫離ê現象。
針對雙層語言ê現象來講，台語若beh tī koh-khah濟公共場合使用，需要有專業台語ê開發，親像tī法律、醫學、科技業，逐个領域創造新ê台語詞彙。禁用台語hōo tsit个語言有70外冬ê時間kah世界ê變化脫節，新產品、新科技、學術發展lóng無thang用台語來講，tse需要趕緊補--起-來，hōo tsit个語言tuè ē著時代kah使用者ê需要，台語tsiah bē kan-na是講故事、kah親人開講、kah朋友pua̍h感情ê時leh使用ê語言。
換tńg來講，台語kah Guaraní仝款，是一个情感豐富、描寫ke tsiânn活跳，適合kah人pua̍h感情ê語言。到tann tsit款pua̍h感情ê語言kah科學精確ê語言比--起-來，是hōo人看做二等ê語言。Tī ná來ná濟AI服務ê時代，人kah人ê交流ē ná來ná珍貴，人際互動、kah人協調ê khang-khuè，ē ná來ná有經濟價值。像台語tsit款適合感情交流ê語言，mā ē tī未來得著koh-khah濟ê重視tsiah tio̍h。
全世界逐個月就有一～兩个語言消失，m̄-koh iáu有真濟人拍拚beh kā家己ê語言留--落-來。Tī南美有一个原住民語言Guaraní，伊經過西班牙殖民kah國家教育ê壓制，500冬後變做巴拉圭ê官方語言。原住民ê族語ē-tàng一直湠--落-去，變做國家認同ê文化基礎，koh tsiânn做官方語言是真罕見。針對Guaraní語有bē少研究，tsit个語言按怎經過殖民，tī全球化ê時代繼續生存？對長期受著無仝殖民文化影響ê台灣來講，ē-sái提供真濟方面ê參考。
Guaraní tsit个語言tī巴拉圭ê發展是真特殊ê一个案例。Tī西班牙人去到南美進前，當地1,000種以上ê原住民語言，今仔日賰無到一半。Guaraní是一个族群ê名，in ê語言古早叫做Avañe'ẽ（意思是「lán人ê語言」），tsit-tsūn是直接kā tsit个語言叫做Guaraní。1986年ê電影《教會》（The Mission）就是leh描寫tsit陣蹛tī巴拉圭、阿根廷、巴西交界ê原住民。Tī 18世紀為著西班牙kah葡萄牙ê爭鬥，致使蹛tī殖民地ê Guaraní族真濟人死亡、受傷、搬徙去別位。
Tsit陣人少koh真溫馴ê Guaraní族，一定想bē到in ê語言tī幾若世紀以後，使用ê人口ē超過南美大部份ê族語。現此時kan-na巴拉圭就有800外萬人leh使用Guaraní。1992年巴拉圭立法kā Guaraní變做國家官方語言。後來阿根廷Corrientes省（tī 2004年）kah南美共同市場1（tī 2006年) mā lóng kā伊當做官方語言。
二、語言ê保存kah發展
Guaraní是按怎保存--落-來--ê？伊本底kan-na口語，無文字。去hia宣教ê耶穌會士Antonio Ruiz de Montoya，用文字kā tsit个語言記載--落-來。1639年出版頭一本Guaraní對照西班牙語ê語法kah詞典《Tesoro de La Lengua Guaraní》。Tse是後--來beh學習tsit个語言ê基礎，m̄-koh m̄是主要hōo語言保存--落-來ê原因。Suà--來ê幾若百冬，Guaraní ê生湠是kan-na靠口語。
Guaraní族ê聚落分佈範圍tsiânn闊。Tsit个語言tī阿根廷、巴西、Bolivia（『玻利維亞』），甚至tī烏拉圭部份所在lóng有人leh講，只不過上濟ê使用人口是tī巴拉圭。巴拉圭是內陸國家，無港口，mā m̄是資源豐富ê所在，所致來到tsia ê西班牙人少，khah無受著西班牙ê影響。19世紀脫離殖民統治ê時，巴拉圭大部份ê人是講Guaraní語。獨立了ê巴拉圭，gia̍p tī南美兩大國中ng，一爿巴西、一爿阿根廷，長期受威脅。有一段時間巴拉圭政府kā國家隔界lóng封--起-來，除了少數ê社會精英，無啥leh kah外面交流，加上教育無普遍，in原本ê語言保存了khah好。就算後--來ê移民，in為著生活，lóng ē學當地ê語言Guaraní。
Tsia-ê地理、歷史、經濟種種原因，hōo巴拉圭人，無論佗一个族群，lóng使用tsit个語言。M̄-koh tse無代表國家ê領導者就百面支持tsit个語言，顛倒是tī無仝時代lóng有出現禁止使用Guaraní ê政策。上矛盾--ê是統治巴拉圭35冬ê 獨裁總統Strossner。伊beh得著民眾ê支持，tī真濟場所ē講Guaraní，mā tī 1967年正式承認Guaraní是國家語言。M̄-koh仝hit時，學校對囡仔講西班牙語ê要求也變koh-khah嚴格。講Guaraní ê學生ē hōo人摃，hōo人罰跪番麥粒仔iah是跪粗鹽，mā有人是罰規日bē-sái lim水。教育程度khah好ê家長ē要求囡仔講西班牙語。Tsit款對母語ê壓制，對真濟台灣人來講，定著是熟sāi ê記憶。好佳哉巴拉圭去學校讀冊ê人口增加khah慢。
1990年代全世界ê獨裁政權沓沓仔結束，巴拉圭ê軍人總統Strossner mā落台。民主化了後，巴拉圭制定新ê憲法，承認家己是雙語國家，kā Guaraní變做kah西班牙語有仝款法律地位ê官方語言。上大ê改變是Guaraní正式變做教育體制內底ê課程。
三、認同增加，使用者減少
巴拉圭人無分族群kah社會階層lóng使用tsit个語言，in對語言ê認同是長期粒積ê結果，有深沉ê歷史因端。南美脫離西班牙殖民了後，國kah國ê界線按怎劃，不時引起衝突。南美歷史內上粗殘ê戰爭——三國同盟戰爭（La Guerra de Triple Alianza，1864～1870）是阿根廷、巴西、烏拉圭做伙拍巴拉圭，致使巴拉圭失去50%以上ê人口，多數是男性，koh kā大約140,000平方公里ê土地撥hōo--人。Tī六冬ê戰爭內，Guaraní變做是敵人聽無ê暗號，hit時軍隊koh出版Guaraní語雜誌《Cacique Lambaré》來安搭民心kah恥笑敵軍。戰後是留--落-來ê女性kah老人kā tsit个語言傳hōo in ê囡仔。
隔壁國家ê威脅kah sio戰ê經驗，hōo語言沓沓仔kā民眾箍做伙、建立巴拉圭認同ê基礎。1990年代初期beh成立南美共同市場ê時，巴拉圭面對講葡萄牙語ê巴西，kah講西班牙語ê阿根廷、烏拉圭，堅持家己語言ê主體性，tshui-sak Guaraní變做tsit个國際經濟組織ê官方語言。仝時tsūn國家憲法kā Guaraní訂做官方語言。後--來ê國際政治變化hōo Guaraní保存運動有koh-khah大ê運作空間。2000年左右聯合國kah國際組織開始注重多元族群kap原住民文化ê保存。阿根廷ê一个省（Corrientes），mā kā Guaraní設做in地方ê官方語言，suà--落-來南美共同市場mā是。
巴拉圭做一个上濟人講Guaraní ê國家，mā tio̍h有人力kah資源來做厝邊國家ê語言模範，國際期待kah政治壓力hōo in制定新ê語言法。Khîng實，巴拉圭自從憲法承認雙語國家、Guaraní教育起鼓了，使用人口並無增加，是leh減少。大部份公家單位mā無全面使用Guaraní。為著hōo公家單位工作上ē-sái用tsit个語言，hōo語言教育kah書寫系統koh-khah有制度，巴拉圭2010年通過語言法，成立語言政策秘書處（La Secretaría de Políticas Lingüísticas）負責語言政策ê規畫kah實施，mā成立Guaraní語學院（La Academia de la Lengua Guaraní）來研究kah審定Guaraní ê語法、寫法、新詞，處理kah語言有關ê問題。
雖bóng變做官方語言，民眾mā認同tsit个語言，m̄-koh民主化了後，教育機會增加，國外影片、節目變濟，使用Guaraní ê人數直直lak。1992年全國聽有、ē-hiáu講Guaraní ê人iáu有90%，tsit个比例到tann賰70%。兩个語言（Guaraní、西班牙語）lóng有leh講ê人口目前是39%，主要講Guaraní--ê是28%，主要使用西班牙語--ê是30%。按統計來看，西班牙語ê使用者增加tsiânn緊，kan-na ē-hiáu西班牙語、bē-hiáu Guaraní ê人也愈來愈濟。M̄-koh語言專家肯定政府ê語言政策kah民眾對Guaraní ê認同，若無，tsit个語言ê使用者減少ê速度ē koh-khah緊。
四、看Guaraní ê變化，思考台語ê未來
Guaraní uì hōo人歧視ê語言變做國家kah國際組織ê官方語言，伊ê歷史背景，傳承ê基礎條件kah台灣ê母語雖bóng無仝，m̄-koh做一个仝款hōo殖民語言壓制，koh beh保存ê弱勢語言來看，tsit个南美語言政策ê效果iáu是有thang hōo lán參考ê所在：
1.語言ê法律保障是基本，制度kám tuè有著tsiah是重點
Guaraní uì國家語言變做學校教ê官方語言、到公家機關lóng總tio̍h用雙語，是經過真久長ê爭取。Beh真正hōo社會各領域lóng講kah寫Guaraní，必需ài設立一个管理、協調各部門ê機關kah一个專門處理語言問題ê中心。Tsia-ê khang-khuè tio̍h-ài有政府ê支援kah資源，tsiah有法度進行。Tsit幾若冬來民間團體要求成立台語委員會，意思sio仝。Beh復振台語tio̍h-ài有資源、有行政權力ê公家機關來規畫、協調kah管理。
2.國家kah社會ê認同bē改變語言ê弱勢，m̄-koh ē hōo伊繼續傳承
Guaraní ê研究真tsia̍p寫著雙層語言（diglossia）ê問題。憲法規定巴拉圭是雙語國家，多數ê人兩種語言lóng ē通，m̄-koh tī正式ê場合、高等法院、學術界、大型商業活動主要講--ê是西班牙語；tī厝內、菜市仔、朋友聚會大部份講Guaraní。Tse除了kah過去 Guaraní hōo人當做是無讀冊ê人leh講ê語言有關係，koh-khah重要--ê是兩種語言背後ê經濟力量kah政治影響力差tsiânn濟。
現此時ê巴拉圭無啥人排斥Gua-raní，逐个人lóng認同tsit个語言展現國家ê主體性，m̄-koh使用西班牙語ê經濟效益khah kuân。科學性--ê、khah複雜ê內容tio̍h用西班牙語tsiah有法度接收kah表達，世界講西班牙語ê人ke tsiok濟。巴拉圭上出名ê文學家Augusto Roa Bastos bat講，Guaraní是巴拉圭人感情溝通ê時，上好ê語言。伊用西班牙語寫巴拉圭ê Guaraní文化、在地ê光景，m̄-koh伊mā表示，無一个作家ē用別國人讀無ê Guaraní來寫作。
Tī全球化ê網路時代，語言kah語言ê無仝地位，m̄-nā出現tī一个國家iah是地區內底，是kah別國語言鬥陣leh比phīng。國家政策無辦法改變tī真濟重要ê國際場合主要ê語言是英語，m̄-koh政府ê支持kah制度ê改變ē-sái hōo弱勢、khah少人講ē語言繼續湠--落-去。巴拉圭ê政策kah民眾對Guaraní ê感情ē hōo in ê語言留--落-來。台語tī現實ê條件內bē改變少人講ê弱勢處境，m̄-koh政治ê意志加上民眾ê意願ē-sái hōo tsit个語言傳承--落-來。
Uì tsia來看，kā語言講--tńg-來、保存--落-來，比改變弱勢ê處境koh-khah重要。Koh再講，無仝語言ê使用kah學習m̄是「零和競爭」，語言m̄是kan-na ē-sái揀一个講，支持一个語言ê目的m̄是beh對抗另外一个語言。重點m̄是kah別个語言競爭，是加強語言認同kah意識，hōo逐家願意使用母語。Tsit-tsūn大多數ê人是有語言意識，tsiah ē使用台語。Tsit方面一直有真濟人leh拍拚，m̄-koh iáu需要koh-khah濟、無仝套ê論述，uì無仝ê角度來說服民眾使用台語。
現此時是台灣tī國際上tshia-iānn ê時tsūn，逐个人lóng想beh熟sāi台灣。Tī台灣beh展現家己ê時，「啥mi̍h是台灣？」是上要緊ê問題。Tse mā是鼓勵逐个人使用台灣語言ê好時機。台灣意識ê建立tio̍h uì各方面來進行，講家己ê語言，hōo lán ê母語tsiânn做國家認同ê一部份真重要。M̄-koh現此時社會對「台灣語言」ê想法並無一致，有真濟版本，台語tī tse內底是啥mih角色？Tse需要繼續討論。
3.學校教ê語言kah日常leh講ê語言無仝款
Guaraní uì口語變做有標準講法kah固定ê書寫系統，是專家用心研究，老師拚命教ê成果，m̄-koh ná來ná濟人發現，學校教--ê kah平常時講--ê愈來愈無仝。Tsit个語言沓沓仔變做兩種：一種是學校leh教、專家leh講--ê，一種是平常生活leh使用--ê。特別是真早就有ê Yopará——就是Guaraní透lām西班牙語ê語法kah詞彙發展--出-來ê口語，mā有人講是第三種語言。
Yopará kā兩个完全無仝系統ê語言lām做伙講，kan-na巴拉圭人tsiah聽有。少年人特別kah意，學校老師煩惱若Yopará愈時行，未來西班牙語kah Guaraní lóng講bē「正確」。語言專家分做兩派，有人認為若繼續lām leh講，製造koh-khah濟lām用ê語詞kah文法，原本ê Guaraní語就無人ē-hiáu。Mā有人認為tse是語言ê自然演變，是tī巴拉圭本土發展--出-來ê語言，並無好bái，mā ē hōo khah濟外國人熟sāi Guaraní。Tsit兩種立場代表--ê是兩種對未來巴拉圭人ê語言無仝ê想象。無論學者按怎想，是支持iah反對，語言使用者是自由--ê，Yopará是繼續leh發展。
台語、華語lām leh講m̄是新ê現象，m̄-koh mā無可能像Yopará，變做一个新ê語言。Lām leh講、lām leh寫kám好？台灣beh按怎避免像巴拉圭ê語言教育離民眾ê生活愈來愈遠？Koh再講，語言使用者m̄（免）是語言專家，學者、專家若無共識，民眾就ē照家己ê慣勢kah立場來講、來寫，有khah濟自由發揮ê空間——tsit款語言自由對台語復振ê影響是啥？
五、語言ê價值
巴拉圭ê Guaraní hōo lán知影語言beh繼續湠--落-去，tio̍h-ài有法律保障kah設立執行ê機構。Mā hōo lán思考母語kan-na停tī私底下leh使用ê問題，語言專業kah日常使用脫離ê現象。
針對雙層語言ê現象來講，台語若beh tī koh-khah濟公共場合使用，需要有專業台語ê開發，親像tī法律、醫學、科技業，逐个領域創造新ê台語詞彙。禁用台語hōo tsit个語言有70外冬ê時間kah世界ê變化脫節，新產品、新科技、學術發展lóng無thang用台語來講，tse需要趕緊補--起-來，hōo tsit个語言tuè ē著時代kah使用者ê需要，台語tsiah bē kan-na是講故事、kah親人開講、kah朋友pua̍h感情ê時leh使用ê語言。
換tńg來講，台語kah Guaraní仝款，是一个情感豐富、描寫ke tsiânn活跳，適合kah人pua̍h感情ê語言。到tann tsit款pua̍h感情ê語言kah科學精確ê語言比--起-來，是hōo人看做二等ê語言。Tī ná來ná濟AI服務ê時代，人kah人ê交流ē ná來ná珍貴，人際互動、kah人協調ê khang-khuè，ē ná來ná有經濟價值。像台語tsit款適合感情交流ê語言，mā ē tī未來得著koh-khah濟ê重視tsiah tio̍h。
1 編註：「南美共同市場」是南美洲地區上大ê區域貿易組織。Tsit个組織tī 1991年由阿根廷、巴西、巴拉圭kah烏拉圭四國元首簽署《亞松森條約》了後成立，beh建立自由貿易區kah推動共同關稅同盟。
