下村海南（Shimomura Kainan）
（翻譯／吳柳澤）
--------------------------------------------------------------------------------------------------------------------------
編按：下村海南tī 1915～1921年來台灣做民政長官kap總務長官，對台灣ê基礎建設不止仔有貢獻。「台灣漫感」是伊經過十冬了後tńg來台灣（1931年，昭和六年），刊tī《臺灣日日新報》ê散文連載。請參考第294期30頁本專欄頭一篇ê話頭。
--------------------------------------------------------------------------------------------------------------------------
打狗街(1) gia̍p tī台南廳(2) kap阿緱廳（taⁿ ê屏東(3)）ê兩个大都市ê中央，soah ē thang ùi散赤所在跳過濟濟階段，就直接來升做高雄州ê州廳所在地，chit个所在ē發展kah hiah明顯，其實是料想ē到--ê。高雄chiâⁿ做日本ê南爿唯一ê港口，ài消化濟濟來來去去ê旅客kap貨物，che帶來快速ê進步，高雄ē發展是chiok理所當然--ê。
菅芒發kah規sì-kè，只不過是散赤漁村ê打狗，伊海灣hit tah ê所在，原底ê發音是叫做「Taakao」，是講世間人lóng慣勢kā叫做「Takao」(4)，因為chit个緣故，施行地方自治制(5) ê siāng時，teh改地名ê時chūn，mā有beh kā「Takao」改做「高尾」ê意見kap想法。講著高尾，一部份mā ē hō͘人自發想起京都ê紅葉ê名所(6)，m̄-koh因為另外mā ē hō͘人聯想--著，tī江戶時代ê三叉chit个所在，hō͘仙台ê領主伊達綱宗吊死ê藝妲，hit个絕世美女高尾太夫(7)，若án-ne就歹空--ah。因為hām「尾」saⁿ比，「雄」是koh-khah好，打狗chőaⁿ改做高雄。確實有影！就好親像伊ê新名所表示--ê，後--來高雄是飛koân-koân teh發展(8)。
一下beh接近高雄，壽山hit tah ê山崙看--起-來就霧霧phú-phú。看著éng時ê舊城出現tī正手爿，高雄車頭就到--ah。我駛車直接peh到壽山ê山頂，規个高雄kap高雄港ê內外，變kah hiah-nī近，bē輸kā叫就隨kā我回hit一樣，lóng看kah清清楚楚。防波堤kā伊ê雙翼ǹg雙爿伸長長，一直來到tī港外。一下看著外口爿ê駁岸（poh-hōaⁿ），就隨時tī我ê腦海--裡浮現山形要助君ê形影，伊是tng當時teh起造高雄港ê駁岸ê時，堅持beh採取「潛函工法」(9) ê人物。我想起hit當時，tī填海造地了後，闊bóng-bóng ê chit个地區(10)，kan-taⁿ chhāi孤一間新起ê「梅屋敷」(11)，現此時一般ê徛家mā愈起愈濟，而且後尾手不止仔hiáⁿ場ê高雄州廳ê殿堂(12) mā kā起好勢--ah。
Goán hit个時chūn未解決ê問題，也就是beh往埠頭hit爿面ê鐵枝路，chit-má猶原hām éng過sio-siâng，kap一般ê道路、厝宅仝一个平面，chőaⁿ kā市內切做對半，che是應該ài想辦法解決--ê。新填海造--起-來hit爿ê人家厝，若koh án-ne ná起ná tīⁿ，kap港口hit tah ê交通往來就ē koh-khah chia̍p。總是因為有平交道，交通一工tio̍h-ài hông隔斷幾若十kái。因為ài考慮著chit个地區路面khi身ê情形，hām鐵枝路ê距離，就算想beh kā平交道起做高架化，iah是做地下通道來hō͘民眾通過，oân-ná是真硬斗--ê。是講，就算chit款困難ê工程有完成，有處理--著--ê mā不過是kā一兩个仔平交道重翻niâ。我過去就teh思考，beh kā鐵枝路線hō͘ se̍h ǹg州廳ê後壁面hit箍圍仔。Ē án-ne想ê出發點是來自，若chit-má ê鐵枝路線後日變做一个分界線，ē親像水戶市分做「上市」kap「下市」án-ne，一个城市tiāⁿ-tiāⁿ ē照所屬地區ê無仝，來kā利害關係分做兩爿。市政ê推sak的確ē ná來ná無閒，像chit款逐方面lóng互相對立ê氣氛若形成，不管時lóng ē變成市政ê阻礙，kám m̄是--leh？Án-ne是ē hō͘人真掛念--ê。
徙鐵枝路線án-ne ê大工程，ài khai--ê恐驚就不止仔大條--ah！所致，代先lán tio̍h-ài盡量ùi做ē來兼khah bē費氣ê工程做起，除了án-ne，無其它ê法度--ah。因為sòa--落-來高雄ē ná來ná發展，高雄車頭mā ài tòe leh徙到khah外口爿chiah妥當，若án-ne beh去屏東ê車chōa mā無需要koh se̍h翻頭--ah(13)。橫濱ná來ná發展了後，新ê平沼車頭就kā改做橫濱車頭。我認為應該ài採用hit款ê處理法度chiah tio̍h(14)。
- 日本統治時代ê行政區名。打狗街tī 1920年改名做高雄街，高雄街是高雄郡ê郡役所ê所在地，高雄郡koh屬tī高雄州。1924年高雄街升做高雄市，廢止高雄郡，高雄市直屬tī高雄州。
- 1920年施行「台灣市制」，成立台北市、台中市、台南市。台灣漫感寫tī 1931年，作者下村海南先生是延用伊做民政長官時代（1915年～1921年）ê稱呼。
- 因為踮tī半屏山ê東爿，tī 1920年改名做屏東。
- 原文分別是「ターカオ」、「タカオ」。「Takao」是源自平埔族Makatao ê打狗社chit个部落ê名稱，tī Makatao ê語言內底，「takao」ê意思是「竹林」。
- 1920年（大正9年）施行，設立台北州、新竹州、台中州、台南州、高雄州、台東廳、花蓮港廳，lóng總五州兩廳。州ê下底設「市」、「街」、「庄」，原住民ê部落設「社」。
- 現代ê地名是「京都府京都市右京区梅ヶ畑高雄町」。Tī京都ê「Takao」，用漢字表記ê時，「高雄」kap「高尾」ê情形lóng有。
- 「太夫」是階級名稱，上koân級ê藝妓。伊達綱宗kah意著頂級ê藝妓高尾太夫，koh kā伊贖身。M̄-koh高尾太夫無順趁伊達綱宗ê意，chőaⁿ hông吊起來慘死tī船頂。傳說ê性質khah濟。
- 原文是「高く雄飛すること」。
- caisson foundation（編按：國家教育研究院kā譯做「沉箱基礎」），建設工程ê時ê基礎工法之一。山形技師hit-tang-chūn beh採用潛函工法ê原因主要有兩項：hām hit時普遍te̍k teh用ê「紅毛塗板」比--起-來，潛函ê體積khah大，防波堤出現歹--去ê可能性khah無；koh因為第一項，現場ê作業日數、作業用ê船隻使用量減少，thang kā工資ê支出降低。日本ê港灣建設採用潛函工法--ê，高雄是第五例。He進前有神戶、留萌、小樽、基隆。
- 高雄填海造地ê地區，是tng當時ê壽町、新濱町、湊町。Chit-má鼓山區ê南爿hit tah。
- 「梅屋敷」一般te̍k ē hō͘人聯想著日本式ê厝宅。真有可能是tng當時tī chit个kā海新填--起-來ê地區，起「梅屋敷」chit个新設施，thang後日chiâⁿ做高雄港邊逐方面ê新商業中心。
- Tī愛河邊，前金區。原底ê建築tī 1987年khà--起-來、起做chit-má ê台灣高雄地方法院。
- 高雄車頭徙到現此時ê位置進前，ùi頂港來ê車chōa beh繼續ǹg屏東ê方向，ài先駛到高雄港hit爿chiah koh駛出來落南（請參照1930年ê高雄地圖）。舊高雄車頭路線ê感覺，就類似現此時ê基隆車頭iah是舊台東車頭。
- 十冬後ê 1941年，下村海南先生ê高雄鐵枝路線ê理想圖得著實現。原底se̍h ùi州廳西爿ê鐵枝路，徙到州廳ê後壁面（北爿）。新ê高雄車頭徙到khah外口爿ê大港埔，原底ê高雄車頭改做高雄港車頭。
台灣漫感專欄，本文使用教育部推薦漢字kap白話字。
台文通訊BONG報303期，2019年6月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
