(影片:
5、6--月，台灣lóng ē落「黃酸雨」，mā有人kā號做「梅雨」，因為tsit-tang-tsūn是梅仔beh夠分ê石鎮所落ê雨。Tsit-má拄著落雨天，穿雨衫、攑雨傘就好，但是古早人若欲作穡，無手ē-tàng攑雨傘、mā無雨衫thang好穿，in就是穿棕蓑（tsang-sui）。Tsit個月ê專欄，lán就來介紹一種名內底帶有「棕蓑」ê台灣保育類動物。
今年初，「棕蓑猫」（tsang-sui-bâ）tsiah由lán法律規定ê第二級保育類動物變做第三級，tse kap lán幾個月進前講--著ê四目鹿、山羊仔仝款，lóng是表示in無即時ê危險，但是iáu是需要lán繼續來保育。講著「猫」（bâ），台語內底有一寡生物lóng號做是「猫」：果子猫、臭羶猫、香猫、竹筒猫kap棕蓑；tsia-ê「猫」，有台灣tsiah有ê特有種，mā有亞種。
「亞種」是啥mih意思--leh？就是講生物生做tsiah-nī濟款，照生物學家 Darwin（『達爾文』）「進化論」ê講法，是ài有地理上ê分隔，hōo動物有機會家己湠種演化，就有可能ē變做兩種無仝ê生物；但是有時tsūn，分隔無夠久長iah是分隔無真完全，由仝一種生物變做兩種生物ê過程中，就有一種過渡型態，就是「亞種」。
台灣因為是一个島嶼，特殊品種ê生物真濟，lán tsit个專欄介紹--ê lóng是台灣ê生物，lóng是針對特有種kap亞種。「棕蓑猫」就是台灣ê亞種：全世界來講，中國南方、印度、Nepal（『尼泊爾』）、Myanmar（『緬甸』）、東南亞，lóng有in ê影跡，in ê全球數量，是tī-teh安全範圍內底，但是對台灣tsit个亞種來講，in是tsiânn需要保育ê動物。
台灣tsit幾種「猫」，是lán ê先祖看in lóng sio-siāng就當做差不多ê動物；由現此時動物分類來講，有tsiânn濟ài幼秀區別ê所在，以後tī tsit个專欄tsiah-koh來介紹。Tsit-má先來好好仔講tse「棕簑猫」就好；in ê華語名是『食蟹獴』，lán tsia ē-tàng看出一寡線索：In kah意食蟳仔，可能是蹛tī水邊，in ê毛是塗色--ê，kap棕蓑sio-siāng。Tse lóng是tio̍h--ê，koh再認真講--來，in 是蹛tī溪流邊，是lán評估tsit條溪流kám有清氣ê指標，in ē家己挖空iah是揣石穴來生活，雖然上kah意食蟳仔，但是魚仔、田蛤仔 、蛇、鳥鼠仔、杜定、田螺、雨螺，lóng ē-tàng做in ê飯菜。棕簑猫ê毛不只是塗色--ê，kap其他ê猫比--起-來，in ê毛是koh-khah長kap硬，親像穿「棕簑」仝款；棕簑猫ê面--裡koh有一个特徵，就是有兩簇白毛，ká-ná是掛草笠仔ê時有縖帽帶。
「棕簑猫」差不多有狗仔hiah大隻，in iáu有其他ê名，親像「芒花猫」、「膨尾猫」，是teh講in 膨膨ê尾溜；in koh有幾个身軀特徵，像講in beh掠魚仔蟳仔，in ê跤是五肢跤tsáinn koh有爪仔，hōo in ē-tàng掠mi̍h件koh ē-tàng泅水。棕簑猫是tsit-má lán台灣淺山範圍溪流生態內底，唯一食肉ê動物；tse是in 當做指標生物ê原因：若環境受汙染了後，食肉ê動物tsiânn緊就受著影響，m̄是hông thāu--死就是枵--死。所以若有一寡作穡人願意顧環境，做田ê時tsūn mài用農藥，hōo田螺、田蛤仔有機會生活--落-來，棕簑猫就m̄免煩惱食mi̍h無夠--ah。Tsit个概念，進前專欄mā有講--過，像講「石虎雞卵」、「鷹仔紅豆」lóng仝款，逐家若beh買農產品ê時，mā ē-tàng揣機會看māi，kám有環境友善ê農產品thang好買？
台灣動物記事專欄，本文使用教育部推薦漢字kap臺灣閩南語羅馬字拼音方案。
台文通訊BONG報303期，2019年6月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
