作者：吳柏鴻
5月中，lán台灣開始進入「三級警戒」ê疫情生活，公共場所運動器材lóng圍--起-來、bē-sái用--得，半個外月，無去厝後ê公園散步。逐擺去公園散步，我lóng ē順suà「吊橫篙」。
6月初雄雄有一工倒跤suah bē行路，bē直--ah。請阮suí某載我去醫生館，連跤beh hānn tsiūnn oo-tóo-bái to疼kah哀哀叫。醫生講是腰tsiah骨牽連去大腿神經，beh起落樓梯mā是大問題，原來就是無去公園散步kap「吊橫篙」引起--ê。姑不二三將，食一禮拜藥仔，做三工復健，小可ē行，心肝掠坦橫，偷偷仔去公園散步kap「吊橫篙」。好佳哉tsit個外月koh順序順序。
差不多50歲就開始有腰酸背疼ê問題，去醫生館做復健。逐擺ài規半工，tsiok無奈，kā醫生complain，伊講「吊橫篙」試看māi，有效，上重要是khah bē了時間。早起時出去散步順suà「吊橫篙」，到tann已經做超過有20外冬--ah，mā bat腰閃--著，兩、三工就好勢溜溜。伊ê效果kap做復健khiú腰完全仝款，但是ài hōo身體小可燒--一-下，上好先行5到10分鐘後tsiah吊。
武漢肺炎自舊年到tann，舊年年底逐家就開始討論，beh按怎降低傷害iah是死亡，一般認定是注預防射。Hit當時有政客講「koh-khah貴mā ài買」，koh有一寡政客配合中國政府推銷無受國際認定、中國出產ê預防射。
經過舊年一冬逐家平安度過。3--月開始有進口預防射，m̄管是真iah是假，國內開始流傳各種負面消息，致使一般人注預防射ê意願真低。政府一直鼓吹逐家tio̍h-ài注預防射，tsiah ē-tàng保平安。
4--月iáu是sio仝，政府一直鼓吹、注預防射ê意願mā是真低，目睭金金看進口ê預防射beh到期。想講食到有歲--ah，koh食mā無久--ah，我就先來去試看māi。4月底、5月初，就去病院登記beh注，結果登記著5月13。病院講一禮拜kan-na排一工，而且ài等候人數有夠tsiah ē-tàng注。阮某，我一直kā鼓吹去病院登記beh注，而且我驚注了ē有副作用，請伊登記慢我一禮拜tsiah注。伊隔工就去登記，國內疫情suah開始發燒。
真好運，5月13注了後，國內疫情開始大發燒，iáu未一禮拜，病院醫護人員就khà電話來kā阮某講：「歹勢--lah，bē-tàng注。」頭起先，阮某mā受著hia-ê五四三ê消息影響m̄肯注，我強kā鼓吹tsiah去登記，病院kā講慢且來注，換伊開始緊張，koh怪我ài伊khah慢tsiah去注。
7月初，預防射開始分批進口，政府公佈登記分批去注，用電話、網路lóng thang登記。Tsit擺我koh登記有著，就去注第二針，大概就安--ah。
國內疫情大發燒，逐家心理上有壓力，預防射suah變無夠用，一寡政客koh開始大細聲。Tī tsia我m̄免講siunn濟，兩個月以來各種媒體逐日配合政客teh罵政府，特別是偏「中」媒體。
Koh來講跤疼ê代誌，本底阮某自舊年開始就有跤路ê問題，今年過年過koh聽人講一寡老人「蹛」ê問題，開始beh揣厝。一方面，阮原來蹛ê透天厝，內外出入lóng ài peh樓梯，koh無法度tī一樓另外隔一間房間。阮隔壁有老大人用輪椅，看伊厝內外出入真正是大問題，所以beh揣厝，第一要件就是免peh樓梯。終其尾揣著一間電梯大樓，m̄-koh逐個月ài納管理費，阮某對tsit項代誌真畏，講無彩錢；我講hōo我出，就殘殘kā買--落-去。Beh買tsit間厝是用伊ê錢，因為伊是公教退休，本底有賰一寡錢，厝款hōo伊出，整修kap搬厝等等其他費用就由我負擔。
Tann已經搬入來蹛，環境是真好，一層樓四戶，除了阮一戶以外koh有三戶；平常日m̄ bat看人出入，所以真安靜。搬厝ê過程實在是大工程，幾十年ê家庭生活累積ê mi̍h件有夠濟，beh留beh tàn實在是真歹選擇。好佳哉久年ê拍拚，所有ê開銷m̄免siunn計較，歡歡喜喜搬入厝，雖然m̄是新樓仔厝，就當做準備beh蹛到百歲年老ê所在，真正是安居ê所在。
#台灣人寫真 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
