作者：張顥瀗
今年ê肺炎疫情實在有夠嚴重，致使lán人kap產業lóng受著tsiânn大ê影響，tī全球疫情tann-á爆發ê時，台灣守了iáu算bē-bái，koh有法度去幫助其他國家，贊助喙am kap其他ê醫療用品，所以初期台灣比起其他國家iáu算安全。因為長期ê政治因素hōo lán變做國際ê孤兒，所以lán kan-na ē-sái認命，萬項代誌lóng ài靠家己來解決。自án-ne，lán國內tshui-sak真濟真好ê防疫政策，好kah hōo別國mā kā lán學習。台灣因為一陣人ê拍拚研究提出好ê建議，hōo番薯仔囝出頭天，hōo國際看著台灣。台灣受著無平等對待ê問題，mā koh一擺hōo國際提出來討論。俗語講「番薯m̄驚落塗爛，只求枝葉代代湠」，因為有頭人ê拍拚hōo台灣ē-tàng重新看著希望。
M̄-koh，自5--月疫情因為人為ê因素，開始tuì北台灣湠--出-去。原本是抗疫模範生ê台灣，雄雄變做逐工lóng有幾若百人確診，開始實施三級警戒，hōo原本ê生活雄雄「風雲變色」，受著真大ê改變。譬如講，政府禁止逐家聚會，連親tsiânn朋友beh見面開講to lóng bē-sái。出門ài實行實名登記，koh有全國ê教育場所lóng禁止開放，學校、補習kap幼兒園lóng總ài停止實體ê上課，改做線頂教學。
Tse m̄-nā影響著學生、家長，對老師mā是一種困擾，因為生目睭m̄ bat看著目眉，lóng無拄過án-ne ê情形。逐个老師是心驚膽hiannh、tit-beh tshuah--死。果然，一開始有影是真亂，老師因為無熟手，無法度按照時間來上課；學生是歡喜ka̍h，因為等於是直接放假；家長是kiōng-beh掠狂，ài ná上班應付khang-khuè，ná ài管囡仔。有影是ē心狂火to̍h，是氣kah beh死，有夠希望趕緊開學。
食力--ê是，因為各種因素hōo台灣無法度買著疫苗，所以疫情無法度隨控制--落-來。對面--ê koh派一寡人放送白賊話來攻擊政府，打擊台灣人對政府ê信任，koh硬beh ài lán接受in ê疫苗，實在是有影hōo人真受氣。
好佳哉lán進前幫助日本koh有美國等等ê民主國家，in看著台灣ê困境，mā伸手捐真濟疫苗來感謝台灣，hōo台灣感受著國際民主國家ê溫暖。Lán國內mā家己研發疫苗，企業家hām宗教團體mā拍拚去kap藥商tsih接談判。番薯仔囝靠家己ê力量koh再證明，m̄管環境koh按怎bái，lín koh按怎用心計較，一切mā是無彩工，俗語講：「兄弟若仝心，烏塗變黃金」。
M̄-koh lán iáu是bē-sái siunn靠勢，因為病毒生湠ê速度是tsiok緊。若無繼續遵守政府ê規定，台灣可能ē koh重新流行肺炎。Án-ne m̄-nā ē影響著逐家ê健康，mā ē hōo對面想空想縫想beh做一寡傷害台灣ê代誌。所以政府ê話ài聽koh ài做，對政府ài有信心，mài hōo人看無目地，全民仝心對抗病毒，抗疫路途無分你kap我，lán lóng是驕傲ê番薯仔囝，我是台灣人我驕傲。
#Lán來講看māi 專欄，本文使用教育部推薦漢字kap臺灣閩南語羅馬字拼音方案。
台文通訊BONG報333期，2021年12月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
