作者：張廷鋐
青森是日本東北ê城市，ē記得阮牽手kap我第一擺去青森，是大tsûn--年（2018年）ê寒--人。Hit時tsūn ê 青森kan-na看ē著一phiàn白色ê色緻，上特別--ê是有tsiânn濟餐廳lóng有提供現絞ê蘋果汁；所致，若講起青森，我印象上深--ê是蘋果。Ē記得tsûn--年（2019年）ê歇寒，阮翁仔某坐新幹線beh去北海道tshit-thô，阮tsiânn siàu念青森ê蘋果，兩人就來青森食晝，無意中tī街仔路影著一幅鍾馗（Tsiong-kuî）ê圖樣，斟酌看tsiah知影鍾馗是青森熱--人上鬧熱ê慶典ê重要角色；hit當時，阮就tiānn好歇熱ê飛行機票，beh來參與青森ねぶた（Nebuta）祭1。
己亥（2019）年ê歇熱，阮牽手kap我tī東京車頭拆好新幹線beh往青森ê車票，阮就tī車頭ê案內走揣ねぶた祭ê紹介。原來ねぶた祭是受著華人ê影響，相傳tī七娘媽生tsit工，華人有放水燈ê慶典，tsit个華人ê慶典沓沓仔hām在地ê傳說結合，在地人tī舊曆7月初7進前ē做大型ê鼓仔燈，鼓仔燈ê造型大部份lóng是神話iah是傳說故事ê人物。Suà--落-來ē將鼓仔燈迎去街仔路遊行，借迎鼓仔燈kā魔神仔趕走。活動ê上尾工，遊行ê隊伍就ē kā鼓仔燈迎去海邊仔，斯當時也是活動ê最高潮——眾人將鼓仔燈sak到海面上，tsit時tsūn ê場面就親像基隆中元節放水燈仝款，實在有夠鬧熱。明治維新了後，日本改用新曆計算月日，青森ねぶた祭沓沓仔固定tī新曆8月初2到初7舉行，每一年êねぶた祭lóng吸引超過百萬人來參與；不而過，ねぶた祭猶原保存傳統鼓仔燈ê做法kap迎鼓仔燈繞境，所致青森ねぶた祭也是日本政府登記有案ê無形民俗文化財產。
Hit年歇熱，ē記得阮翁仔某坐踮青森車頭邊--a ê亭仔跤，阮兩人ná食thia̋n-pú-lah ná配麥仔酒，看鬧熱ê迎鼓仔燈，是一種tsiânn迷人ê享受；hit年熱--人，ē記得阮翁仔某tuè鍾馗圖樣ê鼓仔燈，阮兩人變做隊伍當中負責跳舞ê「跳人」ê舞伴，tuè挵大鼓ê樂手翩翩起舞，是旅行當中上放鬆ê享受；2020年熱天，新冠肺炎造成tsiânn濟不便，ねぶた祭也就án-ne暫時告別青森。
- 編按：青森ねぶた祭，華文一般寫做『青森睡魔祭』。「ねぶた」是日本東北地方ê話，意思類似「愛睏神」。
