作者：石牧民
記錄片〈台灣男子葉石濤〉6月中開始tī電影戲園搬，到tsit篇「文學káng台」專欄leh寫ê時iáu看ē著。葉石濤先生寫《台灣文學史綱》，tsiânn做「台灣文學」體制化ê根基。Ē-sái講，tio̍h-ài代先有葉石濤先生ê《史綱》，大學設立台灣文學科系tsiah有thang水到船就浮。葉石濤先生tsit位台灣文學先覺，值得lán用一齣電影來kā siàu念。有leh要意台灣文學ê有志mā有出來phôo-thánn、phâng場，定著是2020年代台灣文學界起鼓ê大代誌。
葉石濤先生ê文學行踏kap成就tsiok suí-khuì。總--是，伊ê人生suah無hiah suí-khuì。葉石濤先生親身經歷日本人、中國國民黨ê殖民統治。Tī伊文學事業源起頭，kan-na ē-tàng使用日文創作；中國國民黨一下來，姑不將tio̍h-ài重頭學華文。終其尾學了有四正，suah落難關監。艱苦kah hit號形，猶原為著台灣文學來tio̍h磨。
Lán tio̍h m̄-thang bē記--得，葉石濤tsit个人，代先是loo-bán-tshí-khuh ê文學少年，人koh阿舍；20歲了後人生反困苦，尾手thang起造一个學科，是tsiânn大ê吞忍kap勇氣tsiah有法度。葉石濤先生ê吞忍，包括伊甘願tī華文體制下跤，做一个華文創作者，án-ne來疼台灣、疼台灣文學。Lán台灣文學箍仔ê有志，到tann iáu tī葉石濤先生ê疼內底。葉石濤先生做一个台灣文學創作者，koh「台語人」創作者，suah無法度使用台語、台文來創作（事實伊mā無hit个選擇）。Lán台灣現代文學在來有「我手寫我口（ngóo siú siá ngóo khió）」tsit个底蒂，葉石濤先生kap hām伊仝沿ê創作者lóng無法度。Tse lán台灣人ê悲哀。葉石濤先生用疼來排解。
台語人、客語人、原住民，hōo中國國民黨ê獨裁kap語言政策舞kah lóng tio̍h-ài使用華文來創作；hiàng時，根本需要改換身份，甚至序細是kā身份放bē記--得，去做華語人。Tsit款tsiok傷重ê語言環境，tī〈台灣男子葉石濤〉內底看ē著。接受訪問ê學者、bat幫贊葉石濤先生寫《史綱》ê有志（甚至是「迷眾」）、欽敬葉石濤先生ê文學後輩（親像記錄片內底有出現ê林懷民先生），大部份講華語。逐家講話一半句仔lām台語，比論講林懷民先生，hōo觀眾聽著tsiok驚喜，「m̄ bat想過林懷民有leh講台語，講了koh kài好聽。」
Tsit个現象，上無藏三个mê角。第一，你kám ē「m̄ bat想過葉石濤有leh講台語」？你bē。獨獨林懷民先生kap葉石濤先生無仝沿。In hit沿tio̍h-ài全然變華語人tsiah ē有出頭。第二，林懷民先生好聽ê台語m̄是thang歡喜ê代誌。無m̄-tio̍h，台語tsiok好聽。總--是hām林懷民leh講話，台語to賰一半句仔，m̄就顯明歲數khah減林懷民ê人，喙--裡台語koh-khah少，終其尾ē滅無？第三，記錄片內底ê人lóng leh講論（káng-lūn）華語文學，使用華語真對too。總--是，lán tio̍h-ài煩惱，kám講講論文學定著需要使用華語、用華語tsiah ē-tàng講文學？事實tsit-má就是án-ne。
〈台灣男子葉石濤〉內底有一个主要使用台語ê人。莊益增演出「葉石濤」hit个角色，lóng講台語。Hiàng時，伊mā用台語讀葉石濤先生ê華文作品。人講伊讀了無kài suí-khuì。準做無討論莊益增演葉石濤先生ê時語言表現有suí-khuì iah無，mā看ē著台文文學ê主體性tsiok顯然。
食老猶原像少年時代hiah loo-bán-tshí-khuh ê華文作家葉石濤，文學手路siáu幼路，你無法度提--來tsua̋nn順順--ā就讀做台語。想beh讀hōo suí-khuì，中ng有濟濟mê角、濟濟專業、濟濟語言顧問kap文學研究者參詳、研討tsiah ē tsiânn ê文學khuì口。具體來講，你tio̍h-ài kā葉石濤ê華文文學變做台文文學，tsiah koh kā囥tī電影內底、囥tī莊益增先生ê舌尖，tsiah ē suí-khuì；án-ne tsiok顯然，台文文學有伊ê主體性。無因為部份文字有sio-siāng就tsiâu勻。事實精差tsiok大。
Tuì án-ne，lán tio̍h-ài來追求台文文學。葉石濤先生ê筆尖無才調寫伊ê舌尖。伊用疼來吞忍、來tio̍h磨。Lán tī hit个疼內底，tann m̄免kap葉石濤先生仝款吞忍--ah。Lán來kā葉石濤先生ê疼sak到極頭。Lán來kā台文文學寫hōo suí-khuì。
