海產按怎食

主講/張永州

記錄/田永承


編按:本文是2022/9/28棲地復育台語講座ê摘要記錄,講者張永州是台灣海洋保育與漁業永續基金會講師。

台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座,歡迎逐家tī逐個月第三禮拜五暗時7點到9點,同齊來「呷米共食廚房」(台北市中正區衡陽路9號3樓)擴展家己ê台語棲地(tshe-tē)!詳細資料ē-tàng看「台灣蠻野心足生態協會」FB專頁。

人類lām-sám掠、lām-sám食海產,致使海洋資源一日仔一日了盡。根據記錄片The End of the Line推測,上緊tī 2048年,海--裡ê魚仔ē hōo人類掠kah無半尾,人類就食bē著魚仔--ah。若án-ne,lán人類beh按怎做tsiah ē-tàng救lán ê地球?海漁基金會ê張永州老師,beh來參逐家講現此時海洋資源拄--著ê危機,koh beh教lán按怎食魚,tsiah ē-tàng保護海洋,hōo lán年年lóng有魚仔thang食。

海洋資源為啥mi̍h ē愈來愈少?M̄-nā因為全世界人口增加,海產ê消費mā tuè leh增加,mā因為tsit-má掠魚ê技術愈來愈好,想beh掠偌濟lóng有才調掠--著,就ē無站節kho̍k-kho̍k掠,hōo海洋無時間thang歇喘,久--來就愈來愈掠無魚。對討海人來講,出海一tsuā ê成本不止仔kuân。譬論講uì台灣出海,到日本琉球一tsuā,就ài 50外萬新台票,若是掠無夠額,真正ē了錢。所以漁民m̄管大尾魚、細尾魚,iah是tsínn蟳、tsínn蝦lóng掠來賣錢,魚仔、蝦仔無機會thang生湠,lán ê海洋資源漸漸少--去;人類就án-ne tiâu tī一个惡性循環,無thang化解海洋ê危機。

若án-ne,lán個人beh按怎盡家己ê力量,來保護海洋--leh?Kám是自今仔日開始mài食魚?其實只要lán食魚遵守「三个優先」,就ē-tàng保護海洋。

頭一个優先是「國產魚優先」。若食lán台灣掠--ê、生產ê魚,ē-tàng減少運送ê碳跤跡,m̄-nā對海洋好,mā對規个地球環境真好。第二个優先是「有標章優先」。台灣tī 2020年正式使用「海洋之心生態標章」,ē-tàng提著tsit个標章ê討海業者,lóng是「確保魚群永續、保護海洋環境、有效漁業管理、企業社會責任」tsit四點做ē到ê業者。Lán消費者ē-tàng優先選擇有標章ê產品,支持對海洋友善ê業者。上尾一个優先是「中低階優先」。中低階是講tī海洋食物鏈khah下跤ê魚類,in ê食mi̍h ē比高階魚類--ê khah少。比一个例來說明:tshǹg仔是高階魚類,lán若食一公斤ê tshǹg仔,等於ē-tàng食一百尾低階ê花飛1。Tshǹg仔beh生kah tsiah大尾,需要ê食mi̍h比花飛濟,所以lán若優先食中低階ê魚,就ē-tàng保護lán ê海洋。

尾--à,海漁基金會推薦lán幾若種khah bē造成大自然負擔ê海產,譬論講人工養殖ê ham仔、蚵仔、虱目魚,kap近近--ā就掠ē著ê飛烏2、飛烏虎3、花飛。講者尤其推薦花飛kap飛烏虎。Tsit-má台灣人khah tsia̍p食--著ê花飛是Norway(『挪威』)進口--ê,其實真無環保。Lán台灣生產ê花飛是海洋之心生態標章認證、第一等ê金質魚類,好食、俗koh對環境好,是食魚真好ê選擇。其實台灣mā是飛烏虎ê大產地,歐美國家真愛食飛烏虎,in食飯桌仔頂ê飛烏虎,有真濟是uì台灣來--ê。Tsiah好ê魚,lán台灣suah khah無人leh食,實在真無彩。所以講者大力推薦飛烏虎hōo台灣人,邀請lán同齊巧巧仔食魚,保護lán ê海洋資源。

1.花飛:音hue-hui,『鯖魚』。
2.飛烏:音pue-oo,『飛魚』。
3.飛烏虎:音pue-oo-hóo,『鬼頭刀』,因為愛食飛烏,m̄-tsiah號tsit个名。

蠻野講堂  

https://reurl.cc/0oAEKo










棲地復育台語講座 專欄,本文使用教育部推薦漢字kap台羅

#台文通訊BONG報 344期,2022年11月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。