Voyu Taokara Lâu
貴--à家己bih teh房間暗靜仔（àm-tsīⁿ-á）tsheh氣，細漢查某囝阿香tuì門口行--過聽--著，liam跤倚去伊邊--a，貴--à將津來喙角ê目屎pué掉，phuiⁿh一句：「Lín秀--ê kah taⁿ iáu未嫁...」阿香隨知中晝in母--à去街仔，定著koh去tn̄g著Lua̍h-khua̍t姆--à，he Lua̍h-khua̍t姆--à上關心人ê序細嫁娶，見著人連相借問to懶，lóng直破問講：「啊lín雄--ā kap公司hit个行了按怎？福榮伯--à講hit个查某囡仔生著kài福相。」「Lín阿玲phàng好緊交交--leh o͘，三十thóng--ah neh...he天保嫂頂工講ē替你煩惱...」其實天保嫂--à ia̍h福榮伯--à lóng m̄-bat講啥，是Lua̍h-khua̍t姆--à烏白tshiàng名thang做伊家己ê城垛子（siâⁿ-tó-tsí），khah好伊sái話箭，啊人若聽了目頭結結，伊suah ē喙仔la-hi，bē輸冤家ê人一句過，直透tu̍h入去對頭ê嚨喉空，佔贏teh風神hit一樣。
秀--à beh暗仔下班轉--來，隨tsông入去灶跤，看貴--à就le：「Má！我後月日beh升協理--ah，koh來公司ê總務kap人資就lóng我hua̍t-lo̍h--ah o͘，副總講月給（gue̍h-kip）上無beh ke hō͘我萬五kho͘ neh！」In小妹阿香tī樓頂聽--著，緊走--落-來，「阿姊！Hó͘，你báu--死-ah！你ài請guán食飯，無，無beh放你煞--lah！」 「Gōng阿香！餐廳做你揀講，阿姊koh按算年底beh換一台khah好ê車leh，我轉--來ê路--裡有土算，街仔hit間透天--ê無，凡勢落後年貸款就ē-tàng納清--ah，eh...咱明年規家伙仔做伙出國好--無？」
兩个姊妹仔手牽--leh，歡喜kah直直tiô，tsiah雄雄注意著in母--à lóng無應聲。
「Má！你無歡喜--o͘h？」 「無...無--lah！阿母當然替你歡喜--ah！」貴--à喙bóng ngiāu，頭suah lóng無越，手--裡煎匙mā無停，秀--à聽了隨接：「Má！多謝你kā guán飼kah tsiah大漢，koh來，guán ē kā你iú孝，bē hō͘你煩惱食穿徛起！」 阿香uat頭siam著老母ê面，想著e晡ê代誌，緊kā秀--à kháiⁿ--leh，講beh去客廳討論禮拜beh去食佗一間餐廳。
Lua̍h-khua̍t姆--à tsit-tsūn mā拄到厝，kā電火phiak to̍h，厝內恬tsih-tsih，伊kā pháng hē蹛飯桌頂，將桌頂ê紹興--ê開--開，未tsîng tîn--一-甌，電話giang--起-來。
「Hàiⁿ.....啥？兩千萬？你有講m̄-tio̍h--無？你當做lín祖媽teh khong--sìm，兩千萬就beh離婚？做你蹛大陸kap越南參hia-ê狐狸精（tsiaⁿ）消遙？你食khah bái--leh lah！做你去gām想lah！Lín祖媽lóng有倩人teh tuè--leh，你就ke燒寡香hō͘豬哥神，mài hō͘ lín祖媽tsang--著，無，你一sián五釐to免想beh留，時到，beh放你煞--無，koh ài看lín祖媽ê心情--leh！」Lua̍h-khua̍t姆講了，隨將電話手phiaⁿ--落。
酒拄斟好，就iáu未搵著喙唇--leh，電話suah koh tân--起-來，Lua̍h-khua̍t姆--à氣phu̍t-phu̍t狂去攑--起-來：「你聽無人話--sìm！？...」Thài-thó知hit爿頭是一个o͘-bá-sáng ê聲。「無...無lah，我teh罵guán翁lah......heⁿh......伊......伊昨昏對大陸--轉-來.....無lah，真無閒，過--幾-工-仔就ài koh過--ah.....guán阿玉仔？Āi-ioh！天保嫂--à你mā m̄-thang聽人烏白講，guán阿玉仔是kap in翁冤家niâ，無kah beh離婚hiah嚴重lah！無lah！洗面礙著鼻he to tiāⁿ-tiāⁿ有--ê，eh...顛倒是lín阿芳啊，ài緊揣對象o͘，heⁿh啊heⁿh啊，無beh做老姑婆--o͘h？」聽天保嫂--à有tuè喙，Lua̍h-khua̍t姆--à tháu一口氣，緊suà接講：「另工我kā lín阿芳--a紹介--一-下，保證讚--ê-lah！.....啊.....有人teh tshi̍h電鈴，你等--leh tsiah koh khà--來，好...好...先án-ne。」走去kā門開--開，阿玉仔一个面臭tū-tū，兩个烏目墘bē輸點仔膠糊--ê，抱一个幼嬰仔mà-mà-háu。
「阿母！維真ài麻煩你tàu顧--兩-工-仔，he夭壽奶母講逐月日beh ke提兩千，我kā講beh揣別人tshuā，m̄-koh臨時臨iāu iáu問無適合--ê.....」
Lua̍h-khua̍t姆--à hm̍h-hm̍h將囡仔tsih過手，翻頭行入去客廳，tsiah講：「Hit-sò͘ m̄是兩百萬hō͘--你，koh講一月日beh匯你一萬tàu出--leh，奶母beh起兩千就hō͘起--啊，to也tshuā tsiah久--ah，重揣kám就khah好？」
阿玉看著飯桌頂ê酒，「阿母！你koh lim！你to高血壓...」
「好--ah lah！我teh問你你是有聽--著-無？Hit-sò͘ hō͘--你-ê無夠補添--sìm？」
「阿母！你有食暗--無？哪ē桌頂kap冰櫥內底lóng空空？」
「玉--à！你是去hō͘ lín hit-kho͘ m̄-tsiâⁿ老爸帶--著-sìm？臭耳講lóng bē翻車！我問你hia-ê錢--leh！你是lóng khai去tueh？你是無teh替維真拍算sioh！」
「阿母！」阿玉雄雄hiu tsiok大聲！「戶政事務所手續辦to辦--ah，伊錢m̄匯--來我是有法度--sìm！！！我逐工上班忝kah beh死！！！是beh按怎有hit號閒工走法院kā告ài伊吐錢出來lah？」
Lua̍h-khua̍t姆--à坐tī膨椅頂，孫抱--leh，頭犁犁，喘氣ê時，感覺規間厝bē輸罩烏bông洘洘，胸坎縛縛，電話giang一聲，伊規个人tsua̋ⁿ tiô--起-來。
「Hàiⁿ...天保嫂o͘h...無...無lah，是隔壁來借豆油lah.....拄tsiah講kah tah--ah.....啊，heⁿh，安排lín芳--ê對看，tio̍h lah！看ē-tàng緊嫁嫁--leh-無，咱講有一个倚靠hoⁿh，做爸母--ê mā khah放ē落心，khah免逐日操煩.....」Lua̍h-khua̍t姆--à羊羔面快píng，目nih仔koh喙笑目笑--ah，心內開始teh拍算beh牽佗一家ê後生hō͘ he芳--ê，ē khah有機會。
