昨暗8點thóng老母khà電話hō͘--我，講查某孫嫁--出-去-ah，賰伊一人，想beh轉來厝mài蹛tsia，好--無？一搭久仔，話iáu未煞，講兄哥落去樓跤倒pùn-sò煞拄入門，老母趕緊kā電話掛斷。昨hng tsiah tshuā老母去八卦山大佛跤「和仔仙」寫ê「前進」看板hia，參加野外讀冊會，看風景suh好風氣；中晝tī「淘米樂蔬食園餐廳」食一頓tsheⁿ-tshau koh hām頭家娘hip一張相；暗頓hō͘同窗ê翁某煮ám糜仔配好料ê素食招待，老母歡喜tshit-thô規工。昨暝老母一通電話，hō͘無法度完全做主ê我，一時心肝絞滾疼kiōng-beh碎--去，tse就是tsit當今lán台灣社會每个家庭lóng拄ē著ê「照顧老大人」ê大問題。
老大人心肝底ê故鄉就是上熟sāi、蹛有伊親人，有好厝邊伊蹛幾十年ê厝，m̄管是序細好意ê孝心，iah是兄弟間無法度ê「理性責任」分攤ê安排，若是減一項徛伊立場ê「同理心」，kan-na考慮「食kap蹛」，無leh管待是m̄是有囡仔大細鬥陣做伴、若是無細膩去對待，in平素時ê生活習性、隔離貼tī伊心肝íⁿ仔ê厝前厝後景物ê影像、斷絕伊hām隔壁厝邊早前ê情誼，啊就ē大大傷殺著老大人身心靈ê安樂。
〈同住盡孝道，台灣人讚〉2012.11.11（自由時報），作者文魯彬先生蹛台灣beh三十五冬，是一个台灣籍美國阿啄仔，伊講：美國社會風俗kap國家體制對三代同堂真無友善，台灣人應該了解koh珍惜現有ê社會資源，m̄-thang kho̍k-kho̍k學美國對待老人hit套。Tse是伊tī 2011年11--月轉去美國照顧九十幾歲ê爸母十個月，後--來老母先過身，賰老爸一个人hō͘兄姐搬來徙去他鄉外里，致覺著老爸「身心靈ê焦慒」ê痛苦，伊講tse就是「包括現此時美國社會既定模式，爸母無愛麻煩序細ê心態，koh序細因為錯誤ê感覺suah誤判爸母ê需求」所造成--ê。伊koh講：「美國式ê思考，理性對待，欠同理心」，「阿兄阿姐雖然逐年lóng ē轉去故鄉Tucson探望爸母，m̄-koh真tsiâⁿ表面--ê，in lóng m̄-bat蹛tī厝內，是蹛旅社，爸母對待阿兄阿姐就親像招待人客，in對爸母ê生活完全放外外，阿母過身了，我發覺九十外歲ê阿爸目前真正需要--ê是kap厝內人蹛做伙」。伊koh講tī台灣蹛久--ah叫是阿兄阿姐ē安排老爸蹛in兜，後--來tsiah知是安排去蹛一間專門收失能老人ê安養院，心肝想講「有夠譀！」，「iáu有法度自理ê阿爸哪ē堪得蹛tī he離天堂近ê所在」。上路尾伊講：「因為tsit段時間有真濟機會重新認bat我ê故鄉美國，hō͘我更加肯定留tī台灣是tsiok正確ê決定，mā感謝台灣社會hō͘我一寡對待老人hām家庭ê基本概念」。
台灣人讚？Tsit个阿啄仔台灣人對lán ê期待有夠大。「各人爸母各人顧」，是tsit-má tng-teh tī公教退休家庭趁流行--ê，18%領一个爽歪歪，連家己（後頭厝）ê爸母就無心照顧，mài講in翁ê爸母kā hiat tī邊--a秋凊。「落家教」過去是一个新婦人tī家庭ê SOP，tsit-má無人leh信斗tsit套，家庭倫常塗跤踏，厝--裡ê老大人變成有「厝」無「siū」ê弱勢者，「a-phà-tò͘」bóng ku，無，lio̍h-lio̍h--à就hông戽去「養老院」，無人beh tshap-siâu--伊。
『全方位關懷 建構高齡化溫馨社會』，2012.11.03《中國時報》tī伊ê社論用tsit个標題，提出：Tī面對姓命旅程ê最後一哩，對無仝老化面向所採取ê切割式處理，iah是kā長輩tùi親人、家庭kap社會單獨抽離--出-來，lóng ē hō͘老人陷入「存在性孤獨」kap「孤獨性存在」ê境遇，處理ài細膩周至」。講實行濟濟年ê「老人福利法」ê核心是「tùi健康促進，延緩（uān）老化，社會參與，世代融合，友善環境，活顯（hiáⁿ）老化到尊嚴老--去，tse是連續性ê歷程kap關係，相關建制措施若thang穩健運作，台灣ê高齡者tsiah thang迎接樂天知命ê黃昏歲月」。
，
Lán一般人真緊就學美國人，將年老行動ài人扶插ê老大人sak上「老人安養院」，叫是án-ne了一寡錢，hō͘去外地安養就thang卸責任，目睭無看--著就無代誌。Kám講頂一代--ê飼囝晟養是應該--ê，下一代--ê看顧爸母，好親像是ē-sái隨人顧性命，m̄免做kah到ê代誌。Lán ài知，政府ê「老人福利法」tī1980年就公佈，2009年koh再修改，老早對老人ài有尊嚴ê「在地老化」kap「社區老化」，保護老人ê身心靈，有相當ê規晝kap措施。無事無白切割老大人kap家庭，iah是kap社會ê關連，就是違反tsit个法。文魯彬先生tsit个一生為台灣ê環保、生態拍拚ê台灣阿啄仔，講伊ê下1步beh關切台灣ê老人kap社會相輔相成照護制度ê建構，lán「在地在生」ê台灣人，kám bē歹勢--leh。
人食愈濟歲對早前kap伊有sio交插ê朋友、對伊成長大漢ê所在發生ê代誌特別ē記--得，hia-ê故事歡喜也好，悲傷也好lóng ē tī伊ê心肝內底記tiâu-tiâu，he就是伊心肝內ê故鄉，離bē開ê厝。奉待一个老大人，假使是kā捆縛tī一个伊生疏ê所在，無親人、無厝邊，免偌久，伊就ē無話無句，無，就掠狂kho̍k-kho̍k-tsông，hō͘伊晚年人生ê色彩變成黑白，絕對m̄是lán政府通過「老人福利法」想beh建構ê溫暖社會。序細若有「同理心」，就m̄-thang kan-na有理性ê thún踏，緊tshuā伊轉去伊心肝內ê故鄉安歇老化。
Tī台語、日語kap英語ê歌曲中間，唱出離開故鄉又koh bē得轉--去ê心情，有「黃昏ê故鄉」、「想厝ê心情」、「green green grass of home」、「夕燒け雲」，lóng是hō͘人斷腸ê詩歌。思鄉m̄是kan-na出外少年人ê專利，in ē得用歌詞唱出in siàu念故鄉ê感情，啊老大人--leh？In唱bē出歌聲，卻是ē-tàng凝心怨慼niā-niā，終其尾hō͘ in變成做無話無句，鬱悶無快樂，加速痴呆老化niâ。「Bē得轉去厝--裡」是tsit-má一般tī都市老大人ê苦情，你kám知？
Beh逃離都市「a-phà-tò͘」iah是「老人安養院」ê頓teⁿ，是現此時老大人晚年ê惡夢，想beh tsông轉去庄跤ê塗kat厝hām囝孫仔蹛做伙，tsiah是in晚年ê美夢。
「我沓沓仔、沓沓仔了解著－所謂爸仔囝、母仔囝一場，意思只不過是講你hām伊ê緣分就是今生今世，直直leh目睭金金送伊ê背影ná行ná遠」龍應台文化部長bat án-ne講。
