讀國小一年（it-nî）ê時，頭一日老師點名，老師用華語叫三遍：「蘇晏德」，我lóng無攑手，因為我m̄知影我叫做「蘇晏德」，guán老母lóng叫我Iàn-tik，後--來老師就用台語講：「So͘ Iàn-tik」，我tsiah攑手，
老師koh繼續點名，「林佳碑」、「林佳碑」、「林佳碑」，老師若用華語叫三遍koh無人攑手，就用台語叫，老師講：「Lim Ka-pi」？全班lóng笑--出-來，koh繼續點名，華語講「謝碎礁」、「謝碎礁」、「謝碎礁」，無人應聲，用台語叫：「食喙焦」？Koh繼續點名，華語「鄔雞賽」、「鄔雞賽」、「鄔雞賽」，無人應聲，用台語叫：「烏雞屎」？全班ê同學一直笑，老師講bē-sái笑，老師用華語kap台語叫，lóng無人攑手，全班點名煞，有一个同學攑手，老師你無點著我ê名，我叫做「鄔雞sài」，m̄是叫做「鄔雞sái」，下課ê時有同學叫伊「挖雞屎」，後--來伊改名叫做「鄔基賽」，台語叫做O͘ Ki-sài，koh有同學叫伊「挖豬屎」，後--來伊koh改名叫做「鄔基明」，台語叫作「O͘ Ki-bîng」，koh有同學叫伊「O͘ Tsi̍t-pîng」。
