主講／王昭文
記錄／賴昭男
本文是2019年3月初6 ê講座摘要記錄，主講者是中研院台史所研究助理王昭文
「情深義重」ê形容，聽著kánn-ná有寡古板，suah是台語小說家王貞文kap伊筆尖所描寫ê蔡瑞月、黃晴美——tsia-ê為家庭、為社會恬恬付出ê查某人，上tàu-tah ê刻畫。中研院台灣史研究所研究助理、mā是王貞文ê雙生仔阿姊王昭文，tī 3月初6 ê講座--裡，分享王貞文小說內底兩位女性典型，m̄-nā展現宗教、性別、歷史sio kap ê多元面向，koh hōo lán看著台語tsiânn做文學語言，thang發揮ê應用可能。
王昭文講，王貞文ē用台語創作，一部份是伊自細漢tī長老教會thuā--來ê傳統，一部份mā是受著文友宋澤萊等台語小說家ê啟發，tī伊德國留學期間，開始用台文創作。到tann已經出版十種以上ê冊，其中台文作品有短篇小說集《當第一道光突破黑暗（oo-àm）》、《天使（thinn-sài）》kap詩集等。王貞文m̄-nā愛文學創作，伊mā真kah意畫圖，親像《馬利亞行過莿帕（tshì-phè）》。王貞文ê文字kap圖，表達出自由、平等、基本人權，iáu-koh有女性意識；若beh用一句話說明伊作品ê主題，就是：Tī暴力kap死亡威脅中ê女性性命之歌。
王昭文代先介紹ê台灣女性，是舞蹈家蔡瑞月。蔡瑞月tī台南出世，去日本學舞蹈，tńg來台灣了，創設舞蹈研究社，提倡現代舞。後--來，伊kap旅台中國詩人雷石榆結婚；無疑悟，婚姻生活兩冬無到，雷石榆就因為政治因素hông掠走、被迫離開台灣，蔡瑞月mā因為「通匪」ê理由hông掠，坐監三年。出獄了，伊繼續推sak舞蹈，suah不sám時受著國民黨ê阻礙。Hē苦心創作ê《晚霞》（紅霞〈âng-hê〉）舞劇hōo國民黨文工會阻擋，致使無法度演出。Tsia-ê苦難，就親像白色恐怖對伊一世人ê迫害。
雖然受著tse種種ê迫害，蔡瑞月iáu是堅持藝術創作，tī坐監期間盡力練舞、編舞。Tī國民黨ê監視之下，伊試用無仝ê方式去推廣藝術，可比改創作民族風格ê舞，thang有ha̍h著政府ê大中國主義。王昭文講，就算有驚惶kap不滿，蔡瑞月iáu是用溫柔kap giám-ngē面對人生，用舞劇創作來tháu-khuì；到kah今仔日，蔡瑞月基金會逐冬堅持辦「蔡瑞月舞蹈節」，表達對tsit塊土地、人權、自由ê支持。王貞文ê筆尖án-ne描寫蔡瑞月：「伊一直是用心來跳舞ê人，我相信，hānn過死亡，伊ē kap所有受著暴力迫害ê人，用心彼此連結，繼續leh跳出永遠--ê、性命ê歌。」
蔡瑞月基金會bat用黃文雄、鄭自才ê「四二四刺蔣事件」做題材編過舞劇，啊王昭文beh介紹ê第二位女性，就是tī tsit个事件ê背後，khah無人注意--著、黃文雄ê小妹、鄭自才ê前某——黃晴美。四二四事件，是1970年hit-tsūn做行政院副院長ê蔣經國訪問美國，黃文雄等人決定beh用刺殺ê方式，引起世界注意。王昭文強調，針對tsit个事件，各界有無仝ê看法kap評論，m̄-koh tī tsia lán beh看--ê，是in決心hōo國際看著台灣人民意志ê hit種青春熱情，koh有tī事件了後，黃晴美一肩擔家ê勇敢。
王昭文講，事件籌備過程，黃晴美完全知情，tī了解風險kap代價ê情形下，贊同、支持in阿兄kap翁婿。落尾，黃文雄、鄭自才tī美國hông掠--去，海外台灣同鄉窮空（khîng-khong）募款kā保--出-來，in最後suah選擇逃亡。家庭生活ê重擔、同鄉人情ê壓力，tsit聲lóng tio̍h黃晴美一人來擔。黃晴美koh tshuā囝去瑞典揣翁婿，全力kā救援。王貞文ê作品án-ne形容：「Tī hia-ê情緒緊張ê日子，hē決心將照顧囡仔ê責任，ngiâ-tsih可能發生ê一切狀況，所需要ê勇氣、耐心kap智慧，無比徛去一線行動ê查埔人khah少。」
黃晴美仝款是留學生，王貞文kap伊是tī一擺歐台會ê聚會熟sāi--ê，兩人有真好ê交陪。王貞文寫ê一篇〈野草莓開花的所在〉，就是leh講黃晴美為翁為囝為國家、勇敢活--落-去ê活力，伊ê政治理念kap翁婿、阿兄是仝款--ê。王昭文認為，王貞文筆尖ê蔡瑞月、黃晴美，共通ê特質就是「情深義重」，in tī苦難中勇敢向前行、有情有義有家己、無因為有劫難就tòng-tiām，m̄-nā是為著身軀邊ê人，koh是為著大團體，深情為台灣。
參與講座、研究過王貞文作品ê台灣師範大學台灣語文學系助理教授呂美親tī會場表示，王貞文作品內底ê蔡瑞月、黃晴美兩人，是tsiok拄好、真自然ê連結，伊所描寫--ê正正就是kap伊仝款ê人；in ê思想kap實踐，雖然是傳統ti̍k ê giám-ngē，m̄-koh koh是前衛--ê。呂美親koh講，王貞文是唯一ē-tàng kā宗教、性別、歷史各面向kap-kap做伙ê小說家，kā女性參與政治運動背後ê心聲刻畫--出-來。
台語sa攏有講座專欄，本文使用教育部推薦漢字kap台羅。
台文通訊BONG報300期，2019年3月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
