主講／賴嘉仕
記錄／吳玉祥
本文是2024/1/10「台語sa攏有」講座ê摘要記錄，賴嘉仕是曾文溪廣播電台台長兼節目主持人。
台語sa攏有 - YouTube 頻道
曾文溪廣播電台ê台長賴嘉仕是嘉義水上人，伊自底並m̄是teh行台語tsit條路，m̄-koh伊熱心投入，用tsiok濟時間、精神規畫，kā台語文作家陳雷ê小說改做廣播劇，tse是一个真大ê工程，所以今仔日邀請伊來分享、紹介伊做台語文學節目ê經過kap過程。
黨國時代久長ê「獨尊華語」政策，m̄-nā本土語言受著全方面ê歧視、thún踏，mā影響真濟廣告主無愛踮台語電台做廣告，台語電台只好靠藥廠ê廣告來維持，m̄ tsiah ē hōo人講是「賣藥仔台」。電台雖然無好經營，m̄-koh曾文溪電台ê頭家真有心，願意撥時段來製作對社會有正面意義ê節目，所以tsiah有2014年2--月由賴嘉仕按企劃、編劇、主持一手包辦ê「戀戀曾文溪」節目，開播到tann已經十冬。
頭家有心beh做好節目回報社會，伊mā無kā頭家làu-khuì。除了tī做節目ê第四年提著第53屆廣播金鐘獎「最佳非流行音樂節目獎」kap「最佳非流行音樂節目主持人獎」以外，2021年kap 2023年koh分別入圍金鐘獎ê「廣播劇獎」kap「藝術文化節目獎」。2017年開始，節目有幾若年受文化部影視局ê肯定補助。M̄-nā是公部門肯定，優質ê節目mā影響真濟有志來參與節目ê製作，按原本一个人「校長兼摃鐘」到tsit-má變一phâng人ê團隊。
賴嘉仕講，伊tshím開始teh做廣播劇ê時tsūn，完全m̄知影有「台語文學」tsit个世界，tī 2019年進前所用ê文本lóng是華文作品，親像李喬ê《寒夜三部曲》、吳念真ê「甘露人生」專欄、郝廣才ê《有一天》等。
尾手，賴嘉仕tī 2020年接觸著陳雷先ê小說，雖然伊hit時iáu m̄ bat羅馬字，一寡語詞mā m̄知是啥mih意思，m̄-koh陳雷先ê文字單純bē拖沙、suí-khuì鬥搭ê台語詞、iáu-koh有講故事ê工夫，一步一步kā伊siânn入去《鄉史補記》內底。Siraya平埔族ê世界iah是二二八、白色恐怖ê時代，tsia-ê故事正正是lán台灣人流血流滴ê集體運命。冊ná看，伊內心ná teh滾絞。等kah五本小說讀煞，已經滾絞出伊對台語文ê趣味kap使命感，伊利用làng縫ê時間家己研讀，koh去參加教育部ê認證考試，頭改就hōo伊考tiâu中高級。
另外，賴嘉仕mā決志，「戀戀曾文溪」koh來，就是beh招所有ê聽友做伙來行台語文學之路。按2020年「台語文學廣播劇」開始，2021年「78轉音樂廣播劇」（放送日本時代ê台語流行歌），2022年「三合院繪本廣播劇」（台文劇本，原著是華文），一直到2023年ê「陳雷小說廣播劇」。
賴嘉仕呵咾陳雷先ê故事精彩、文筆優美、台語suí-khuì，ē-tàng講就是寫便便ê劇本，m̄免koh過編、過改，kan-na拄著文本khah短ê時，tsiah tio̍h寫幾句仔對話thap時間，所以決定用口白比對話khah濟ê「講古式廣播劇」來表現， beh hōo聽友感受著陳雷先原汁原味、樸實ê khuì口。除了有完整ê配樂、音效，劇中koh有安排顧問老師來解sueh、評析作品ê背景、語詞、文學性kap人文歷史。因為版權ê關係，網路重播版ē kā部份音樂提掉，賴嘉仕講án-ne就bē-tàng聽著上kài完整ê作品有khah拍損，鼓勵聽友一定ài準時來空中相會。
