作者：潘科元
上元暝時常有『猜燈謎』ê活動，tsit个詞台語按怎講？阮細漢就lóng聽序大人講「臆謎猜（ioh bī-tshai）」。若是beh強調「燈」--字，台語是講「臆燈猜（ioh ting-tshai）」。
Tsit个「謎」--字，傳統台語ê白話音是第七調「bī」，kap「氣味（khì-bī）」ê「味」仝音，但是kap「迷（bê）」--字無仝音。目前真濟人一方面是有邊讀邊（iú pian tho̍k pian），一方面是受華語影響，不知不覺將台語「謎」當做是「迷」ê仝音字，tsiah講做「猜迷（tshai-bê）」。
「謎」《廈門音新字典》收兩音，話音「bī」、文音「bē」，lóng是第七調；《彙音寶鑑》仝款是話音「bī」、文音「bē」第七調，但是伊ke收一个文言音「bê」第五調（無tī檢字表內底）；《彙集雅俗通十五音》只收「bī」一音；《彙音妙悟》「謎」收一音「be去聲」（伊陰去、陽去兩調混雜）。綜合來看，只有《彙音寶鑑》內文ke收一个「bê」第五調ê音，tse有koh-iūnn。
 |
| 《彙音雅俗通十五音》「謎」是「居下去聲、具韻、門字頭」，「未、味、寐、謎」四字仝音，也就是唸「bī」。 |
Koh查康熙字典所收ê反切，大部份ê中古音反切也是lóng唸去聲：
「謎：《唐韻》莫計切《集韻》《正韻》彌計切，迷去聲。」所以kap「迷」--字唸平聲無仝。但是集韻ke收一音「緜批切，音迷」。
台語ê傳統，「謎」口語就是唸「bī」第七調，無論是khah舊ê台語文獻所記，iah是我做囡仔聽老爸所講，lóng是án-ne。目前教典「謎猜」ê音是寫「bī-tshai，又唸作bî-tshai」，tsit个又音「bî」大概是現代台語人受華語「謎」--字ê聲調影響生--出-來ê講法。
《新編華台語對照典》有收「臆謎（ioh-bī）」、「謎猜（bī-tshai）」、「臆謎猜（ioh bī-tshai）」，tse無問題；但是伊koh收「猜謎（tshai-bê）」「（燈謎 ting-bê）」，tse我將伊定位做現代走音／俗音。
《臺日大辭典》（台日典）所收，只要有「謎」--字ê詞，一律唸第七調，其中也是有分文白音：
台日典ê口語單字「謎（bī）」下底有兩个義項，第一義項是名詞，例詞：「憶謎（ioh-bī）」（「憶」是伊ê用字，目前教典寫「臆」--字）、「猜謎（tshai-bī）」；第二義項是動詞，例句「做一個謎俾人謎」（做一个謎hōo人謎〈tsuè tsi̍t ê bī hōo lâng bī〉）。Tsit種動詞用法，目前罕得有人ē-hiáu講--looh！
兩字詞台日典有收「猜謎（tshai-bī）」、「憶謎（ioh-bī）」、「謎謎（bī-bī）」。「謎謎」前字動詞，後字名詞，就是「臆謎猜」ê意思。台日典koh有收「燈謎（ting-bē）」伊註明是文語，對應ê口語是「燈猜（ting-tshai）」。
請注意：「謎猜（bī-tshai）」是名詞，「猜謎（tshai-bī）」是動詞。
台語口傳文學ê傳統，koh有一種「囡仔謎（gín-á-bī）」，是口耳相傳、講hōo囡仔臆，真古錐ê謎猜，tī上元正式ê燈猜（寫漢字tī紅紙頂）看bē著--ê，lán台語文界應該繼續來創作tsit種囡仔謎。親像：
1.「兩兄弟仔平kuân平大，日--時分開，暝--時sio-tshuā。」臆一種mi̍h件。
2.「四跤koh四角，有面無頭殼。」臆一種mi̍h件。
3.“Sì kak tsi̍t kin, la̍k khí tshit bīn.” 臆一種生活用品。
4.「一跤ē走，無喙ē háu。」臆一種tshit-thô-mi̍h。
5.「一枝竹仔直溜溜，尾仔一把鬚，神魂tuè人去，骨頭無人收。」臆一種果子。
6.「風來huā-huā，雨來suā-suā，ún-ku--ê生百外。」臆一種果子。
7.「一陣鴨仔白tshang-tshang，兩枝箠仔趕入空。」臆一種生活動作。
8.「肉空鬥肉榫，一手mooh kha-tshng，一手攬頷頸。」臆兩个人leh做ê代誌（m̄-thang想歪--去--őo）。
（謎底kap部份解sueh tī第20頁）
