作者：張芳莉
自從結婚離開臺北了後，就tsiok久tsiok久m̄ bat來二二八和平公園--ah。今仔日，阮翁仔某趁天氣好，日頭燒lō，就按新竹拚來台北來走揣阮以早留踮台北，青春ê記憶。
二二八公園邊--a整理kah真清氣，大樓有新有舊，koh有便利ê捷運。Tsit 20幾年來，實在是改變真濟。公園--裡增加bē少ê當代藝術，有一个白色ê大舞台，ē-sái hōo民眾看表演。有一个頭尖尖，四角四角ná『樂高積木』ê噴水池。人koh ē-sái行入去看水流來流去ê形影。邊--a有一塊石牌仔，頂頭刻一篇說明，kā lán講是按怎ē發生二二八事件。
我ná讀ná艱苦，台灣人哪ē tsiah可憐！一場事件處理無好，suah造成全台灣ê智識份子受冤屈，死--ê死，逃--ê逃，bih--ê bih⋯⋯。聽見身軀邊ê水流聲，我suah雄雄感覺he m̄是水leh流，是血啊！是苦難ê目屎。行入水池ê石枋是兩塊三角形tàu做一个四角形，一塊一塊kā鋪--起-來，變成lán人leh行ê路。Tsit-má政黨藍綠ê對抗、朝野ê紛爭，就親像tsit兩塊三角形仝款tàu bē bā，hōo人真煩惱。
我一直認為二二八和平公園是一个充滿目屎ê所在。文學家白先勇寫ê《孽子》，描寫看bē著日頭光ê同性戀上愛來ê所在，就是leh寫tsia。事實上mā是án-ne。Tsit-má，政府已經立法規定in ē-sái結婚。社會大眾mā khah ē-tàng理解。真心希望新ê思維ē-tàng減少lán tsit个世界上ê不幸。
Iáu-koh有一个所在，mā是看--著就hōo人艱苦！Tī beh倚出口ê所在有一个貞節牌坊，頂頭寫講有一个偉大ê女性，16歲結婚，18歲死翁，家己辛苦kā囡仔飼大漢……。Tsit个精神是真偉大，m̄-koh，我心疼伊ê遭遇。十幾歲是tng青春ê年歲，死翁了後就一世人烏有。準講若有一个人ē-sái koh kā疼thàng，伊ê人生可能ē有無仝款ê幸福。
20年後，我koh tńg來二二八和平公園，是按怎我ē感受著tsiah濟悲傷kap目屎？Tse是少年時ê我m̄ bat ke想--過--ê。可能是我成長--ah！講khah白--leh，mā有可能是我老--ah！Tsit个想法無答案。我想kan-na二二八公園內底hit寡老老、見證世間事變化ê榕仔，上了解--ah！
