作者：廖啟助
細漢ê我，看藏鏡人、烏白郎君、史艷文、秦假仙、荒野金刀獨眼龍，聽〈苦海女神龍〉、〈粉紅色的腰帶〉tsia-ê歌大漢。
M̄-koh後--來，因為去外位讀冊無時間，所以布袋戲就無koh看--落-去，mā因為無看霹靂相關ê節目，我想講我kah霹靂無熟，所以阮學校有報名抽獎送「霹靂盛典」演唱會門票ê活動，我就無去tàu鬧熱，想講kā機會讓hōo別人。想bē到隔tńg工一位家長專工khà電話hōo--我，講伊拄仔好有門票，伊知影我對台語真關心，所以特別留票beh送hōo--我，真正是tsiok感心--ê。
看著家長tsiah熱心，我後--來想想--leh，講家己是台語人，結果suah無來參加霹靂盛典ê演唱會實在是講bē過，我想tse應該是天公伯--à ê安排，所以我就專工撥工來--ah。
入來到現場，看著坐kah插插插ê觀眾，我量其約kā估計可能上無有3、4,000人，尤其是坐tī我邊--a ê人，差不多lóng 30 thóng歲，每一首歌lóng ē-hiáu唱。而且看in激動ê心情，huah-hiu kah有夠大聲，唱kah有夠熱情，hōo我深深感受著in對霹靂癡迷ê心，mā hōo我對台語ê文化傳承koh有一點點仔ǹg望。
規場ê表演lóng真精彩，其中我感受上深--ê是聽西卿唱歌，一--來是伊唱我細漢愛聽ê歌，二--來是伊已經72歲--ah，iáu-koh有法度唱現場--ê，而且聲線聽--起-來iáu真有khuì力，元氣十足，氣色看--起-來mā iáu真好，hōo我非常敬佩。
M̄-koh hōo我感覺可惜--ê是——大部份歌手lóng講華語，kan-na一位查某歌手模仿豬哥亮講幾句仔台語，就無--ah。連荒山亮tsit位有leh tī電視頂做台語節目主持ê歌手，mā是講華語kah逐家sio借問。Iáu-koh有現場ê主持人mā仝款kan-na講華語來主持！Tī台語布袋戲ê演唱會，結果除了唱歌以外，賰--ê lóng講華語，真正hōo我感覺真失望！所以尾--à我感覺我已經看bē落--去--ah，就先走--ah。聽其他ê朋友講，tī上尾--à謝幕ê時，荒山亮有用台語表達伊ê感謝，m̄-koh其他ê歌手就ná親像無法度用台語來表達。
我想，真有可能主辦單位kah tsia-ê歌手，應該是無台語tih-beh消失--去ê危機意識，而且真有可能，in家己tī日常生活中，mā lóng真罕得用台語來kah人開講tsih接，所以真慣勢tī台仔頂就是用華語來sio借問。
若是主持人kah所有ê歌手lóng有台語傳承ê危機意識，平常時有leh講台語，就ē-tàng好好仔把握tsit擺ê機會，tī現場用台語來kā所有ê人sio借問，kah台跤ê觀眾朋友用台語開講，鼓舞逐家做伙來講台語，hōo愈來愈濟人ē-hiáu講台語、願意講台語，hōo台語ē-tàng繼續傳--落-去，hōo台語大pha尾。
Án-ne布袋戲kám m̄是ē-tàng hōo愈濟人來kah意，mā ē-tàng hōo愈來愈濟人kah意來唱台語歌--leh？若無，等kah真正lóng無啥人leh講台語ê hit个時tsūn，koh賰偌濟人ē想beh來看布袋戲？Koh賰偌濟人ē想beh來唱台語歌、買台語專輯，到時kám koh有台語ê市場？
作者註：寫tī 2024年10月20，記錄高雄海洋音樂館霹靂盛典演唱會ê感想。
