作者：黃靜惠
Hmh，有夠好食，好食kah hōo人感覺活--leh真好。
～吉本ばなな，《月影》
Tng-leh大ê囡仔，逐工10點thóng就leh huah腹肚iau，tiānn-tiānn中晝頓時間iáu未到，便當kheh仔就偷食kah空空空。若是拄著khah gia̍t-siâu ê囡仔，iau-sà-sà家己--ê食無夠，就順suà食別人--ê來拄siàu。Tsit-tsūn kā講啥，lóng無攬無ne無精神，只有講著食，上有興趣，目睭thí kah ná牛目--leh，喙瀾koh kiōng-beh津--落-來，逐家講bē煞，真正是講著食就流汗。
Lán就ē-tàng趁tsit-tsūn，介紹in看柏井壽ê《鴨川食堂》、吉本ばなな ê《廚房》、小川糸ê《蝸牛食堂》……，tsia--ê kap料理有關係ê小說上適當。故事內容lóng是用好食ê料理來安慰家己kap別人，用食物來引導故事中ê人物改變原來無好ê想法，重koh建立新ê關係。Lán台灣作家張維中mā講，每一盤tsiūnn桌ê料理，無論偌厚工、偌好食，lóng是tuì無到有，然後koh tuì有到無。但是，hōo lán食入去腹肚--裡--ê，lóng ē有一部份轉化做hōo lán成長kap活--落-去ê力量。知影料理tuì無到有，tuì有到無，就是人生ê悲歡離合，也就ē理解食飯進前ê感謝kap祈禱ê意義--looh！而且，tsit種健康正確ê觀念，對囡仔ê品德kap人格教育lóng有非常正向ê影響。
Koh再講，有食就有行氣，lán若是傷心、艱苦、忝頭ê時tsūn，來一杯燒燒ê飲料koh配一寡好食ê四秀仔，身軀勻勻仔燒lō--起-來，人mā隨tuè leh精神--起-來。所以，物質上安搭人心上好、上緊、俗koh方便ê辦法就是料理，莫怪就親像心理學家Alfred Adler（『阿德勒』）講--ê，世界無「問題兒童」、「問題青少年」、「問題……」，只有欠缺正確引導ê「生活失敗者」。人講「食tio̍h藥，青草一葉；食m̄-tio̍h藥，人參一石」，所以只要用正確ê方法，就ē-tàng hōo人tuì自卑、悲傷、痛苦、受氣、失望、反背、分離、死亡……，種種致使心靈kap身體分開ê破碎關係--裡，重koh身心合一，肯定家己，原諒別人，得著koh再徛--起-來ê力量。
親像日本Alfred Adler心理學會指導員兼顧問岸見一郎寫ê《被討厭的勇氣》、《其實你不必為了別人改變自己～一定可以實現的阿德勒勇氣心理學》……等等，一出版lóng隨變做真時行ê冊。因為，日本是一个地牛tsia̍p翻身kap海漲天災不斷ê國家，tsiah濟tsiah-nī仔恐怖ê災難，kan-na靠個人ê力量根本無法度繼續活--落-去，一定ài有拍斷手骨顛倒勇ê勇氣kap非常tsa̍t-tsinn ê人際關係，tsiah有辦法來面對環境劇烈ê改變。所以，Alfred Adler提出ê勇氣kap人際關係ê想法，拄拄仔好符合逐家精神上ê需要，m̄-tsiah ē逐擺冊一出版就賣kah tshiâng-tshiâng滾。
譬論講，柏井壽創造ê hit間「鴨川食堂」，是老爸鴨川流kap查某囝阿石開--ê。M̄-nā提供好味好素芳kòng-kòng ê料理，若是來ê人客想beh koh食一kái íng過食--過ê料理，做過刑警ê鴨川流kap聰明乖巧ê阿石，就ē想辦法做出人客以早食--過ê料理。雖然家己mā有一寡無法度解決ê問題，m̄-koh mā是tsiok骨力替別人解決問題。像我mā是án-ne，tiānn-tiānn家己揹黃金甕仔koh beh替人看風水。M̄-koh，有tang時仔，也是因為án-ne，lán ē koh-khah有同理心，mā koh-khah接近對方ê心。親像Alfred Adler，伊是1870年tī奧地利Vienna（『維也納』）出世ê猶太人，細漢ê時tsūn就身體無好tài身命，tiānn-tiānn破病。四歲生日前幾工仔，有一工透早睏醒，suah發現睏仝床ê小弟m̄知tang時早就bē喘khuì--ah。伊大漢了後，m̄-tsiah ē拍拚讀冊立志做醫生，想beh替人治病。後--來，伊koh真正變成眼科、內科kap精神科醫生，又koh是個體心理學派ê開山祖師爺，因為伊想beh幫助不幸ê人提出勇氣，改變生活，永遠過幸福快樂ê日子。
我mā bat hē願，祈求菩薩hōo我勇氣，ē-tàng勇敢面對生活中ê不如意。M̄-koh，我ê生活並無因為án-ne就好--起-來，天公伯--à suah顛倒hōo我拄著一大堆愈來愈食力koh亂七八糟、oo-lóo-bo̍k-tsè ê代誌。最後，我kám有得著勇氣？我想，ke減應該是淡薄仔有--lah，因為我已經度過tsiah濟ê人生關卡，tsit-má iáu-koh好好仔活--leh，ē食ē睏ē笑，koh ē sì-kè走跳kap人puânn-nuá，好佳哉無變做bih tī厝--裡的孤khut老人。只是tsit-tsūn支持我繼續愈活愈精神ê勇氣，kap我原本想--ê無啥仝款。Tsit-má，我khah老步定mā想khah開--ah，若拄著kap我想法、期待無仝ê代誌，我就先kā家己講：「神hōo--我--ê就是上好--ê。」因為，慈悲ê神伊bē一斗就hōo我siunn濟考驗，伊逐kái hōo我ê問題，lóng是我ē-tàng承受解決--ê，然後kā變成我人生ê肥底，hōo我變做一个愈來愈好ê人。原來，向神祈求勇氣，m̄是像「鋼鐵人」án-ne，ē隨kā「勇氣」tsit个裝備tuì 18天外送--來，安裝tī lán ê身--上，hōo lán啥mi̍h lóng m̄驚。若是án-ne，tse就m̄是真正ê勇氣，應該是叫做「gōng膽」tsiah tio̍h。我感覺，神，伊是安排一个koh一个ê試驗，沓沓仔先hōo一粒有智慧ê勇氣種子tī lán ê心肝頭一點仔一點仔釘根、發芽、puh穎、生ue、湠葉、開花，最後生出koh-khah濟粒有智慧ê勇氣種子。Tsit-má我tsiah了解，「接受無完美，tsiah ē愈接近完美」、「萬事善解」……，tsiah濟tsiah好ê人生「座右銘」，若無真真正正純金ê勇氣是做bē到--ê--ōo！
2016年，日本NHK kā《鴨川食堂》拍做八集溫暖人心ê連續劇，每一集探討一種人kap人之間ê問題kap關係。
第一集〈阿母ê馬鈴薯燉肉〉，伊達久彥，33歲，事業成功，因為雜誌beh採訪伊ê主題是「成功男人，靈魂美食」，不而過伊ê靈魂美食是過身tsiok久ê阿母ê手路菜：馬鈴薯燉肉。伊只好來拜託鴨川食堂替伊揣出阿母馬鈴薯燉肉ê滋味。結果鴨川流揣著in後母kap阿母ê食譜，照食譜順利kā菜煮--出-來，mā順suà kā伊達久彥誤會後母1、20年ê心kat tháu--開。
第二集〈前翁ê tsìnn豬排〉，教人彈鋼琴ê音樂老師廣瀨須也子，25年前結婚了後，翁婿岡江開一間店，第三年因為須也子ê叔伯兄弟來店--裡無細膩食著有毒ê刺䲅過身，翁只好kā店收--起-來，但是伊m̄甘須也子食苦，mā因為親tsiânn五十ê壓力，suah堅持beh kap須也子離婚，後--來岡江tī京都出町柳車站附近開一間專門賣tsìnn豬排ê店。離婚22年、岡江破病離開世間了後，iáu是愛岡江ê須也子一直想beh做出仝款口味ê tsìnn豬排，m̄-koh雙手lóng hōo熱滾滾ê油piak tio̍h傷--ah，mā是做bē出--來，只好來揣鴨川食堂tàu-sann-kāng。後--來，因為鴨川流ê調查，tsiah意外知影岡江開豬排店ê原因kap須也子有關係——原來，岡江tsìnn ê豬排hōo無愛食肉肥tsut-tsut、油leh-leh料理ê須也子mā呵咾kah ē tak舌。所以，岡江就講若koh開店，一定ài開賣tsìnn豬排ê店。
第三集〈Kap阿公做伙食Na-phóo-lih意大利麵〉，食著好食ê mi̍h件就ē感動kah哭ê大學生美月明日香，想beh揣五歲時tsūn kap阿公做伙食--過ê意大利麵，因為tsit-má 75歲ê阿公，得著失智症，已經認bē出伊--ah，人mā siān-siān啥mi̍h to無愛食，所以伊希望tsit盤意大利麵ē-tàng hōo阿公想起一寡íng過ê代誌。果然，阿公食一喙鴨川流煮ê意大利麵了後，ná像想起啥mi̍h，雄雄徛起來開喙唱出íng過kap明日香食意大利麵了做伙唱ê hit首歌：「想beh行tī生份ê街仔路，想beh去遠方，想beh去看m̄ bat去看--過ê大海，想beh去遠方……。」唱煞，歡頭喜面坐--落-來，kā麵食kah清氣liu-liu。
第四集〈牽手ê鍋燒烏龍麵〉，窪山秀治是鴨川流íng過警察局ê同事，in牽手千惠子已經過身15年--ah。最近，窪山拄著好ê對象奈美，想beh kap伊結婚。奈美tsiok gâu煮食，無論煮啥mi̍h lóng tsiok好食，m̄-koh m̄知按怎，只有窪山上愛食ê鍋燒烏龍麵，無論伊按怎煮窪山就是感覺歹食kah bē孝孤--得。所以，伊專工來拜託鴨川流，koh煮一kái像千惠子án-ne，用雞肉、海帶、九條蔥、柴魚片、麵thi、魚板、香菇、tsìnn蝦仔kap卵煮ê烏龍麵hōo伊食，就當做kap過去告別，然後安心仔tuè奈美離開tsia，好好仔開始第二个人生。
第五集〈外公ê ha̋n-bà-gù〉，美食作家竹田佳奈，伊讀幼稚園ê後生勇介講伊上愛食外公做ê ha̋n-bà-gù（『漢堡排』），m̄-koh佳奈討厭hit个愛se̍h-se̍h唸、管教嚴格又koh自私ê老爸，已經tsiok濟年lóng無koh kap伊講話--ah。因為對老爸ê怨恨，所以佳奈想beh改變勇介ê想法。伊想beh hōo後生koh食一kái ha̋n-bà-gù kap上jió-toh ê牛排，hōo勇介知影世界koh有tsiok濟食物比ha̋n-bà-gù koh-khah好食。但是，佳奈經過鴨川流ê phò-tāu、解sueh，kap親喙食過老爸ê ha̋n-bà-gù以後，終其尾化解心中對老爸ê怨恨。
第六集〈初戀ê紅酒燉牛肉〉，55年前，信子tī京都kap筆友子島第一擺見面，ná食紅酒燉牛肉ná討論日本古典文學，tuì《源氏物語》、《平家物語》，一路講到《方丈記》。食到一半，子島suah雄雄開喙向信子求婚，害伊驚一tiô隨逃出hit間餐廳，後--來因為信子爸母ê阻擋，子島就無辦法kap伊聯絡。Tsiah濟年過--去--ah，信子一直想beh kā子島會失禮，m̄-koh lóng無子島ê消息。經過鴨川流ê調查tsiah知影，其實見面了後過無偌久，子島就去英國留學，畢業以後tī倫敦大學教冊、結婚、生一个查某囝，退休tsiah tńg來日本，舊年拄過身。Tsit-má，信子koh食一kái初戀ê紅酒燉牛肉，算是對hit段純情ê戀愛上好ê記念。
第七集〈阿爸ê nóo-lih便當〉，游泳明星恭介siàu念老爸做ê nóo-lih便當，伊讀國中ê時因為爸母離婚，所以老爸認真去餐廳學做便當，開始逐工lóng做仝款口味ê nóo-lih便當hōo伊食，m̄-koh愛pua̍h-kiáu ê老爸mā是繼續pua̍h，甚至kā伊beh讀冊ê錢lóng輸了了，伊一受氣就離開老爸一直到tann。最近，伊聽著老爸破病ê消息，想講koh食一kái老爸做ê nóo-lih便當，tsiah來決定是m̄是beh來原諒--伊。其實，除了pua̍h-kiáu以外，恭介ê老爸mā是一个好老爸。應該án-ne講，lán人ke減lóng ē做m̄-tio̍h代誌，kan-na ē-tàng講世界上無完美ê人。
第八集〈拜五ê炒飯〉，厝--裡散赤ê阿初，老爸tī公司做m̄-tio̍h代誌suah恬恬離開，辛苦tshiânn養伊ê阿母mā tī伊十歲ê時過身--去，後--來伊hōo阿叔收養。自細漢就生了真lò跤，阿母又koh愛hōo伊穿紅衫，害伊tiānn-tiānn hōo人笑，m̄-koh阿母lóng ē安慰伊ài勇敢做家己，koh ē煮好食ê粉紅色炒飯hōo伊食。因為，家境富裕ê男朋友向伊求婚，所以阿初想beh煮一頓阿母ê炒飯hōo伊食，伊若是愛食，就ē有勇氣好好仔kā伊解sueh家己ê身世。當然鴨川流kap阿石，tsit kái mā是完美達成任務，祝福阿初有一个幸福ê未來。
表面上，tsit八集看--起-來每一集是leh討論一種人際關係ê問題，鴨川流kap阿石，leh替人客sì-kè走揣記憶中ê滋味ê時，無疑悟mā解決人客kap家己人生ê衝突kap問題。其實，tsit八集ê故事最後lóng是leh講一个人生大道理——過去發生ê代誌就hōo伊過--去，有問題就ài勇敢面對kap解決，因為重要--ê是tsit-má kap未來。
兩暗看煞tsit八集，害我愈siàu念阮阿母ê手路菜，暗時又koh夢見阿母。阮tiānn-tiānn夢著阿母煮kah規桌phong-phài tshenn-tshau ê好料beh請我食，我ná夢ná giâu疑，怪奇--ah，阿母m̄是死--ah，哪ē koh tī厝--裡煮飯hōo我食？M̄-koh逐遍連一喙to iáu未食--著，人就醒--過-來--ah。
Hainnh！阿母已經去塗州賣鹹鴨卵tsiok濟年--ah，想koh beh食伊煮ê菜是無可能ê代誌，阿母ê炒米粉、肉粽、紅燒豬肉，koh有煎kah赤赤赤ê魚仔……，料好實在，我掛保證真正是世界好食--ê。Tsit-má，想有食無kan-na giàn；想beh食只好家己煮，趁放假tī廚房舞東舞西、無閒tshih-tshih一、兩點鐘，tsiah煮好金瓜排骨湯、蝦仁khiàn蔥烏龍炒麵tsit兩項，kap阿母規桌ê tshenn-tshau實在是bē比--得。M̄-koh，無魚蝦mā好，腹肚iau啥mi̍h lóng好食--lah！古早番薯食kah飽ê時代，食飯是趁燒緊食；tsit-má手機仔時代，飯菜一tsiūnn桌，lán是趁燒緊hip一張一張suí-suí ê相片，傳起去網路頂hōo人tshi̍h讚。大姊做鞋小妹看樣，tsit招我最近拄學ē，mā緊來展--一-下，hip三張相片囥起去面冊，文友吳珍勝大姊隨送我一首詩：「阿母煮ê好滋味，有魚有肉koh有麵，愈食心內愈歡喜，幸福滿足笑bi-bi。」看了實在tsiok感心--ê，人善心suí ê吳大姊，有伊真好，阮阿母tī天頂若看--著，一定mā ē tsiok歡喜。
你kám想beh走揣記憶中拍ka-la̍uh ê幸福食堂氣味？M̄管伊是芳kòng-kòng ê竹管仔飯、四神湯、蚵仔麵線，iah是臭hiam-hiam ê臭豆腐……，只要lán拍拚骨力揣，一定揣ē著！
