作者：吳睿穎
自出社會到結婚生囡仔，家己成立一个家庭，除了爸母對我ê恩情khah大天、比海koh-khah深以外，koh有一个人是我真正感恩ê人，hit个人就是我ê翁婿。
我ê翁婿ke我四歲，阮兩人ē熟sāi是我ê ban叔--à紹介--ê。
Hit个時tsūn，我蹛tī下港，伊蹛tī北部食頭路，因為tiānn-tiānn去南投竹山ban叔in姪仔hia tshit-thô，叔--à看伊真定著，就問伊：「Kám有對象--ah？」伊講：「Iáu無對象。」就án-ne，阮兩人ê姻緣就牽--起-來--ah。經過三年外ê長距離交往，tsiah無簡單來結成連理。了後，我就tuè翁婿來到台北，kap伊做伙拍拚。
雖bóng北部生活真便利，m̄-koh tī下港蹛慣勢ê我，真bē適應北部ê空氣kap交通。因為狹koh kheh，車輛來來去去速度lóng tsiânn緊，逐工空氣mā真bái，hōo我kiōng-kiōng-beh bē喘khuì！伊知影了後，歇睏日lóng ē tshuā我去山頂行行--leh、看看--leh，心情放輕鬆，hōo我壓力mài hiah-nī大，mā hōo我熟sāi蹛ê所在附近ê地理位置。Án-ne，我若普通時仔beh出去行行--leh，mā知影路thang去。koh有，厝內ê khang-khuè，伊mā lóng ē kā我tàu sio-kīng khioh起來做，mā ē kā我tàu tshuā囡仔。小可仔tàu-sann-kāng就對我tsiok有幫贊--ê，iah無，我tshuā一个囡仔24點鐘，實在bē堪--得。
見擺我若拄著困難，我ê翁婿知影，伊就ē鼓勵--我，做我ê心靈導師，開破我內心ê困境，hōo我真緊就ē-tàng跳脫所拄--著ê困難。Iah無，我真正痛苦無解，行bē出心魔！所以，我真正感謝我ê翁婿，伊對我ê好，點點滴滴我lóng囥tī心肝內，hōo我溫暖、kā我鼓勵。伊真正是我一世人ê貴人kap好伴侶。
