作者：廖啟助
自查某囝出世，我就想beh kā「阿公阿媽講ê話」好好仔傳hōo囡仔。有一擺，我無意中去聽著農村武裝青年tī成功大學「跤踏土地唱民謠」演唱會內面演唱ê〈阿母的話〉 tsit首歌，ná親像是透過主唱兼gì-tà手阿達--à ê喙來講出我ê心聲。我tsit个做老爸ê人，ná聽阿達--à ê分享目屎ná流。你講kám有tsiah hàm？無m̄-tio̍h，就是hōo我tsiah-nī感動，請你沓沓聽我說明，是按怎我ē tsiah-nī仔感動。
我是tī台南龍崎大漢ê庄跤囡仔，自細漢m̄-nā厝內人lóng講台語，ē-sái講是規个庄頭，甚至是規个鄉鎮ê人lóng是全台語leh kah人溝通tsih接，我就tī tsiah-nī純ê台語母語環境大漢。M̄-koh，後--來退伍了後到高雄教冊食頭路ê時，身邊講台語ê人無濟，有leh講ê人，mā是透lām華語leh講khah濟，我無意中開始tuè in講華語。
歇睏ê時tńg來台南厝--裡kah阿爸阿母iah是阿公阿媽開講ê時，suah變做tsiok濟台語語詞開始bē記得ài按怎講。講台語ê時，喙舌lóng ē拍kat、bē liàn-tńg，ài停落來問序大人tsit个語詞按怎講，tsiah有法度koh用台語講--落-去。所以差不多uì 20冬前，我開始有意識提醒家己盡量用台語kah人tsih接溝通，來保持家己ê台語能力。
因為蹛庄跤，序大人無特別注重我ê課業，細漢ê時lóng leh tshit-thô，啊無，就是去田--裡tàu-sann-kāng khah濟。加上厝內環境無好，無啥mih教育資源，就算阮班kan-na七个人，我ê成績iáu是按尾--à算--來前三名khah濟，我tī學校考試ê成績一直lóng無好。自國小差不多三四年以後，tsiah意識著成績bái tsit項代誌，一直到讀大學ê時，我對家己ê表現，lóng有真深ê自卑。
2010年hit冬ê「國語文」競賽，我聽著教學組長講，目前「國語」ê比賽項目，同事lóng報tīnn--ah，m̄-koh台語演講tsit項無人報，kám有人beh來報名？啥mi̍h！我kám有聽m̄-tio̍h？全國ê語文競賽，竟然有台語ê比賽項目，koh拄好演講tsit項無人參加，我就tshenn-mê m̄驚銃，殘殘主動去報名，代表學校比賽。
想bē到我頭擺去比賽，就hōo我得著全高雄市教師組ê第一名，tse對一个自細漢tī庄跤大漢、自卑ê我來講，是有夠大、有夠大ê肯定kah鼓舞，講台語ê庄跤囡仔mā有出頭天ê一工！自hit時開始，我叫家己ài疼惜台語，kā lán ê母語傳承--落-去，就án-ne，我費心、用心教家己ê囡仔講台語。
我tsiok希望阮查某囝ē-hiáu講in阿公阿媽kah我講ê話，自伊出世開始學講話，我就lóng全台語leh kah查某囝講話；m̄-koh阮太太ê母語m̄是台語，所以伊kah查某囝講華語。因為身邊大部份ê人對阮查某囝講華語，kan-na我tsit个老爸講台語，伊tsua̋nn變做無啥愛講台語。為著beh繼續傳承台語，只要伊講一句華語，我就tī邊--a隨講一句台語，hōo伊知影tsit句華語若換做台語beh按怎講。
有一擺我為著beh教囡仔講台語，要求阮查某囝ài講台語，伊suah kā我應講：「阮同學a̍h無人leh講台語，是按怎阿爸你就ài hiah堅持叫阮講台語？」聽著伊án-ne kā我應，我ê心內kah阿達--à仝款，煩惱阮查某囝是m̄是認為「講母語是一項真見笑ê代誌」，感覺「是按怎lán兜講ê話ē kah人無仝？」
太太看阮舞kah爸仔囝起衝突，無愛看阮拍歹感情，伊開喙講：「是按怎你ài hiah堅持叫囡仔講台語？我mā無leh講台語，m̄是仝款過了好好？你為著beh教囡仔講台語，舞kah爸仔囝sio罵，án-ne kám有必要？Kám有價值？」後--來我只好讓步，無koh堅持囡仔一定ài開喙講台語，kan-na用好喙、用參詳、用koo-tsiânn ê方式，叫in盡量ke講寡台語，我仝款家己一个人堅持繼續講台語hōo in聽。
長期落--來兩个囡仔iáu是真罕得tī我ê面頭前講台語，坦白講，對我tsit个逐工想beh kā母語傳hōo--in ê老爸來講，心內一直lóng是傷痕，疼kah無人知，身邊ê人lóng無法度體會kah了解，甚至hōo我感覺心肝ná像有一部份kiōng-beh ta--去--ah。我mā bat請教幾个教授iah是其他資深ê台語老師，問in有啥mih撇步thang來改善tsit个狀況。
In hōo--我ê答案kah建議lóng差不多是：叫我khuann-khuann仔來，mài急mā mài勉強囡仔一定ài按怎，因為「硬挽ê果子bē甜」，相信時間一下久，囡仔ê表現自然ē改善。看著tsiah濟教授kah老師lóng án-ne kā我鼓舞kah建議，我mā只好放下，叫家己順其自然，慢慢等待花開ê hit工。
我繼續堅持逐工tī囡仔身邊kah in全台語講話，mā做模範hōo我ê囡仔看，一直充實家己，讀台文拚專業級ê認證、去參加演講比賽、寫文章投稿、參加教育部辭典編輯培訓、本土語言意識培力培訓、做宣講師、sì-kè去演講、到真濟縣市做評審、做伙去演台語廣播劇、參加台語有聲冊錄音，尾--à甚至改途做台語老師。我一直關心、鼓舞身邊ê人鬥陣講台語，ē-sái講規个心lóng tī傳承母語頂面。
囡仔看我做tsiah-nī濟台語khang-khuè，應該知影我ǹg望kā母語傳--落-去。大漢查某囝bat代表學校參加台語演講比賽，甚至tī國中ê時bat提著市賽第三名。伊去參加教育部B卷ê台語認證考試，完全無準備，suah一擺就通過B1中級，甚至差10外分就到B2程度。細漢查某囝mā有代表學校去比台語朗讀，學校ê台語老師mā kā我呵咾講伊是in班--裡台語課表現上好ê學生。看著兩个囡仔ê表現，我知影我tsit个阿爸平常時逐工對in講ê話，in有囥tī心肝內kah頭殼底。
Tsit-má聽著〈阿母的話〉tsit首歌，hōo我想起大漢查某囝有一工tī LINE寫訊息hōo--我，伊講：
恭喜阿爸你ê台文寫作投稿又koh錄取--ah！
我感覺厝內人ē-tàng做伙分享歡喜ê代誌tsiok讚--ê。
純文字無啥溫度，m̄-koh我發自內心替阿爸歡喜--ōo。
雖然我平常時仔無啥講台語，
m̄-koh我支持你對台語ê貢獻hām參與。
加油，衝衝衝！
你tiānn-tiānn鼓勵--我，所以我mā beh替你加油！
想起查某囝tsia-ê kā阿爸鼓舞ê話，hōo阿爸知影，你bē感覺阿爸對你講母語是見笑代，mā bē感覺阿爸一直leh講台語ē hōo你感覺真歹勢。你koh支持阿爸去參與對台語有貢獻ê種種活動，阿爸有沓沓仔去感受--著，原來我過去tī lín心內tiām ê台語種子，mā已經慢慢leh puh-ínn開花--ah！
