作者：王哲聖
8--月ê時有一工，阿兄khà電話來講：「8月27是爸爸過身ê日子，lán m̄免一定ài 8月27 hit工，揣一工逐家方便ê禮拜六，9--月、10--月lóng ē-sái，做伙來去山--裡kā爸爸掃墓〔1〕，lín姊--à就hōo你聯絡，日子講好tsiah kā我講……」啊，又koh是beh去掃墓ê日子--ah。
 |
| 南山公墓ê基督教公墓 |
 |
| 有白話字ê墓誌銘 |
掃墓是阮兜tiānn-tiānn sio招去做ê代誌，清明節ê時sio招去掃墓，過年前後去掃墓，爸爸過身ê日子去掃墓……，見若厝內有重要ê代誌，逐家就ē講，「lán來去掃墓」——he是一種想beh kā序大人報告說明ê心情。
9月初9 hit个禮拜六下晡3點，我kah阮某uì高雄駛車tńg去台南厝內，兄嫂已經kā掃墓beh用ê花備辦好勢，姪仔準備té水ê罐仔，姪女tàu kuānn hia-ê花，等阮姊--à in hit家四个人到位，就做伙出發去墓地。
Tī台南市南區國民路，殯儀館正門對面，拄仔好有一條小路，tsiânn狹，無法度sio閃車，彎彎khiau-khiau，直thàng入去墓地；中途ê路兩爿lóng是墓，過兩个大tńg彎來到基督教ê墓園，雄雄出現一phiàn平坦整齊ê墓區，tse是台南市基督教長老教會ê聯合公墓〔2〕；直thàng四角亭仔ê路，兩爿是一格一格排列整齊ê墓。
Tsit个所在古早叫做桂仔山，mā ē-sái叫做鬼仔山，是舊底府城南門外ê一个小山崙，古早就是府城埋葬死人ê所在，tsit-má號做「南山公墓」〔3〕，mā已經ē-tàng算做文化古蹟。
Tī傳統ê風俗，講究風水ê要求，原底南山公墓並無規畫，大大細細ê墓方向無仝，比較khah亂；m̄知影長老會是按怎tī桂仔山內底買著tsiah大塊ê土地。基督教ê墓園就khah有規畫，kā一phiàn山坡地，分做兩層，第一層中ng一座四角亭，十字路隔做四區，peh幾若坎樓梯，去第二層，仝款以四角亭做中心，koh分割做四區。
阮家族因為原底lóng tī南門長老教會〔4〕做禮拜，所以有會籍tī內底，大體lóng安葬tī tsia。
阮ē uì阿公ê墓開始，清理墓前lian--去ê花草，kā插花ê花瓶斟水，換新ê花蕊，koh用布搵水kā墓頂ê塗粉拭掉，逐家做伙行禮，由大兄tshuā逐家做伙祈禱，感念阿公信仰ê模範，tsiah-koh去爸爸、媽媽ê墓；後壁一門一門ê墓，有二姆、二伯、大伯、大姆、大姨、大姑……，每一个墓是阮過往ê親人。除了插花、拭塗粉、行禮、祈禱之外，一路上，阮ē講起過去ê代誌，笑詼、冤家、答喙鼓，講來講去lóng總變成甘甜ê記持；mā ē講起家族中，逐人無仝ê個性——二伯bat tshuā我去食『飲茶』，大伯真愛雜唸，大嚨喉空ē驚死人ê大姆，iáu有爸爸一生ê成功kah失敗——tsia-ê講bē煞ê過去，是阮切bē斷ê情份，就án-ne一代一代傳--落-去。
阮兜規个家族lóng是信基督教，厝內並無神主牌仔kah拜拜ê風俗，m̄-koh阮mā有屬於阮家己ê傳統，阮仝款mā ē去有孝父母，阮有屬阮記念祖先ê方式。
1.作者信仰是基督教，所以稱呼「掃墓」，m̄是道教ê「培墓」。
2.南山公墓內底有兩成屬於私人墓地，其中包含基督教墓地，占地兩公頃，分做十區墓園、五堵納骨牆，像英國牧師巴克禮就葬tī第二區第八排。
3.Tī台南市南區，中華南路一段到國民路、西門路一段之間，占地面積有100公頃，倚近富貴南山紀念中心kah台南市立殯儀館。是全台灣規模上大ê明清時期墓葬群。
4.Tī台南市中西區南門路117號。1930年感動母會東門巴克禮紀念教會來開山町（開山路）開設高砂町說教所，tī 1933年1--月第一个主日開始上午ê禮拜。
