主講／林大米（Podcast「米米之音」主持人）
黃建圖（『海波浪』主理人、龜山島民搬徙大溪以後第一代）
林沛慈、蔡茹米（宜蘭大溪國小六年ê學生）
記錄／田永承
「米米之音」是一个農村廣播節目，自2015年開播。主持人林大米當初辭頭路、搬去宜蘭，決定家己製作網路廣播，beh做「農民生活聲音紀錄者」。大米行踏全台灣，分享農業議題，記錄作穡人ê生活kap種作理念；ǹg望透過節目，走揣農村hām農業ê價值。Tsit篇是2021/10/3節目ê文字記錄，雜誌設「農民食堂」專欄kā刊出。
米米之音
Tsit集ê節目內容ē-sái tī tsia收聽：
頭城鎮管理ê龜山島，是宜蘭縣上大ê離島。根據文獻紀錄，龜山島上無tī清國時代就有人蹛--ah，但是tī 1974年因為軍事需求，龜山島ê居民hông押遷徙到今仔日ê頭城大溪里。自hit年開始，若無代先申請就bē-tàng tsiūnn島，龜山島變做宜蘭人kan-na ē得遠遠看、無法度行跤到ê所在。M̄-koh你kám知，suah有人tshuā一陣宜蘭頭城大溪國小ê囡仔到龜山島探索，熟sāi宜蘭tsit个神祕ê厝邊。
今仔日米米之音ê受訪者是文創品牌「海波浪」ê創辦者——黃建圖先生。Tsiânn做龜山島移民到大溪里ê第一代，tiānn-tiānn ē聽著厝--裡老大人講起íng過細漢時tī龜山島，厝邊隔壁ê囡仔ē sio招去在地囡仔ê祕密基地「龜抓仔底」探索，iah是去白色ê海埔，kā沙、kā塗疊做百百款ê沙城，或者是lia̍p塗尪仔ê快樂日子。龜山島m̄-nā是íng-tsūn囡仔ê樂園，mā是心靈ê歸依。龜山島有一欉毛柿樹，是龜山島人ê精神中心kap心靈倚靠。過去ê龜山島人若生囝，ē tshuā囡仔去揣毛柿樹，hōo家己ê囡仔做毛柿樹ê契囝，保庇囡仔ē-tàng健康大漢。李建圖尾--à講--著，hit欉毛柿樹ná像世界名著《小王子》內底ê玫瑰花，m̄管小王子到闊bóng-bóng ê宇宙sì-kè流浪，玫瑰花永遠iáu是ē踮B612星球恬恬做小王子ê倚靠。
講者就想講，beh kā tsiah-nī趣味koh有意義ê龜山島故事揣倒tńg來hōo宜蘭，延續按1974年hông斬斷ê記憶kap感情。所以就kap羅東高中ê老師合作，tshuā大溪國小四年到六年ê學弟、學妹去龜山島冒險一工，透過拍通關遊戲，熟sāi龜山島ê大細項事。
龜山島對大溪國小ê學生來講，就是做伙上課、散學--ê，對龜山島真熟--ah。受訪ê大溪國小林同學是頭城在地人，進前已經去過龜山島五kái--ah。林同學講龜山島sian去lóng bē siān，逐kái tsiūnn島lóng有無仝ê發現，koh推薦逐家去龜山島tio̍h-ài去410高地，tī至高點欣賞規个龜山島。按桃園轉學到大溪國小ê蔡同學，來到大溪liam-mi就去愛著大溪ê清閒。去龜山島拍通關，是外地來ê蔡同學第二kái tsiūnn島，透過sńg拍通關遊戲熟sāi真濟龜山島頂kuân古蹟ê過去，hit工ê旅行mā kap好朋友起造真濟美滿ê回憶。
舉辦龜山島ê拍通關活動對黃建圖先生來講是「揣根之旅」；對大溪國小ê囡仔來講，龜山島居民hông押搬厝ê時代已經真遙遠，tsit个拍通關是beh hōo tsit陣宜蘭囡仔hām變kah真生疏ê龜山島重koh做朋友，熟sāi龜山島ê過去、熟sāi宜蘭，起造對土地ê認同kap驕傲。
