主講／陳翠蓮
記錄／張翠硯
「轉型正義kap不當黨產」台語講座是由不當黨產處理委員會主辦、李江却台語文教基金會承辦ê系列講座。
本文是2024/8/23講座ê摘要記錄，陳翠蓮是台灣大學歷史學系教授兼台灣民間真相與和解促進會理事。
Uì威權行入民主化ài思考啥？
1980年代，全世界有3、40个國家tī tsit段時間經歷政治體制uì威權行入民主化ê過程。東亞國家像台灣、韓國、菲律賓lóng算是仝一批--ê。轉變了後，以早ê錯誤beh按怎處理？受害者kah in ê厝內人應該得著啥mih款ê補償iah是幫助？錯誤是siáng造成--ê？是獨裁政府kah規个組織ê支持幫贊？Iah是講，因為逐家lóng tìnn m̄知、mā無人去阻擋tsia-ê代誌發生，所以tse其實是規个社會ê責任？
民主tńg bē過
2000年透過民主選舉政黨輪替，台灣一步一步行向民主化，m̄-koh，有bē少ê思想iáu未轉換--過--來，所以m̄-nā有政治人物大聲講伊認同蔣經國，mā有bē少人民認為蔣經國是過去上好ê總統，tse實在是台灣民主政治ê怪現象。威權遺緒是威權政府為著beh堅固in ê統治所做ê代誌，有ê是看ē著ê實際工程，有ê是看bē著ê「政治神話」，利用tsia-ê信念來kā人民洗腦。
國家是黨leh tshuā頭，就是所謂ê「以黨領政」，所有ê政府組織leh做代誌，後壁lóng有黨leh控制。M̄管你是智識份子、軍人iah是警察，組織內底lóng有人kā你「顧tiâu-tiâu」。無論人民是啥mih款ê社會身份，lóng有各種情治單位leh監視。Tse hōo hit-tang-tsūn ê人民對看--著ê代誌tìnn恬恬，因為tshap政治ē出代誌，落尾漸漸仔變做政治冷感。
堅固政權ê手段
除了威權壓制，後一步就是靠hōo人好處、利益來買收別人，thang好hōo政權穩定運作--落-去。所以開始經營黨營事業家己飼家己，suà--落編政府預算hōo kah黨關係好ê民間企業，用國家ê錢來tshiânn地方派系。用金錢利益來kā人民顧腹肚以外，政權beh穩也tio̍h顧思想，所以uì囡仔tī學校讀ê課本內底beh教啥，到日常ê報紙、媒體，各種管道beh講啥，甚至tī藝術文化tsit方面，啥mih歌tsiah ē-sái唱，lóng是in leh決定。M̄-nā án-ne，整體社會koh強調領袖崇拜。若是有人民想beh反抗，因為監視ê組織設kah ba̍t-ba̍t-ba̍t，tsiânn緊就ē hông發現kah處理。
1979～1980年，美麗島事件、林--家命案hōo人覺醒
高壓ê壓制mā有破空ê時tsūn，以美麗島雜誌社成員為主ê黨外運動「美麗島事件」，是tsîng「二二八事件」以後，規模上大ê反抗衝突。Suà--落koh發生悲慘ê林--家命案，hōo人民無法度koh忍受威權政府ê暴力kah粗殘，總算覺醒beh開始反抗，願意相信智識份子、支持律師tshuā頭ê黨外運動。一切ê轉變m̄-nā靠lán人民家己ê力量，國際ê力量mā非常關鍵。1980年，美國政府tī人權、民主化方面hōo hit-tang-tsūn ê政府tsiânn明顯ê壓力。
李登輝ê角色矛盾kah伊帶--來ê改變
李登輝是頭一个台灣人總統，mā是國民黨主席，兩種身份hōo伊無法度主動去處理國民黨khah早造成ê歷史錯誤。一个台灣人總統，應當ài ē-tàng達成人民對國家發展ê期待，m̄-koh，伊若選擇beh處理歷史錯誤，國民黨就無thang執政--ah。
另外一方面，tī uì威權行入民主ê過程，李登輝tio̍h-ài用「以黨領政」ê方式來tshuā領政黨kah社會一步一步改革。Tī伊在任ê 12冬內，伊達成「寧靜革命」ê成就，包含國會全面改選、總統直接選舉、實際ê外交、台灣kah中國建立「特殊國kah國ê關係」。政府組織內底雖然有「國家統一委員會」，m̄-koh實際上lán ê條件是「除非中國共產黨民主化，若無，無beh統一。」
就算是án-ne，寧靜革命猶原有tsiok濟做了無夠ê所在。當時ê政府用金錢補償來處理二二八kah白色恐怖，但是歷史真相是啥？加害者是siáng？Lóng無人知。威權政府ê黨產、烏道、地方派系、黨國媒體等等問題lóng iáu未解決。Lán有民主選舉，m̄-koh suah kánn-ná tiānn-tiānn變做台灣ê內戰，政黨之間leh tshia拚，有實際投票行動ê形式民主niā-niā。
罩bông ê真相
2000年，陳水扁總統在任ê時成立「國家檔案管理局」，相關檔案沓沓仔公開了，逐家tsiah對過去ê歷史事件有koh-khah深入ê了解。促進轉型正義委員會mā有建立「台灣轉型正義資料庫」，統計威權時代hōo蔣介石判死刑ê政治受難者ê一寡細節。M̄-koh檔案內底ê人名，tiānn-tiānn lóng無公開。政治受難者蔡焜霖bat講：白色恐怖到tann無公開加害者ê名，án-ne是beh講啥mih原諒？
人民--ê，國家--ê，lóng變黨--ê
無正義ê資源分配hōo國民黨趁執政方便thang累積黨產。黨部、民眾服務社、救國團等等，lóng占用tsiok濟國家ê土地。Hit-tsūn bat任黨職ê官員，tī黨內kah tī政府體制內底擔任職務ê年資lām做伙算，hōo in thang領tsiok濟退休金。「不當黨產委員會」就是leh處理tsia-ê代誌。
無法度脫離威權
台灣人mā是iáu有bē少人其實認同以早ê威權體制，認同管制kah服從。或者是認為「中立」、mài tshap政治上好，實際上是選擇維持現狀、無愛改變ê「假中立」。因為過去台灣人認為tshap政治是歹代誌，所以普遍kā生活目標轉向物質ê追求，感覺趁錢比政治khah重要，mā tsiah ē出現用趁錢做選舉政見ê候選人。
結論
以早政治歷史ê錯誤到底beh按怎處理khah tio̍h？規个過程大概初步是uì tìnn m̄知到有金錢補償，後一步是公開真相、追究責任，koh ài清查hit-tang-tsūn有牽連ê組織，相關ê人未來應當bē-tàng koh tī政府機關做khang-khuè，上尾是進行司法審判。
世界各國ê做法lóng無仝，mā lóng 有in家己beh達成ê目標。德國是追求澈底ê轉型正義，重點是beh防止『納粹』kah共產主義koh再出現。南非hit-tang-tsūn是白人leh統治原住民，轉型正義實行了，逐家mā是ài繼續做伙生活，為著mài hōo族群之間產生koh-khah濟對立kah怨恨，in hōo加害者出來認罪，認罪ē-tàng減刑，終其尾追求--ê是社會和解。西班牙tī經過30年久長ê等待了後，總算立法來解除威權統治ê正當性。Kā獨裁者ê雕像提掉、相關ê路名改掉，mā替過去無辜ê受害者恢復名聲。
轉型正義是leh處理以早ê代誌，m̄-koh伊ê目標是未來。Lán ǹg望台灣是一个知影thang守護民主、保障人權ê社會。透過轉型正義ê工程hōo過去ê錯誤m̄-thang koh再出現，tsiah ē-tàng起造koh-khah好ê台灣社會。
