《Tshui-sak台語，導師來tàu tshuā》/廖啟助
今仔下晡放學行過運動埕ê時，兩个六年ê查某學生囡仔，uì我ê後壁用台語kā我招呼：「老師你好！」我m̄知是啥人leh kā我問好，我越頭對in講：「Lín好，lín ê台語講了tsiok好聽--ōo！」In講：「因為阮老師最近每一工透早lóng ē tshuā阮規班讀台語。」我講：「有影--無？Lín老師是啥人？」
In講是某mí老師，koh講後禮拜一ê時，伊beh叫in規班每一个人起去台仔頂唸台語課文，害in lóng tsiok緊張。我講：「Uah！Án-ne有夠讚--ê--neh，若是每一个tshuā班ê導師lóng ē-tàng án-ne做，án-ne lán ê台語就有ǹg望，免煩惱--ah！」
Tsit位導師我過去kah伊tsih接ê時，伊lóng ē用台語kah我開講，hōo我知影伊mā是台語底--ê，只是因為大環境ê影響，koh有khang-khuè ê關係，伊平常時仔khah罕得講台語。
了後，我去教in班ê台語課ê時，我就ē鼓舞學生囡仔，下課有閒ê時，盡量招同學做伙講台語，甚至ē-tàng去kah導師開講，「因為lín導--ê台語講了tsiok好--ê，而且伊台語ê聲調khuì口，講了比啟助老師koh-khah好聽、koh-khah suí--őo！所以老師建議--lín，有閒ê時ē-tàng盡量去揣lín導--ê開講，若有án-ne去做，相信lín ê台語一定ē進步tsiok緊--ê！」
然後tī下課ê時，我專工行過去kah導師a̋i-sat-tsuh，一--來是肯定導師ê台語真正講了tsiok好聽，二--來是拜託導師若有閒ê時，盡量ē-tàng kah囡仔ke講寡台語。甚至平常時教課，m̄管是國文、數學、美術、綜合課程iah是班級經營……lóng ē-tàng ke減透lām寡台語來教囡仔，hōo囡仔ē-tàng tī m̄是台語課ê時，mā聽著其他ê老師講台語，用台語來教其他ê科目。
Hōo囡仔知影：台語m̄是kan-na台語課ê台語，台語是ē-tàng用來tī生活中kah人溝通kah學習其他科目ê語言，台語是lán ê共同生活語言。
後--來，我mā bat聽in班ê學生kā我講起，講in導--ê bat tī數學課用台語kah in開講，mā用台語來教數學，hit个時tsūn就hōo我真感動，因為tsit位老師真正有kā我講ê話囥tī心肝內，而且koh真正tī伊ê教學中來實踐。
最近因為我beh考囡仔ê台語口語測驗，我知影一般ê囡仔下課了後，尤其是tńg去厝了後，無可能ē提台語課本出來複習，所以我私底下拜託導師tàu-sann-kāng，鼓舞kah提醒學生囡仔ài撥工來複習台語。
想bē到tsit位老師，m̄是kan-na kā我凊彩答應，叫囡仔複習niā-niā，koh利用每一工透早8點到8點半tsit段時間，親身tshuā規班做伙讀台語，做伙來liū台語，聽了真正是hōo我非常非常感動，mā hōo我非常非常歡喜。
因為lán有主動kah導師溝通，邀請導師鬥陣kah我合作，請in tàu-sann-kāng、做伙tshui-sak台語，就真正ē-tàng hōo台語uì kan-na tī台語課ê教學，慢慢仔湠來其他m̄是台語課ê導師時間kah數學課來釘根傳承。
聽著án-ne ê好消息，hōo我真期待後禮拜囡仔tī台語口語測驗ê表現--ah。當然mā一定ài來tshuân一杯大大杯ê咖啡，好好仔來答謝tsit位老師tsiah-nī用心，願意費精神kah我做伙來tshui-sak台語。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
