都市囡仔ê台語 mā ē-tàng siah-siah叫
/ 廖啟助
現此時ê台語，流失狀況非常嚴重，真濟囡仔m̄-nā bē-hiáu講，甚至連聽to bē輸是「鴨仔聽雷」，tsit款情形尤其是tī大都市ê囡仔，特別明顯。我服務ê學校，雖然是tī lán台灣上濟人講台語ê高雄，m̄-koh市區ê囡仔mā是有bē少人連聽to有困難，而且是真明顯tī仝年級ê學生，愈後壁出世ê年代，調查--出-來聽無ê比例愈kuân。是按怎ē án-ne？
就我上課ê統計，上主要--ê就是厝內面lóng無人leh講台語，iah是序大人kan-na ē kah頂沿ê爸母講一寡台語（mā是tiānn-tiānn透lām tsiok濟華語tī內面），m̄-koh翁仔某之間，iah是對囡仔、對孫仔輩差不多lóng全華語leh溝通khah濟。Tsia-ê囡仔，tī厝tsiok罕得有機會，甚至是kiōng-beh完全無tàng聽人講台語，tsiah ē造成in連基本ê台語對話to聽無。
我ê學校tī正市中心ê所在，國小加幼稚園ê學生數差不多有2,500个人，m̄-koh tī下課ê時tsūn，全校你去kā揣，應該是揣無十个人用台語leh開講。Tī tsit款學校環境，kám有法度培養學生，hōo伊講台語ê能力進步，甚至hōo伊講kah tsiok liàn-tńg，tī全國語文競賽提著台語演說ê特優--leh？Lán來做伙看māi仔，阮是按怎一步一跤印來達到tsit个目標！
人講「有心開山，山tsiânn園，有心拍石，石tsiânn tshng」，只要有心，任何目標總是有機會來達成！所以tī學生通過校內ê台語演說比賽，取著代表權了後，我就主動kah伊ê序大人加LINE聯絡，甚至連阿公阿媽mā做伙khiú入來組一个訓練講台語ê群組。
學生ê阿公阿媽kah序大人本底就ē-hiáu講台語，m̄-koh受大環境影響，慣勢kah囡仔講華語khah濟，所以我第一項kah in溝通ê代誌，就是提昇in講台語ê意識。我kā學生ê厝內面人講，台語beh講ē liàn-tńg，上重要--ê就是ài先uì厝內ê長輩開喙講台語做起。
囡仔聽了有夠濟，伊tsiah有法度開喙講台語，而且因為有人kah伊對話，伊m̄-nā有聽ê刺激，koh-khah重要--ê是tī聽--著了後，伊隨ē-tàng反應練習按怎用台語來表達、來kah人互動溝通。Koh再來，lán厝內面ê長輩，就親像是囡仔ê台語家教老師仝款，tng伊bē-hiáu講，iah是講了tîng-tânn ê時tsūn，ē-tàng tī邊--a隨時kā輔導牽教，陪伴伊做伙學習成長。
Hōo厝內ê大人先有台語意識，了解台語環境對提昇台語能力ê重要性了後，我就請in規厝內面人培養講全台語ê習慣，因為án-ne效果上好！拄開始大人mā ē tńg bē過--來，iáu ke減ē用華語來講，m̄-koh透過指導老師ê提醒鼓勵，大人就愈來愈慣勢講台語，大人囡仔同齊進步，做伙kā台語khioh--tńg-來兼提昇表達能力。
囡仔tī厝講台語ê時間kah機會tuè leh愈來愈濟，ē-hiáu講ê詞彙就一直leh增加，仝款ê意思開始有法度用無仝ê語詞講法來表達，聲調mā愈講愈自然，甚至tī講ê過程當中，自然學ē-hiáu變調。
為著beh hōo in規厝內面人ê台語地基緊khōng hōo在，我tī群組kah in對話，大部份lóng拍台文hōo in看kah讀，koh鼓舞in去參加教育部ê台語認證考試，in真認同我ê建議，規口灶——阿公、阿媽、老爸、老母加囡仔，五个人做伙去報名，真正hōo我tsiok感動！尤其是72歲ê阿媽，ke減ē tī群組練拍台文。Tsit款行動力，hōo我感覺辛苦付出tsiok有成果mā tsiok感心--ê！
創造台語家庭環境了後，囡仔ê台語底蒂就慢慢仔有基礎--ah。Tsit个時tsūn老師加強指導，親像：抽著題目了後，beh按怎準備演講ê內容重點、鋪排演講ê結構，koh有學習beh按怎有理路來回答評判老師ê提問等等ê能力。
另外，因為囡仔本身真肯學、耐操koh tsiok骨力練，爸母kah阿公阿媽非常認真配合老師ê要求，全家總動員，用心陪伴伊做伙綿tsinn練習，老師、所有ê親tsiânn，lóng hōo伊真大ê鼓勵kah祝福，加上天公伯--à ê疼thàng，hōo伊真順利，一路uì縣市ê分區賽、市決賽，一直拚到全國語文競賽，一路過關斬將，最後得著『特優兼生動自然獎』tsiah-nī好ê表現！
人講「番薯m̄驚落塗爛」，雖然現此時社會ê本土語意識kah講母語ê環境無kài好，m̄-koh只要lán有堅心，有正確ê理念，願意徛--出-來，用時間費精神kah家長學生溝通，提昇in ê台語意識，爭取in ê認同，親身做hōo in看，有共同ê目標，鬥陣beh kā台語khioh--tńg-來，規家伙kah老師同齊做伙拚，都市囡仔ê台語mā ē-tàng kā教kah siah-siah叫--őo！
就我上課ê統計，上主要--ê就是厝內面lóng無人leh講台語，iah是序大人kan-na ē kah頂沿ê爸母講一寡台語（mā是tiānn-tiānn透lām tsiok濟華語tī內面），m̄-koh翁仔某之間，iah是對囡仔、對孫仔輩差不多lóng全華語leh溝通khah濟。Tsia-ê囡仔，tī厝tsiok罕得有機會，甚至是kiōng-beh完全無tàng聽人講台語，tsiah ē造成in連基本ê台語對話to聽無。
我ê學校tī正市中心ê所在，國小加幼稚園ê學生數差不多有2,500个人，m̄-koh tī下課ê時tsūn，全校你去kā揣，應該是揣無十个人用台語leh開講。Tī tsit款學校環境，kám有法度培養學生，hōo伊講台語ê能力進步，甚至hōo伊講kah tsiok liàn-tńg，tī全國語文競賽提著台語演說ê特優--leh？Lán來做伙看māi仔，阮是按怎一步一跤印來達到tsit个目標！
人講「有心開山，山tsiânn園，有心拍石，石tsiânn tshng」，只要有心，任何目標總是有機會來達成！所以tī學生通過校內ê台語演說比賽，取著代表權了後，我就主動kah伊ê序大人加LINE聯絡，甚至連阿公阿媽mā做伙khiú入來組一个訓練講台語ê群組。
學生ê阿公阿媽kah序大人本底就ē-hiáu講台語，m̄-koh受大環境影響，慣勢kah囡仔講華語khah濟，所以我第一項kah in溝通ê代誌，就是提昇in講台語ê意識。我kā學生ê厝內面人講，台語beh講ē liàn-tńg，上重要--ê就是ài先uì厝內ê長輩開喙講台語做起。
囡仔聽了有夠濟，伊tsiah有法度開喙講台語，而且因為有人kah伊對話，伊m̄-nā有聽ê刺激，koh-khah重要--ê是tī聽--著了後，伊隨ē-tàng反應練習按怎用台語來表達、來kah人互動溝通。Koh再來，lán厝內面ê長輩，就親像是囡仔ê台語家教老師仝款，tng伊bē-hiáu講，iah是講了tîng-tânn ê時tsūn，ē-tàng tī邊--a隨時kā輔導牽教，陪伴伊做伙學習成長。
Hōo厝內ê大人先有台語意識，了解台語環境對提昇台語能力ê重要性了後，我就請in規厝內面人培養講全台語ê習慣，因為án-ne效果上好！拄開始大人mā ē tńg bē過--來，iáu ke減ē用華語來講，m̄-koh透過指導老師ê提醒鼓勵，大人就愈來愈慣勢講台語，大人囡仔同齊進步，做伙kā台語khioh--tńg-來兼提昇表達能力。
囡仔tī厝講台語ê時間kah機會tuè leh愈來愈濟，ē-hiáu講ê詞彙就一直leh增加，仝款ê意思開始有法度用無仝ê語詞講法來表達，聲調mā愈講愈自然，甚至tī講ê過程當中，自然學ē-hiáu變調。
為著beh hōo in規厝內面人ê台語地基緊khōng hōo在，我tī群組kah in對話，大部份lóng拍台文hōo in看kah讀，koh鼓舞in去參加教育部ê台語認證考試，in真認同我ê建議，規口灶——阿公、阿媽、老爸、老母加囡仔，五个人做伙去報名，真正hōo我tsiok感動！尤其是72歲ê阿媽，ke減ē tī群組練拍台文。Tsit款行動力，hōo我感覺辛苦付出tsiok有成果mā tsiok感心--ê！
創造台語家庭環境了後，囡仔ê台語底蒂就慢慢仔有基礎--ah。Tsit个時tsūn老師加強指導，親像：抽著題目了後，beh按怎準備演講ê內容重點、鋪排演講ê結構，koh有學習beh按怎有理路來回答評判老師ê提問等等ê能力。
另外，因為囡仔本身真肯學、耐操koh tsiok骨力練，爸母kah阿公阿媽非常認真配合老師ê要求，全家總動員，用心陪伴伊做伙綿tsinn練習，老師、所有ê親tsiânn，lóng hōo伊真大ê鼓勵kah祝福，加上天公伯--à ê疼thàng，hōo伊真順利，一路uì縣市ê分區賽、市決賽，一直拚到全國語文競賽，一路過關斬將，最後得著『特優兼生動自然獎』tsiah-nī好ê表現！
人講「番薯m̄驚落塗爛」，雖然現此時社會ê本土語意識kah講母語ê環境無kài好，m̄-koh只要lán有堅心，有正確ê理念，願意徛--出-來，用時間費精神kah家長學生溝通，提昇in ê台語意識，爭取in ê認同，親身做hōo in看，有共同ê目標，鬥陣beh kā台語khioh--tńg-來，規家伙kah老師同齊做伙拚，都市囡仔ê台語mā ē-tàng kā教kah siah-siah叫--őo！
