辦語言活動，「語言意識」是第一要緊
/ 陳育萱
2025/10/25 tī桃園推廣傳統文化ê八塊厝民俗藝術村，有做一齣布袋戲，宣傳是講80%使用台語ê演出。M̄-koh頭前說明介紹教學是用華語，演出ê時tsūn，歹人、老人講台語，主角、英雄講華語；媽媽平常時講台語，suah對七歲ê主角講華語，規个演出使用台語無到四成。
內容甚至出現，
家臣（台語）：
「Kong-tsú。」
哪吒（華語）：
『我又不是女的，
你為什麼叫我公主？』
家臣（台灣國語）：
『Kong-tsú是台語的公子啦！』
哪吒（華語）：
『你在說台語我都聽不懂。』
戲看到一半，囡仔講：「我知影in華語leh講啥！因為我有去學校！」煞戲了後家長去kā劇團反應，in問囡仔：「你kám知影leh搬啥？」講siunn濟華語ê布袋戲，囡仔無興趣看，囡仔mā真老實講：「M̄知。」劇團應講：「你看伊mā是聽無，所以華語囡仔若是全台語in愈聽無。」
劇團表示，in m̄是「假台語演出」，無khau洗mā無恥笑台語，演出lām摻華語，是為著照顧聽無台語ê家庭，hōo koh-khah濟人了解劇情。劇團主張án-ne ê做法是「多語共存」，m̄是beh將台語踢一邊，若台語使用比例ê問題，無符合觀眾期待，未來ē檢討。In強調布袋戲lām摻無仝語言是歷史演變ê結果，希望囡仔先願意來看布袋戲，tsiah沓沓仔kah意台語，tsit場表演是「親子布袋戲推廣」，m̄是「語言推廣」。
根據記者採訪各方看法，桃園市文化局是講，in是響應文化部台語家庭培育計畫，無提中央ê補助，演出有派人tī台跤監督，尊重創作，buē做內容審查，ē koh檢討做法。
桃園市文化局tsit種回答，實在hōo人看lóng無。Tsit个演出用地方政府ê經費請劇團來執行計畫，宣傳掛文化部指導kah「國家語言整體方案」，koh講內容有八成台語。民眾ē來參加，m̄是因為免錢，是信任文化部、信任文化局，相信透過補助kah輔導，ē-tàng提升演出語言ê意識kah品質，suah看著無語言意識ê內容。
過去濟濟活動，講是台語活動，實際上主體iáu是華語，譬如講kan-na教五个台語詞，án-ne kám算「台語活動」？
尾--à tsiah改做，若提文化部補助--ê、參加台語家庭集點計畫ê活動，建議註明台語使用比例。Tī其他國家，親像紐西蘭、加拿大，語言復振活動有量化ê標準，m̄是親像lán án-ne量其約仔掠--一-下。就算量其約仔mā無要緊，但是八成講台語算真kuân，賰無到四成實在差siunn濟，buē輸食泡麵，包裝kah tsiânn suí hōo你「參考」，拍開kan-na麵kah湯，差濟--ah！
到底「語言使用」比例對活動有啥mih影響？每一種語言lóng有家己ê系統、思考方式kah理路。若是台語siunn少，就真有可能uì「台語主體」變做「台語主題」。語言比例kah宣傳差siunn濟，kah觀眾ê期待有真大無仝以外，「語言意識」其實mā是復振活動ê重點。
過去bat看過別團，提語言友善補助，做tsiok suí ê宣傳海報，演出suah一直講華語，甚至家己掠做真親切，去模仿刻板印象ê原住民口音，完全無文化敏感度。就親像tsit擺事件，劇本設定主角buē-hiáu講台語，老人、歹人tsiah講台語，án-ne是加強刻板印象，但是劇團本身ná像無智覺，阮撥工參加著tsit款活動，實在hōo人感覺tsiok痛苦--ê。
事實上，各劇團beh辦啥mih活動、選擇用啥mih語言表現，lóng是劇團ê自由。阮一个戲劇老師本身mā是資深演員，伊講：「你若感覺台語真重要，你就去做，伊感覺客語重要，伊就去做，án-ne m̄-tsiah ē多元。」
Tsit種講法阮mā真認同，m̄-koh若以「語言復振」ê角度來講，就m̄是án-ne--ah。華語活動根本to m̄免特別說明是啥mih語言，無說明--ê就是華語活動，華語ê強勢kah kiōng-kiōng beh死--去ê台語有真大ê差別，台語環境需要特別保護！
Tsit-má是分眾市場，劇團經營確實無簡單，阮mā對劇場tsiânn有感情，希望所有ê劇團lóng ē-tàng行出家己ê活路。提出tsit个問題，m̄是beh刁難啥mih團，因為今仔日tsit團，明仔載有hit團，lán ê政策應該是ài支持民眾使用台語，創造台語環境。制度無改變，逐家觀念無改變，tsit款代誌就ē一直發生。
親像要求成立「台語復振委員會」記者會頂kuân，台師大台語系系主任莊佳穎教授所講--ê，台灣社會對台語流失無「病識感」，掠做台語koh真勇壯，其實用台語生活ê囡仔已經賰7.4% niâ！Lán應該照顧tsia-ê囡仔。Koh-khah重要--ê是，台語復振牽涉國家安全，台語是過去社會ê共通語，是唯一koh有機會對抗強勢華語ê語言。烏俄戰爭開始了後，真濟烏克蘭人民放棄俄國話，kā烏克蘭語講倒tńg--來，ǹg望lán台灣人，mā ē-tàng uì tsit个方向去思考看māi。
參與語言計畫ê機關到執行單位，需要有語言意識、加強文化敏感度，請逐家勇敢講台語！Ài hōo觀眾有表態意見ê管道kah監督機制。語言復振m̄是表演團體ê責任niâ，是政府ê責任，請成立像「台語復振委員會」tsit款ê專責單位！Hōo台語有預算、有人力，做koh-khah久長ê規畫，台語m̄-nā需要復振，koh-khah需要恢復伊ê主體性kah公共地位。
一場無語言意識ê語言活動，ná像無魂有體ê稻草人，就算看--起-來，人坐kah滿tīnn-tīnn，逐家笑hai-hai，失去語言ê主體性，就是失去靈魂mā失去文化。
內容甚至出現，
家臣（台語）：
「Kong-tsú。」
哪吒（華語）：
『我又不是女的，
你為什麼叫我公主？』
家臣（台灣國語）：
『Kong-tsú是台語的公子啦！』
哪吒（華語）：
『你在說台語我都聽不懂。』
戲看到一半，囡仔講：「我知影in華語leh講啥！因為我有去學校！」煞戲了後家長去kā劇團反應，in問囡仔：「你kám知影leh搬啥？」講siunn濟華語ê布袋戲，囡仔無興趣看，囡仔mā真老實講：「M̄知。」劇團應講：「你看伊mā是聽無，所以華語囡仔若是全台語in愈聽無。」
劇團表示，in m̄是「假台語演出」，無khau洗mā無恥笑台語，演出lām摻華語，是為著照顧聽無台語ê家庭，hōo koh-khah濟人了解劇情。劇團主張án-ne ê做法是「多語共存」，m̄是beh將台語踢一邊，若台語使用比例ê問題，無符合觀眾期待，未來ē檢討。In強調布袋戲lām摻無仝語言是歷史演變ê結果，希望囡仔先願意來看布袋戲，tsiah沓沓仔kah意台語，tsit場表演是「親子布袋戲推廣」，m̄是「語言推廣」。
根據記者採訪各方看法，桃園市文化局是講，in是響應文化部台語家庭培育計畫，無提中央ê補助，演出有派人tī台跤監督，尊重創作，buē做內容審查，ē koh檢討做法。
桃園市文化局tsit種回答，實在hōo人看lóng無。Tsit个演出用地方政府ê經費請劇團來執行計畫，宣傳掛文化部指導kah「國家語言整體方案」，koh講內容有八成台語。民眾ē來參加，m̄是因為免錢，是信任文化部、信任文化局，相信透過補助kah輔導，ē-tàng提升演出語言ê意識kah品質，suah看著無語言意識ê內容。
過去濟濟活動，講是台語活動，實際上主體iáu是華語，譬如講kan-na教五个台語詞，án-ne kám算「台語活動」？
尾--à tsiah改做，若提文化部補助--ê、參加台語家庭集點計畫ê活動，建議註明台語使用比例。Tī其他國家，親像紐西蘭、加拿大，語言復振活動有量化ê標準，m̄是親像lán án-ne量其約仔掠--一-下。就算量其約仔mā無要緊，但是八成講台語算真kuân，賰無到四成實在差siunn濟，buē輸食泡麵，包裝kah tsiânn suí hōo你「參考」，拍開kan-na麵kah湯，差濟--ah！
到底「語言使用」比例對活動有啥mih影響？每一種語言lóng有家己ê系統、思考方式kah理路。若是台語siunn少，就真有可能uì「台語主體」變做「台語主題」。語言比例kah宣傳差siunn濟，kah觀眾ê期待有真大無仝以外，「語言意識」其實mā是復振活動ê重點。
過去bat看過別團，提語言友善補助，做tsiok suí ê宣傳海報，演出suah一直講華語，甚至家己掠做真親切，去模仿刻板印象ê原住民口音，完全無文化敏感度。就親像tsit擺事件，劇本設定主角buē-hiáu講台語，老人、歹人tsiah講台語，án-ne是加強刻板印象，但是劇團本身ná像無智覺，阮撥工參加著tsit款活動，實在hōo人感覺tsiok痛苦--ê。
事實上，各劇團beh辦啥mih活動、選擇用啥mih語言表現，lóng是劇團ê自由。阮一个戲劇老師本身mā是資深演員，伊講：「你若感覺台語真重要，你就去做，伊感覺客語重要，伊就去做，án-ne m̄-tsiah ē多元。」
Tsit種講法阮mā真認同，m̄-koh若以「語言復振」ê角度來講，就m̄是án-ne--ah。華語活動根本to m̄免特別說明是啥mih語言，無說明--ê就是華語活動，華語ê強勢kah kiōng-kiōng beh死--去ê台語有真大ê差別，台語環境需要特別保護！
Tsit-má是分眾市場，劇團經營確實無簡單，阮mā對劇場tsiânn有感情，希望所有ê劇團lóng ē-tàng行出家己ê活路。提出tsit个問題，m̄是beh刁難啥mih團，因為今仔日tsit團，明仔載有hit團，lán ê政策應該是ài支持民眾使用台語，創造台語環境。制度無改變，逐家觀念無改變，tsit款代誌就ē一直發生。
親像要求成立「台語復振委員會」記者會頂kuân，台師大台語系系主任莊佳穎教授所講--ê，台灣社會對台語流失無「病識感」，掠做台語koh真勇壯，其實用台語生活ê囡仔已經賰7.4% niâ！Lán應該照顧tsia-ê囡仔。Koh-khah重要--ê是，台語復振牽涉國家安全，台語是過去社會ê共通語，是唯一koh有機會對抗強勢華語ê語言。烏俄戰爭開始了後，真濟烏克蘭人民放棄俄國話，kā烏克蘭語講倒tńg--來，ǹg望lán台灣人，mā ē-tàng uì tsit个方向去思考看māi。
參與語言計畫ê機關到執行單位，需要有語言意識、加強文化敏感度，請逐家勇敢講台語！Ài hōo觀眾有表態意見ê管道kah監督機制。語言復振m̄是表演團體ê責任niâ，是政府ê責任，請成立像「台語復振委員會」tsit款ê專責單位！Hōo台語有預算、有人力，做koh-khah久長ê規畫，台語m̄-nā需要復振，koh-khah需要恢復伊ê主體性kah公共地位。
一場無語言意識ê語言活動，ná像無魂有體ê稻草人，就算看--起-來，人坐kah滿tīnn-tīnn，逐家笑hai-hai，失去語言ê主體性，就是失去靈魂mā失去文化。
