『給台灣的情書 Dear Taiwan,』
特展開幕致詞稿
/ 周婉窈
作者是台大歷史系名譽教授
逐家午安。
今仔日（2026/7/26）是『給台灣的情書 Dear Taiwan,』特展ê第一工，tsit个名稱hōo我想起我ê黨外運動ê知己——林世煜Michael kah胡慧玲翁仔某，20冬前in bat經營一个blog，就叫做『寫給台灣的情書』，tsit个號名，hām lán今仔日ê展覽真仝。Tse是文學性ê比喻，就是kā台灣tsit个所在當做上愛ê人，用行動、用性命來愛--伊、來保護--伊，lán ê每一改ê動作，就ná親像寫一張批hōo愛人仔，表示lán對伊ê愛。Tse是lán台灣人一百冬來一致ê感情kah志氣。
今仔日我用台語來致詞，是有用意--ê。台語tī日本時代、tī戰後到1990年代，lóng是台灣社會ê通用語kah抵抗ê語言。台灣文化協會不管是演講，iah是夏季學校，in用ê語言就是台語，m̄是in bē-hiáu講日語，in真濟人lóng去日本讀大學，日文真好；黨外時代，台語就是通用語、就是抵抗ê語言。華語是戰後，外來統治者、mā是殖民者帶入來台灣--ê，81冬後suah變做台灣人ê語言，對tse，lán若無反省，lán kám ē同情香港ê廣東話未來ē消失？Lán kám ē認為中國強迫Tibetans（『圖博』）kah Uyghurs（『維吾爾族』）講普通話是真可怕ê壓迫？
面對中國ê併吞、侵略，lán需要有hām中國區別ê mi̍h件。你若有tī-leh關心烏克蘭、波蘭，koh有波羅的海三國，你就知影語言、歷史、文化是國防ê前線。Tī民間，台語就是真親切ê語言，ē-tàng直接連結著鄉土、tsit个土地頂頭ê人kah歷史。希望lán ē-tàng kā tsit个通用語、mā是抵抗ê語言講倒tńg--來。
今仔日7/26是舊年大罷免第一梯次投票ê一週年，第二梯次是8/23。Tsit兩个日子，相信逐家lóng ē記tiâu-tiâu。大罷免當然是無過，m̄-koh，伊是失敗iah是成功，tse是ài靠未來ê歷史來決定。Lán未來若成功，舊年ê 7/26、8/23就是兩个真重要ê坎站。為著大罷免ê努力bē烏有--去，lán一定ài繼續奮鬥，一直奮鬥到台灣tsiânn做一个真正ê國家。
我有參與黨外運動真深ê師長，認為大罷免是第二改ê黨外運動。我mā認為大罷免志工所展現--ê，就是黨外運動ê精神：拚生拚死，無惜一切，lóng是為lán台灣！
大罷免若是第二改ê黨外運動，哪有一年就結束--ê？Lán tsit-má iáu-koh tī-leh奮鬥，kám m̄是？Tsit个展覽mā是lán ê努力ê一部份，kám m̄是？自訓團、民防團，lóng是大罷免ê延續，kám m̄是？
M̄-koh，tsit-má ê局勢真危險，lán ài有tsit个覺悟：戰爭早就開始--ah！中華民國立法院tī 2024年就淪陷--ah，已經tsiânn做中國侵略台灣ê橋頭堡。Lán若無面對「戰爭已經開始--ah」tsit个現實，lán就輸一半--ah。
Uì三一八到大罷免，真濟人愛huah「國民黨無倒，台灣就bē好」。其實lán ài進一步了解：中華民國m̄是台灣、ROC≠TW，台灣tsiah有活路。若無，你無可能講傅 萁、翁曉玲、王鴻薇、徐巧芯、馬文君等人是「叛國」，根據中華民國憲法kah體制，in無背叛in ê國，in是「叛台」，是反背台灣、出賣台灣。Tsit點你若分ē清楚，你就知影lán ê困局tī佗位，知影lán一定ài uì根本來解決台灣ê問題。
最後，我beh講：台灣人hiah-nī仔優秀、hiah-nī仔有才調，啥mi̍h lóng有，就是欠一个國家。Lán台灣人，值得一个真正ê國家！以上。
Lán繼續做伙拍拚！
今仔日（2026/7/26）是『給台灣的情書 Dear Taiwan,』特展ê第一工，tsit个名稱hōo我想起我ê黨外運動ê知己——林世煜Michael kah胡慧玲翁仔某，20冬前in bat經營一个blog，就叫做『寫給台灣的情書』，tsit个號名，hām lán今仔日ê展覽真仝。Tse是文學性ê比喻，就是kā台灣tsit个所在當做上愛ê人，用行動、用性命來愛--伊、來保護--伊，lán ê每一改ê動作，就ná親像寫一張批hōo愛人仔，表示lán對伊ê愛。Tse是lán台灣人一百冬來一致ê感情kah志氣。
今仔日我用台語來致詞，是有用意--ê。台語tī日本時代、tī戰後到1990年代，lóng是台灣社會ê通用語kah抵抗ê語言。台灣文化協會不管是演講，iah是夏季學校，in用ê語言就是台語，m̄是in bē-hiáu講日語，in真濟人lóng去日本讀大學，日文真好；黨外時代，台語就是通用語、就是抵抗ê語言。華語是戰後，外來統治者、mā是殖民者帶入來台灣--ê，81冬後suah變做台灣人ê語言，對tse，lán若無反省，lán kám ē同情香港ê廣東話未來ē消失？Lán kám ē認為中國強迫Tibetans（『圖博』）kah Uyghurs（『維吾爾族』）講普通話是真可怕ê壓迫？
面對中國ê併吞、侵略，lán需要有hām中國區別ê mi̍h件。你若有tī-leh關心烏克蘭、波蘭，koh有波羅的海三國，你就知影語言、歷史、文化是國防ê前線。Tī民間，台語就是真親切ê語言，ē-tàng直接連結著鄉土、tsit个土地頂頭ê人kah歷史。希望lán ē-tàng kā tsit个通用語、mā是抵抗ê語言講倒tńg--來。
今仔日7/26是舊年大罷免第一梯次投票ê一週年，第二梯次是8/23。Tsit兩个日子，相信逐家lóng ē記tiâu-tiâu。大罷免當然是無過，m̄-koh，伊是失敗iah是成功，tse是ài靠未來ê歷史來決定。Lán未來若成功，舊年ê 7/26、8/23就是兩个真重要ê坎站。為著大罷免ê努力bē烏有--去，lán一定ài繼續奮鬥，一直奮鬥到台灣tsiânn做一个真正ê國家。
我有參與黨外運動真深ê師長，認為大罷免是第二改ê黨外運動。我mā認為大罷免志工所展現--ê，就是黨外運動ê精神：拚生拚死，無惜一切，lóng是為lán台灣！
大罷免若是第二改ê黨外運動，哪有一年就結束--ê？Lán tsit-má iáu-koh tī-leh奮鬥，kám m̄是？Tsit个展覽mā是lán ê努力ê一部份，kám m̄是？自訓團、民防團，lóng是大罷免ê延續，kám m̄是？
M̄-koh，tsit-má ê局勢真危險，lán ài有tsit个覺悟：戰爭早就開始--ah！中華民國立法院tī 2024年就淪陷--ah，已經tsiânn做中國侵略台灣ê橋頭堡。Lán若無面對「戰爭已經開始--ah」tsit个現實，lán就輸一半--ah。
Uì三一八到大罷免，真濟人愛huah「國民黨無倒，台灣就bē好」。其實lán ài進一步了解：中華民國m̄是台灣、ROC≠TW，台灣tsiah有活路。若無，你無可能講傅 萁、翁曉玲、王鴻薇、徐巧芯、馬文君等人是「叛國」，根據中華民國憲法kah體制，in無背叛in ê國，in是「叛台」，是反背台灣、出賣台灣。Tsit點你若分ē清楚，你就知影lán ê困局tī佗位，知影lán一定ài uì根本來解決台灣ê問題。
最後，我beh講：台灣人hiah-nī仔優秀、hiah-nī仔有才調，啥mi̍h lóng有，就是欠一个國家。Lán台灣人，值得一个真正ê國家！以上。
Lán繼續做伙拍拚！
編註：『給台灣的情書 Dear Tai-wan,』特展由辜寬敏基金會kah台灣北海民主韌性協會主辦，tī 8月下旬結束。Tsit个展覽記錄台灣人ê公民行動kah集體記憶，本文是周婉窈開幕致詞全文，特別tī tsia刊出。
