〈Pua̍h-kiáu出頭天〉閱讀感想
學生組 第三名
/ 朱偉誠
台南市立大灣高級中學〈國中部〉
學者李勤岸先生tī小說集ê頭序，就「刁工」kā讀者褒嗦陳雷ê小說偌gâu，逐篇tsuan-tsuan可比「淬煉ê水晶」。斟酌kā讀確實好味，無疑悟就ē看kah目睭無tńg輪。Uì陳雷先ê小說內底，thang讀著純正ê台灣話，koh ē-tàng了解台灣事，tse lóng是我意愛陳雷文學ê因端。其中，有一篇hōo我印象tsiok深，iáu-koh有感想，就是《無情城市》ê〈Pua̍h-kiáu出頭天〉。
「Pua̍h-kiáu thài ē出頭天？」看標題，liam-mi thang知陳雷先koh beh供體。內中描寫斯當時「阿樂--à」teh時行。主角三斗甘願為錢賭性命，想beh靠pua̍h-kiáu大趁錢。為著beh pik明牌，甚至koh睏王爺宮。有一擺為著beh贏一斗，就kā金庫囥定期--ê總領。結局hit期開獎出--來，tio̍h無半字。兩翁仔姐koh因由án-ne冤家，連王爺公mā罵參--落。終其尾suí某偷咬雞，錢銀無半sián。某kap定期lóng因由pua̍h-kiáu ī無--去，一世人烏有--去。
故事顯然beh苦勸世人kiáu m̄-thang pua̍h，tsiânn有警世ê應效。像tsit款純然「目睭看近無看遠」ê現象，有影m̄-thang。雖bóng thìng好得著眼時ê利頭，一時ê樂暢。不而過，年久月深suah是ē阻礙家己ê前途。小說內底pua̍h-kiáu三斗ê三斗，ē直透pua̍h，歹癖改bē掉有原因--ê！是按怎已經輸kah褪褲--ah，主角koh ē想beh pua̍h--neh？Tse是因由teh pua̍h-kiáu ê時tsūn，lán ê頭殼產生「多巴胺」，ē hōo人感覺tsiok爽快。想講koh一擺，就thang贏倒tńg--來，ē愈liâu愈深。
做一个學生kám有觀察著kài成ê狀況？想一下真，確實有！比論講現此時濟濟學生，lóng有teh sńg遊戲。有ê koh ē「投資」買遊戲設備，kā所費lóng lok-lok--落，想beh hōo家己等級ē用得kiau人比phīng。又koh投入精神kap khuì力，hōo家己維持tī頭前名，甚至半暝iáu-koh teh拚命。得勝，想beh koh贏；失敗，ē跋入驚惶落第ê無底深坑，所致ē想講：「Tann看tsit个pān勢，koh拍一回就好，kā分數補--tńg-來就來睏。」
結果，uì翻點拍kah天光雞也啼，名次無起顛倒落。Tng當透早代表ǹg望ê日頭光tshiō入房間，因由連敗澈底崩盤ê名次，加添心內ê空虛kap絕望，hām故事中為著pik明牌去睏王爺宮、kā金庫銀票總領--出-來ê三斗，本質上beh仝仔beh仝。無必然ē成功ê硩tù，suah thang hông失去睏眠ê時間、難得求ê所費，甚至suà接影響課業。
陳雷透過tsit篇〈Pua̍h-kiáu出頭天〉，從中ê啟示真簡單：贏--ê，是bē「攑香tuè拜」ê人。M̄管是「阿樂--à」iah是「假ná真ê遊戲排名」，lóng是一款「無張持ê硩tù」。面對充滿變數ê未來，做一个學生，檢采掌握家己ê人生，tsiah thang贏一口khuì。跤踏實地生活、學習，tsiah ē「出頭天」！
「Pua̍h-kiáu thài ē出頭天？」看標題，liam-mi thang知陳雷先koh beh供體。內中描寫斯當時「阿樂--à」teh時行。主角三斗甘願為錢賭性命，想beh靠pua̍h-kiáu大趁錢。為著beh pik明牌，甚至koh睏王爺宮。有一擺為著beh贏一斗，就kā金庫囥定期--ê總領。結局hit期開獎出--來，tio̍h無半字。兩翁仔姐koh因由án-ne冤家，連王爺公mā罵參--落。終其尾suí某偷咬雞，錢銀無半sián。某kap定期lóng因由pua̍h-kiáu ī無--去，一世人烏有--去。
故事顯然beh苦勸世人kiáu m̄-thang pua̍h，tsiânn有警世ê應效。像tsit款純然「目睭看近無看遠」ê現象，有影m̄-thang。雖bóng thìng好得著眼時ê利頭，一時ê樂暢。不而過，年久月深suah是ē阻礙家己ê前途。小說內底pua̍h-kiáu三斗ê三斗，ē直透pua̍h，歹癖改bē掉有原因--ê！是按怎已經輸kah褪褲--ah，主角koh ē想beh pua̍h--neh？Tse是因由teh pua̍h-kiáu ê時tsūn，lán ê頭殼產生「多巴胺」，ē hōo人感覺tsiok爽快。想講koh一擺，就thang贏倒tńg--來，ē愈liâu愈深。
做一个學生kám有觀察著kài成ê狀況？想一下真，確實有！比論講現此時濟濟學生，lóng有teh sńg遊戲。有ê koh ē「投資」買遊戲設備，kā所費lóng lok-lok--落，想beh hōo家己等級ē用得kiau人比phīng。又koh投入精神kap khuì力，hōo家己維持tī頭前名，甚至半暝iáu-koh teh拚命。得勝，想beh koh贏；失敗，ē跋入驚惶落第ê無底深坑，所致ē想講：「Tann看tsit个pān勢，koh拍一回就好，kā分數補--tńg-來就來睏。」
結果，uì翻點拍kah天光雞也啼，名次無起顛倒落。Tng當透早代表ǹg望ê日頭光tshiō入房間，因由連敗澈底崩盤ê名次，加添心內ê空虛kap絕望，hām故事中為著pik明牌去睏王爺宮、kā金庫銀票總領--出-來ê三斗，本質上beh仝仔beh仝。無必然ē成功ê硩tù，suah thang hông失去睏眠ê時間、難得求ê所費，甚至suà接影響課業。
陳雷透過tsit篇〈Pua̍h-kiáu出頭天〉，從中ê啟示真簡單：贏--ê，是bē「攑香tuè拜」ê人。M̄管是「阿樂--à」iah是「假ná真ê遊戲排名」，lóng是一款「無張持ê硩tù」。面對充滿變數ê未來，做一个學生，檢采掌握家己ê人生，tsiah thang贏一口khuì。跤踏實地生活、學習，tsiah ē「出頭天」！
