9--月ê「台語sa攏有」講座邀請台灣高等教育產業工會祕書長、前世新大學社會發展所教授陳政亮kap自由音樂人兼yoga（『瑜伽』）老師陳秋山兩位講者。原本邀請陳政亮老師分享--ê，是台灣高等教育產業ê相關議題，無疑悟伊感覺ē-sái分享無仝款ê mi̍h件，「高等教育ê議題真嚴肅，我mā講kah lám-lám、無意無意」伊滾笑án-ne講，tsua̋nn改做分享伊創作台語歌ê經驗。伊kap陳秋山兩人tī工會熟sāi，落尾suah開始做伙創作台語歌，一个寫詞、一个做曲kap唱歌，mā算是tsiânn特別ê緣份。兩人現場tshuân十幾塊歌曲，即時kā講座變做演唱會，不止仔鬧熱！
Tsit擺講座lóng總帶來12塊歌，憑頭是：1. 火金蛄、2. 失眠、3. 散步夜公園、4. 昨暝燒酒醉、5. 無妨、6. 富豪／資本無祖國、7. 冤魂、8. 紅紅蝴蝶、9. 寒流、10. 沉浮、11. 貓咪、12. 老友。
兩人開始創作了，ē kā歌曲傳去YouTube，m̄-koh tsit擺講座ê歌曲大部份無tsiūnn網，算是頭擺公開發表，tsia-ê歌內容五花十色，講著台灣百百款ê社會議題。Tī演唱進前，陳政亮ē先說明伊創作ê理念，tsiah聽陳秋山用伊清幽ê歌聲，唱出人情世事幼路ê情感。Tsit篇文章tī tsia簡單記錄逐塊歌創作ê理念，雜誌mā uì頂一期開始連載歌詞kap分享現場演唱ê影片連結（306期刊出〈無妨〉、本期刊出〈寒流〉）——對創作理念有趣味ê讀者，ē-sái進一步去聽歌，kā歌ê背景kap音樂對照欣賞，koh-khah有意思。
1.火金蛄
陳政亮tī台北ê時tsūn，蹛木柵公園hit搭，木柵公園內有一个翠湖，市政府tī hia做火金蛄復育。逐年春天差不多5、6--月ê時，就ē有火金蛄，siânn tsiok濟人去看，tsiânn心適。Tsit塊歌就是leh描寫火金蛄tī公園內飛來飛去ê情境，tse mā是一塊寫hōo囡仔兄、囡仔姊聽ê歌，都市內底thang看著火金蛄實在無簡單，lán tio̍h-ài做伙來注重環境ê保護。
2.失眠
陳政亮認為睏眠有分四種：「好睏」是地動五級to hàinn bē起--來；「淺眠」是ē睏--得，m̄-koh厚眠夢；「歹睏」是若lim茶lim咖啡、枕頭一下無sù-sī就睏bē去；最後一級就是「失眠」。根據統計，台灣有睏眠障礙--ê差不多十个就有一个是ài食藥仔--ê，tsit塊歌創作ê第一句就是uì「藥仔一袋」 開始--ê，koh用台語歌khah罕得看--著ê四字一句ê形式，對寫曲、演唱者來講真挑戰。
3.散步夜公園
「講著失眠，lán tio̍h-ài ke運動--lah！」陳政亮講，tsit塊〈散步夜公園〉mā是leh寫木柵公園，hia有做步道、塗跤koh標公尺，hōo人行一lìn四百公尺ê意思。現代人日--時坐辦公室，生活緊張、無leh運動，暗時tsiah thang去bóng散步。陳政亮去公園，聽著有人leh散步ê時，koh leh討論日--時ê mê-mê角角，寫tsit塊歌就是希望逐家去散步ē-tàng mài想hiah濟，輕輕鬆鬆就好。
4.昨暝燒酒醉
一寡中年男子，事業有成、感情穩定、家庭幸福，m̄-koh m̄知按怎就是對人生無滿意。陳政亮觀察，身軀邊kánn-ná tsiok少真正uì心肝底快樂ê人，伊做兵ê朋友退伍20幾冬了後koh ē sio招，生活lóng ē得過，無欠錢、欠快樂niâ，出--來就beh招lim酒。有時tsūn ē感覺人生m̄知leh追求啥mi̍h，永遠無滿足、kánn-ná欠一塊啥mih mi̍h件，tsit塊歌就是leh描寫tsit種感覺。
5.無妨（已經tī 306期第2頁刊出）
朋友內底，結婚--ê少、離婚--ê bē少，陳政亮bat去參加親tsiânn tsa̋囝ê婚禮，in suah一冬了後就離婚。根據統計，台灣人有結婚--ê tī第二个十年離婚--ê占兩成，世界排名第五名；離婚率是所有人口ê千分之2.3對，結婚ê比例差不多kuân一倍，等於講結婚--ê有一半ē離婚。Hit个親tsiânn tsa̋囝離婚了，tī台北稅厝，「小小ê套房，四四方方」，tsit塊歌就是leh描寫對感情無常ê心境。
6.富豪／資本無祖國
陳政亮一位女性朋友in先生tī中國有工場，做電子行業--ê有趁著錢，就tī hia娶細姨，變做是有兩个家庭。台灣ê大某真m̄甘願，揣人去調查，講beh kâng按怎，無，就beh自殺，鬧kah規家jû-tsháng-tsháng。Tsit塊歌ê故事是uì tsia來--ê，陳政亮感覺，趁錢當然重要，但是m̄-thang趁著錢了後家己ê慾望就無法度控制，tsit塊歌是leh描寫生理人一切用成本考量，無顧人、國家、土地、環境、勞工ê情形。
7.冤魂
台灣去hông屈打成招，尾--à去hông拍--死、銃殺--ê，到底有偌濟人，無人知影。白色恐怖、二二八ê年代，有一个統計講五十年代ê前幾年，掠來接受軍法審判、hông刣--死ê人，就有四、五千以上，路邊烏白刣--ê iáu無算在內。除了政治犯以外，台灣koh有真濟冤枉ê死刑犯，陳政亮寫tsit塊歌是送hōo勇敢ê廢死聯盟，tse是一个重要ê議題，伊mā希望以後世間lóng無冤魂。
8.紅紅蝴蝶
Tsit塊是leh寫一个「紅斑性狼瘡」病友ê故事，tsit款病是免疫系統出問題、攻擊家己ê身體，若出現tī面，就ē有紅紅一phiàn kánn-ná蝴蝶。Tio̍h病ê人ài食『類固醇』，就是lán講ê「美國仙丹」，食了面ē腫；陳政亮高中ê時有一个女性就是án-ne，hit个朋友tsiok討厭人kā可憐，伊講，「人百百種，是你正常iah是我正常真歹講」，陳政亮感覺有理，就kā tsit个故事寫--出-來。
9.寒流（tī本期雜誌第3頁刊出）
進前leh選舉（編按：2018年九合一選舉）hit-tsūn，陳政亮去外口食飯tiānn hām頭家冤家，就是因為電視leh放中天新聞，落尾冤kah伊lóng無愛去--ah。陳政亮講，中天新聞ê標題真濟是leh「造神」，既然beh造神，伊就來寫一塊歌。陳政亮借慈蔭亭（編按：台南市中西區ê觀音廟）籤詩ê形式，寫一塊「藏頭詩」，來khau-sé tsit款造神ê現象。
10.沉浮
男性追求女性，見一个愛一个，kánn-ná家己起一間厝，但是真虛無；起了感覺真幸福，了後koh嫌tsit間厝bái，想beh koh追求新--ê。Tsit塊歌就是leh描寫tsit款永遠無滿足ê追求。
11.貓咪
Tsit-má台灣飼貓ê人tsiok濟、tsiok大phâng，bē得罪--得。陳政亮家己感覺，貓仔大部份是自私、無情--ê，有tang時仔家己走--出-去，三四工了tsiah走--tńg-來，m̄知去佗位；啊伊beh需要--你ê時tsūn，suah叫kah bē輸偌可憐--leh。是按怎人愛飼貓？陳政亮認為，凡勢是因為欣羨貓無情ê自由，想beh變做hit款koh無法度。Tsit塊歌就是leh描寫貓仔目睭ê sa-bui-sa-bui、行蹤ê神祕神祕。
12.老友
陳政亮ê爸母已經七八十歲--ah，in同窗會來ê人，一年一年少，tiānn-tiānn講「見一kái減一kái」。陳政亮感覺，台灣人對死亡ûn-na ē驚，m̄-koh無到恐惶，心內想講「啊性命就是án-ne--lah！」無必要kā看了siunn過重。廣欽老和尚beh過往ê時講一句話tsiok出名：「無來，無去，無代誌。」陳政亮就kā tsit種面對人生輕鬆、單純、無掛礙ê心情寫做一塊歌。
（本文是2019年9月初4 ê講座摘要記錄，主講者陳秋山是音樂創作者，歡迎逐家去「聽秋山唱歌」ê FB tshi̍h追蹤。）
（本文是2019年9月初4 ê講座摘要記錄，主講者陳秋山是音樂創作者，歡迎逐家去「聽秋山唱歌」ê FB tshi̍h追蹤。）
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報307期，2019年10月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
