作者：Khóo Sè-lâm
阿珠--a in老母八歲就來新莊林--家hōo人做新婦仔，真細漢就ài夯椅頭仔kap人輪流煮飯，做kah beh死。尾--à配hōo第二--ê，生阿珠--a tsit个查某囝了就bē生--ah，當然mā真疼--伊。到阿珠--a七、八歲ê時，去圳岸跤pun一个三歲ê查某囡仔hōo伊做伴。想bē到，koh過--一-站-仔in阿公去kā阿姑pun拄出世ê細漢囝來hōo伊做小弟，一个囡仔變三个，厝內ke tsiok鬧熱。
阿珠--a in家族仔真大，阿公有四个後生，一个查某囝，in兜是排第二。蹛tī戰後兩年拄起好ê正身護龍。大廳ê兩扇門是用做風颱了khioh--著ê大箍柴做--ê。Tī叔伯兄弟姊妹內底伊算是真大，因為大房--ê khah早生，前三个囝lóng是終戰前生--ê，比其他ê囡仔ke tsiok大，kap逐家khah無親。阿珠--a是戰後早期出世--ê。三、四房娶了後，hām大房--ê，三个新婦囡仔是一年一个有tang時是兩个leh生，hōo阿媽抱孫抱kah bē赴，tsiânn無閒。Tsit陣囡仔phí，逐家lóng叫伊tsé-tseh。熱--人下晡時仔，tsia-ê囡仔ē先去頭前ê溝仔提水來tshiâng大埕hōo涼，食暗飽逐家tsiah來大埕tshū草蓆仔，坐tī hia nah涼做伙sńg，阿媽講古koh教逐家唱歌kap唸謠。上趣味ê唸謠是草ni公kap賊仔偷挖壁。庄跤所在逐家生活真單純mā tsiânn快樂。
作穡人歹趁食，in老爸嫌作田艱苦koh趁無錢，附近開藥仔工場了後，就hām阿叔lóng去hia上班。藥仔工場mā是趁m̄-tsiânn錢，生活無好過。藥仔工場就tī厝邊niâ，工場有leh hiânn火鼎，koh起浴間仔有燒水thang好hōo員工洗身軀，連厝邊ê囡仔有tang時仔mā ē-sái去hia洗身軀，逐家lóng tsiok歡喜。因為hit時厝內iáu無洗身軀間，kan-na ē-sái tī灶頭hia用hôo--ê niâ，無thang像藥仔工場ē-tàng用tshiâng--ê，洗kah tsiok爽快。
阿珠--a國校仔出業就無thang去考初中，開始上班趁錢。Tī紡織廠做上久，mā tī tsia交真濟好朋友。Hit時ê紡織廠是台灣tsiânn重要ê工業，就像tsit時ê電子業，hit-tsūn台灣有--ê是粗俗ê人工，屬工業發展ê初期。伊tī tsia做到領班，mā有去讀一站仔中學ê暗學仔，後--來嫁hōo tī紡織廠熟sāi ê勝章。
勝章in兜就tī附近niâ，有夠拄好--ê，序大lóng sio-bat。Hit時ê送定kap現今差真濟，除了聘金、餅，koh ài送豬爿。豬爿是用li-á-kah拖--來--ê。儀式是ài先phâng茶，上尾tsiah掛手指。Phâng茶tio̍h-ài揣好命ê婦jîn人來牽。伊是拜託阿嬸來牽新娘。Hit工tsiok鬧熱，眾人lóng真歡喜。結婚式ê時，拄好去tn̄g著風颱來kā in鬥鬧熱，khah無彩。
勝章對逐家來講，上稀罕--ê是有一台hip相機，kā tsia真濟人hip相留做紀念。Hit-tsūn ê人真少有機會thang好hip相，逐家lóng tsiânn kah意勝章。Khah早tsia上奇妙ê經驗是有一擺美國人來參觀，看台灣農村ê現狀，kā in hip幾張仔Polaroid ê相片，隨有相片thang看，有夠趣味。
勝章真疼阿珠--a，tī hit个年代，逐家iáu是慣勢kā鞋仔穿入去厝內，無像tsit-má lóng有分室內、室外ê鞋仔，án-ne厝內khah清氣。因為hit-tsūn逐家塗跤lóng iáu是抹紅毛塗niâ khah濟，洗石仔--ê無偌濟。勝章in厝塗跤mā是抹紅毛塗，勝章tī in ê新房鋪塑膠地板，入去ài褪赤跤，ke tsiok清氣。
M̄-koh，無偌久就傳出講伊kap in ta-ke bē ha̍h，走tńg來外家投。Hainnh，ta-ke新婦tsit條歹pháng ê紗mā去hōo伊拄--著！真緊大漢查某囝出世--ah，就khah少聽伊leh唸tsit條。因為外家tsiânn近，翁仔某若beh去se̍h街看電影，就kā囡仔tshuā來寄tī tsia，免去麻煩ta-ke。Làng無幾年，koh生一个查某囝，一家就四个人--ah。
後--來，勝章利用伊tī紡織廠學--著ê學問，kap人合開一間染整廠，替人染紗仔，生理bē-bái。無偌久搬去板橋新買ê厝，無koh kap序大人蹛做伙。阿珠--a愈來愈幸福--looh。想bē到，天公伯--à來創治，勝章suah去tài著歹mih仔，原本幸福和樂ê家庭隨來墜落，失去笑容。
勝章hām阿珠--a參詳，第一步當然是想辦法醫，揣醫生mā揣神明tàu-sann-kāng，盡量做。想著無後生是beh按怎，阿珠--a 心bē安，就sì-kè去探聽。尾--à去揣著一个有困難ê人生ê查埔囡仔，kā抱來報出生，hōo勝章有一个後生，án-ne阿珠--a就khah安心--ah。
勝章過身ê時，兩个查某囡仔lóng iáu leh讀小學，阿珠--a koh真久無去上班--ah。染整廠伊iáu m̄是真bat，就聽股東ê話繼續經營。生活khah孤單m̄-koh是無問題。Khah煩--ê是ta-ke tsit爿ài in搬--tńg-去，染整廠ê股份ta-ke in mā有意見，染整廠按怎收尾tsit層代誌，阿珠--a m̄ bat講hông聽。
阿珠--a有一个機緣去廟--裡kap人學台語誦經，ē hōo心安靜--落-來，khah熟了後就參加誦經團，時常kap人去廟--裡誦經，有tang時仔mā ē去替往生者誦經，ke減有寡所費。漸漸伊就行入替往生者誦經tsit行。拄開始是tuè團niâ，過--幾-年-仔，伊就有才調去接khang-khuè，khah細場--ê伊有法度家己一个做，án-ne接ê khang-khuè就bē少--ah，生活khah安定。M̄-koh tsit種頭路tiānn-tiānn是臨時臨iāu hōo你bē按算--ê，實在是無輕鬆。若想講tse是leh做功德，心就khah tiānn。
Tn̄g著in外家ê厝都市計畫tio̍h路，大路拄好對正身護龍中ng過，第二kap第四--ê ê地是連做伙，大--ê kap第三--ê tī路ê hit爿。老爸kap阿叔講beh hōo人起新厝去pun--ê。In老爸ē-tàng pun一棟三層樓仔家己蹛，koh有半棟ê額thang好賣。阿珠--a就買in老爸beh賣ê tsit棟。起新厝ê時，老爸就kā厝做hōo in小弟，伊kap in小妹lóng無份。Tsit時in ta-ke kap老母lóng過身--ah。規家徙tńg來外家tsia，大漢查某囝拄讀國中，後生mā ē-sái讀幼稚園--ah。In無愛tńg ta-kuann hia，kan-na過年tsiah ē tńg去圍爐。厝邊頭尾tiānn-tiānn to聽著in ta-kuann騎跤踏車來tī樓跤leh huah in孫，huah kah規條巷仔ê人lóng聽kah tsiok清楚，想beh提mi̍h件hōo--in，順suà來看孫。
一个查某人beh拖三个囝實在無簡單，佳哉伊khah早有儉一寡錢，koh leh替人誦經，tsiah有法度生活--落-去。Mā因為án-ne，伊生活上lóng tsiok m̄甘開--ê，食穿lóng真凊彩，逐項to想beh儉，kan-na想著in三个囝niâ。厝邊隔壁lóng是阿叔、阿伯、大兄kap小弟親hònn-hònn，蹛著真安心，tsia是in規家伙仔此後beh生活ê所在。
