阿媽是我ê靠山

作者:陳掄瑜


我上早ê記憶就是uì阿媽開始——倒tī阿媽重重、涼涼ê板仔床頂頭食ne-ne tshit-thô;徛tī眠床頂,等阿媽kā我穿我上愛ê hit領伊家己做hōo--我ê青黃花Kimino睏衫;phak tī阿媽kha-tsiah-phiann等伊kā我āinn tńg去厝;坐tī車布機邊--a kā阿媽hōo--我ê鈕仔lóng thīnn tī一塊碎布頂頭……。


阿媽是避風港。無論發生啥mih代誌,若是有阿媽tī--leh我就心安。讀書以後,我uì阿媽兜搬tńg去厝--裡kap爸母蹛。有時仔爸母ē冤家,我就馬上khà電話叫阿媽過--來。拜六禮拜我mā一定吵beh去阿媽兜睏。 15歲hit年,爸母送我出國,是阿媽孤身一个人kap我留tī美國讀書拍拚。阿媽雖然看無半字英文mā bē-hiáu開車,伊mā甘願留落來陪我行過上艱苦ê頭三年移民生活。連阿祖過身hit-tsūn,伊lóng bē-tàng趕tńg去台灣。阿媽hit暗ê目屎,我到tann koh ē記--得。


阿媽是馬蓋先。阿媽做人做代誌認真koh巧。伊勤儉拍拚,絕對bē浪費資源。歹--去ê mi̍h件,伊一定ē-sái用上天才ê辦法修理好勢。 舊--去ê家電,伊mā逐个lóng拭kah金爍爍。阿媽上愛用頭腦解決問題。有一擺,伊看著電視影片內底ê馬蓋先(MacGyver)mā愛用頭腦,伊就tiānn-tiānn講家己是lán兜ê馬蓋先。


阿媽是電動冠軍。阿媽愛拍益智型電動。細漢時,阮教伊sńg「俄羅斯疊磚仔」。阿媽目睭明手勢緊,阮uì單人比賽拍到雙人挑戰,lóng無人ē-tàng贏過阿媽ê厲害。後--來,連自認上gâu ê弟弟mā無愛kap阿媽鬥陣sńg--ah。幾年前,阿媽最後一擺來美國,兩个kan仔孫介紹伊sńg iPad。結果,阿媽sńg到半暝,koh來討插頭插電。自hit-tsūn開始,兩个kan仔孫就lóng叫伊「電動阿祖」。


阿媽是我ê靠山,因為我成長ê記憶滿滿lóng是伊。我iáu細漢ê時,伊牽我ê手過大路khioh淺拖仔、到美國hua̍t-lo̍h我ê生活。阿媽勇敢m̄驚艱苦,用家己ê性命來陪伴--我。斟酌想--來,阿媽ê八个孫lóng bat kap伊蹛一段時間。 阿媽一世人m̄ bat講過「愛」,iáu-m̄-koh伊用性命來疼惜囝孫。若無阿媽,就無今仔日ê我。


阿媽tī兩冬前離開世間,伊ê名號做「美女」。Tī我ê心內底,伊是hit个上慈愛、上suí、上古錐,永遠ê美女。











#台灣人寫真 專欄,本文使用教育部推薦漢字kap臺灣閩南語羅馬字拼音方案。

#台文通訊BONG報 338期,2022年5月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。