作者：陳頂新
我ê爸爸tī公元2021年11月19 hō͘上帝接走--ah。
事後，長期以來，時常kap爸爸研讀聖經ê老師講，爸爸最後「相信--ah」，爸爸相信koh活、相信永生、相信上帝--ah，伊相信，而且跟從。可能是án-ne，所以，上帝將爸爸接走--ah。
阮爸爸ê名叫「信從」，伊熱愛研究聖經，soah一世人kap上帝辯論，到最後，伊iáu是跟從伊自細漢就接觸ê信仰。
爸爸tī我ê心目中，就是一个「人格者」。
若m̄是爸爸，我mā bē行chiūⁿ法律chit條路，無論是攻讀法學博士、考tiâu律師、開家己ê事務所擔任所長，到最近beh去國立大學法律系擔任兼任講師，一切ê一切，lóng是爸爸不斷teh鼓勵、支持kap引chhōa。
無爸爸，就bē有今仔日ê我。
我對政治kap社會ê關懷、母語ê意識、待人接物ê道理、處事ê哲學，lóng受著爸爸ê影響，而且我iáu-koh無到伊ê百分之一。
幾工前，我看著陳定南教育基金會董事長林光義先生ê一段話，感觸真深：「讀冊人坐--落-來ài ē-tàng寫，徛--起-來ài ē-tàng講，倒--落-來ài ē-tàng想，講話ài hō͘人ē認同，做代誌ài hō͘人感動，做人ài hō͘人懷念。」
阮爸爸，就是án-ne ê一个讀冊人。
爸爸自細漢致著小兒麻痺，身軀承受行動不便ê折磨，檢采因為án-ne，伊ê意志比一般人giám硬koh充滿韌性。雖bóng有時對上天有埋怨，m̄-koh伊總--是充滿自信，是hit種無驚惶、命運是家己ē-tàng掌握ê自信。想--起-來，我確實m̄ bat看過爸爸lún-neh--過，伊確確實實展現『尼采』所講ê親像超人ê意志。
爸爸ê正能量phong-phài，總--是hō͘周圍ê人欽佩。爸爸chiok愛讀冊，所以tī kap人對談ê中間，總--是ē-tàng講出真濟名言佳句。Tī阮屏東舊厝--裡，上濟ê mi̍h件應該就是冊。我細漢ê時chūn，lóng ē走去爸爸舊舊大大ê鐵冊櫃提冊來看，凊彩掀，逐本冊lóng ē有爸爸滿滿ê筆記，無論法學、哲學、宗教、文學、政治等，爸爸ē-tàng講啥mih冊lóng看。
『歌德』bat講過：「讀一本好冊，就是kap真濟高尚ê人對談。」我想，爸爸數十年來lóng浸tī冊--裡，確實形成伊相當大方正向ê人生觀，可能因為án-ne，爸爸mā行kah真sáng勢。
周圍ê親人安慰--阮，爸爸離開kah真sáng勢，是無想beh拖累囝兒，爸爸無痛苦、真幸福，阮做囝兒--ê mā真幸福。我m̄知，án-ne到底kám是幸福？但是我無了解，若是che是爸爸對囝兒ê體貼，為何阮猶原感覺無盡ê遺憾kap憂傷。
爸爸一生勞苦、坎坷。Chit世人，爸爸除了參加二姊tī越南ê婚禮以外，從來m̄ bat踏出過台灣一步，他真情熱愛chit个民主自由ê國家；一直到過身進前，爸爸lóng iáu-koh熱phut-phut kap囝兒討論公投ê議題，ài阮一定ài投四个無同意。伊對台灣ê前途，總--是充滿樂觀；tī過身前幾工，爸爸koh講，等伊活到99歲，台灣就獨立--ah。
爸爸離開以後，我上懷念--ê，就是伊he意氣風發ê神情kap āng聲談論ê身影，he是一種伊想beh kā伊發覺ê真理全部piàⁿ hō͘--你ê堅定kap熱情。
一直以來，我lóng知影爸爸心內有寡遺憾，所以，我總是紮伊ê遺憾kap期待做伙拍拚。自細漢，我就想beh chiâⁿ做爸爸ê驕傲，因為án-ne，我加倍拍拚，就是希望hō͘爸爸感覺榮耀。但是，爸爸過身以後，我chiah聽媽媽講，爸爸chiok煩惱--我，伊煩惱我拚過頭，影響家庭、身體kap健康。
爸爸煩惱--我，m̄-koh伊驚我無閒，m̄願kā我攪擾，所以伊無ke講。伊就親像伊hit輩ê台灣嚴父仝款，心內對囝兒有萬分ê關愛，總--是bē表現--出-來。
我想，我無閒是因為我想beh hō͘爸爸感覺驕傲，總--是，因為我ê無閒，所以bē-tàng見著伊最後一面；因為我ê無閒，所以無好好仔陪伴--伊；因為我ê無閒，hō͘伊m̄敢攪擾--我。我到底，是有孝iah是不孝？
聽媽媽講，爸爸真想beh來台中看我買ê新厝，但是因為知我無閒，看我lóng無開喙，所以伊mā m̄敢主動提出。我m̄知，我用盡性命拍拚kám chiâⁿ實為爸爸帶來榮耀？我kan-na知影，無法度好好仔有孝--伊ê遺憾，ē跟tòe我一世人，直到我kap伊koh再相見。
Tī爸爸ê告別式，有一段聖經ê經文（哥林多後書第六章第十節）我chiok kah意，因為chit段經文，真簡短koh適當註解爸爸坎坷koh富足ê一生：
雖然有煩惱，其實tiāⁿ-tiāⁿ有喜樂；雖然散赤，其實hō͘真濟人好額；ká-ná無半項，其實逐項lóng有。
阿爸 多謝
阿爸 再會
