作者：呂越雄
Tī理揚拄提著碩士學位、我第二个早產ê囡仔拄度chè，厝內充滿濟濟歡喜ê代誌ê時，我敬愛ê丈人、疼惜--阮ê好爸爸soah雄雄來過身。阮心碎、阮m̄甘，已經百日過--去，iáu是無法度接受chit个事實。
我六個月ê時，親生爸爸就過身，我m̄知有阿爸ê感覺。但是tī chit个家庭內底，得著丈人真濟溫暖hām照顧。逐擺，我講著細漢tī越南發生ê代誌，丈人lóng chiok愛聽，然後chiok歡喜hām我分享伊細漢mā有仝款ê經驗。雖然阮差32歲，但是總是感覺hām伊chiok親近、chiok親近。Hām丈人出門，有人ē當做阮是爸仔囝，我lóng感覺真驕傲，mā無想beh否認。因為我感覺ē-tàng做伊ê後生真好、真幸福。
丈人行動無方便，自細漢應該食真濟苦，但是伊hō͘身軀邊ê人充滿正面ê想法。若是阮生活上、工作上拄著不如意、拄著困難或者是失志ê時，就想beh tńg去屏東hām伊開講，聽伊分析、開破。有伊不時teh鼓勵，阮chiah有法度笑笑面對困難、chiah有khùi力繼續拚。丈人總--是充滿力量kap智慧，用心chhōa領阮親近土地、疼惜台灣、關心政治、對母語有使命感。伊是hiah-nī好ê人，是按怎上帝無hō͘ ke活--幾-年？是按怎上帝hiah早kā接--去？
丈人一直辛苦照顧某囝，無真正享受--過。認真教冊40冬lóng無歇睏，唯一一遍kā學生請假是為著去越南參加我hām理揚ê婚禮。丈人疼--阮、惜孫。但是阮bē赴替伊做啥，bē赴hō͘伊享福，阮ê約束mā無機會實現--ah，連講最後一句話ê機會to無--ah。
爸爸……感謝你hō͘我做你ê囝婿……
爸爸……希望你tī天頂，雙跤無束縛，ē-tàng自由自在sì-kè走……
爸爸……你教過阮hiah濟道理，soah無教過阮按怎hām你sio辭……
爸爸……爸爸……爸爸……
