翁仔某一tńg--來就入冷氣房歇睏，講開車坐車hiah久ē忝。
若晴chhím頭leh哀哀hoah「好熱喔！」一下kah大漢姑--a sńg--loeh，就bē記得thang熱。Liam-mi tī客廳灶跤sio-bih揣，liam-mi去騎阿公替伊做ê kho̍k-lo̍k-kho̍k-lo̍k馬，liam-mi koh招跤kah伊sńg「的相反」gè-muh，啥mih一人講一个詞iah是語句，對方ài kā話語顛倒頭講，án-ne thèng好sńg kah péng-phiaⁿ。
講著冷氣，規家伙就是in有tè吹。有tang-chūn仔阿霞ē刁意故ge in兄哥，講囡仔冷氣吹慣勢liam-mi就變肉雞，細膩時到一下曝日就烏暗眠。庄跤囡仔若變肉雞bē堪得曝日……啊，he有影khah見笑。啊in兜ê囡仔……to確實m̄是庄跤囡仔啊！阿雲khah要意--ê是講，爸仔母惜囝惜孫，逐項好to kan-na beh儉hō͘用，伊m̄甘kah。看in阿爸熱kah流汗sám滴，一台用30冬ê電風pháng--ê全燒風，阿雲tiāⁿ-tiāⁿ kā阿爸講，「裝hit台冷氣幾lō萬，kan-na in tńg--來chiah leh吹，一年看吹幾kái？你就去in房間theⁿ--一-下bē要緊--lah！」
「Boaih，我吹電風khah贏。」
「He人ê房間mài kâng入--去--lah！」阿好--à聽--著未chēng-mī就來擋。
「Heⁿh，你a̍h知he人ê房間，創啥去kā洗便所？」阿霞聽--著就來kā khoe。
「In便所to thái-ko-nōa-lô……」
「Ho͘h！你就lóng mài入--去、lóng mài看就無代誌--了-了，thái-ko做in去thái-ko啊！」
「He有味、ē臭neh！」
「啊你就mài入--去bē-hiáng？Mài看、mài鼻lóng清氣liu-liu。」
想著就厭氣。阿雲kah阿霞lóng感覺in爸仔母做kah chiah hā-choh oân-á chiâⁿ可憐。重點是講，in囝也無因為án-ne kā感謝。
Éng擺若晴開金口ê時，阿霞就注意著囡仔kah阿公阿媽lóng bē親，吸in大漢姑--a就吸tiâu-tiâu。免kah偌詳細聽，就知啊to話語bē通。大漢姑--a愛囡仔，也khah ē配合伊講中國話。阿公阿媽lóng kan-na坐tī邊--a看囡仔leh笑。
「啊哪ē bē-hiáu講台語？」阿霞隨點--出-來。
「有--lah，tī厝阮ke減ē講。」阿雨kā囡仔mo͘h tī跤腿搖，「若晴，我們在家都有練習說台語對不對？」
若晴tìm頭，chiok認真chiok拍拚lā in大漢姑--a買hō͘食ê布丁。
Koh來ê故事kah逐口灶lóng仝款：阿公阿媽開始講狗蟻--ah。有leh講狗蟻，囡仔就khah ē kah in hìⁿ-haiⁿ--著。
阿霞感覺真悲哀。一个囡仔thang改變規家伙，神仙難救無命客。
是講，伊mā無才調創啥。Mài講伊家己歹面腔koh歹鬥陣，講話無人愛聽，阿爸阿母看孫看kah笑一下目眉歪一爿，聽有聽無，koh káⁿ-ná無重要。伊想著「台湾國」ê囡仔，hoai-ê 囡仔台語講kah chiok liàn-tńg、chiok古錐，伊講啥lóng免驚囡仔聽無，koh再一擺意識著家己按怎ē hiah興beh tòe。He是一款無奈ê欣羨。
阿霞對囡仔chiâⁿ無法--lih。
嬰--a m̄敢mo͘h，驚伊軟軟、驚家己手無勢kā摔--著；度chè--過mā m̄敢sńg，驚伊háu、驚伊揣媽媽；koh-khah大--leh，驚伊吵、驚伊tiuⁿ、驚伊講bē-chhun-chhia。特別chit个koh是華語囡仔。
M̄-kú，閃bē離ê時chūn oân-á有。親像chit-má。
In爸仔母睏精神講beh去拜訪朋友、大漢姑--a leh無閒、阿媽練功時間到、阿公落田拍筍仔，賰伊thang tàu顧囡仔。
阿霞m̄知按怎kah囡仔鬥陣khah好。人hit陣母語囡仔伊就真gâu弄in sńg，thaih家己厝內chit个就無才調？逐擺若見面，伊就chiok拍拚kah囡仔講台語，伊mā m̄是聽無，to按怎lóng無愛講。阿霞oân-á想空想縫來siâⁿ--伊。
「阿晴，lán來講台語好--無？」
若晴搖頭。
「啊無，lán來sńg一个gè-muh。Lán來交換講話，你講台語、我講中國話，看阿晴反應有緊--無？」
囡仔歪頭想--一-下，有leh考慮，凡勢ē通？
「那，你說台語，我說普通的。」
阿霞起愛笑，tiang時仔原來講台語無普通？Mā好--lah！橫直伊本chiâⁿ就無啥囡仔緣，若thang chiâⁿ做一粒「無普通ê菇」，hō͘記tiâu-tiâu mā好。
阿霞péng手kā囡仔攬倚--來。
「好，án-ne lán來算數。我beh開始算--ah！Chi̍t、nn̄g、saⁿ……」。
「四、五、六……不對啦！你沒有算到peh啦！」
「Aih-ioh？M̄-chiâⁿ猴！你koh知--o͘h？」
「我知道啊！Chhit、peh、káu……chhit後面是peh--lah！」
「M̄-chiâⁿ猴！你koh知--o͘h？」
「M̄-chiâⁿ猴是甚麼？」
「M̄-chiâⁿ猴就是g……啊不對啦，m̄-chiâⁿ猴是一種猴子--lah！」
「晴晴不是猴子！」若晴雄雄lùn開阿霞，háu kah天地顛倒péng，ná啼ná走去揣大漢姑--a……
「小姑姑說我是猴子！！」……án-ne就háu--chhoaih--ah！
阿霞目珠thèⁿ大蕊……夭壽--o͘h！Án-ne a̍h bē-sái？！
囡仔心，猜bē到，茫茫渺渺sa無cháng。
Chit層代誌暗頭仔食飯hō͘厝內底khe̍h來配飯配笑。
阿公阿媽笑kah目屎kō͘ chōaⁿ--ê，阿公koh笑kah著ka-cha̍k。
若晴坐tī阿雲ê跤腿：「好啦！晴晴不是猴子，我們是可愛的小狗對不對？」
囡仔面àu-tū-tū，目屎kâm--leh，攬胸sái目角，gîn-hò͘-hò͘。
「漏晴、漏晴，阿公kā你講，m̄-chiâⁿ猴素一總好厲害的猴chuh。」
「我不要當猴子！」
「是按怎口以當小狗、不行當猴chuh？」
「我不要當猴子！」
「豪啦！小姑姑才素猴chuh啦！」阿好笑kah流目油，「Oeh！Seⁿ-ko͘，你chiah是猴chuh--lah！」
看阿公阿媽kah細漢姑--a笑kah腹肚tit-beh糾筋，無意中soah來一聲：「不！是！」，逐家chőaⁿ恬--去。若晴一箍面仔結規khiû，想beh講話chèⁿ喙--leh，詞彙量koh無夠，滿腹委屈無tè講，未chēng-mī就koh目屎四liân-sûi。
「Ai-ioh，啊m̄就m̄-thang哭哭啊，哭哭豪醜neh。」
「不准說別人！」
若晴大聲jiáng，一肢chéng頭仔kí ùi ài伊mài哭ê阿媽，tiuh-tiuh--à面腔結--起-來，目屎斤外重，目箍底禁bē tiâu，gêng kah規个人ē chùn ē chhoah，sòa--loaih……
Sòa--來就koh再一擺悽慘chhoeh。
又koh háu又koh ki，牽聲兼牽絲，又koh beh罵阿媽，又koh beh搥心肝，無閒chhih-chhah，四个大人soah恬恬看伊tǹg椅桌，也m̄知是beh氣iah beh笑。
外口in阿爸阿母拄好tńg--來。車門chiah ta̋ⁿ hop--loeh，in阿母就聽著囡仔mà-mà-háu，phiak phiak phiak開門出現--lo͘h。一入門若晴就nǹg入媽媽胸前。In媽媽囡仔緊kā àⁿ--leh，輕聲kā問，「怎麼啦！為什麼哭得這麼傷心？」
「阿公阿媽還有小姑姑都笑我！」
「真的喔！他們笑你甚麼？」
「他們都說我m̄-chiâⁿ猴。」
阿霞代先擋bē tiâu，大聲笑--出-來。
「Hiô？M̄-chiâⁿ狗mā chiâⁿ gâu ê款hoⁿh？」
若晴手kí in細漢姑，面仔jiâu-phè-phè，硬死ki，氣kah手頭掠一粒phîn-phóng來kā kiat……可惜離真遠，阿霞忍笑chiâⁿ艱苦。
「Mài koh講--ah--lah！」阿雲kā阿霞chhiⁿ，sòa手àⁿ腰kā球khioh--khaih。
阿婷一面阻擋囡仔烏白khian，一面leh無閒kā安搭。
「沒有，阿公阿媽沒有笑你，你看，他們在笑小姑姑！」
「晴晴沒有好醜！」
「好，晴晴沒有好醜，晴晴很可愛，對不對？」
囡仔人tìm頭tìm kah beh lak--去，親像受著全世界ê委屈，總算揣著人理解。
阿霞tī邊--a khiau跤giàu頭，也感覺不止仔心適。現現若有台語元素，阿爸阿母lóng聽有囡仔leh講啥，也ē笑kah khah大聲。M̄-kú，看--khaih mā m̄是逐家lóng愛笑。看囡仔in阿母無閒kā háu kah beh吐腸頭ê囡仔攬--leh，phiak phiak phiak koh走起去in房間講beh處理--一-下chiah-koh loaih。
Thèng候kah聽著門khok--khaih ê聲，阿霞就講：「可憐--o͘h！Tiang時仔參「gâu」lóng變kâng笑ê話--ah，有影gâu kah。」
「叫你mài講你koh講！」
阿雲kā白目，阿霞吐舌hō͘看。
（後期繼續）
編註：
華語用無仝字體色水標示。
