主講／葉倫會
記錄／蔡天享
「Lán台灣人上大ê風險是m̄敢冒險！」Tsit kái行讀ê解sueh老師葉倫會起頭就án-ne提醒在場ê 30个朋友，目睭tio̍h-ài peh hōo金，斟酌觀察，跤尾mā tio̍h徙hōo在，攑筆做紀錄，做伙來去走揣lán m̄知ê所在。
二二八和平紀念公園有五个涼亭仔，tī水池中ng ê hit个有徛孫中山，另外四个，有tshāi鄭成功、劉銘傳、丘逢甲kiau連橫ê銅像，為怎樣tshāi in四个人--leh？In對lán tsit塊土地有啥mih貢獻--leh？葉老師ài逐家好好仔思考回想，tńg去厝--裡tsiah-koh揣資料求證。雄雄聽著「吱！吱！吱！吱！」，是蟬leh叫ê聲，台北市仁愛路、新生南路kap金山南路ê hit箍圍仔，蟬leh háu是tī 6--月到9--月tsit三月日；若tī草山，蟬háu ê時日加倍長，tī-leh逐冬ê 4--月到11--月——tse是倫會老師長期行踏觀察ê發見。Tsit時，互相無熟sāi ê朋友，你比tsit欉樹仔，我指hit枝樹ue，聽蟬聲來sio報蟬影ê所在，用真情leh交流——用目睭看四面以外，用耳仔聽聲也是逐家感受大自然要緊ê方式。
行到「黃--氏節孝坊」，老師tann頭看tsit个三个門四枝柱ê三層石造牌坊，講是清朝同治皇帝（1870年代）允准起造--ê，來表彰黃--氏。伊28歲守寡，tuè ta-ke-kuann tuì福建泉州來到lán台灣艋舺徛起做生理，家己tshiânn養三个後生、兩个查某囝，囝兒lóng tio̍h功名。Tī 150冬前hit个時代，查某人守節、huānn家kap有孝序大人是高尚ê社會倫理道德，就親像刻tī石匾頂kuân hit兩字大字「節孝」，來警醒世間人，ài百姓kā敬重趁樣。
一kiânn人來到台灣博物館門跤口，兩隻銅牛四目sio-siòng，屈leh kā逐家迎接。銅牛原底是tī日本時代1930年代，信眾獻hōo台灣神社--ê，後--來國民黨政府kā神社改起做圓山飯店，銅牛tsiah hōo人徙來tsia。東爿面倚台大病院hit隻是紅銅做--ê，khah純，無透lām啥mih雜質，比西爿面hit隻青銅做--ê價值ke beh十倍。「摸牛角，趁金角；摸牛頭，起大樓；摸牛喙，大富貴；摸牛耳，食百二！」逐个人ná tuè老師唸tsit pha盤喙錦，ná摸銅牛，ǹg望福祿壽齊全，隨个仔to笑kah喙仔裂sai-sai。
二二八公園內底有真濟古蹟以外，多樣ê植物tī tsit个7--月火燒埔ê天時，也引人透心涼，尤其是園內派出所頭前hit欉台灣油杉，是千萬冬前冰河時期就有ê台灣特有種，人稱台灣國寶。M̄-koh，伊結ê子kan-na一成有飽tīnn，thìng好thn̂g種，賰ê九成全虛--ê，無才調生湠，莫怪ē hōo政府kā列做保護ê樹木。
跤踏實地巡過二二八公園內底ê涼亭、牌坊、動物kap植物了後，來到服sāi土地公ê「福德宮」。廟公請逐家lim清涼退火ê梅仔汁，koh送桃仔木做ê護身八卦，bē輸田頭田尾ê土地公hit一樣，白喙鬚kuà好笑神，有保庇也有心安。
煞尾，用有限ê時間巡過日本時代ê榮町（tsit-má ê衡陽路hit箍圍仔），出名ê店頭一間一間kā影--過，文星出版社、金仔店、極品軒餐廳、菊元百貨、上海藥房、全祥茶莊kap濟濟ê布店。順路向北來到博愛路ê台北郵局，欣賞國定古蹟清朝台北府城ê北門，石座、紅磚壁配翹尾厝頂，真真正正tī台北城內行讀，有頭有尾行到城門邊，應驗「讀萬卷書，不如行萬里路」ê道理。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
