主講／吳介民
記錄／張翠硯
話頭
7--月ê salon講座邀請中研院社會學研究所ê吳介民教授，tī香港版《國安法》拄通過了後ê 7月初，來kap逐家分享伊對香港kap國際情勢ê長期觀察。1997年7月初1，香港tuì英國ê殖民地轉變tńg去做中國ê土地。其實，17冬前ê 2003年，香港政府就根據《基本法》第23條拍算beh來制定《國家安全法》。Iáu-m̄-koh，hit冬ê 7月初1，有50萬人tsiūnn街仔路遊行、示威反抗，tī hit-tang-tsūn香港「半威權、半自由」ê社會氣氛之下，去hōo人民擋--落-來。經過舊年開始ê「反送中運動」，香港人民向世界各國展現反對極權政府ê決心。不而過，中國kap香港iáu是tī今年6月30簽署、實施《國安法》。
中共為啥mi̍h beh制定香港版《國安法》？
香港版《國安法》大約有tsit寡目的：
- 阻擋民主派，hōo in tī立法會選舉無法度過半、beh想盡辦法hōo參選人失去資格。7月30，香港政府kā香港民主派黃之鋒等12个立法會議員ê參選資格取消，也就是所謂ê DQ（disqualify）。Suà--落-來tī 7月31，特首林鄭月娥宣佈立法會選舉beh延後一年，理由是COVID-19疫情嚴重。林鄭講tse是「艱難ê決定，m̄-koh得著北京中央支持」，koh強調講「無政治考慮」。到tsia來，tsit擺立法會選舉活動已經hông「沒收」。
- Beh斬斷香港對外界ê連結，尤其一寡NGO長期對香港lóng有提供民主社會ê支援。7月30，香港警察通緝六名流亡iah是人tī海外ê香港人，包含羅冠聰、陳家駒、劉康、鄭文傑、朱牧民kap黃台仰。控訴ê罪名是『涉嫌煽動分裂國家』kap『涉嫌勾結外國或境外勢力危害國家安全』，其中四个人主要是因為in有tī面冊發言kā定罪。
- Beh全面來管制、治理香港。香港政府原本tī英國管轄之下，有真獨立、完整ê司法系統，tsiah有才調tsiânn做世界ê經濟中心。
- Beh進行「第二擺回歸」，雖bóng香港已經hōo中國收tńg來統治20外冬，人民反抗、無認為家己是中國人--ê，iáu真濟。
- 實施全面ê政治手段heh驚，hōo人民m̄敢koh tsiūnn街仔路抗爭。
Kap台灣人ê關連
Kap台灣人khah有關連--ê，是《國安法》ê四大罪名：『分裂國家、外國勢力、顛覆政權、恐怖主義』——就算你人無tī香港，若是行為牽涉tsit幾个罪，mā ē出問題。另外，tī施行細則內底，甚至要求相關人員，bē得拒絕提供犯罪相關資料。所致，lán台灣政府針對派官員駐香港ê khang-khuè，ài有適當ê對策。國安法tsia-ê規範，刁工hōo人無夠時間thang反應，香港政府真有可能tī最近就掠一寡tshuā頭反抗運動ê人，來「刣雞教猴」。
7月29，香港警察國安處kā「學生動源」前成員鍾翰林、何諾恆、何忻諾、陳渭賢等四个人掠--起-來。警方表示，掠--in ê理由是根據in tī社群網站頂頭ê言論，引用《國安法》第20條kap第21條，koh講市民「若有宣告，就已經是煽動ê罪行」。Ná像吊燈內底ê「大尾蛇」（『巨蟒』），bih起來偷偷仔kā你看，hōo真濟學者m̄敢批評中國，若無，ē提無中國ê研究資料、資源，學術研究成果ē受影響。
大學編雜誌ê經驗
吳教授講tī伊讀大學ê年代，有做過《大學新聞》總主筆，bat hōo人要求kā文章內底ê「階級」改做「階層」tsiah ē-tàng刊。1986年，《大學新聞》mā bat因為刊一篇khau洗政治ê bàng-gà去hông停社一冬。Tse是表面上ê理由，真正ê原因是伊kap一寡人tshuā大學新聞社等幾个社團ê學生去鹿港參與「反杜邦運動」。可見1980年代，校園ê政治氣氛iáu-koh真緊張。伊舉tsit寡古早ê例講hōo逐家聽，感覺未來ê香港真有可能經歷台灣以早ê「白色恐怖」。
國際反應
美國訂《香港自治法》，ē-tàng制裁破壞香港自治ê官員。英國hōo有「英國海外僑民」護照ê香港人，ē-tàng申請做永久居留ê英國公民。到7--月初旬為止，歐盟kap日本lóng無採取啥mih行動，kan-na表示「遺憾」。
反送中運動
動員kap鎮壓ê規模lóng tsiok大，濟濟人hông判暴動罪、iáu leh審查ê案件mā真濟。參與運動--ê，70%～80% lóng是16到30歲ê香港少年人。其中hông判暴動罪--ê，身份是「學生」ê比例占上kuân。Tse ē-tàng講是一擺「青年學生運動」。根據研究調查，香港經過2014年ê「雨傘運動」kap舊年ê「反送中運動」了後，大部份lóng認為家己是香港人，認為家己kan-na是中國人--ê，愈來愈少。
美國ê國際力量
Tī中國力量愈來愈強ê情勢之下，美國是世界上iáu ē-tàng插手控制ê角色。美中tsit-tsūn是tī-leh新冷戰狀態。M̄-koh，美國kap台灣是盟友，lán kap香港mā是「戰略互助」關係，tī中國對香港kap台灣造成威脅ê情形之下，台灣是幫助香港ê關鍵。香港若是政治情勢愈來愈bái，恐驚後一个受影響--ê，就是台灣。
台灣民意對中國ê觀點
針對台灣民意對中國政府ê觀點來講，2012～2020年ê調查比較--起-來，今年iáu-koh認為中國政府kap台灣是朋友--ê，比舊年明顯減少。調查mā發現講，台灣社會有67% ê人支持反送中運動，算是比例真kuân、普遍lóng贊聲ê態度。反送中運動mā是今年初台灣選舉趨勢改變ê關鍵因素之一。
台灣後一步ē-tàng按怎做？
Lán ē-tàng提供人道救援，ē-tàng吸引香港ê資金kap人才，m̄-koh，tsit點mā有bē少人反對，因為香港ê資金，有真濟實際上是中國資金leh huānn。Lán koh-khah適合做--ê，其實是吸引khah濟教育、新聞、演藝、NGO各界ê香港人才來台灣。Koh-khah進一步周全ê計畫，就ài kā lán ê移民政策mā包含在內。Ǹg望台灣tī目前ê世界情勢發展當中，ē-tàng變做「全球公民社會」ê「連結」之一，hōo台灣tī國際扮演koh-khah重要ê角色。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
