主講／蕭文杰
記錄／賴昭男
北投是一个有好山水、好環境ê所在，自日本時代以來，就是真出名ê景。Tsit kái ê台語行讀由蕭文杰老師tshuā領，逐家tī新北投捷運站集合，tuì「新北投舊車頭」開始導覽。蕭老師講，規个北投地區觀光史，ē-sái講kap tsit座車頭有真深ê牽連，北投人ê文史意識mā是tuì搶救車頭開始聚集--起-來--ê。
蕭老師介紹，tsit-má lán看--著ê捷運淡水線ê車路，基本上就是tuì古早ê台鐵淡水線來--ê，包括新北投支線，lóng是tī日本時代就起好ê火車路。上早，日本人起淡水線主要是beh配合淡水港做貨運，m̄-koh落尾淡水港積沙、船路bē通，注定了錢，tsua̋nn改發展觀光。新北投支線就是為著發展在地溫泉ê觀光資源tsiah起ê火車路。
規條淡水線到戰後改起做捷運，上尾留--落-來唯一ê古蹟，就是新北投車頭。M̄-koh車頭建築tī鐵枝路廢止以後，台北市政府kā賣hōo彰化ê台灣民俗村，經過北投在地人濟濟年ê爭取，tsiah hōo車頭有機會tńg來tī北投重起。蕭老師講，雖然希望盡量照原貌重起，suah因為施工單位對車頭無夠了解，致使部份構件起了有小可tîng-tânn。
車頭掠外，koh一个hōo在地人真關心ê議題，就是「北投纜車」。蕭老師tshuā逐家行到北投公園內，kā逐家說明：為著beh進一步開發北投ê觀光資源，有一寡財團kap官員拍算beh tī北投起纜車，而且beh tī公園內起纜車系統ê相關設施。Án-ne來，定著ē破壞原本公園ê景緻kap自然環境，甚至影響著在地ê溫泉產業。
公園內有濟濟老樹，koh有無仝造型ê噴水池，蕭老師一項仔一項來介紹，in lóng kap北投ê文化、歷史有牽連。Íng-tsūn，在地人m̄知北投纜車ê建設，ē sńg-tn̄g環境，是後--來透過環保團體kap文史老師ê開拆，tsiah沓沓仔了解。居民參與搶救車頭、守護公園ê運動，一擺koh一擺kap市政府對抗，經過風風雨雨，終其尾tsiah kā「北投纜車」建設案擋--落-來。
北投因為有溫泉ê天然資源，tī日本時代就吸引濟濟日本人來tsia tshit-thô。蕭老師tshuā逐家行過一座歐洲式ê噴水池，到kah公園kap溫泉路73巷ê巷仔口，tsit tah目前是一棟集團經營ê溫泉飯店大樓，tī大樓門口邊--a、無特別hiánn目ê石gám仔kā peh--起-去，就是「天狗庵」遺址——tse是北投地區頭一間民營ê溫泉旅館，北投ê溫泉產業就是tuì tsia起鼓--ê。
天狗庵遺址ê範圍無闊，是gia̍p tī大樓kap人家厝中ng ê一角仔位。所在狹狹--à，有起日本式ê亭仔kap nî-tsînn，真有日本味，bē輸tsiânn實來到日本ê款。蕭老師講，實際上真正ê遺址kan-na石gám仔niâ，別个lóng是落尾tsiah整理--出-來--ê；雖然無文資身份，m̄-koh ē-tàng hōo人感受著北投產業發展ê歷史，mā是真好ê教育。
除了車頭、公園，北投koh有真濟值得lán去好好仔遊賞ê所在，親像：溫泉博物館、梅庭等。一埔短短ê時間無法度kā規个北投bat透透，m̄-koh透過蕭老師ê導覽，已經體會著北投自然kap人文sio-kap ê特色，m̄-nā有清溪suí景，koh有原住民、漢人、日本人透lām ê文化。佳哉有tsia-ê樹仔kap文化資產，北投tsiah thang保留原始ê光景，繼續siânn遊客來觀光。
