聽老師講故事

作者:李玉鳳


細漢時tsūn,老師tī上課ê時,有tang時仔就ē講一寡故事hōo阮聽,老師講ê故事有心適--ê、感動--ê、恐怖--ê……。


有一个故事,我逐擺想--起-來lóng ē笑kah擋bē tiâu,hit个故事是講,有一工暗時,阿明坐tī船頂食薰,看著對面有一隻船。船頂有一个查某囡仔,穿一軀白色ê洋裝,人未到,就鼻著一tsūn芳kòng-kòng ê芳水味。阿明真歡喜,心內想講:「一定是一个真suí ê查某囡仔!」Tsiah想beh看詳細niâ,siáng知伊ê頭毛lóng phi tī頭前,鬍sa̍p-sa̍p,親像鬼ê款。阮老師koh講koh ná比,規班ê同學是驚kah目睭am--起-來、耳空罩--起-來。


Suà--落-來,老師講,he阿明是驚kah phi̍h-phi̍h-tshuah,就開始一直唸:「一兩三四,驚--著無代誌,驚耳仔,m̄驚囡仔!」無想著船頂ê hit个查某suah講:「Ài用金閃閃洗衫精洗衫仔褲,衫仔褲就ē tsiok芳、tsiok芳--ōo!聽到尾--來tsiah知影是一个笑詼,逐家lóng笑kah真歡喜,就愛老師ke講幾个仔故事,siáng知影下課ê摃鐘就tân--起-來,實在有夠可惜。


另外,koh有一个我一直記tiâu-tiâu ê故事。主角是阮老師教--過ê囡仔,tsit-má iáu tī阮學校讀冊,伊生--落-來就有hām別人無仝款ê「長短跤」。下課ê時tsūn,tiānn-tiānn看著伊tī走廊,跛--leh、跛--leh teh行路,無法度行緊。尤其是行樓梯ê時,伊lóng ài沓沓仔行,正跤徛hōo在,tsiah換倒跤,一步、一步來tsiah bē跋倒。熱天換教室上課ê時tsūn,伊行kah大粒汗細粒滴mā無看伊leh怨tsheh。老師就教阮做人tio̍h-ài親像伊仝款,笑bi-bi,有人緣,認真、拍拚,得人疼。

 

有一冬ê運動會比賽,我看著伊mā報名參加比賽,雖然伊無法度走,速度mā無我緊,但是伊肯做、m̄驚見笑ê個性,我實在tsiok佩服,老師講ê故事hōo我學著:「一枝草,一點露,天無絕人之路。」


老師講ê故事,逐家聽kah真趣味,就親像看電視、電影,聽別人ê故事,學人生ê道理。Tsit-má,我mā做人ê老師--ah,tsia-ê故事tī我心內tuì一粒子,沓沓仔puh-ínn大漢、開花結子,繼續一代一代tī囡仔ê心內掖種作穡。 









心內話 專欄,本文使用教育部推薦漢字kap臺灣閩南語羅馬字拼音方案。

#台文通訊BONG報 342期,2022年9月出刊。

歡迎捐款贊助 #李江却台語文教基金會 

(捐款可抵稅,匯款後請通知02-23112199)



郵政劃撥:19021486
戶名:財團法人李江却台語文教基金會

電匯:123-20-050514-2
華南銀行士林分行活儲
戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。