2021/10/30 台灣時間拜六暗22：00~24：00
主辦／陳文成博士紀念基金會
承辦／世界台灣文化論壇
贊助／台語文化大使命基金
主持／周佳穎
記錄／吳宛霖
-----------------------
台文通訊30冬紀念獎 頒獎典禮 (第一場) https://youtu.be/d5JTY2a5-e4
台文通訊30冬紀念獎 頒獎典禮 (第二場) https://youtu.be/hpsiG5NmBy8
-----------------------
-----------------------
台南妹仔
周佳穎
《台文通訊》是台語文運動上重要ê一份刊物，tsit擺頒獎典禮ê主辦單位美國「陳文成教授紀念基金會」得著「台語文化大使命基金」ê贊助，特別舉辦tsit个紀念獎ê活動，就是beh來感謝台語文運動者，in追求台灣政治、經濟、語言文化、轉型正義ê拍拚。Lán先邀請1991年tī洛杉磯創辦《台文通訊》，mā代表tsit擺活動籌備單位「世界台灣文化論壇」ê鄭良光先生來kā lán致詞。
世界台灣文化論壇
鄭良光
陳文成過身40周年，辦tse活動有特別ê意義。陳文成在生ê時tsūn一向追求台灣社會tī政治、經濟、文化上ê公平正義。一個月前 lán kā平台改名做「世界台灣文化論壇」，鼓勵台灣人用台語來論台灣事，期待變成世界台灣文化議會，促進台灣文化政策ê提升。
前文化部長
鄭麗君
語言ài tī生活內底發展，lán每一个人有權利自由使用lán ê母語，語言本身就是文化，用伊來思考、創造、表達，hōo伊自然發展。今仔日lán ê囡仔ē-tàng tī學校學母語、國家制定《國家語言發展法》、成立台語台，用台語繼續創造音樂、文學、戲劇kap傳統藝術，一直到生活各方面lóng ē-tàng來使用台語文。感謝濟濟前輩kap先進ê拍拚，tsiah有今仔ê結果，tsiânn做台灣ê多元文化。
台灣陳文成博士紀念基金會董事長
楊黃美幸
美國「陳文成教授紀念基金會」自1982年成立以來，推廣台灣語言文化，鼓吹台灣主體價值，設立「社會關懷獎學金」，鼓勵青年學生用實際行動關懷台灣社會。台灣文化上重要--ê就是語言，發現學生開始用台語講話，tse是一種進步。台灣有tsiok濟傑出ê人，需要hōo少年人知影台灣ê歷史，tsiah知影將來ài按怎行。陳文成雖然過身40冬，m̄-koh伊用另外一款方式繼續，lán tsit-má做ê台語文運動是伊愛做ê khang-khuè，是非常有意義ê khang-khuè。
主題演講：
台語滅種kap拯救
【阿勇台語】YouTuber
阿勇
有一句話leh講「政治是文化ê墜物」，政府有leh執行，m̄-koh政府無影leh tshuā頭。政府ê正當性uì民間tsit爿來，民眾接受，政府tsiah有法度做。Tshuā頭--ê一定是民眾，台語ài有家己ê文化，特別是文化制度。今仔日ê運動ài面對ê問題是，一般人接受學校講北京語、報紙寫中文……，tse是正港ê問題。30冬來，政府極ke做閩南語辭典、學校一禮拜一節台語課、公視台語台、《國家語言發展法》……。Lán台語意識iáu-koh欠缺，世界有前例thang參考，1989年ê Czech（『捷克』），文化制度40外冬hōo威權占--去，in無法度uì政府體制內底做正經ê改變。In發現ài家己建立家己beh愛ê文化制度、教育、媒體、公司……，in lóng家己來。政府以外ê制度，號做「平行制度」，一爿政府、一爿民間，平行制度愈大，愈有法度kap原本民間無beh愛ê政府制度做替換——in ê革命tī 1989年成功。台語早晚ài uì語言運動變做正港ê社會文化運動。我若有錢就開學校，uì幼兒園、小學開始；開新聞社、做報紙，mài koh等政府來做，起造平行ê學校、平行ê新聞社，一定ài家己來。
專業成就獎
吳宗信
我出國讀冊，tī鄭良光kap蘇芝萌鼓舞之下，《台文通訊》是我第一本接觸ê台語文月刊，透過文章ê理念，hōo我學習正確ê語言態度。文字其實是記載無仝語言聲音ê工具，語言ê發聲kap語法是重要ê元素，所有ê語言lóng是平等--ê，有關對台語復興ê態度kap做法，tsit本雜誌提供我健康ê養份kap正確ê指導方向。Tńg來台灣了，koh kap好朋友發起「5%台譯計畫」，會員逐个人奉獻時間iah是5%收入，做翻譯出版世界名作ê路用，總共出版台語kap客語文13本冊。2015年我tī TED Taipei第一个用台語講演太空智識，證明台語語詞ē-sái解sueh複雜ê科技。希望未來有koh-kah濟ê專家ē-sái tī公開、正式ê場合使用台語，進行智識ê傳播kap交流，增加台語ê專業地位。感謝陳文成教授紀念基金會kap牽手ê支持。
台語文教育獎
蔣為文
感謝世界台灣文化論壇kap陳文成教授紀念基金會，mā感謝爸母kap兄哥ê支持kap贊助我台語文ê研究hām教育ê khang-khuè。Tse是第二擺uì陳文成教授紀念基金會領獎，頭一擺是我tī美國讀博士，基金會贊助我博士論文來做台越比較研究。1990年，我成立淡江大學台語文社，擔任頭任社長，有一擺tī前衛出版社熟sāi陳豐惠、陳明仁，透過in熟sāi社會上、其他學校ê台語文社。1995年，台大辦ê台灣語言國際研討會，大會禁止會場用台語、客語來問問題，in講tse是國際研討會，ài用華語、英語來發言，逐家kā大會抗議；hit暗，我寫一首詩〈十字架頂頭ê niáu鼠〉，mā決定beh改讀語言學，thang對無台灣心ê語言家tshiàng聲。
弱勢文化關懷獎
鄭雅怡
感謝主辦單位hōo我tsiânn大ê鼓勵，平埔田野調查khang-khuè ê啟發ài感謝陳雷先--ê，因為伊寫ê台語長篇小說《鄉史補記》，hōo我tsiânn感動，徛tī台灣ê立場用平埔族ê祖先做主題來寫。我去台南做田野調查愈liâu愈深，對台灣tsit塊土地有koh-khah深入ê認bat，是我感覺上kài有意義、快樂ê khang-khuè。
社區服務獎
陳豐惠
感謝台語文化大使命基金、陳文成教授紀念基金會、世界台灣文化論壇。感謝家族序大hōo我tī台語ê環境成長；因為in開放ê教育，hōo我自細漢接觸著講台語ê長老教會，mā接觸著hit時iáu是禁忌ê「黨外雜誌」kap濟濟「禁冊」。大學時代，520農民運動事件kap鄭南榕為beh爭取百分之百ê言論自由suah來自焚ê事件，hōo我tsiânn大ê衝擊。1988年尾，聲援520農民ê遊行，是我頭擺行tsiūnn街頭為弱勢發聲。
Tī一擺koh一擺認bat各種議題ê過程中，我愈來愈深化家己kap台灣ê關係，mā決定beh選擇「台灣語文運動」做我一生投入ê志業。感謝良光兄創辦《台文通訊》雜誌，1992年尾hōo我擔任雜誌ê台灣總聯絡人。感謝前衛出版社社長文欽兄，tī雜誌創辦第一年tàu處理《台文通訊》台灣ê發行khang-khuè，我tsiah有機會看著tsit本雜誌；iáu-koh有接辦《台灣文藝》創新號，hōo我參與台文版ê編輯工作、體會漢字造字ê問題。
感謝90年代台語詩人明仁先--ê tī台語文學kap歌謠等等對我ê牽教。感謝李江却台語文教基金會創會董事長林皙陽、李秀卿翁仔某，tī 1996年捐款成立基金會、感謝李江却女士ê翁婿李樹全先生提供艋舺ê厝做台北辦公室，感謝我ê阿爸阿母提供高雄ê厝hōo基金會做南部聯絡處。Mā感謝20幾年來，無仝時期做伙做khang-khuè ê濟濟專職、兼職同工、志工kap熱情捐款者，特別感謝上資深、上辛苦ê專職人員素枝姊；若無逐家ê同心協力，就無今仔日tio̍h獎ê我。
草根運動獎
陳明仁
Lán ê話語m̄ bat是官方語言，mā無標準ê書寫文字。《台文通訊》起造平台，hōo台語文有志thang伸跤出手，tī起造獨立國家進前、台語文標準化ê期間，tse是集體拍拚ê成果。真歡喜得著tsit个獎勵、肯定，tse榮光是上帝--ê，感謝。
資訊工程獎
楊允言
我是資訊工程出身，到大學三年有意識開始做台語文ê khang-khuè，後--來我tī中央研究院食頭路ê時tsūn，老師叫阮處理電腦內底hit時台文文本、語料無夠kap標準化ê問題。Hit-tang-tsūn，電腦按怎處理台文是一个遙遠ê夢，經過十冬，資料成熟，利用教學、研究ê機會，開始做台華線頂辭典、語詞檢索系統，十幾冬來khai真濟時間、精神，m̄-koh看著真濟人ē-tàng使用tsia-ê系統，我感覺真歡喜。希望有koh-khah濟少年人ē-tàng開發出koh-khah好ê系統，hōo逐家方便使用台文，感謝主辦單位，多謝。
科技運用獎
吳家銘
Tāi-ke平安，我是「台文雞絲麵」計e̍k發起jîn，Ngô͘ Ka-bêng。Chiok感謝「Tân Bûn-sêng教授紀念基金會」、「Taigi Mission Fund」決定beh頒chit-ê siúⁿ hō͘--我，對我chit 5冬ùi軟體工程師轉途全心來做台文事工，ū chiok tōa ê鼓勵。我參與ê時間bô gōa久，來領chit-ê 30冬紀念siúⁿ是ū tām-po̍h-á歹勢，m̄-koh相信án-ne ē鼓舞khah chē青少年朋友做伙投入。
Tī台灣大學內底ê Tân Bûn-sêng事件紀念tiâⁿ，頂禮拜chiah tú經過校務會議決定，thang設說明牌á，hông知影chit-chân烏暗ê歷史。Beh設chit-ê tiâⁿ，chiok-chiok 10冬，中間iáu是ū烏手直直chhun--入-來。台灣ê民主運動kiâⁿ kàu taⁿ，解救lán台灣lâng寶貴ê活命，bô-ta-ôa，靈魂soah iáu bē得tio̍h tháu-pàng。
台羅會理事長張復chû醫生tiāⁿ kóng：lán ài趕緊來起造「台灣學」。台灣學to̍h是kō͘台灣語文來記錄、傳播、教育lán ê文化智識。Gún「台文博覽會」團隊製作YouTube節目「台語相借問」，bat訪būn chêng文化部長Tēⁿ Lē-kun，請i用哲學來解說語言kap思想ê關係，i真認同阿勇講--ê，「語言m̄是文化ê 1-ê部份，其實文化to̍h是語言」。頂禮拜香港出名ê導演杜汶澤（dou6 man4 zaak6）先生tī面冊寫1句話——消滅1-ê民族，先消滅i ê語言。（『消滅一個民族，先消滅他的語言。』），是i做1-ê文化工作者，siōng深ê感受。台灣lâng beh精神、beh覺醒，chhím頭tio̍h ài lán ka-tī願意注重台灣語文，在來Tâi-oân族tio̍h ài實chiān「講台語、讀寫台文」，chiah ū才調thn̂g-thòaⁿ ka-tī ê文化，建立ka-tī ê思想自由，脫lī中華民國（中國）教育。
我ùi 2016年年底開始，整理chē-chē寶貴ê台語字詞資料，開發PhahTaigi輸入法kap ChhoeTaigi辭典。Ǹg望利益Tâi-oân lâng來學習台語、實chiān台文書寫。應效siáⁿ款iáu bô lâng去研究，總--是ta̍k-kang tī線頂看ē tio̍h ū lâng chhiau ChhoeTaigi辭典，teh論台語詞，mā lú來lú chē lâng願意o̍h白話字，安PhahTaigi輸入法，來寫台文。Koh 1-pái感謝主辦單位頒chit-ê siúⁿ hō͘--我，ǹg望我ē-tàng像其他siăn-pái kāng款，繼續做30冬、60冬。
最後分享1-chân代，我是「打狗台語開講社」chêng社長，chit-má擔任組頭。Gún chit幾冬ū針對ta̍k款族群設計in適合ê活動，來創造友善ê台語文環境——hō͘一般社會大眾ū「台文博覽會」、「台語開講會」、YouTube節目「台語相借問」；支持母語家庭ū「來聽台語gín-á古」、講師培hùn、出版台語畫本；幫chān學習者、教育者ū辦讀冊會，台文基礎班、進階班課程，認證研習等等。影響bē少lâng關心kap投入，應效相信bô輸1-ê正式ê NGO，m̄-koh kan-na靠少少幾ê有志sio-kēng，實在需要koh khah chē資源來o͘-ián。所pái我決定將chit-pái siúⁿ金全額捐hō͘「打狗台語開講社」，thang趕緊來成立「打狗台語文促進協會」。Ǹg望chit-pái捐款，ē-sái吸引其他有志tàu-tīn來sio-thīn！
Siōng尾，感謝chē-chē siăn-pái、有志引chhōa我kiâⁿ chit條台語路，hō͘我bē孤單。感謝「台文雞絲麵」ê贊助者，長期支持我做chia ê事工。Lán繼續phah拚，ló͘-la̍t！
#台文通訊30歲 專欄，本文使用教育部推薦漢字、臺灣閩南語羅馬字拼音方案kap傳統白話字。
台文通訊BONG報334期，2022年1月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
