主講／陳君愷
記錄／吳宛霖
語言是beh用現代觀念iah是歷史角度來看--leh？陳君愷教授本身是研究歷史--ê，伊bē用現代ê觀念去看語言，因為語言本身有歷史性，lán平常時講ê各種台語用詞，lóng有伊ê歷史層次。譬如講，北門是啥mih時tsūn起--ê？是清朝；郵局是日本時代；lán tsit-má tsit个所在ê大樓1是戰後起--ê，所以仝時tsūn看--著ê mi̍h件，其實是無仝時代ê mih仔，都市內底ê建築物lóng有無仝ê歷史性。
語言mā是仝款，舉例來講：阮「新婦」雖然「閑慢」，但是伊真「感心」。「新婦」tsit个詞tī中國古早時代ê文獻就看ē著；「閑慢」2是宋代用語；「感心」是日本時代入來--ê。台語tiānn-tiānn有仝款ê字，無仝款時代ê發音無仝，舉例來講：手術了後若ē「放屁」（pàng-phuì），就ē-tàng「放心」（hòng-sim），pàng是古音3，hòng是近世音；親像「方」，png是古音，hng、hong是近世音；「父」，pē是古音，hū是近世音4；「輔」，phóo是古音5、hú是近世音。這就是khah新ê「讀冊音」kap khah古早ê「白話音」ê差別，tuì tsia反映出語言ê歷史性。
既然仝一字有無仝語音，是無仝時代ê產物，問題是lán應該按怎來看待「白話音」kap「讀冊音」ê歷史性？Ài運用文獻記載，來揣出古早ê語音，譬如講「土地公」，是按怎無讀做「thóo-tē-kong」，ài讀做「thóo-tī-kong」？因為「土地公」kap「土地」是兩組無仝歷史時代ê用詞，lán m̄是一字一字去讀，是kā當做一組語詞去理解。
Tī東亞地區，漢字音就親像歐洲ê拉丁語仝款，有受著真濟其他民族ê語言影響。譬如「大學」tsit个詞：
逐種語言互相有關連，甚至拼字完全仝款，kan-na發音無仝niā-niā。
Koh譬如「國家」、「動作」tsit兩个詞來講：
Tse就親像台語ê偏泉腔kap偏漳腔，有仝款ê變化規則，lán ē-sái利用規律來對音。
M̄-koh，mā有無受著影響，猶原保存本底家己ê用語--ê。譬如「烏色」tsit个詞：
綜合以上ê例，lán ē-tàng推論講，台語雖然本底有話，但是無一定有漢字。語言是珍貴ê資源，lán ài去保存、研究hōo透。語言發展有伊ê歷史，用詞kap語音lóng有歷史ê變化，語言研究應該以歷史做基礎，來了解語言tī歷史上ê定位。所以講，lán tio̍h-ài運用歷史語言學（Historische Linguistik）ê學理，包括文獻學、比較語音學、文字學……等等，來了解台語；因為台語活tī歷史內底，伊本身mā是有歷史--ê。
- .編按：指基金會。
- .編按：Tsit个詞《教育部臺灣閩南語常用詞辭典》（簡稱教典）用字是「頇顢」。
- .編按：Tsit段所講ê古音就是現代台語ê白話音，khah精確ê講法應該是「uì古音來--ê」。
- 編按：教典用字是「爸（pē）」kap「父（hū）」。
- 編按：教典認為「phóo」tsit音是俗音。
線頂看影片
台語sa攏有 - YouTube 頻道
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報334期，2022年1月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
