台文通訊BONG報

李江却台語文教基金會需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。 ● 線上捐款(定期定額) https://donate.newebpay.com/Period/akhioh/lkk ● 線上捐款(單筆) https://donate.newebpay.com/akhioh/lkk ● 郵政劃撥：19021486 / 戶名：財團法人李江却台語文教基金會 ● 電匯：123-20-050514-2 華南銀行士林分行活儲 / 戶名：財團法人李江却台語文教基金會

顯示具有 陳豐惠 標籤的文章。顯示所有文章

紀念溫柔、堅定ê母語運動者：黃晴美

作者：陳豐惠（李江却台語文教基金會執行長）

二月初聽著晴美姊tī瑞典過身ê消息，雖bóng心肝tiuh-tiuh疼，但是koh有淡薄仔感覺伊tsiânn有「福氣」－除了伊thang脫離幾若年來ê失智以外，聽講過身進前無艱苦偌久；顛倒是對晴美姊ê翁婿Percy－八十幾歲ê藝術家紳士－tsiok oh承擔這个意外ê打擊感覺真毋甘。

大部份了解四二四刺殺蔣經國事件ê有志大概lóng知影晴美姊是參與這个事件ê其中一个，但是應該真少人知影，晴美姊除了是台獨運動ê行動者，mā是溫柔、堅定ê母語運動者。

講晴美姊是溫柔、堅定ê母語運動者，因為伊用溫柔ê聲嗽kā別人講伊對「漢羅合用」台語書寫ê認同，而且雖bóng倚六十歲chiah有機會開始學習台語讀寫，真短ê時間內就親身實踐，認定台語讀寫是台灣人ê本份，家己無行動bē用--得；就算伊已經有嚴重ê失智症頭，這幾冬有機會用skype通話ê時，伊笑笑直直重複teh問--我--ê總--是：「最近台灣ê母語運動啥款（Chòe-kūn Tâi-oân ê bó-gú ūn-tōng sáⁿ-khoán）？」，心心念念--ê 攏是台灣ê母語。

Bē記得是1999年iah 2000年ê時kap晴美姊結緣--ê，伊當初大概是聽黃文雄先生講--ê，一旦有機會轉來到台灣，為beh支持台灣母語運動mā想beh了解相關資訊，就主動kap李江却台語文教基金會連絡，m̄-nā參加活動，koh不時捐款。伊主動講伊讀《台文通訊》、《台文BONG報》雜誌了後，感覺用母語chiah有法度寫家己真實ê想法，就用家己學其他語言ê方法加減試寫台文作品，想beh記錄家族ê故事。

Tī某一擺開講ê時，我邀請伊替《台文BONG報》雜誌「台灣人寫真」專欄寫稿，伊隨就答應，但是希望我一定ài替伊看稿，伊驚家己對台語文用字ê掌握iáu無夠好勢；面對經過chiah-nī濟苦難koh chiah-nī謙卑ê長輩願意用母語寫家己ê家族故事，實在真歡喜，就án-ne開始一篇一篇〈追想四二四事件kap gún tau ê故事〉編輯校對ê過程。

2004年3月份，晴美姊特別配合「台文通訊海內外讀者聯誼活動」調整轉來台灣ê時間，kap加拿大、日本、台灣ê讀者hām《台文通訊》幾若任編輯熱烈交流、開講，我tùi難得ê聯誼活動相片看著目睭光sih-sih、心滿意足ê晴美姊。

晴美姊心思幼膩，溫柔體貼，寫好ê文章lóng ài讀--過koh再讀，感覺有順chiah會放心。可惜〈追想四二四事件kap gún tau ê故事〉寫七pha了後就暫停--ah，晴美姊hit時是講伊認為有寡資料ài koh走揣kap查證chiah ē-tàng繼續寫，後--來mā毋知啥原因lóng無koh寫；實在真遺憾！除了家族故事，晴美姊2002年主動建議beh kā瑞典「囡仔權利公約連線」團體tùi聯合國〈囡仔權利公約〉改寫了後tī國內推動ê內容翻做台文thang刊tī《台文BONG報》，這个系列mā tī雜誌連載幾若期，紀念文集kan-na收錄一篇，若有beh看其他篇--ê歡迎連絡李江却台語文教基金會，hit時ê合訂本有收。

十外冬來有一段時間，晴美姊平均一冬kap藝術家翁婿Percy轉來台灣一擺，若有轉--來，攏會sio-chhōe。Kap樸實ê晴美姊hām藝術家Percy翁仔某做伙是kài特殊ê經驗，晴美姊總--是滿面笑容，台語、瑞典語、英語三款語言隨時切換，看情形做通譯，聽in ê對話，雖bóng真濟內容聽無，m̄-koh我攏感覺chiok享受，因為tī目睭前--ê是一對天使；會記得Percy有泅水ê習慣，koh不時用色筆teh畫圖，m̄-nā送我幾若幅伊ê作品，有一擺koh刁工送我一个伊手工雕刻ê筆架。晴美姊mā bat送我瑞典製ê動物圖杯chū仔kap餐桌chū仔，攏是chiok感心ê同志情誼。印象chiok深--ê是有一擺kap in翁仔某做伙去浸磺水，goán赤身露體ná浸ná笑談（chhiàu-tâm），he是我頭擺無穿泅水衫去浸磺水，但是lóng bē驚kiàn-siàu，顛倒感覺chiok輕鬆自在。事後便若回想著hit時ê情景，攏想講he凡勢就是「天堂」。

幾若十冬bē得轉來台灣ê晴美姊，便若有機會轉--來，一定把握機會sì-kòe行踏，伊生活一向樸實勤儉，但是chiok gâu經營心適ê生活，像講挽路邊ê春仔花piⁿ做花環做粧thāⁿ，ah若上興（hèng）--ê就是買幾支仔滷雞跤沓沓仔chhńg、聊聊仔khòe。

Oān-nā寫，頭殼內koh浮出有溫柔笑面ê晴美姊kap你輕聲細說ê講話聲，siàu念ê話句kéⁿ tī心肝íⁿ仔個外月--ah，一直躊躇beh寫啥khah妥當，想想--leh就寫khah無人知ê你ê另外一條運動跤跡；上尾beh kā你講：我beh koh kā你攬--一-下，感謝--你！晴美姊，期待再相會！

#台文BONG報
#台灣人寫真
#黃晴美
#陳豐惠
#424

歡迎捐款贊助　#李江却台語文教基金會　
（捐款可抵稅，匯款後請通知02-23112199）

線上捐款(定期定額) https://donate.newebpay.com/Period/akhioh/lkk

線上捐款(單筆) https://donate.newebpay.com/akhioh/lkk

郵政劃撥：19021486
戶名：財團法人李江却台語文教基金會

電匯：123-20-050514-2
華南銀行士林分行活儲
戶名：財團法人李江却台語文教基金會

#李江却台語文教基金會需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
-----------------------------------------------------------------------------------------------

天涯‧人間‧晴美：黃晴美紀念文集
作者：黃文雄、鄭自才、黃晴美等
編者：廖宜恩、陳豐惠
ISBN：9789578018426
出版日期：2018.03
#前衛出版社
E-mail：a4791@ms15.hinet.net
服務電話：02-25865708
傳真電話：02-25863758
地址：台北市中山區農安街153號4樓之3
書籍介紹 http://www.avanguard.com.tw/m/2001-1609-799861-1.php

做伙來行台語路

台文通訊30冬線頂讀者聯誼會

2021/7/31 台灣時間拜六暗時10:00-12:19，美東時間早起10:00-12:19

主持：陳豐惠（李江却台語文教基金會執行長）

記錄：吳宛霖

Tsit幾年有愈來愈濟20至40幾歲ê台灣青年，語文意識覺醒，透過學習讀寫，想beh kā家己ê族群語言khioh倒tńg--來，m̄-nā個人無愛koh做「母語ê文盲」，koh積極招厝內人做伙學，甚至tī各人ê領域用逐款方式推動台語iah是台文。Tsit條台語路，看--起-來簡單，實際上充滿鹹酸苦hiam。Lán做伙來聽in ê心聲。

火星樂團guitarist、台語路樂團團長

楊晉淵：

我是來自天龍國ê台語人，細漢時，阮老爸、老母有意識著若無hōo囡仔先學台語，後kái就無機會--ah。我為著囡仔教育報名台語讀寫班，koh有tī YouTube創「台語冷智識」頻道，用台語探討各種主題。尾--à hām囡仔參加台語路親子共學團，mā成立台語路樂團，逐家做伙創作。頭一張囡仔歌專輯按算2021年底開始募資，2022正式發行。未來拍算利用音樂專輯tsiūnn節目宣傳，突破仝溫層。

樂暢親子共學空間負責人

陳育萱:

Tshuā囡仔參加活動ê時，發現台語漸漸beh無--去--ah，所以我想beh uì家己做起，hām囡仔講台語，tsiah發現無台語繪本，所以邀請陳豐惠老師教阮台文，hōo爸爸媽媽tī親子共學空間ē-tàng tshuā囡仔做伙參加活動。希望lán ê台灣囡仔，ē-tàng繼續湠--落-去，tuì台語到台文。

【沃草】網路媒體總編輯、《湯德章》尪仔冊台文版譯者

薛翰駿:

公視台語「台灣新眼界」當初想beh做台語版ê「有話好說」，我tī現場落台語標題，用詞學問有影深，佳哉有陳豐惠老師thang問。介紹逐家一本好冊《新編華台語對照典》，tsit本冊對我幫助真大。做《湯德章》尪仔冊台文翻譯，翻譯ê重點是，當時ê講法ài問序大，mā有請鄭順聰老師tàu-sann-kāng，出版無偌久就三刷，尾--à出版社tsiah敢出台文作品。

「牽囡仔ê手，行台語ê路」幹部

許雅茹:

是按怎行tsiūnn台語路? 一陣單純kap囡仔講母語ê爸母無細膩liâu--落-去。Kā囡仔揣伴，做伙講台語。利用共學ê時tsūn，大人做伙學台文，學習ê過程中，囡仔ná聽ná看，對囡仔是真好ê模範。透過文章、影片、分享會，siânn人來行台語路，為打造台語友善環境拍拚。

台灣師範大學台灣語文學系、靜宜大學台灣文學系兼任助理教授

石牧民:

對語言ê覺醒就是表達認同，lán拄著家己bē-hiáu ê語言、tī社會上無強勢ê語言，頭一个想--著ê代誌應該是去聽看māi、學看māi。我tsit-má tī大學教台語，beh hōo我ê學生有一个概念，想著台語ê時，是快樂ê記持、是開放ê記持。大部份戲劇一定有劇本，用台語寫劇本ê時tsūn，leh想按怎寫khah suí-khuì、hōo對話內容對聽ê眾人有意義，tse就是文學，án-ne就是沓沓仔發展台語文學。Kā台語囥tī戲劇，hōo社會愈來愈濟人講台語。

#台文通訊30歲 專欄，本文使用教育部推薦漢字kap臺灣閩南語羅馬字拼音方案。

台文通訊BONG報333期，2021年12月出刊。

歡迎捐款贊助　#李江却台語文教基金會　

（捐款可抵稅，匯款後請通知02-23112199）

線上捐款(定期定額) https://donate.newebpay.com/Period/akhioh/lkk

線上捐款(單筆) https://donate.newebpay.com/akhioh/lkk

郵政劃撥：19021486
戶名：財團法人李江却台語文教基金會

電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。

新時代ê婚禮儀式

作者：林佳怡、陳豐惠

今仔日真歡喜有tsit个機會來主持新創ê婚禮儀式：

Tsit-má請兩位新人kha-tsiah-phiann對kha-tsiah-phiann～～

「雙人徛平kuân，婚姻有平權（pîng-kuân）」

婚姻內底，兩个人ê權利是平等--ê，ài互相尊重、互相疼惜。

Tsit-má請兩位新人，面ǹg頭前，牽～手～

「牽手牽tiâu-tiâu，頭家兼家後」

Tsit-má請兩位新人，面～對～面～

「正手做家內（ke-lāi/ka-lāi），倒手做翁婿」

疼是無怨妒、無phín-phóng，無行見笑ê事，無快受氣；

疼是無歡喜不義，疼是kap真理sann-kap歡喜。

今仔日tī tsia有爸母序大、有親tsiânn好朋友，逐家來做干證：

佳怡、韻如知sann疼

手牽牽手鬥陣行

人生路途起落崎

互相纏tuè lóng免驚

境遇難免有憂愁

拄搪挑戰sann顧守

佳怡、韻如做牽手

Sio伴sio-thīn到永久

#台語應用文專欄，本文使用教育部推薦漢字kap臺灣閩南語羅馬字拼音方案。

台文通訊BONG報308期，2019年11月出刊。

--------------------------------------------

歡迎捐款贊助　李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

做伙來讀台語繪本

主講／陳豐惠

記錄／田永承

李江却台語文教基金會tī 1997年創立到tann，出盡心血tshui-sak台語文。除了通人知ê《台文通訊BONG報》，koh有1998年就創辦、鼓勵創作優質台文詩、小說、劇本ê阿却賞。阿却賞ê獎勵初初m̄是針對繪本，因為tsit-má有愈來愈濟有母語意識ê家庭，親像台語親子共學團，ǹg望囡仔ē-tàng有一个全台語ê環境。M̄-koh少年爸母家己ê母語能力無才調經營，少年爸母若beh hōo囡仔學母語顛倒koh ài拜託in ê爸母kap家己ê孫講母語。市面上koh無夠額ê台文繪本thang輔助hōo囡仔浸tī母語內底，為著滿足母語家庭ê需求，tsiah tī 2015年增加繪本創作ê項目，kā社會大眾徵求好故事。Mā希望透過出類koh趣味ê繪本，hōo大人、囡仔lóng對台語文作品有趣味。

繼續讀 » » »

《台文通訊》30週年慶祝會ONLINE

2021/7/3 拜六

暗時10:00-12:46

主持人／張秀滿（《台文通訊》第97～118期總編輯）

陳豐惠（李江却台語文教基金會執行長）

重點記錄／吳宛霖

1991年7月初1《台文通訊》第1期創刊，開創一條新時代ê台語路，tsit條台語路按海外拚到國內，tī 2012年kap《台文BONG報》合刊，tsiânn做《台文通訊BONG報》，到tann 2021年7--月也已經滿30冬--looh。因為防疫緣故，透過網路，tī線頂來慶祝。2021年7月初3拜六暗，愈uànn愈ka-ia̍h，有超過260个參與者，有按30年前拍拚到tann ê開路先鋒、有各行各業一直關心台語文未來運命ê事工支持者，mā有少年輩，慶祝會先按東方白ê詩歌〈上媠ê花〉來起鼓，連結海內外台灣人共同保守lán母語上suí ê花。

林皙陽（美國Long Island教會牧師、李江却台語文教基金會創會董事長）：

30年前《台文通訊》創刊受壓制，有一陣疼台灣、疼台語ê同志tàu牽成，看見濟濟人行--出-來，有人出錢、有人出力，做伙圖謀台語文ê事工。30年後，看著濟濟台文作家，ǹg望台語進步、koh-khah有前途。

鄭良光（《台文通訊》第1～50期總編輯）：

30年前《台文通訊》tī洛杉磯創刊，想bē到薄薄八頁半ê地下式刊物，到tann tsiânn做歷史上長、發行量上大ê台文刊物；看著tsiah濟少年人參加，相信lán台語文化香火有機會傳--落-去。Lán所做--ê m̄-nā是傳承台語文化，mā是beh講一段台灣人m̄知ê故事。

林昶佐（立法委員）

——台語家庭ê酸甜苦hiam：

為啥mi̍h我beh培養台語家庭？我是阮阿媽tshuā大漢--ê，對語言有特別ê感情，語言m̄-nā是對國家ê認同，mā是對厝內人、親情ê認同，我beh kā tsit種認同感hōo我ê序細感受--著。規家伙做伙學一項代誌是tsiok心適--ê，增加翁仔某之間ê趣味，開創kap囡仔之間ê互動，是一个真珍惜ê緣份。

吳景裕（筆名陳雷，台灣文學作家）：

30年前有一寡人看台文漸漸無--去，出版台文雜誌救台語。《台文通訊》是語言ê運動，感謝濟濟少年人ê加入，lín是台語kap台灣文化ê希望。

賴咏華（【足英台三聲道磅米芳】YouTuber）

——網路自媒體時代ê語文運動：

Tī台灣，對30歲以下ê少年輩來講，台語bē輸是外國話，是一个聽無ê語言，想beh用媒體做趣味ê內容來sak台語，效果只有1%到2%。勉勵逐家ài過幸福快樂ê日子，tse kap做台語運動是平重要ê代誌。

張復聚（台灣羅馬字協會理事長）：

蔡英文總統認同lán做ê台語文母語運動，連續三冬寫三張公開批kā lán祝福。感謝周清玉縣長、姚嘉文資政tī總統府tàu-sann-kāng。

周清玉（台灣母語聯盟理事長）：

台語文ē-tàng傳--落-來，是濟濟人ê覺醒kap加入。彰化台語文化園區是台灣目前唯一ê台語文園區，tse是屬於眾人--ê，請逐家做伙管教、做伙規劃、做伙推動，希望ē-tàng發揮koh-khah大ê功效。多謝前輩一路來ê努力，拜託逐家ē-tàng連結--ê ài連結tiâu--leh，有團結，lán ê目的tsiah ē成。

陳柏惟（立法委員）

——體制外到體制內ê台語文運動：

Tī台灣電影歷史上票房前十名--ê，有七齣是使用多元ê本土語言。台語是tsiok浪漫ê聲音，我對台語文有革命、復興ê情感，夢想是創造一个流行hōo逐家來tuè。若是你有想法、對台語體制有期待，歡迎透過lán ê辦公室來集合力量，集合眾人ê智慧，一代一代湠--落-去，繼續做台語文khang-khuè。

蔣為文（成功大學台灣文學系系主任）：

1991年《台文通訊》以母語ê文化運動做起，m̄是kan-na發行紙本刊物，上重要--ê是帶動草根組織。《台文通訊》發行無偌久，全台灣開始組台文寫作會，鼓勵各地區讀友聯誼會。Tsit幾年《台文通訊BONG報》kap台灣羅馬字協會結合，有時代性ê意義。19世紀尾用白話字創造台灣文學，tse比中國五四運動早30幾冬。歷史傳統ài傳承--落-去，感謝30冬來陸續參與ê編輯kap讀者tàu-sann-kāng。

何信翰（台中教育大學台灣語文學系副教授）：

Hōo人印象上深ê兩份報紙雜誌，第一个是《Tâi-oân-hú-siâⁿ Kàu-hōe-pò》（台灣府城教會報），就是《Kàu-hōe Kong-pò》（教會公報），百外冬前就用台語leh討論醫學、科學，各種議題。第二个是《台文通訊》，伊m̄是一本純文學ê雜誌，有討論醫學、台灣地名、台語beh按怎書寫、科學、智識，議題多元，hōo台語m̄-nā講日常、講文學，台語路ē愈來愈闊。

吳宗信（陽明交通大學機械工程學系教授，2021年8--月起接任國家太空中心主任）：

感謝30冬來台語文有志辛苦維持到tsit-má，逐家繼續拍拚。

紀品志（《台文通訊30冬紀念特刊》文字編輯）：

《台文通訊》用台語文結連海內外ê台灣人，是濟濟ê文學作家、文史工作者、社會運動者、語文學習者交流ê論壇，到tann iáu是真重要ê平台。《台文通訊》tsit份雜誌累積真濟文獻，hōo lán真寶貴ê資源，mā為台灣語言運動做見證。

鄭良光（《台文通訊》創辦人、第1期～50期總編輯）

有一寡少年人提出講海外ê老一輩應該kā台灣語文運動歷史寫--落-來，所以有《台文通訊30冬紀念特刊》ê想法。舊年吳家銘（吳蝦米）自願執行，tsit段時間看in真拍拚，中間mā有開設《台文通訊》線頂讀者聯誼會。時間原訂是點半鐘，in lóng繼續留--落-來，講到台灣時間半暝1、2點。我心內真感動，感覺台灣少年人m̄肯放棄。台語文化是眾人--ê，鼓舞逐家募資贊助。

吳景裕（筆名陳雷，台灣文學作家）：

若是beh了解台語文危機ê人，tsit本30冬紀念特刊bē輸百科全書。至少有40幾位志工，大部份是少年志工，tàu做數位化編輯，來網頂贊助算是光榮。

A-koan（【落/làu台語-瑞士ê台語】社長）：

台文通訊30冬！M̄知偌濟人拍拚、堅持，tsiah ē-sái行到tsín。Ǹg望30冬後ē-tàng koh再來慶祝。到時tsūn台灣ē變啥款？將近20種本土話kám ē真正平等？多元語言文化kám有thang lóng koh活跳跳？

Sandy（法國台灣協會會長）：

講台語kap學其他語言仝款，面皮ài厚，tiānn-tiānn講，放棄就輸--ah。

吳易蓁（『夾腳拖』劇團團長兼導演）：

用台語講故事hōo囡仔聽，bē-tàng kā囡仔當做囡仔，ài kap伊互動，用陪伴囡仔ê方式辦活動。

陳育萱（樂暢親子共學空間負責人）：

我ê台語老師是陳豐惠老師，我踮伊ê身--上感受著推動台語ê熱情。「台文」m̄-nā是學台文，mā是學台灣ê文化，我希望kā tsit个文化、歷史教hōo囡仔，kā tsit个對台灣ê愛傳--落-去。

許雅茹（【牽囡仔ê手行台語ê路】幹部）：

感謝《台文通訊》tī困苦ê台語環境堅持30冬，tsiânn做台灣人ê精神糧草，tse是一件無簡單ê代誌。阮是一陣kap囡仔講台語ê爸母，ǹg望台語生湠，為打造台語友善環境拍拚。第一步，透過面冊、文章、影片、經驗分享會huah醒意識。第二步，辦講古培訓、家長學堂，hōo家長增加能力，tsiah有法度堅持行--落-去。第三步，透過台語活動體驗、Podcast做文化串連。Tsit-má有台語家庭意識ê人愈來愈濟，相信未來ē愈來愈好。

楊晉淵（【台語冷智識】YouTuber）：

目前leh製作囡仔歌專輯，ē-sái tsiūnn「牽囡仔的手，來聽囡仔古」Podcast試聽，透過專輯kā台語家庭理念傳hōo koh-khah濟人知。

薛翰駿（【沃草】網路媒體總編輯）：

參加台文讀寫班了後，koh參加邱文錫老師ê讀冊會，愈學愈趣味，自án-ne來做相關tshui-sak ê khang-khuè，譬如做尪仔冊《臺灣名人傳記漫畫：湯德章》，希望thang kā台語文變做主流ê議題。

-----------------------------------------------------

#台文通訊30歲專欄。

台文通訊BONG報328期，2021年7月出刊。

歡迎捐款贊助　#李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

有固定的長期捐款，讓更多的台語文相關計畫可以穩定的推行，感謝逐家。

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

《台文通訊》30冬紀念獎頒獎典禮第二場簡要記錄

主持／周佳穎

記錄／吳宛霖

2021/11/6 台灣時間拜六暗22：00~24：00

主辦／陳文成博士紀念基金會

承辦／世界台灣文化論壇

贊助／台語文化大使命基金

台文通訊30冬紀念獎頒獎典禮 (第一場) https://youtu.be/d5JTY2a5-e4

台文通訊30冬紀念獎頒獎典禮 (第二場) https://youtu.be/hpsiG5NmBy8

主辦單位致詞 :

美國陳文成教授紀念基金會

劉斌碩理事長

台灣連續hōo人殖民ê過去kap tsit-má快速全球化ê過程中，過去in透過強烈ê教育、媒體等手段，消滅台灣原本多元ê語言，台灣ê語言運動特別重要。恭喜tio̍h獎人，感謝lín久長為台灣語言運動所做、無私ê奉獻kap貢獻。

主題演講：

台灣基進為何用台語論政

基進黨

陳奕齊主席

Lán鼓勵少年家用台語、家己ê母語來發言、表達思想。2009年，我坐高雄捷運發覺揣無用台語交談ê高中生。台灣民主化過程中，台灣主體性明確，m̄-koh台語tsit个語言suah大量流失，文化意識型態受早期中國國民黨教育打壓kap對台語ê歧視。2013年，基進揣一寡少年世代tńg來關心台灣政治，除了挑戰政治制度，上重要--ê就是文化kap大中國意識型態ê挑戰，所以基進堅持用台語問政，未來是tī tsit个世代ê少年家身--上，希望母語ê使用ē-tàng愈來愈普遍。

贊助單位致詞:

台語文化大使命基金

鄭良光

陳文成教授紀念基金會頒tsit个獎是真好ê開始，華語霸權已經生根tī台灣社會，普遍認同華語ê正當性，lán beh建立台灣主體性國家，需要有主體性ê台灣文化，uì草根ê台語運動做起。感謝我ê牽手，長期對我推動台語事工ê支持，感謝我ê後生不時提醒我hām阮孫ài講台語，感謝我ê二哥、二嫂啟明我ê台灣意識。

主題演講：

Tuì猶太人ê文化認同、建國來思考重建台灣人文化認同到建國ê可能性

台南神學院

王崇堯前院長

猶太人ê認同是tuì每一工開始，in kap上帝立約，是守節禮ê民族，in每一工ài祈禱三擺，提醒家己是猶太人，拜五暗kā囡仔講猶太人ê故事，拜六早起去會堂kap猶太人做伙講猶太人ê故事，起造家庭kap社區對家己ê認同。In 9--月快樂過新年ê時，ài講起亡國ê痛苦，in ê成年禮俗ài知影做一个猶太人ê意義kap責任，上要緊--ê是ē-hiáu用家己ê母語讀家己ê律法，做一个猶太人，感覺是榮耀，tse是猶太人對歷史ê認同kap意識。就算是亡國，猶原是逐日、逐禮拜、過節ê時講家己ê語言，所以母語就ē-tàng保存；1984年復國ê時，語言真緊就恢復。台灣人若真正beh出頭天，建立家己ê國家，ài用家己ê語言講lán ê故事，ài有tsit款決心。所有宗教禮儀就是一種remider，提醒你ài講啥mih話、講啥mih故事、做啥mih款ê代誌，ē-tàng一代傳hōo一代。真正有價值ê代誌，無法度tī lán一生中完成，所以一定ài保持ǹg望，來得著心安。

專業人士貢獻獎

吳宗信

Ǹg望tī lán社會有影響力ê人士盡量tī政治、文化、科技、藝術、運動等重要ê場合，用母語iah是台語傳播專業ê智識，表現台語ê完整兼水準，透過展現，影響有資源分配政治權ê政治人物kap台灣未來有前途ê少年家。感謝無私啟蒙我ê濟濟前輩kap朋友，無in ê牽領就無tsit-má我對台灣ê堅持。

台語文教育獎

蔣為文

感謝世界台灣文化論壇、陳文成教授紀念基金會，感謝進前tī美國讀冊時，德州濟濟ê同鄉對我做台語文、台越比較研究ê支持，感謝成大台灣語文測驗中心所有助理團隊長久以來做伙拍拚tshui-sak台語文，感謝阿兄一直kā我支持。

弱勢文化關懷獎

鄭雅怡

Tsiânn榮幸得著tsit个獎，kan-na建議請求以後類似ê頒獎名額ke hōo查某人一寡機會，多謝。

社區服務獎

陳豐惠

感謝主辦單位，感謝家族序大背後ê支持，感謝李江却台語文教基金會一路ê同工、捐款者、有志、志工ê鼓勵kap支持，感謝逐家做伙拍拚。

草根運動獎

陳明仁

感謝朋友久年來ê拍拚，感謝蔡有全傳道教我白話字hōo我行台語文ê路途，感謝教會公報社hōo我用白話字發表寫作，感謝《台文通訊》、《台文BONG報》，若無tsia-ê發表平台，我無法度出台語文作品，感謝濟濟朋友hōo我sì-kè走揣文學ê人生，鼓勵逐家用台語文書寫，創作、欣賞台語文。

資訊工程服務獎

楊允言

希望有koh-khah濟少年人ē-tàng開發出koh-khah好ê系統，hōo逐家方便使用台文，感謝主辦單位，多謝。

科技運用獎

吳家銘

感謝主辦單位、陳文成教授紀念基金會，鼓舞koh-khah濟少年朋友參與台語文事工。

謝詞：

《台文通訊》主筆

陳雷

感謝過去所有關心台語、為台語拍拚ê每一个人，台灣台語ê生態，一方面政府有真濟資源，但是對台語ê政策無積極；另一方面，lán民間有真大ê力量leh tshui-sak、拍拚，m̄-koh欠資源也無決策ê權力。台語tsit條路變做長短跤行bē緊，過去30冬，台語tshui-sak，靠民間ê動力做火車母，政府tuè tī後面行，總--是台語面對滅絕ê危機。30冬典禮凸顯民間ê精神，tsit七位hōo人尊敬ê tio̍h獎人，in除了kap《台文通訊》有共同ê因緣以外，iáu有sio仝ê所在，in lóng是拍頭陣運動ê人，長期ê奉獻kap貢獻是台灣精神ê示範。多謝陳前總統水扁接受邀請，可惜臨時有代誌無法度參與。感謝主辦單位：美國陳文成教授紀念基金會、贊助單位：台語文化大使命基金、承辦單位：世界台灣文化論壇。多謝前文化部長鄭麗君支持台語、語言平等，多謝基進黨用行動支持台語kap母語。多謝王崇堯院長kā lán分拆猶太人ê文化認同、建國，hōo lán思考suà--落-來beh行ê路。多謝阿勇第一場ê演講，分拆台語ê危機kap救台語ê思考。

台灣行入民主艱難ê過程中，lán得著民主，但是失去文化，lán得著投票選舉，但是lán拍m̄見先民所累積--落-來寶貴ê文化遺產，甚至lán ê語言。文化雖然無法度決定lán beh做佗一國ê人，但是，文化ē-tàng決定你beh做佗一款ê人。Lán思考ê方法、內容、做人ê價值lóng受著文化ê影響，tī衝突無和平ê世界，文化是認同kap認知ê基礎，伊tsiânn做國家安全ê基本條件。所以lán一定ài計較文化，改變文化hōo人殖民、消滅ê地位。台灣話ē-sái到ê所在，台灣文化就ē-tàng活--起-來，kā lán ê語言帶入去社會內底，m̄是kan-na做表演、展覽，ài kā台語變做lán生活ê語言。

#台文通訊30歲 專欄，本文使用教育部推薦漢字kap臺灣閩南語羅馬字拼音方案。

#台文通訊BONG報 335期，2022年2月出刊。