主講／陳育萱
記錄／吳玉祥
配合國際婦女節，基金會邀請爆發力十足ê少年女性陳育萱來分享伊所做ê代誌。育萱是舊年（2021）阿却賞繪本組tio̍h獎人之一，陳豐惠老師hām伊熟sāi tsiah一冬，m̄-koh講著熟sāi ê過程實在是真感動——育萱除了照顧囡仔以外，伊mā想beh營造一个親子共學友善ê空間，thang kā家己ê故鄉「台北」介紹hōo koh-khah濟人認bat；伊ê台北腔、台北ê人文、宗教、民情……等等，hōo眾人ē得透過活動來認bat台北，進一步愛台北，相對khòng大到愛台灣。
育萱m̄-nā是樂暢親子共學空間ê頭家，伊koh是一个五歲囡仔ê老母，伊特別強調伊上要緊--ê是伊做一个老母ê身份。親子共學就是一陣有心ê家長，in想beh參與課程ê設計，家己揣老師來教囡仔、學mi̍h件，in逐家sio-kīng做伙，講師費kap場地費kong-ke pun-phenn。為án-ne，陳育萱就liâu落去創立共學空間，hōo眾人籌辦囡仔大人lóng ē-tàng做陣參加ê活動hām課程，無論是用台語戶外導覽iah是室內台語文ê教學。Tsia-ê活動m̄-nā是學讀寫，koh ē-tàng hōo逐家交朋友，熟sāi囡仔伴，對台語家庭來講有真大ê幫贊。
育萱ê阿母自細漢就kā伊講：「Lán m̄-thang hām別人無仝。」Tse是in老母保護伊ê方式，m̄-koh伊認為每一个人lóng是獨一無二--ê。伊有身ê過程m̄是真順利，經歷過生囝、顧囡仔……；伊感覺所謂女性ê力量是指了解家庭kap家己ê需要，做出有意義ê決策kap選擇，m̄免活tī別人ê期待，ài享受性命、疼家己，先照顧家己tsiah有法度照顧別人。
樂暢已經成立三年--ah，三年內mā bat有人走來質疑，認為in辦台語活動有政治立場iah是有啥mih企圖。育萱講，伊只是單純beh hōo囡仔認bat tsit塊土地，知影家己是啥mih人。尤其是tng伊有機會聽人用台語導覽黃土水ê雕刻作品〈甘露水〉了後，hōo伊ê內心深深感受--著：「我就是台灣人，我出世tī台北，我對tsit塊土地有感情是生成--ê，我m̄甘語言無--去，所以我beh hām囡仔用台語生活，án-ne囡仔對tsit个語言就ē有感情。」五歲ê後生mā主動要求beh學台語ê讀寫。Tse hōo伊真感動，因為序大人所做ê代誌，囡仔lóng有leh看、lóng有leh觀察。無一个人ē-tàng改變另外一个人，若是tsit个人beh改變，就是伊家己beh改變。Lán ài先有自我智覺tsiah ē想beh來改變，透過調整來達到平衡，用「完整」代替「完美」。
拄開始講台語，育萱心肝內mā是ē驚驚，驚講了無標準，m̄-koh伊認為若是掠著重點，知影beh行啥mih路，就ē愈行愈有自信，家己做ê代誌就真有意義。雖然三年來無啥趁錢，m̄-koh iáu是有寡好代誌leh生湠，譬如講，有人開始關心台語，問伊beh按怎使用台語辭典，hōo伊感覺有幫助著需要ê人，tsit條路行了有價值。
線頂看影片
台語sa攏有 - YouTube 頻道
