Chiúⁿ Ji̍t Êng
台語tī獨尊華語ê政府主導下，hông拍做「方言」，方言相對「國語」是khah低級，tī威權殘餘型ê官員心目中，母語是kan-taⁿ tī厝--nì用--ê，連台灣人mā hông教育kah家己ē棄嫌。Tse到底是語言無水準？Ia̍h是人有問題？Lán tsit-má比對英語ê發展就知。
早期海上交通khah困難，所以海島ê發展是比大陸khah慢。Tī 1380年代以前，海島國家ê英國，in ê語言是hông看做粗魯不雅--ê，使用ê 聖經是用拉丁文寫，無幾个人看有。拉丁文tī hit當時是貴族語言，kan-taⁿ少數讀過冊ê 人bat。Tsia-ê情形lán kám有感覺kap台灣仝款，母語hông看做粗魯不雅，漢字像拉丁文，是貴族語言，kan-taⁿ少數讀過冊ê 人bat。1380年改變開始--ah！
1380年，歐洲宗教改革ê先行者John Wycliffe（1330年－1384年），kā聖經翻譯做中古英文，iáu無kài好看，m̄-koh已經指出正確ê路，就是用家己ê母語寫聖經。十六世紀出名ê 基督教學者William Tyndale（1494年－1536年）主張應該hō͘普通老百姓lóng ē-tàng透過讀聖經來認bat神，決心kā聖經翻譯做英文。Tī hit个時代，羅馬天主教教廷kan-taⁿ允准拉丁文聖經，而且kan-taⁿ神職人員ē-sái有解說權。當時一般民間普遍有一个觀念，認為英語是無水準ê 語言，kan-taⁿ法語、拉丁語tsiah是有水準、高尚ê語文，所致，民間高尚ê人beh講話就講法語；beh讀書就讀拉丁文ê作品。
Tyndale是第一个kā聖經翻譯做現代英語ê人，1560年tī Genève出版。後--來出名ê 欽定版聖經有百分九十採用伊ê 譯本。欽定版聖經是1604年英國國王James一世下令，beh用當時英國人通俗ê 語文將聖經翻譯--出-來tsiah有--ê。In集合四十七位聖經學者、專家，用七年ê 時間，tī 1611年完成出版，英文全名King James Version of the Bible，簡稱做「KJV」。因為KJV是用一般人lóng看bat ê 英文翻譯，所以一般民眾感覺親切，koh歡喜in ē-tàng用家己ê 語文讀聖經。
自從tsit本「欽定本」英文聖經出版了後，英國人發現原來「上帝也ē講英語」。Tsit種發現改變英國人長期自卑ê 心理，koh愈來愈肯定家己ê 國家。也因為án-ne，以後濟濟英文ê 聖經版本，就根據tsit个英文版本聖經重修訂。真濟出名ê文學作品mā因為欽定本聖經ê啟發sio連suà出版，像John Bunyan寫ê 《天路歷程》、約John Milton寫ê《失樂園》等等lóng tsiâⁿ做世界名作。Tsit-má英語是全世界上強勢ê語言。
M̄知算好運ia̍h歹運，lán無行過tsit个過程，外國宣教師替lán tshuân好好，koh將羅馬字兩擺送來到厝，kám ē是án-ne，lán suah m̄-bat寶，無顧hō͘好，據在壓霸ê漢文化thún踏。拄好應hit句話：「天下無hit號無料ê中晝頓」，平平是hông看輕ê語言，英國人用家己ê文字提升書寫能力，兼提升民族意識，hō͘國家變強，文學mā行tsiūⁿ世界。Lán兩擺羅馬字來，lóng受漢文化壓迫。第一擺，荷蘭宣教師替Siraya話創設ê羅馬字，平埔人bat用來寫「新港文書」，m̄-koh已經tī十九世紀初期消失。Koh一擺是十九世紀中期來ê白話字，suah hông關tī教會，mā漸漸hō͘漢字取代。
上帝m̄-tāⁿ ē-hiáu講英語，mā ē-hiáu 講台語。M̄-koh英國人發現「上帝也ē講英語」ê 時，in改變長期自卑ê 心理，英文漸漸tsiâⁿ做世界通用ê語言，啊lán suah枉費十九世紀教會ê 宣教師替lán用白話字寫ê聖經，m̄-tāⁿ無像英國人肯定家己，創造家己 ê文學，顛倒迷戀漢字，白話字suah hō͘漢文化khàm--過。Tsit-má華語已經逼殺來tī教會內底，白話字kap台語m̄知iáu有偌久thang活？
我用「逼殺」tsit兩字並無過份。台灣人無愛用強烈ê語詞，外來者suah無teh客氣，用滅絕ê手段對--lán。支持華語ê人ē講：「心胸放hō͘闊，容納無仝ê語言。」無好好仔去想ê人lóng感覺有理，甚至號做顧母語ê人mā認同。In無注意著，tī獨尊華語ê政策下跤，華語已經變做「異形」，ē吞食其他ê母語。獨尊華語hō͘母語變做無路用ê語言，所以社會氣氛是華語一定ài學，母語bē-hiáu無要緊。台灣人hông教ài文雅，khah無拚tù ê氣魄，母語hông壓迫mā當做應該，自然母語能力下降。若hō͘信徒家己揀，母語能力無好ê情形下，ē khah愛揀用華語做禮拜。所以終其尾母語就是消失。
Beh解決獨尊華語ê現象，ài早日實施「語言平等法」，hō͘各種語言tī平等ê地位，互相尊重，和諧鬥陣。Tī獨尊華語ê現象解除進前，因為華語已經形成唯一「逐家聽有ê話」，台灣人ē好意beh講「逐家聽有ê話」，suah顛倒變做幫贊華語刣死母語ê hó͘仔。所以「逐家聽有ê話」bē輸一句刣死母語ê魔咒。
Lán無愛「異形」、lán無愛「魔咒」，lán愛實施「語言平等法」，互相尊重，和諧鬥陣。Hia -ê堅持獨尊華語ê人，kám有beh kap台灣人和諧鬥陣？
